Isahluko 53
UMlawuli Wabantu Owongamileyo Nonqwenelwayo
XA UYESU esondla abantu abangamawaka ngokungummangaliso, abantu babamba ongezantsi. Bathi, “Lo nguye inyaniso umprofeti lowo uzayo ehlabathini.” Abagqibi nje kwelokuba uYesu umele abe nguloo mprofeti mkhulu kunoMoses kodwa bakwathi uya kuba ngoyena mlawuli wanelisa iimfuno zabantu. Ngoko baceba ukumbamba baze bamenze ukumkani.
Noko ke, uYesu uyakuqonda oko aba bantu bakucebayo. Ngoko uthi nyebelele ngokukhawuleza ukuze aphephe ukumiselwa ngabo ngenkani njengokumkani. Uyazindulula izihlwele aze anyanzele abafundi bakhe ukuba bakhwele kumkhombe wabo baze benjenjeya ukubuyela eKapernahum. Wandula ke yena arhoxe kubo esiya kuthandaza entabeni. Obo busuku bonke uYesu uyedwa apho.
Ngaphambi nje komsobomvu uYesu uphos’ amehlo kuloo ndawo iphakamileyo akuyo aze abone amaza elwatyuza ngamandla elwandle eqhutywa ngumoya omkhulu. Ngokukhanya okubangelwa phantse yinyanga epheleleyo, ekubeni iPasika isondele, uYesu ubona umkhombe nabafundi bakhe besilwa namaza ukuze baqhubeke nohambo lwabo. La madoda abhexesha nangamaxhayi kuyiloo nto.
Akukubona oku, uYesu uyehla entabeni aze ahambe esenjenjeya ukuya emkhombeni enqumla phezu kwamaza. Umkhombe sewuhambe umgama oziikhilomitha ezintlanu okanye ezintandathu, xa uYesu efika kuwo. Noko ke, uqhubeka nohambo lwakhe ngokungathi uza kudlula kuwo. Bakumbona, abafundi bakhe bayadanduluka besithi: “Ngumshologu.”
UYesu ubaphendula ngelithuthuzelayo esithi: “Ndim, musani ukoyika.”
Kodwa uPetros uthi: “Nkosi, ukuba nguwe, yitsho ndize kuwe ndihamba phezu kwamanzi.”
“Yiza,” uphendula ngelitshoyo uYesu.
Ngoko nangoko, uPetros uyehla emkhombeni, uhamba phezu kwamanzi esiya kuYesu. Kodwa akukhangela kuqhwithela, uPetros uyoyika, aze aqalise ukutshona, uyazibika: “Nkosi, ndisindise.”
Ngokukhawuleza esolula isandla sakhe, uYesu uyambamba, esithi: “Ehla wena ulukholo luncinane, uthandabuzelani na?”
Emva kokuba uPetros noYesu bebuyele emkhombeni, umoya uyazola, ibe aba bafundi bayamangaliswa. Kodwa ngaba bafanele bamangaliswe? Ukuba bebeyiqondile “intsingiselo yezonka” ngokuqonda ummangaliso omkhulu owenziwe nguYesu kwiiyure ezimbalwa ngaphambili xa ebesondla amawakawaka ngezonka nje ezihlanu neentlanzana ezimbini, ngoko akufanele kube yinto emangalisa kangako ukuba unokuhamba phezu kwamanzi aze abangele umoya uzole. Noko ke, ngoku, aba bafundi baqubuda kuYesu baze bathi: “Inyaniso, unguNyana kaThixo.”
Ngexesha elingephi bafika eGenesarete, ithafa elihle nelineziqhamo kufutshane neKapernahum. Bamisa umkhombe. Kodwa xa besiya elunxwemeni, abantu bayaphawula ukuba ukho uYesu ibe baya kwimizi ekufutshane, befuna abo bagulayo. Xa abo beziswa bekumakhuko abo baze bachukumise nje isondo lengubo kaYesu yokwaleka, baphila qete.
Ngeli thuba, isihlwele ebesikho xa bekulungiselelwa amawaka ukutya ngokungummangaliso siphawula ukuba uYesu usishiyile. Ngoko xa imikhombe emincinane evela eTibheriya ifika, aba bantu bakhwela kuyo baze benjenjeya ukuhamba ngolwandle besinge eKapernahum, besiya kufuna uYesu. Bakumfumana bayambuza: “Rabhi, ufike nini apha?” UYesu uyabakhalimela, njengoko siza kubona kungekudala. Yohane 6:14-25; Mateyu 14:22-36; Marko 6:45-56.
▪ Emva kokuba uYesu ondle abantu abangamawaka ngokungummangaliso, abantu bafuna ukumenza ntoni?
▪ Yintoni ebonwa nguYesu kwintaba azikhethele ukuhlala kuyo, ibe wenza ntoni ke ngoko?
▪ Kutheni le nto abafundi bengafanele bamangaliswe kangako zezi zinto?
▪ Emva kokuba befikile elunxwemeni kwenzeka ntoni?