Isahluko 44

Uzolisa Uqhwithela Oloyikekayo

IMINI yonke uYesu ubexakekile, kuquka ukufundisa izihlwele elunxwemeni nokuba kamva acacisele abafundi bakhe imizekeliso ngasese. Xa kusihlwa, uthi: “Masiwele siye ngaphesheya.”

Ngaphesheya konxweme olungasempuma loLwandle lwaseGalili kukho ummandla obizwa ngokuba yiDekapoli, ngokuphuma kwigama lesiGrike elithi deʹka, elithetha “ishumi,” nelithi poʹlis, elithetha “isixeko.” Izixeko zaseDekapoli ziyindawo yesizwe samaGrike, nangona ngokungathandabuzekiyo zikwalikhaya lamaYuda amaninzi. Noko ke, uYesu akanakusebenza kakhulu kulo mmandla. Nakolu tyelelo akavunyelwa ukuba ahlale ithuba elide, njengokuba siza kubona kamva.

Xa uYesu ecela ukuba baye kolunye unxweme, abafundi bakhe bamkhwelisa emkhombeni. Noko ke, ngoxa behamba bayabonwa. Ngokukhawuleza abanye bakhwela kweyabo imikhombe ukuze babapheleke. Akukude kuyaphi ukuwela. Eneneni, uLwandle lwaseGalili lulichibi nje elikhulu elimalunga neekhilomitha ezingama-21 ubude nobubanzi obungenakudlula kwiikhilomitha ezili-12.

Kuyaqondakala ukuba uYesu udiniwe. Ngoko, ngokukhawuleza bakuba nje bendulukile, ulala ngasemva emkhombeni, ebeka intloko yakhe phezu komqamelo, aze alale yoyi. Iqela labapostile bakhe lingoomatiloshe abanamava, ekubeni bebeloba gqitha kuLwandle lwaseGalili. Ngoko ngabo abaqhuba umkhombe.

Kodwa olu hambo alulula. Ngenxa yemozulu efudumeleyo phezu kweli chibi, elimalunga neemitha ezingama-210 ngezantsi kolwandle, nomoya obandayo kwiintaba ezikufuphi, imimoya enamandla maxa wambi ithi ivuthuze isihla ize ibangele izaqhwithi ezikhulu nezibakho ngesiquphe kweli chibi. Ngoku kwenzeka loo nto. Ngokukhawuleza amaza abetha emkhombeni yaye akrapakela kuwo, kangangokuba uphantse utshone. Kanti, uYesu usalele!

Oomatiloshe abanamava bawuqhuba ngokubhuduzela umkhombe. Alithandabuzeki elokuba ngaphambili bebekhe bahamba betyhubela izaqhwithi. Kodwa kwesi sihlandlo amacebo aphelile. Besoyikela ubomi babo, bavusa uYesu. Badanduluka ngokuthi, ‘Mfundisi, akukhathali na, sitshabalala nje? Sisindise, satshabalala!’

Xa evuka, uYesu uyalela umoya nolwandle esithi: “Hlala uthi tu, uthi cwaka!” Ibe umoya ovuthuzayo uyaphela luze ulwandle luzole. Ephethukela kubafundi bakhe, ubuza oku: ‘Yini na ukuba nibe nje, ukuba ngamagwala? Kutheni na, le nto ningenalukholo?’

Akutsho, abafundi bakhe boyika ngendlela engaqhelekanga. Bayabuzana besithi, ‘Ngubani na ke lo, le nto ayithethelayo imimoya kwanamanzi, zimlulamele ezo zinto.’

Angakanani wona amandla uYesu awabonakalisayo! Hayi indlela ekuqinisekisa ngayo ukwazi ukuba uKumkani wethu unamandla okulawula iziqalelo zemvelo nokuba xa ephatha ngokupheleleyo apha kumhlaba wethu ebudeni bolawulo lwakhe loBukumkani, bonke abantu baya kuhlala benqabisekile kwiintlekele ezoyikekayo zemvelo!

Ngathuba lithile emva kokuba uqhwithela luphelile, uYesu nabafundi bakhe bafika bekhuselekile kunxweme olungasempuma. Mhlawumbi neminye imikhombe yasinda kolo qhwithela lukhulu yaza yabuyela ekhaya ikhuselekile. Marko 4:35–5:1; Mateyu 8:18, 23-27; Luka 8:22-26.

▪ Iyintoni iDekapoli, ibe imi phi?

▪ Ziziphi iinkalo ezibonakalayo ezibangela izaqhwithi ezikhulu kuLwandle lwaseGalili?

▪ Xa ubuchule babo bokuqhuba inqanawa bungabasindisi, benza ntoni abafundi?