Isahluko 70
Ukuphiliswa Kwendoda Ezelwe Iyimfama
XA AMAYUDA ezama ukugibisela uYesu ngamatye akayishiyi iYerusalem. Kamva, ngeSabatha, yena nabafundi bakhe bahamba esixekweni baze babone indoda eyazalwa iyimfama. Abafundi bayambuza uYesu: “Rabhi, ngubani na owonayo, ngulo, ngabazali bakhe, sini na, ukuze azalwe eyimfama nje?”
Mhlawumbi abafundi bakholelwa kukuba, umntu unokona esizalweni sikanina, kanye njengokuba bambi abefundisi bamaYuda bekholelwa ngolo hlobo. Kodwa uYesu uphendula esithi: “Akone lo, akone bazali bakhe; uzelwe eyimfama ukuze ibonakalaliselwe kuye imisebenzi kaThixo.” Ubumfama bale ndoda abubangelwanga yimpazamo ethile yayo okanye yabazali bayo. Isono somntu wokuqala uAdam sabangela ukuba bonke abantu bazalwe bengafezekanga, ngaloo ndlela bengamaxhoba eziphene ezinjengokuzalwa uyimfama. Esi siphene sikule ndoda ngoku sivulela uYesu ithuba lokubonakalalisa imisebenzi kaThixo.
UYesu ubethelela ukungxamiseka kokwenziwa kwale misebenzi. Uthi: “Ndimelwe kukuyisebenza imisebenzi yowandithumayo, kusesemini; kuza ubusuku, xa kungekho namnye unako ukusebenza. Xa ndisesehlabathini, ndilukhanyiselo lwehlabathi.” Kungekudala ukufa kukaYesu kuza kumphosa kubumnyama bengcwaba apho angasenakwenza nto. Okwangoku, ungumthombo wokhanyiselo lwehlabathi.
Emva kokuba ethethe ezi zinto, uYesu utshicela emhlabeni aze enze udaka ngamathe. Uluqaba emehlweni ale ndoda aze athi: “Yiya kuhlamba echibini leSilowa.” Le ndoda yenza kanye ngolo hlobo. Yaye ithi yakuhlamba, itsho ibone! Hayi indlela evuya ngayo ekubuyeni kwayo, kuba kokokuqala ukuba ibone ebomini bayo!
Abamelwane nabanye abayaziyo bamangalisiwe. Bayabuza: “Lo asinguye na obehleli engqiba?” Bambi baphendula ngokuthi: “Nguye lo.” Kodwa abanye abayikholelwa le nto, bathi: “Ufana naye.” Kanti yena uthi: “Ndinguye.”
Abantu bafuna ukuqonda: “Atheni na ukuvuleka amehlo akho?”
“Umntu ekuthiwa nguYesu wenze udaka, waqaba amehlo am, wathi kum, Yiya echibini leSilowa, uhlambe; ndiyile ke ndahlamba, ndabuya ndibona.”
Bayabuza besithi: “Uphi na yena?”
Uyaphendula athi: “Andazi.”
Abantu bayisa le ndoda ibingaboni kwiinkokeli zabo zonqulo, ezingabaFarisi. Kwakhona ezi nkokeli ziyayibuza ukuba kwenzeke njani ukuze ibone. Le ndoda iyacacisa: “Ubeke udaka emehlweni am, ndaza ndahlamba; ndiyabona ke.”
Ngokuqinisekileyo, abaFarisi bamele bavuyisane nalo obehleli engqiba ophilisiweyo! Kodwa kunoko bayamgxeka uYesu besithi, “Lo mntu asingowakwaThixo.” Kutheni besitsho nje? “Ngokuba isabatha akayigcini.” Kanti abanye abaFarisi bayabuza: “Angathini na umntu ongumoni ukwenza imiqondiso engakanana?” Ngoko baqhekeka phakathi.
Ngenxa yoko, babuza kwale ndoda: “Uthini na wena ngaye, ewavulile nje amehlo akho?”
Iphendula isithi: “Ungumprofeti.”
AbaFarisi abafuni kukukholelwa oku. Beyisekile kukuba kumele ukuba kukho sivumelwano sithile sangasese esenziwe nguYesu nale ndoda ukuze babhanxe abantu. Ngoko ukucombulula le ngxaki, babiza abazali bale ndoda eyayingqiba ukuze bababuze. Yohane 8:59; 9:1-18.
▪ Bubangelwa yintoni ubumfama bale ndoda, ibe abubangelwanga yintoni?
▪ Buyintoni ubusuku ekungekho mntu unokusebenza kubo?
▪ Yakuba indoda iphilisiwe, basabela njani abo bayaziyo?
▪ Baqhekeka njani abaFarisi ngokuphiliswa kwale ndoda?