Isahluko 5

Ukuzalwa KukaYesu—Phi Yaye Nini?

UMLAWULI woBukhosi baseRoma, uKesare Awugusto, uwise umthetho wokuba elowo nalowo umele abuyele kwisixeko awazalelwa kuso ukuze abhaliswe. Ngoko uYosefu uthabatha uhambo oluya kwindawo awazalelwa kuyo, isixeko saseBhetelehem.

Kukho abantu abaninzi eBhetelehem abeze kubhalisa, yaye ekuphela kwendawo yokuhlala uYosefu noMariya abanokuyifumana sisitali. UYesu uzalelwa kule ndawo, apho kugcinwe khona amaesile nezinye izilwanyana. UMariya umsongela eziqhiyeni aze amngqengqise emkhumbini, indawo ekugalelwa kuyo ukutya kwezilwanyana.

Ngokuqinisekileyo yayilulwalathiso lukaThixo ukuba uKesare Awugusto awise umthetho wakhe wokubhalisa. Oku kwabangela ukuba uYesu azalelwe eBhetelehem, isixeko iZibhalo ezasixela kwasendulo ukuba sasiya kuba yindawo awayeya kuzalelwa kuyo umlawuli othenjisiweyo.

Hayi indlela obubaluleke ngayo obu busuku! Ezindle phayaa kubonakala ukukhanya okuqaqambileyo kwiqela labalusi. Bubuqaqawuli bukaYehova! Yaye isithunywa sezulu sikaYehova sibaxelela oku: “Musani ukoyika; kuba, yabonani, ndinishumayeza iindaba ezilungileyo zovuyo olukhulu, oluya kuba kubo bonke abantu; ngokuba nizalelwe namhlanje emzini kaDavide uMsindisi, onguKristu iNkosi. Nantsi ke into eyoba ngumqondiso kuni: nofumana lusana lusongelweyo eziqhiyeni, lulele emkhumbini wesitali.” Ngequbuliso kuvela izithunywa zezulu ezingakumbi zize zivume zisithi, “Uzuko kuThixo enyangweni, uxolo emhlabeni, inkolelo ebantwini.”

Xa zisimka izithunywa, abalusi bathi omnye komnye: “Masesihamba sisiya eBhetelehem apho, siyibone le nto ihlileyo, esiyazisiweyo yiNkosi.” Bahamba ngobungxamo baze bamfumane uYesu kanye apho isithunywa sezulu sithe baya kumfumana khona. Xa abalusi bebalisa oko bakuxelelwe sisithunywa sezulu, bonke abakuvayo oko bayamangaliswa. UMariya uyawagcina onke la mazwi ewaguquguqula entliziyweni yakhe.

Abantu abaninzi namhlanje bakholelwa kwelokuba uYesu wazalwa ngoDisemba 25. Kodwa uDisemba lixesha elineemvula nelibandayo eBhetelehem. Abalusi babengenakuba sezindle ebusuku nemihlambi yabo ngelo xesha lonyaka. Kwakhona, uKesare waseRoma wayengenakufane amisele ukuba abantu ababesele betyekele ekumvukeleni bathabathe olo hambo kubusika obunengqele eqhaqhazelis’ amazinyo ukuya kubhalisa. Ngokucacileyo uYesu wazalwa ngaxa lithile ekuqaleni kokwindla kwaloo nyaka. Luka 2:1-20; Mika 5:2.

▪ Sisiphi isizathu esibangela ukuba uYosefu noMariya bathabathe uhambo oluya eBhetelehem?

▪ Yintoni emangalisayo eyenzeka ngobusuku bokuzalwa kukaYesu?

▪ Sazi njani ukuba uYesu akazange azalwe ngoDisemba 25?