Isahluko 9
Ilizwi LikaYehova Liyaqhubeka Lihambela Phambili Ngokukhawuleza (1976-1992)
“Elokugqiba, bazalwana, sithandazeleni, ukuba ilizwi likaYehova liqhubeke lihambela phambili ngokukhawuleza [okanye, ‘libaleke’] lize lizukiswe kanye njengoko lenjenjalo nakuni.”—2 Tes. 3:1, “Kingdom Interlinear.”
NGALOO mazwi umpostile uPawulos wacela amakholwa aseTesalonika awayekhonza nawo ukuba athandazele ukuba yena namaqabane akhe babe nempumelelo ekuvakaliseni ilizwi likaYehova bengaphazanyiswa. UYehova wawuphendula loo mthandazo. Kodwa oku akuthethi ukuba lo mpostile akazange ahlangabezane neengxaki. Wajamelana nokuchaswa ngokukrakra lihlabathi yaye kwafuneka ahlangabezane nabazalwana bobuxoki ababenenkohliso. (2 Kor. 11:23-27; Gal. 2:4, 5) Sekunjalo, phezu kwako nje oku, emva kweminyaka emalunga nelishumi, uPawulos wayenokubhala ukuba ngenxa yentsikelelo kaThixo, iindaba ezilungileyo ‘zikho kulo lonke ihlabathi yaye zixakatha isiqhamo.’—Kol. 1:6.
Ngendlela efanayo kumhla wethu—kodwa ngomlinganiselo ongazange wabonwa ngaphambili—iindaba ezilungileyo zixakatha isiqhamo. Kufikelelwa abantu abangakumbi ngeendaba ezilungileyo yaye bayazamkela kunanini na ngaphambili. Ukuzaliseka koko iLizwi likaThixo lakuxela kwangaphambili kuqhubeka ngokukhawuleza, njengembaleki eselugqatsweni.—Isa. 60:22.
Uhlengahlengiso Kwintlangano
Ngowe-1976, uMzalwan’ uKnorr wayesebenze ngenkuthalo njengomongameli weWatch Tower Society ngaphezu kweminyaka engamashumi amathathu. Wayelityhutyhe izihlandlo ezininzi ihlabathi, etyelela yaye ekhuthaza abavangeli basemazweni, efundisa yaye eyalela abasebenza kwiiofisi zamasebe. Waba nelungelo lokubona amaNgqina akhutheleyo esanda ukusuka kwi-117 209 ngowe-1942 ukuya kwizi-2 248 390 ngowe-1976.
Kodwa ngehlobo lowe-1976, uN. H. Knorr owayeneminyaka engama-71 ubudala waphawula ukuba wayethand’ ukuhamba engqubeka ezintweni. Emva kokuxilongwa kwakhe kwafunyaniswa ukuba wayenethumba elingenakutyandwa ebuchotsheni. Wazama ukuqhubeka ethwele umsebenzi kangangeenyanga ezithile, kodwa imeko yakhe yaya isiba mandundu. Ngaba impilo yakhe enkenenkene yayiza kukuphazamisa ukuhambela phambili komsebenzi?
Ukwandiswa kweQumrhu Elilawulayo kwakuqalisile ngowe-1971. Ngowe-1975, lalinamalungu ali-17. Ixesha elininzi kuloo nyaka, iQumrhu Elilawulayo lalicingisisa nzulu ngomthandazo indlela elalinokukunyamekela ngayo ngeyona ndlela ilungileyo konke oko kubandakanyekileyo kumsebenzi wokushumayela nokufundisa ehlabathini lonke ochazwe eLizwini likaThixo njengoya kwenziwa kumhla wethu. (Mat. 28:19, 20) NgoDisemba 4, 1975, iQumrhu Elilawulayo lalivume ngamxhelo mnye ukuba kwenziwe enye yezona nguqulelo zibalulekileyo kwintlangano embalini yanamhla yamaNgqina kaYehova.
Ukususela ngoJanuwari 1, 1976, yonke imisebenzi yeWatch Tower Society namabandla amaNgqina kaYehova emhlabeni wonke yayilawulwa ziikomiti ezintandathu ezilawulayo zeQumrhu Elilawulayo. NgoFebruwari 1, 1976, kwenziwa iinguqulelo kuzo zonke iiofisi zamasebe zoMbutho emhlabeni wonke. Ngoku sebe ngalinye lalingasonganyelwa ngumveleli wesebe omnye, kodwa amadoda amathathu okanye angakumbi akhulileyo ayekhonza njengeKomiti yeSebe, ilungu elinye likhonza njengomlungelelanisi osisigxina.a Emva kokuba ezi komiti zisebenze kangangeenyanga ezithile, iQumrhu Elilawulayo lathi: “Kungqineke kuyingenelo ukuba nabazalwana abaliqela besebenzisana kunye ukuqwalasela izilangazelelo zomsebenzi woBukumkani.—IMize. 11:14; 15:22; 24:6.”
Ngokwindla lowe-1976, phezu kwaso nje isibakala sokuba impilo yakhe yayinkenenkene, uMzalwan’ uKnorr waba nesabelo ekufundiseni kwiintlanganiso ezaqhutyelwa kwikomkhulu namalungu eeKomiti zamaSebe nabanye abasebenza kumasebe abasuka ehlabathini lonke. Ukongezelela ekubeni nesabelo kwiintlangano ezaziqhutywa emini, uMzalwan’ uKnorr wayebamema aba bazalwana, bengamaqela amancinane, ukuba beze egumbini lakhe ngeengokuhlwa. Ngale ndlela yena nomfazi wakhe, uAudrey, baba nobudlelane obusondeleyo nala madoda ayemazi yaye emthanda nawayesebenze nawo ngokusondeleyo ukutyhubela iminyaka. Emva kwezi ntlanganiso, impilo kaMzalwan’ uKnorr yaya isiba mandundu ngokuthe ngcembe de kwaba sekufeni kwakhe ngoJuni 8, 1977.
NgoJuni 22, 1977, emva kweeveki ezimbini efile uMzalwan’ uKnorr, uFrederick W. Franz owayeneminyaka engama-83 ubudala wanyulwa njengomongameli weWatch Tower Society. Mayela noMzalwan’ uFranz, IMboniselo kaSeptemba 15, 1977 (Agasti 1, 1977, ngesiNgesi) yathi: “Udumo lwakhe olubalaseleyo njengomfundi weBhayibhile owaziwayo nokusebenza kwakhe engadinwa ngenxa yezilangazelelo zoBukumkani zimenze wafanelekela intembelo nenkxaso enyanisekileyo yamaNgqina kaYehova kuyo yonke indawo.”
Ngexesha kusenziwa le nguqulelo, amalungiselelo amatsha entlangano okuqinisekisa ukuqhubekela phambili komsebenzi ayesele esebenza.
Ukwanelisa Iintswelo Zokomoya Ngoncwadi LweBhayibhile
AmaNgqina kaYehova ayesondliwa kakuhle ngokomoya ngaphambi kowe-1976. Kodwa ukuhlolisisa oko kuye kwenzeka ukususela ngoko ngaphantsi kokhokelo lweQumrhu Elilawulayo neKomiti yalo Yokubhala kutyhila ukuba amanzi enyaniso aye ampompoza ngakumbi yaye ngeendlela ezahlukeneyo ezingakumbi.
Inkoliso yeempapasho ezivelisiweyo ziye zanelisa iintswelo ezithile zamaNgqina. Kwaboniswa inkxalabo ekhethekileyo ngabantu abaselula. Ukubanceda ukuba basebenzise imigaqo yeBhayibhile kwiimeko abajamelana nazo ebomini, ngowe-1976 (ngesiNgesi) kwapapashwa incwadi ethi Ubutsha Bakho—Ukufumana Okona Kulungileyo Kubo nethi Imibuzo Yabantu Abaselula—Iimpendulo Eziluncedo ngowe-1989. Impapasho enemifanekiso ethi Incwadi Yam Yamabali EBhayibhile, elungiselelwe ngokukhethekileyo abantwana, yakhutshwa ngowe-1978. Kwangaloo nyaka kwanikelwa isiluleko nokhokelo olusebenzisekayo lokomeleza iintsapho kwethi Ukwenza Ubomi Bentsapho Yakho Bonwabe.
Maxa wambi, iintswelo ezikhethekileyo zabantu bakaYehova ziye zalungiselelwa ngesiluleko esisexesheni kwiMboniselo. Ngokomzekelo, ingxelo yazwenibanzi yomsebenzi wamaNgqina kaYehova yowe-1977/78 yabonisa ukuba lalihlile inani labo babenesabelo kumsebenzi wokushumayela. Ngaba oku kuhla ngokuyinxenye kwakungenxa yolindelo olungazalisekanga ngowe-1975? Mhlawumbi kwakunjalo. Kodwa kwakukho nezinye izibakala ezaziphembelele oku. Yintoni eyayinokwenziwa?
IQumrhu Elilawulayo lathabatha amanyathelo okuqinisa ulweyiseko lwamaNgqina kaYehova lokuba kwakuyimfuneko ukuba aqhubeke evakalisa ngenzondelelo uBukumkani kwindlu ngendlu. IMboniselo kaJanuwari 15, 1980, (Julayi 15, 1979, ngesiNgesi) yayinamanqaku athi “Ukuzondelela Indlu KaYehova,” “Ukushumayela Kwihlabathi Elichase Umthetho,” “Bashumayela Kwindlu Ngendlu,” nelithi “Oko Abanye Bakuthethileyo Ngokunikela Ubungqina Kwindlu Ngendlu.” La namanye amanqaku aqinisekisa ukuba ukushumayela kwindlu ngendlu kunesiseko esiqinileyo seZibhalo aza abongoza ukuba nenxaxheba ngenzondelelo nangomphefumlo uphela kulo msebenzi ubalulekileyo.b—IZe. 20:20; Kol. 3:23.
Kwakukho nenye imeko ekwakufuneka kunikelwe ingqalelo kuyo. Ngowe-1980, iqela labantu ababenesabelo kwimisebenzi yamaNgqina kaYehova kangangeminyaka ethile, kuquka abanye ababekhonza kwizabelo ezibalulekileyo entlanganweni, ngeendlela ezahlukahlukeneyo babezama ukubangela iiyantlukwano nokuchasa umsebenzi owawusenziwa ngamaNgqina kaYehova. Ukuze kuqiniswe abantu bakaYehova baxhathise loo mpembelelo yabawexuki, IMboniselo yaba namanqaku afana nathi “Hlalani ‘Nizimasekile Elukholweni’” (Februwari 1, 1981 [Agasti 1, 1980, ngesiNgesi]), “Bangenisa Bucala Amahlelo Entshabalalo” (Matshi 1, 1984 [Septemba 15, 1983, ngesiNgesi]), nelithi “Luchase Uwexuko, Bambelela Kwinyaniso!” (Oktobha 1, 1983 [Aprili 1, 1983, ngesiNgesi]), ngoxa incwadi ethi “Let Your Kingdom Come” (1981) yabethelela isibakala sokuba uBukumkani busondele, ekubeni bamiselwa ezulwini ngowe-1914. IQumrhu Elilawulayo alizange liyivumele imigudu yabachasi iliphazamise kwinjongo ephambili yamaNgqina kaYehova—ukuvakalisa uBukumkani bukaThixo!
Noko ke, kuthekani ngemfuneko yokuba amaNgqina kaYehova aqhubeke esandisa ulwazi lwawo lwenyaniso yeBhayibhile? Ukwenzela ufundisiso olunzulu lweBhayibhile, ngowe-1984 kwakhutshwa uhlelo oluhlaziyiweyo noluneembekiselo lweNew World Translation, luqulethe iimbekiselo ezininzi eziseludinini, imibhalo esemazantsi nombandela osisihlomelo. Emva kweminyaka emine, ngowe-1988, abantu bakaYehova bavuyiswa kukufumana ingxubusho esexesheni yendinyana nganye kwiSityhilelo, kwincwadi ethi ISityhilelo—Incopho Yaso Ezukileyo Isondele, nakukufumana intyilalwazi yeBhayibhile eyimiqulu emibini, ethi Insight on the Scriptures. Kwandula, ngowe-1991, kwapapashwa incwadi enemifanekiso emihle ethi Oyena Mntu Ubalaseleyo Wakha Waphila, efundisa ngokucokisekileyo ngobomi nangeemfundiso zikaYesu Kristu.
Kodwa kuthekani ngeentswelo zabantu abangengomaNgqina kaYehova? Njengesixhobo sokufundisa abasandul’ ukuba nomdla, ngowe-1982 kwakhutshwa impapasho ethi Unokuphila Ngonaphakade KwiParadisi Esemhlabeni. Yayiyilelwe ukunceda abafundi beBhayibhile bahlangabezane neemfuneko zikaYehova zobomi kwiparadisi esemhlabeni. Ukuze kuncedwe abantu abasenokuba banemibuzo ngemvelaphi nenjongo yobomi emhlabeni, ngowe-1985 kwalungiselelwa incwadi ethi Life—How Did It Get Here? By Evolution or by Creation? Ngowe-1989, kwalandela incwadi eyomeleza ukholo ethi IBhayibhile—Ngaba Ililizwi LikaThixo Okanye Lomntu?
Kwakhona kwanikelwa nengqalelo kubantu abathobekileyo abasenokufuna uncedo olukhethekileyo ngenxa yemvelaphi yabo ngokwendlela yokuphila nangokonqulo. Ukuze kufundiswe abo bangayanga esikolweni nabo bangakwazi kufunda kakuhle inyaniso yoBukumkani bukaYehova, ngowe-1982 kwakhutshwa incwadana enemifanekiso enamaphepha angama-32 ethi Bunandiphe Ubomi Emhlabeni Ngonaphakade! Ngowe-1992, bekusele kushicilelwe imibhalo engaphezu kwezi-76 000 000, yaye ibisasazwa ngeelwimi ezingama-200 ehlabathini lonke, nto leyo eyenza ibe yeyona mpapasho yeWatch Tower Society iguqulelwe kwiilwimi ezininzi.
Ngowe-1983, kwaveliswa iincwadana ezintathu ngenjongo ekhethekileyo yokunceda amaSilamsi, amaBhuda namaHindu. Ukuze kufikelelwe abantu abanezi nezinye iimvelaphi zonqulo, kuyanceda ukwazi okuthile ngonqulo lwabo—iimfundiso nembali yalo. Ukuze kufezwe oku, ngowe-1990 kwakhutshwa incwadi ethi Iphulo Loluntu Lokufuna UThixo.
IQumrhu Elilawulayo lalinomdla okhethekileyo wokufikelela abantu abaninzi kangangoko ngesigidimi soBukumkani—abantu bazo “zonke iintlanga, nezizwe, nabantu, neelwimi.” (ISityhi. 7:9) Ukuze kwenziwe oko, kwenziwa amalungiselelo okuguqulela uncwadi kwiilwimi ezininzi ngakumbi. Ngokomzekelo, ukususela ngowe-1976 ukusa kowe-1992, kwabakho ulwando olumalunga nama-42 ekhulwini kwiilwimi ephuma ngazo IMboniselo. Ngo-Oktobha 1992 ibikhutshwa ngezili-111. Ukuze umsebenzi wokuguqulela ukhawuleze, ngaloo nyaka yayingabaguquleli abangaphezu kwama-800 ehlabathini lonke ababenesabelo kulo msebenzi.
Iinkqubo Zokufundisa Ezandisiweyo Nezahlukahlukeneyo
Ngaphantsi kolwalathiso lweQumrhu Elilawulayo neKomiti yalo Yokufundisa, iinkqubo zokufundisa abo basebenza kwikomkhulu neentsapho zaseBheteli kumasebe asehlabathini lonke zandiswa zaza zenziwa zahlukahlukana kakhulu. Ukongezelela kufundo lweBhayibhile neYearbook njengenxalenye yonqulo lwabo lwakusasa, kwaqaliswa ukuxutyushwa ngokweenkcukacha kwenxalenye yeBhayibhile ebifundwa kwiveki engaphambili nokwenziwa kwalo mbandela ufanelekele abo bakhonza eBheteli. Kongezelelwa neengxelo zoko kwenziwa kumasebe awahlukahlukeneyo aseBheteli kwaneengxelo zabaveleli bamacandelo.
Ukuze kuhlangatyezwane neentswelo zabo baneembopheleleko ezongezelelekileyo entlanganweni, kwalungiselelwa iinkqubo ezingakumbi zokufundisa zaza zasetyenziswa. Ebudeni bowe-1977, kwenziwa amalungiselelo okuba bonke abadala babekho kwisifundo seeyure ezili-15 seSikolo Sobulungiseleli soBukumkani. (IZe. 20:28) Ukususela ngoko, ucwangciso olufanayo olungalinganiyo ngexesha luye lwalungiselelwa qho emva kweminyaka embalwa; yaye ukususela ngowe-1984, nezicaka zolungiselelo zaqeqeshwa kwiSikolo Sobulungiseleli soBukumkani. Ukususela ngoDisemba 1977, eBrooklyn kwaqalisa isikolo esikhethekileyo seeveki ezintlanu samalungu eeKomiti zamaSebe.
Kwaboniswa nenkxalabo ekhethekileyo ngabo babezibhokoxa kubulungiseleli bexesha elizeleyo njengoovulindlela. NgoDisemba 1977 iSikolo Senkonzo Yobuvulindlela, isifundo seeveki ezimbini sokuqeqesha abalungiseleli abangoovulindlela, saqalisa eUnited States saza ekugqibeleni saya kufikelela kuzo zonke iinxalenye zomhlaba. Kwiminyaka eli-14 elandelayo, inani loovulindlela liye landa ngokuphindaphindwe kahlanu—lisuka kwi-115 389 laya kutsho kuma-605 610!
Ekwindla ngowe-1987, kwavulwa esinye isikolo esitsha—iSikolo Sokuqeqesha Abalungiseleli. Esi sikolo sasekwa ngenjongo yokuqeqesha abazalwana abafanelekayo abangatshatanga abanethuba bengabadala okanye izicaka zolungiselelo nababekulungele ukukhonza naphi na apho kwakukho imfuneko khona kwintsimi yazwenibanzi. Ngowe-1992, bekuqhutywe izikolo eBritani, e-El Salvador, eFransi, eItali, eJamani, eMexico, eNigeria, eOstreliya, eOstriya, eSpeyin, eSweden naseUnited States. Ngokomphumo, akukhanga kubekho udidi lwabantu abagqalwa njengabaphezulu kunabanye ebandleni, kodwa kunoko kuye kwanda amadoda afanelekayo okukhonza abazalwana bawo.
Ukuze kuhanjiselwe phambili umsebenzi wokufundisa ngeBhayibhile ehlabathini lonke, kwalungiselelwa iindibano zezizwe ngezizwe kwizixeko ezikhulu—ezinye kumazwe umsebenzi wamaNgqina kaYehova owawuvaliwe kuwo. Ezi ndibano zaba luncedo ekomelezeni abazalwana kuloo mimandla nasekukhuthazeni ukushunyayelwa kweendaba ezilungileyo kuloo mazwe.c
Izakhiwo Zokunyamekela Ulwando
Njengoko ilizwi likaYehova beliqhubeka lihambela phambili ngokukhawuleza, kuye kwafuneka kwenziwe izinto zamehlo kumsebenzi wokwakha nowokushicilela—umsebenzi owalathiswa liQumrhu Elilawulayo neKomiti yalo Yokushicilela.
AmaNgqina anamava kumsebenzi wokwakha azinikela ngokuzithandela, yaye imigudu yawo yalungelelaniswa ukuze ancede ekwakhiweni kwezakhiwo zamasebe ezitsha nezandisiweyo kulo lonke ihlabathi. Ukususela ngowe-1976 ukusa kowe-1992, kwakhiwa izakhiwo zamasebe ezitsha ngokupheleleyo kumazwe angama-60. Ukongezelela koko, kwenziwe umsebenzi wokwandisa izakhiwo ezikhoyo kumazwe angama-30. Indlela owenziwe ngayo umsebenzi (ngabasebenzi bokuzithandela abasuka kumabandla amaninzi—maxa wambi besuka kwamanye amazwe) iye yaqinisa uthando nomanyano phakathi kwabantu bakaYehova.d
Ukuze kuhlangatyezwane neentswelo ezingakumbi zoMbutho zokushicilela ngeelwimi ezininzi, amaNgqina anamava ngeekhompyutha enza inkqubo yekhompyutha yokwenza wonke umsebenzi owenziwa ngaphambi kokushicilela ebizwa ngokuba yiMEPS (Multilanguage Electronic Phototypesetting System). Lo msebenzi wagqitywa ngowe-1986. Ngenxa yoku, ngowe-1992, IMboniselo ibishicilelwa ngaxeshanye ngeelwimi ezingama-66. Ngaloo ndlela inkoliso yamaNgqina kaYehova yayikwazi ukufumana ukutya kokomoya okufanayo ngaxeshanye.e
Njengoko izakhiwo zeWatch Tower Society beziqhubeka zisanda, kuye kwafuneka abasebenzi bokuzithandela abangakumbi kwikomkhulu eBrooklyn nakwiiofisi zamasebe ehlabathini lonke. Ukususela ngowe-1976 ukusa kowe-1992, intsapho yaseBheteli kumazwe ngamazwe iye yanda ngokuphindwe kathathu, ukusuka kumalungu anokuba ngaphezu kwama-4 000 ukuya kutsho kwangaphezu kwe-12 900 akhonza ehlabathini lonke. IQumrhu Elilawulayo neKomiti yalo Yabasebenzi liye lanyamekela iintswelo zobuqu nezokomoya zalo mkhosi mkhulu wabasebenzi bokuzithandela bexesha elizeleyo.
Ukunyamekela Amabandla Nomsebenzi Wokushumayela
Njengoko ilizwi likaYehova lihambela phambili ngokukhawuleza, iQumrhu Elilawulayo neKomiti yalo Yenkonzo liye lasebenzisa amandla alo ekwakheni amabandla kulo lonke ihlabathi nasekwandiseni umsebenzi wokushumayela ehlabathini lonke.
Ngaba kwakunokwenziwa okungakumbi ukuze kuncedwe abasebatsha abaninzi ababebhaptizwa nyaka ngamnye? Ekuqaleni kowe-1977, kwenziwa amalungiselelo okomeleza amaNgqina amatsha ngokomoya. INkonzo Yethu YoBukumkani yacacisa: “Sikholelwa kukuba ebuncinaneni iincwadi ezimbini zifanele zifundisiswe kunye nabo bonke abantu abangena enyanisweni. . . . Ngoko ke ufundisiso lufanele luqhubeke ngemva kobhaptizo de incwadi yesibini igqityezelwe.” Ngale ndlela amaNgqina asandul’ ukubhaptizwa ayenikwa ithuba elaneleyo lokuzuza ulwazi nokuqonda nokuba abe noxabiso olwandayo loko kuthethwa kukubhaptizwa. Kwakhona eli lungiselelo litsha lakhuthaza ulwalamano olusenyongweni phakathi kwabatsha namaNgqina abancedileyo kwisifundo sabo seBhayibhile sekhaya.
Ukuze kunyanyekelwe abo babethontelana kwintlangano kaYehova, ehlabathini lonke kwasekwa amabandla amatsha angaphezu kwama-29 000 phakathi kowe-1976 nowe-1992. (Mika 4:1) IQumrhu Elilawulayo lamisela abaveleli beziphaluka nabezithili abangakumbi laza labathuma ukuba baye kunceda. Inani laba baveleli bahambahambayo lantinga ukususela kuma-2 600 ngowe-1976 laya kutsho kuma-3 900 ngowe-1992.
Njengoko inani lamabandla lalisanda, kwabakho nemfuneko eyandayo yeeholo zokuhlanganisana ezingakumbi. Ngaba kwakukho indlela ekhawuleza ngakumbi yokwakha iiHolo zoBukumkani? Ngeminyaka yee-1970, amaNgqina kaYehova aseUnited States alungiselela inkqubo yokwakha ekuthi kuyo kumenywe abakhi abanobuchule abasuka kwimimandla ekufuphi yelo lizwe ukuza kunceda amaNgqina asekuhlaleni akhe iHolo yoBukumkani. Xa kuncedisa abantu abaninzi, iholo inokugqitywa ngokukhawuleza—ngokufuthi ngeentsuku nje ezimbini okanye ezintathu. Ngeminyaka yee-1980, iiHolo zoBukumkani ezakhiwe ngokukhawuleza zazisakhiwa nakweminye imimandla yomhlaba.
Iinguqulelo zobupolitika eMpuma Yurophu zawachaphazela namaNgqina kaYehova. Hayi indlela abachwayita ngayo abazalwana bethu kumazwe anjengeMpuma Jamani (njengokuba yayisaziwa njalo ngoko), iHungary, iPoland, iRomania, nakuloo ndawo yayibizwa ngokuba yiSoviet Union xa beva ukuba umsebenzi wabo uye wamkelwa ngokusemthethweni, kwezinye iimeko emva kweminyaka engama-40 yokuvalwa kwawo! Inkululeko engakumbi kuloo mazwe ngoku yenza kwaba lula ngabo ukufikelela abantu abanokuba ngama-380 000 000 ngeendaba ezilungileyo! AmaNgqina kaYehova akazange aphozise maseko ekuyisebenziseni inkululeko awayesandul’ ukuyifumana ekubeni nesabelo kumsebenzi wokushumayela ekuhleni.
Yaba yintoni imiphumo? Ilizwi likaYehova liye lahambela phambili ngokukhawuleza! Ngokomzekelo, ngoAprili 1992 abavakalisi boBukumkani abanikela ingxelo ePoland babeli-106 915. Yaye kwakubonakala kukho ithemba lolwando olungakumbi: Kwangaloo nyanga ababeze kwiSikhumbuzo sokufa kukaKristu babengama-214 218. Ngokufanayo, kwimimandla eyayibumba iSoviet Union ngaphambili, kweza abantu abali-173 473 eSikhumbuzweni ngowe-1992, ulwando lwama-60 ekhulwini kunakunyaka ongaphambili.
Noko ke, kwamanye amazwe ukuqhubeka kwentshutshiso neentlekele zokwemvelo bekungumqobo. Ngokomzekelo, ngowe-1992 umsebenzi wamaNgqina kaYehova kumazwe angama-24 ubusephantsi kwemiqathango yaseburhulumenteni. IKomiti kaSihlalo yeQumrhu Elilawulayo yenza unako nako ukunceda nokwazisa abazalwana kumazwe ngamazwe ngeendlela abanokuwanceda ngazo amanye amaNgqina akhonza ngaphantsi kobunzima. (Thelekisa eyoku-1 kwabaseKorinte 12:12-26.) Ukutshutshiswa neentlekele zemvelo azikwazanga ukukunqumamisa ukushunyayelwa kwelizwi likaYehova!
“Abantu Abangabakhe”
Ngoko, kwiminyaka esusela kowe-1976 ukusa kowe-1992, ngokwenene ilizwi likaYehova liye lahambela phambili ngokukhawuleza. Intlangano iphantse yanda ngokuphindwe kabini, yaba nabavakalisi boBukumkani abazizi-4 470 000!
Abantu bakaYehova baqhubekile bevakalisa uBukumkani bukaThixo ngenzondelelo, ngoku ngeelwimi ezininzi ngakumbi kunangaphambili. Besebenzisa iimpapasho ezilungiselelweyo, baye balwandisa ulwazi lwabo ngeBhayibhile baza banceda abanomdla bafunda iinyaniso zeBhayibhile. Baye bangenelwa kwiinkqubo zokubafundisa eziye zasekwa ukuze zincede abo baneembopheleleko ezongezelelekileyo entlanganweni. Ngokungathandabuzekiyo uYehova uye wakusikelela ukuvakaliswa koBukumkani bakhe.
Ukususela ngeminyaka yee-1870 ukuza kuthi ga ngoku, amadoda athile abe negalelo elibalaseleyo ekuhanjiselweni phambili komsebenzi woBukumkani, amadoda anjengoCharles T. Russell, uJoseph F. Rutherford, uNathan H. Knorr, noFrederick W. Franz, kwanamanye aye akhonza njengamalungu eQumrhu Elilawulayo. Kodwa amaNgqina kaYehova akakhange abe lihlelo elisekelwe kwiimpawu zobuntu zakhe namnye kula madoda. Kunoko, inkokeli yawo inye, ‘nguKristu.’ (Mat. 23:10) UyiNtloko yala maNgqina kaYehova alungelelanisiweyo, lowo ‘unikwe lonke igunya’ lokwalathisa lo msebenzi ‘yonke imihla kude kube sekuphelisweni kwephakade eli.’ (Mat. 28:18-20) Azimisele ukuzithoba kubuntloko bukaKristu, abambelele kwiLizwi likaThixo, yaye asebenzisane nokhokelo lomoya oyingcwele, ukuze aqhubeke ehambela phambili ekunquleni okuphela koThixo oyinyaniso yaye ezingqina ‘engabantu abangabakhe, abazondelela imisebenzi emihle.’—Tito 2:14.
Kodwa ziziphi ezinye zeemfundiso nemigaqo yokuziphatha esisiseko eyahlula amaNgqina kaYehova kuzo zonke ezinye iinkonzo? Kwaqala phi sele esaziwa ngokuba ngamaNgqina kaYehova nje ngoku? Imali yokuqhuba imisebenzi yawo ivela phi? Kutheni ezahlula ngokupheleleyo kwezinye iicawa nakwihlabathi ngokubanzi? Kutheni eye atshutshiswa ngokukrakra kwimimandla emininzi kangaka yomhlaba? Le neminye imibuzo emininzi iza kuphendulwa kwizahluko ezilandelayo.
[Imibhalo esemazantsi]
a Bona iSahluko 15, “Inkqubela Kulungelelwaniso Lwentlangano.”
b Ukususela ngowe-1980 ukusa kowe-1985, abantu ababa nesabelo kumsebenzi wokushumayela banda ngama-33 ekhulwini, yaye ukususela ngowe-1985 ukusa kowe-1992, kwabakho ulwando olungakumbi lwama-47,9 ekhulwini.
c Bona iSahluko 17, “Iindibano—Ubungqina Bobuzalwana Bethu.”
d Bona iSahluko 20, “Ukwakha Kunye Emhlabeni Wonke.”
e Bona iSahluko 26, “Ukuvelisa Uncwadi LweBhayibhile Ukuze Lusetyenziswe Kubulungiseleli.”
[Amagama acatshulweyo akwiphepha 117]
Akalohlelo elisekelwe kwiimpawu zobuntu zawo nawaphi na amadoda
[Ibhokisi/Igrafu ekwiphepha 110]
Ukususela ngowe-1976 ukusa kowe-1992, kubekho ulwando lwama-42 ekhulwini kwinani leelwimi eyayiphuma ngazo “IMboniselo”
[Igrafu]
(Ukuba ufuna inkcazelo ehlahlelwe kakuhle, yiya kwimpapasho)
111
78
1976 1992
[Ibhokisi ekwiphepha 111]
Imvelaphi kaF. W. Franz
UFrederick William Franz wazalelwa eCovington, eKentucky, eUnited States, ngoSeptemba 12, 1893. Ngowe-1899 intsapho yakowabo yafudukela eCincinnati, apho uFrederick wayigqiba khona imfundo yamabanga aphakamileyo ngowe-1911. Wandula ke waya kwiYunivesithi yaseCincinnati, wenza izifundo ze-“liberal arts.” Wayegqibe kwelokuba wayeza kuba ngumshumayeli waseRhabe, ngoko wazibhokoxa kufundisiso lweBhayibhile yesiGrike. Eyunivesithi uFrederick watyunjwa ukuba afumane ibhaso likaRhodes eliyimali yokufunda ngesisa, nto leyo eyamenza wafanelekela ukuya kwiYunivesithi yaseOxford eNgilani. Noko ke, ngaphambi kokuba esi saziso senziwe, uFrederick waphelelwa ngumdla kweli bhaso waza wacela ukuba igama lakhe lisuswe kuluhlu lwabo babezigqatsile.
Ngaphambili, umntakwabo uAlbert wayemthumelele incwadana awayeyifumene kuBafundi BeBhayibhile Bezizwe ngeZizwe. Kamva uAlbert wamnika imiqulu emithathu yokuqala yencwadi ethi “Studies in the Scriptures.” Kwamvuyisa gqitha uFrederick oko wayekufunda waza wagqiba kwelokuba aluqhawule unxibelelwano neCawa yaseRhabe aze anxulumane nebandla laBafundi BeBhayibhile. NgoNovemba 30, 1913, wabhaptizwa. NgoMeyi 1914 wayishiya iyunivesithi, waza wenza kwangoko wenza amalungiselelo okuba ngumhambisi woncwadi (uvulindlela).
NgoJuni 1920 waba lilungu lentsapho yaseBheteli eBrooklyn. Emva kokufa kukaN. H. Knorr, ngoJuni 1977, uMzalwan’ uFranz wanyulwa ukuba abe ngumongameli woMbutho. Ukhonze ngokuthembeka njengelungu leQumrhu Elilawulayo de kwaba sekufeni kwakhe ngoDisemba 22, 1992, eneminyaka engama-99.
[Igrafu ekwiphepha 112]
(Ukuba ufuna inkcazelo ehlahlelwe kakuhle, yiya kwimpapasho)
Izintlu Ezandayo Zoovulindlela
1992
600 000
400 000
1986
200 000
1981
1976
[Igrafu ekwiphepha 113]
(Ukuba ufuna inkcazelo ehlahlelwe kakuhle, yiya kwimpapasho)
Intsapho YaseBheteli Ehlabathini Lonke Eyandayo
1992
12 000
9 000
1986
6 000
1981
1976
3 000
[Igrafu ekwiphepha 114]
(Ukuba ufuna inkcazelo ehlahlelwe kakuhle, yiya kwimpapasho)
Amabandla Awandayo
80 000
1992
60 000
1986
1981
1976
40 000
20 000
[Igrafu ekwiphepha 115]
(Ukuba ufuna inkcazelo ehlahlelwe kakuhle, yiya kwimpapasho)
Ukwanda Kwabavakalisi BoBukumkani
1992
4 000 000
1986
3 000 000
1981
1976
2 000 000
1 000 000
[Umfanekiso okwiphepha 109]
Iofisi yesebe nganye yoMbutho ivelelwa yikomiti yabazalwana, njengale ivelela umsebenzi eNigeria
[Imifanekiso ekwiphepha 116]
IQumrhu Elilawulayo lamaNgqina kaYehova Januwari 1992
Carey W. Barber
John E. Barr
W. Lloyd Barry
John C. Booth
Frederick W. Franz
George D. Gangas
Milton G. Henschel
Theodore Jaracz
Karl F. Klein
Albert D. Schroeder
Lyman A. Swingle
Daniel Sydlik