Isahluko 23
Imimangaliso Engakumbi EKapernahum
NGESABATHA emva kokubiza kukaYesu abafundi bakhe abane bokuqala—uPetros, uAndreya, uYakobi noYohane—bonke baya kwindlu yesikhungu yasekuhlaleni eKapernahum. Apho uYesu uqalisa ukufundisa, yaye abantu bayakhwankqiswa kuba ubafundisa njengonegunya yaye kungekhona njengababhali.
Ngale Sabatha kukho umntu ophethwe ziidemon. Emva kwethutyana, ukhwaza ngelizwi elikhulu esithi: “Yini na enathi nawe, Yesu waseNazarete? Uze kusitshabalalisa na? Ndiyakwazi wena, lowo unguye; ungoyiNgcwele kaThixo.”
Idemon elawula lo mntu ngokwenene isesinye sezithunywa zikaSathana. Eyikhalimela le demon, uYesu uthi: “Yithi tu, uphume kuye.”
Ngoko, idemon ibangela lo mntu ukuba axhuzule ize ikhwaze ngezwi elikhulu. Kodwa iyaphuma kulo mntu ingamenzakalisanga. Wonk’ ubani uyakhwankqiswa! Bayabuza besithi: “Yintoni na le nto?” “Noomoya abangcolileyo aba abathethela ngegunya, bamlulamele.” Iindaba ezingoku zisasazeka kuwo wonke ummandla okufutshane.
Eshiya indlu yesikhungu, uYesu nabafundi bakhe baya kwikhaya likaSimon, okanye uPetros. Apho umkhwekazi kaPetros ugula gqitha uphethwe yicesina. ‘Khawumncede,’ bayamcela. Ngoko uYesu uya kuye, ambambe ngesandla, aze amphakamise. Kwangoko uyaphiliswa aze aqalise ukubalungiselela isidlo!
Kamva, xa ilanga sele litshonile, abantu abaphuma kuzo zonk’ iindawo baqalisa ukuza endlwini kaPetros besiza nabagulayo babo. Kungekudala sonke isixeko sihlanganisene ndawonye emnyango! Yaye uYesu uyabaphilisa bonke abagulayo babo, kungakhathaliseki ukuba baphethwe zizifo zini na. Ude akhulule nabaphethwe ziidemon. Njengoko ziphuma, iidemon azikhuphayo ziyakhwaza zisithi: “Wena unguye uKristu, uNyana kaThixo.” Kodwa uYesu uyazikhalimela yaye akazivumeli ukuba zithethe kuba ziyamazi ukuba unguKristu. Marko 1:21-34; Luka 4:31-41; Mateyu 8:14-17.
▪ Kwenzeka ntoni kwindlu yesikhungu ngeSabatha emva kokubiza kukaYesu abafundi bakhe abane?
▪ Xa eshiya indlu yesikhungu uYesu uya phi, yaye nguwuphi ummangaliso awenzayo apho?
▪ Kwenzeka ntoni kamva kwangaloo ngokuhlwa?