Isahluko 132
Ngakwesokunene SikaThixo
UKUTHULULWA komoya oyingcwele ngePentekoste kububungqina bokuba uYesu ufikile ezulwini. Umbono odluliselwa kumfundi uStefano kamsinya emva koko nawo ukwangqina ukuba ufikile apho. Ngaphambi nje kokuba axulutywe ngamatye ngenxa yokunikela kwakhe ubungqina ngokuthembeka, uStefano udanduluka athi: “Yabonani, ndiwabona amazulu evulekile, ndimbona uNyana woMntu emi ngasekunene kukaThixo.”
Ngoxa ekwesokunene sikaThixo, uYesu ulindele umyalelo osuka kuYise othi: “Yiba nobukhosi phakathi kweentshaba zakho.” Kodwa okweli thuba, lokuba engekathabathi nyathelo nxamnye neentshaba zakhe, yintoni ayenzayo uYesu? Ulawula abafundi bakhe abathanjisiweyo, ebalathisa kumsebenzi wabo wokushumayela yaye ebalungiselela ukuba, ngovuko, babe ngookumkani kunye naye kuBukumkani bukaYise.
Ngokomzekelo, uYesu unyula uSawule (kamva owaziwa ngokuqhelekileyo ngegama lakhe lesiRoma, uPawulos) ukuba akhokele kumsebenzi wokwenza abafundi kwamanye amazwe. USawule unenzondelelo ngoMthetho kaThixo, kodwa ulahlekiswa ziinkokeli zonqulo zamaYuda. Ngenxa yoko, uSawule akaneli nje ukukholiswa kukubulawa kukaStefano, kodwa uyahamba aye eDamasko ngokomyalelo wombingeleli omkhulu uKayafa ukuze awazise eYerusalem ekhonkxiwe nawaphi na amadoda nabafazi abafumanayo apho abangabalandeli bakaYesu. Noko ke, ngoxa uSawule esendleleni, ngequbuliso kuthi lenye umbane kufuphi naye, aze awe phantsi emhlabeni.
“Sawule, Sawule, unditshutshiselani na?” kuvakala ilizwi elitshoyo lomntu ongabonakaliyo. USawule uyabuza, “Ungubani na, Nkosi?”
Impendulo ithi: “Mna ndinguye uYesu omtshutshisayo wena.”
USawule, oye waphanyazwa koko kukhanya kungummangaliso, uxelelwa nguYesu ukuba angene eDamasko aze alindele imiyalelo. Uthi ke uYesu abonakale embonweni kuHananiya, omnye wabafundi bakhe. Ngokuphathelele uSawule, uYesu uxelela uHananiya oku: “Lowo usisitya esinyuliweyo ndim, sokuphatha igama lam emehlweni eentlanga, nookumkani, kwanoonyana bakaSirayeli.”
Eneneni, bexhaswa nguYesu, uSawule (ngoku owaziwa ngokuba nguPawulos) nabanye abavangeli bafumana impumelelo engathethekiyo kumsebenzi wabo wokushumayela nokufundisa. Enyanisweni, malunga neminyaka engama-25 emva kokubonakala kukaYesu kuye endleleni eya eDamasko, uPawulos ubhala ukuba ‘iindaba ezilungileyo ziye zashunyayelwa kwindalo yonke ephantsi kwamazulu.’
Kwakuba kudlule iminyaka emininzi ngakumbi, uYesu udlulisela uthotho lwemibono kumpostile wakhe oyintanda, uYohane. Ngale mibono uYohane ayichazayo kwincwadi yeBhayibhile yeSityhilelo, ngokungathi kunjalo, uphila de ambone uYesu ebuya ekumandla oBukumkani. UYohane uthi ‘ekumoya’ wathwalelwa phambili wasiwa ‘kwimini yeNkosi.’ Yiyiphi le “mini”?
Ukufundisisa ngenyameko iziprofeto zeBhayibhile, kuquka isiprofeto sikaYesu esimayela nemihla yokugqibela, kutyhila ukuba ‘imini yeNkosi’ yaqalisa ngonyaka owawunezigigaba wowe-1914, ewe, kwesi sizukulwana! Ngoko kwakungowe-1914 awathi uYesu wabuya ngokungabonakaliyo, engenzelwanga mbhiyozo nguwonke wonke yaye ingabakhonzi bakhe abathembekileyo kuphela ababesazi ngokubuya kwakhe. Ngaloo nyaka uYehova wanika uYesu umyalelo wokuba abe nobukhosi phakathi kweentshaba zakhe!
Ethobela umyalelo kaYise, uYesu wamkhuphela ngaphandle kwamazulu uSathana needemon zakhe, ebalahlela phantsi emhlabeni. Emva kokubona oku kusenzeka embonweni, uYohane uva ilizwi emazulwini lisithi: “Ngoku luthe usindiso, namandla, nobukumkani, lwaba lolukaThixo wethu, negunya laba lelikaKristu wakhe.” Ewe, ngowe-1914 uKristu waqalisa ukulawula njengoKumkani!
Ezinjani zona ukulunga iindaba oku okuzizo kubanquli bakaYehova ezulwini! Bayabongozwa: “Yibani nemihlali, nina mazulu, nani ninomnquba kuwo.” Kodwa injani imeko yabo basemhlabeni? Ilizwi eliphuma ezulwini liyaqhubeka, “Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.”
Sikwelo xesha lincinane kanye ngoku. Abantu ngoku bayahlulwa ukuze bangene kwihlabathi elitsha likaThixo okanye batshatyalaliswe. Inyaniso ikukuba, indlela osabela ngayo kwiindaba ezilungileyo zoBukumkani bukaThixo ezishunyayelwayo ngoku emhlabeni wonke ngaphantsi kolwalathiso lukaKristu yiyo eya kugqiba ngekamva lakho.
Xa ukwahlulwa kwabantu kugqityiwe, uYesu Kristu uya kukhonza njengoMthunywa kaThixo ukuze aphelise emhlabeni inkqubo kaSathana yezinto iphela nabo bonke abo bayixhasayo. UYesu uya kukuphumeza oku kupheliswa kwabo bonke ubungendawo kwimfazwe ebizwa eBhayibhileni ngokuba yiHar–Magedon, okanye Armagedon. Emva koko, uYesu, oyena Mntu ubalaseleyo kwindalo iphela kwisigxina esinganeno kwesikaYehova uThixo, uya kumbamba uSathana needemon zakhe aze abakhonkxe iminyaka eliwaka “enzonzobileni,” oko kukuthi, imeko yokungasebenzi efana nokufa. IZenzo 7:55-60; 8:1-3; 9:1-19; 16:6-10; INdumiso 110:1, 2; Hebhere 10:12, 13; 1 Petros 3:22; Luka 22:28-30; Kolose 1:13, 23; ISityhilelo 1:1, 10; 12:7-12; 16:14-16; 20:1-3; Mateyu 24:14; 25:31-33.
▪ Emva kokuba uYesu enyukele ezulwini, uhleli phi, yaye ulinde ntoni?
▪ UYesu ulawula oobani emva kokunyukela ezulwini, yaye ulawulo lwakhe lubonakaliswa njani?
▪ Yaqala nini ‘imini yeNkosi,’ yaye kwenzeka ntoni ekuqaliseni kwayo?
▪ Nguwuphi umsebenzi wokwahlula owenziwayo namhlanje ochaphazela ngamnye wethu ngokobuqu, yaye oku kwahlula kwenziwa ngokwasiphi isizinzi?
▪ Xa umsebenzi wokwahlula ugqityiwe, ziziphi iziganeko eziya kulandela?