Isahluko 67
Abakwazi Ukumbamba
NGOXA kusaqhutywa uMthendeleko wemiNquba, iinkokeli zonqulo zithuma amadindala ukuba aye kubamba uYesu. Kunani khona ukuba azimele. Kunoko, uYesu uyaqhubeka efundisa ekuhleni, esithi: “Liselixesha elifutshane endinani, ndize ndiye kowandithumayo. Niya kundifuna, ningandifumani; nithi apho ndikhona mna, ningabi nakufika nina.”
AmaYuda awakuqondi oku, ibe ngoko ayabuzana esithi: “Uza kuya phi na lo, le nto singayi kumfumana thina? Angaba uza kuya kwiintsali ezikumaGrike, afundise amaGrike, yini na? Liyintoni na eli lizwi alithethileyo, lithi, Niya kundifuna, ningandifumani; nithi apho ndikhona mna, ningabi nakufika nina?” Kambe ke, uYesu uthetha ngokusondela kwexesha lokufa kwakhe nokuvuselwa ezulwini, apho iintshaba zakhe zingenakuya khona.
Kufika usuku lwesixhenxe nolokugqibela lomthendeleko. Ntsasa nganye kweli xesha lomthendeleko, umbingeleli uye wagalela amanzi, awafumene kwiChibi laseSilowa, kangangokuba ankcenkcezela emazantsi esibingelelo. Mhlawumbi ekhumbuza abantu ngale nkqubo yemihla ngemihla, uYesu uyadanduluka: “Ukuba kukho othi anxanwe, makeze kum asele. Lowo ukholwayo kum, njengoko satshoyo isibhalo, kuya kumpompoza imilambo yamanzi aphilileyo, iphuma embilinini wakhe.”
Enyanisweni, apha uYesu uthetha ngemiphumo emihle eya kubakho xa umoya oyingcwele uya kuthululwa. Kunyaka olandelayo oku kuthululwa komoya oyingcwele kwenzeka ngePentekoste. Apho, imilambo yamanzi aphilileyo iyaphuphuma xa abafundi abali-120 beqalisa ukulungiselela ebantwini. Kodwa de kufike elo xesha, akukho moya ukhoyo ngengqiqo yokuba akukabikho mfundi kaKristu othanjiswe ngomoya oyingcwele nobizelwe ukuya kuphila ezulwini.
Ekusabeleni kwimfundiso kaYesu, abanye baqalisa ukuthi: “Lo nguye umprofeti, inyaniso,” ngokucacileyo bebhekisela kumprofeti omkhulu ngakumbi kunoMoses ekuthenjiswe ngaye kusithiwa uyeza. Abanye bathi: “Lo nguye uKristu.” Kodwa abanye bechasa oko bathi: “UKristu angavela kwelaseGalili yini na? Asitshongo na isibhalo ukuthi, uKristu uphuma embewini kaDavide, naseBhetelehem, umzana ebekuwo uDavide?”
Ngoko isihlwele sahlulelana phakathi. Abanye bafuna uYesu abanjwe, kodwa akukho mntu umchukumisayo. Xa amadindala engabuyi noYesu, ababingeleli abakhulu nabaFarisi bayawabuza: “Kungani na ukuba ningezi naye?”
Amadindala aphendula ngelithi: “Akuzange kuthethe mntu njengoko athetha ngako lo mntu.”
Zifile ngumsindo, iinkokeli zonqulo zibhenela ekuwanyeliseni, ziwanyemba, yaye ziwathuka. Ziyawasinekela zisithi: “Ningaba nilahlekisiwe nani na? Kubaphathi nakubaFarisi kungaba kukho mntu ukholiweyo kuye yini na? Olu luntu lungawaziyo umthetho luqalekisiwe.”
Akukuva oku, uNikodimo, ongumFarisi nomlawuli wamaYuda (oko kukuthi, ilungu leNtlanganiso Yamatyala), uyazincama athethe ngenxa kaYesu. Usenokukhumbula ukuba kwiminyaka emibini enesiqingatha ngaphambili, uNikodimo waya kuYesu ebusuku waza wabonakalisa ukholo kuye. Ngoku uNikodimo uthi: “Umthetho wethu uyamgweba yini na umntu, ukuba awuthanga uve kuye kuqala, uqonde into ayenzayo?”
AbaFarisi bavutha ngakumbi ngumsindo ngenxa yokuba omnye wabo ethethelela uYesu. Besebenzisa amazwi ahlabayo bathi, “Ungaba ungowelaseGalili nawe na? Phengulula ubone, ukuba akuveli mprofeti kwelaseGalili.”
Nangona iZibhalo zingatsho ngokungqalileyo ukuba umprofeti wayeya kuvela eGalili, zalatha kuKristu njengovela apho, zisithi “ukukhanya okukhulu” kwakuza kubonwa kuloo mmandla. Ngaphezu koko, uYesu wazalelwa eBhetelehem, ibe wayengowembewu kaDavide. Ngoxa kunokwenzeka ukuba abaFarisi bayakuqonda oku, kubonakala ingabo abasasaza ezi mbono ziphosakeleyo abantu abanazo ngoYesu. Yohane 7:32-52; Isaya 9:1, 2; Mateyu 4:13-17.
▪ Kwenzeka ntoni kwintsasa nganye yomthendeleko, ibe uYesu usenokuba uyitsalela njani ingqalelo koko?
▪ Kutheni le nto amadindala engakwazi ukumbamba uYesu, ibe iinkokeli zonqulo zisabela njani?
▪ Ngubani uNikodimo, sinjani isimo sakhe sengqondo ngoYesu, ibe abaFarisi aqhubana nabo bamphatha njani?
▪ Bubuphi ubungqina obukhoyo bokuba uKristu wayeza kuvela eGalili?