Isahluko 13

Ukwaziwa Ngehambo Yethu

SIPHILA kwixesha apho imilinganiselo yokuziphatha ebisoloko ihlonelwa ilahlwe kude yinkoliso yabantu. Inkoliso yeenkonzo zeNgqobhoko ziye zalandela ekhondweni, ngelithi ziyakunyamezela oku okanye ngelithi amaxesha ngamanye yaye izalelo zezizukulwana zangaphambili azisasebenzi. Ngenxa yoko, uSamuel Miller, oyintsumpa yaseHarvard Divinity School, wathi: “Ngokulula nje singathi icawa ayikhokeli phakathi koluntu. Isuke nje yathabatha impucuko yexesha lethu yaza yayamkela.” Umphumo kubomi babo bebekhangele kwezo cawa ukuze bafumane ukhokelo ube yintlekele.

Ngokwahlukileyo koko, xa yayixubusha ngamaNgqina kaYehova, iL’Eglise de Montréal, ulindixesha ophuma kanye ngeveki wenqila kabhishophu wamaKatolika waseMontreal, eKhanada, yathi: “Anemigaqo ebalaseleyo yokuziphatha.” Abafundisi-ntsapho, abaqeshi namagosa aseburhulumenteni amaninzi ayavumelana noko. Yintoni ebangela olu dumo?

Ukuba ngomnye wamaNgqina kaYehova kubandakanya okuninzi ngakumbi kunokubambelela kwiinkolelo zeemfundiso ezithile nokunikela ubungqina kwabanye ngezi nkolelo. UbuKristu bokuqala babusaziwa ngokuba “yiNdlela,” yaye amaNgqina kaYehova ayaqonda ukuba unqulo lokwenyaniso namhlanje lumele lube yindlela yokuphila. (IZe. 9:2) Noko ke, njengokuba kwakunjalo kwezinye izinto, amaNgqina anamhlanje awazange akuqonde kakuhle ngokukhawuleza okwakubandakanyekile koku.

“Kukuphi Okubalulekileyo—Bubuntu Okanye Ngumnqophiso?”

Nangona baqalisa ngesiluleko esisengqiqweni seZibhalo esingemfuneko yokuba njengoKristu, indlela abanye aBafundi beBhayibhile bokuqala abagxininisa ngayo “ekuphuculeni ubuntu,” njengokuba babekubiza njalo, yatyekela ekuzenzeni ezingabalulekanga iinkalo ezithile zobuKristu bokwenyaniso. Abanye babo babonakala benengcamango yokuba ukuziphatha njengenene—ngalo lonke ixesha ubonakala unobubele yaye ulungile, uthetha ngezwi eliphantsi, ukuphepha ukubonakalisa umsindo nangaluphi uhlobo, ufunda iZibhalo imihla ngemihla—kwakuya kubangenisa ezulwini. Kodwa abo abazange bakuse so ukuba uKristu wayenike abafundi bakhe umsebenzi ababefanele bawenze.

Le ngxaki yaxutyushwa kakhulu kwinqaku elithi “Kukuphi Okubalulekileyo—Bubuntu Okanye Ngumnqophiso?” kwinkupho (yesiNgesi) kaMeyi 1, 1926, yeMboniselo.a Eli nqaku labonisa ukuba imigudu yokuvelisa “ubuntu obufezekileyo” ngoxa besesenyameni yayibangela abanye badimazeke, kodwa kwangaxeshanye, kwabanye yayivelisa isimo sokuba “ngoongcwele ngcwele” ize ithande ukubabangela ukuba bangakusi so oko kwafezwa lidini likaKristu. Emva kokugxininisa ukholo kwigazi likaKristu elaphalalayo, eli nqaku labalaselisa imbaluleka ‘yokwenza izinto’ enkonzweni kaThixo eziya kuba bubungqina bokuba ubani usukela ikhondo lokukholisa uThixo. (2 Pet. 1:5-10) Ngelo xesha, ngoxa inkoliso yeNgqobhoko yayisenza ngathi ibambelele kwimilinganiselo yeBhayibhile yokuziphatha, oku kugxininisa emsebenzini kwawucacisa ngakumbi umahluko phakathi kwamaNgqina kaYehova neNgqobhoko. Lo mahluko wacaca ngakumbi njengokuba bonke ababesithi bangamaKristu kwakufuneka bajamelane nemibandela engokokuziphatha eyayisiya iqheleka.

‘Khumkani Kulo Uhenyuzo’

Umlinganiselo wamaKristu ngokuziphatha ngokwesini wachazwa kwakude kudala ngokucacileyo eBhayibhileni. “Oku kukuthanda kukaThixo, ukungcwaliswa kwenu, ukuba nikhumke kulo uhenyuzo . . . Kuba uThixo akasibizelanga ekungcoleni; usibizele ebungcwaliseni. Ngako oko ke lowo ugibayo akagibi mntu, ugiba uThixo.” (1 Tes. 4:3-8) “Umtshato mawubekeke ngeendlela zonke, nesilili masingadyojwa; ke abenza umbulo nabakrexezi, uThixo uya kubagweba.” (Heb. 13:4) “Anazi na, ukuba abangemalungisa abayi kubudla ilifa ubukumkani bukaThixo? Musani ukulahlekiswa; abenza umbulo, . . . nabakrexezi, nezifebe, namadoda alalanayo . . . abayi kubudla ilifa ubukumkani bukaThixo.”—1 Kor. 6:9, 10.

IMboniselo, (yesiNgesi) yatsalel’ ingqalelo kulo mlinganiselo wokuziphatha kwamaKristu okwenyaniso kwangoNovemba 1879. Kodwa awuzange uxutyushwe ngokufuthi okanye ngokweenkcukacha ngokungathi wawuyingxaki enkulu phakathi kwaBafundi beBhayibhile bokuqala. Noko ke, njengoko isimo sengqondo sehlabathi saya sisiba sesiyekelelayo ngakumbi, kwanikelwa ingqalelo engakumbi kule mfuneko, ngokukodwa kwiminyaka eyayikufuphi neMfazwe Yehlabathi II. Oku kwakuyimfuneko kuba abathile phakathi kwamaNgqina kaYehova babenembono yokuba ukuba nje babesiba nenxaxheba ekunikeleni ubungqina, ukuyekelela kancinane ekuziphatheni ngokwesini kwakungumcimbi wobuqu. Liyinyaniso elokuba IMboniselo (yesiNgesi) kaMatshi 1, 1935, yayitsho ngokucacileyo ukuthi ukuba nenxaxheba kwinkonzo yasentsimini kwakungeyiyo imvume yokuziphatha kakubi. Kodwa asingabo bonke abanikela ingqalelo kwesi siluleko. Ngoko kwinkupho yayo (yesiNgesi) kaMeyi 15, 1941, IMboniselo yaphinda yawuxubusha lo mbandela, ngokweenkcukacha, kwinqaku elinomxholo othi “Umhla KaNowa.” Yabonisa ukuba ukuziphatha kakubi ngokwesini komhla kaNowa kwakusesinye sezizathu ezabangela ukuba uThixo alitshabalalise ihlabathi langoko, yaza yabonisa ukuba okwenziwa nguThixo ngoko kumisela umzekelo woko aza kukwenza kumhla wethu. Ngeliphandle yalumkisa ngelokuba umkhonzi kaThixo ogcina ingqibelelo wayengenakunikela inxalenye yosuku lwakhe esenza ukuthanda kweNkosi aze ke, ngokuhlwa, azifice ‘kwimisebenzi yenyama.’ (Gal. 5:17-21) Oku kwaphinda kwagxininiswa ngakumbi kwiMboniselo (yesiNgesi) kaJulayi 1, 1942, lelinye inqaku elayigxeka kanobom ihambo eyayingavisisani nemilinganiselo yeBhayibhile yokuziphatha kubantu abangatshatanga nabatshatileyo. Akukho namnye owayemele agqibe kwelokuba ukuba nesabelo ekushumayeleni isigidimi soBukumkani esidlangalaleni njengomnye wamaNgqina kaYehova kwakuyimvume yokuphila ubomi bokuziphatha kakubi. (1 Kor. 9:27) Ekuhambeni kwexesha, kwakuza kuthatyathwa amanyathelo angqongqo ngakumbi ukuze kulondolozwe ukucoceka ngokokuziphatha kwentlangano.

Bambi ababevakalisa umnqweno wabo wokuba ngamaNgqina kaYehova babekhulele kwiindawo apho umtshato wolingelo wawamkelekile, apho iintlobano zesini phakathi kwabantu abaganeneyo zazivumelekile, okanye ukuhlalisana kwabantu ababini abangatshatanga ngokusemthethweni kwakugqalwa njengento eqhelekileyo. Imbinana yezibini ezitshatileyo zazizabalazela ukuhlala ngaphandle kokuba neentlobano zesini. Abanye abantu, nangona bengawuqhawulanga umtshato, babengahlali namaqabane abo, nto leyo eyayingebobulumko. Ukuze kunikelwe ulwalathiso oluyimfuneko, ebudeni beminyaka yee-1950, IMboniselo yaxubusha ngazo zonke ezi meko, yaxubusha ngeembopheleleko zomtshato, yagxininisa ukwalelwa kohenyuzo eBhayibhileni, yaza yacacisa oko uhenyuzo lukuko, ukuze kungabikho ukuqondwa phosakeleyo kwezinto.b—IZe. 15:19, 20; 1 Kor. 6:18.

Kwiindawo apho abantu ababeqala ukunxulumana nentlangano kaYehova babengayithabathi ngokunzulu imilinganiselo yeBhayibhile yokuziphatha, oku kwanikelwa ingqalelo ekhethekileyo. Ngaloo ndlela, ngowe-1945, xa uN. H. Knorr, umongameli wesithathu weWatch Tower Society, wayeseCosta Rica, wanikela intetho ngokuziphatha kwamaKristu awathi kuyo: “Nonke nina nilapha ngokuhlwanje enihlala nabafazi kodwa eningekawulungisi ngokusemthethweni umtshato wenu, ndinipha icebiso. Yiyani kwiCawa yamaKatolika nize nizibhalise njengamalungu, ngenxa yokuba ninokuzenza apho ezi zinto. Kodwa le yintlangano kaThixo, yaye aninakuzenza apha ezi zinto.”

Ukususela ngeminyaka yee-1960, xa amafanasini aqalisa ukuzenza ekuhleni izenzo zawo, iicawa ezininzi zawuxoxa lo mbandela, zaza zawamkela njengamalungu. Ngoku ezinye iicawa zide ziwamisele njengabefundisi amafanasini. Ukuze kuncedwe abantu abanyanisekileyo ababenemibuzo kwezi nkalo, iimpapasho zamaNgqina kaYehova nazo zaxubusha ngale mibandela. Kodwa phakathi kwamaNgqina, akuzange khe kubekho mathandabuzo ngendlela ubufanasini obufanele bujongwe ngayo. Ngoba? Ngenxa yokuba oko kwandlalwe eBhayibhileni awakujongi ngokungathi ziimbono zabantu belinye ixesha. (1 Tes. 2:13) Ayakuvuyela ukuqhuba izifundo zeBhayibhile namafanasini ukuze aba bantu bafunde ngoko kufunwa nguYehova, yaye abantu abanjalo bakhululekile ukuya kwiintlanganiso zamaNgqina ukuze baphulaphule, kodwa akukho namnye oqhubekayo nezenzo zobufanasini onokuba lelinye lamaNgqina kaYehova.—1 Kor. 6:9-11; Yuda 7.

Kwiminyaka yakutshanje ukuzifica ngesini kuye kwayinto eqhelekileyo phakathi kolutsha olungatshatanga ehlabathini. Ulutsha olukwiintsapho zamaNgqina kaYehova nalo luye lwayiva le ngcinezelo, lwaza olunye lwaqalisa ukuthelela kwiindlela zehlabathi oluphila kulo. Intlangano iye yahlangabezana njani nale meko? Kuye kwapapashwa kwiMboniselo nakuVukani! amanqaku awenzelwe ukunceda abazali nolutsha bajonge izinto ngendlela yeZibhalo. Kwiindibano kuye kwenziwa imidlalo yezinto ezenzeka kubomi bokwenene ukuze kuncedwe bonke baziphaphele iziqhamo zokugatya imilinganiselo yeBhayibhile yokuziphatha kunye neengenelo zokuthobela imithetho kaThixo. Omnye weyokuqala, owadlalwa ngowe-1969, wawunomxholo othi “Indlela Yokhululekileyo Izele Ngameva Nezabatha.” Kwalungiselelwa iincwadi ezikhethekileyo zokunceda abaselula baqonde ubulumko besiluleko seBhayibhile. Ezi zaziquka ethi Ubutsha Bakho—Ukufumana Okona Kulungileyo Kubo (eyapapashwa [ngesiNgesi] ngowe-1976) nethi Imibuzo Yabantu Abaselula—Iimpendulo Eziluncedo (eyapapashwa ngowe-1989). Abadala basekuhlaleni banikela uncedo lokomoya lobuqu kubantu ngabanye neentsapho. Kwakhona amabandla amaNgqina kaYehova akhuselwa ngokugxothwa kwabenzi bobubi abangaguqukiyo.

Ukuwohloka kwemilinganiselo yokuziphatha ehlabathini akukhokelelanga ekubeni amaNgqina kaYehova abe nembono yokuba ngoovula-zibhuqe ngakumbi. Ngokwahlukileyo koko, iQumrhu Elilawulayo lamaNgqina kaYehova liye lagxininisa ngakumbi kwimfuneko yokuphepha kungekuphela nje izenzo eziphosakeleyo zokuziphatha okubi ngokwesini kodwa kwaneempembelelo neemeko ezikhukulisa imigaqo yokuziphatha. Kula mashumi eminyaka mathathu adluleyo, liye lanikela imiyalelo yokomeleza abantu bamelane “nezono zangasese” ezinjengokuphulula amaphambili neyokubenza baphaphele ingozi yoncwadi olunamanyala, amabali angcolileyo aqhutywa ngokweziqendu, nomculo othob’ isidima. Ngaloo ndlela, ngoxa utyekelo lwehlabathi lokuziphatha beluwohloka, olwamaNgqina kaYehova beluphucuka.

Ubomi Bentsapho Obulawulwa Yimilinganiselo YobuThixo

Iintsapho zamaNgqina kaYehova ziye zangenelwa kakhulu ngokubambelela ngokuqinileyo kwimilinganiselo yeBhayibhile yokuziphatha ngokwesini. Kodwa ukuba ngomnye wamaNgqina kaYehova akusosiqinisekiso sokuba umntu akayi kuba nazo iingxaki zentsapho. Sekunjalo, amaNgqina eyisekile lelokuba iLizwi likaThixo linikela ezona ziluleko zisebenzayo ngendlela yokuhlangabezana neengxaki ezinjalo. Anamalungiselelo amaninzi awenziwe yintlangano okuwanceda asebenzise ezo ziluleko; yaye xa ezisebenzisa, imiphumo iba yingenelo, ngokwenene.

Kwangowe-1904, umqulu wesithandathu wencwadi ethi Studies in the Scriptures wazixubusha ngokweenkcukacha iimbopheleleko zomtshato nezokuba ngumzali. Ukususela ngoko, kuye kwapapashwa amanqaku amaninzi yaye kuye kwanikelwa iintetho ezininzi kuwo onke amabandla amaNgqina kaYehova ukuze kuncedwe ilungu ngalinye lentsapho liyiqonde indima yalo eliyinikwe nguThixo. Le mfundo engobomi bentsapho obuphumelelayo ayenzelwanga abasandul’ ukutshata kuphela kodwa yinkqubo eqhubekayo ebandakanya lonke ibandla.—Efe. 5:22–6:4; Kol. 3:18-21.

Ngaba Isithembu Sasiza Kwamkelwa?

Nangona amasiko achaphazela umtshato nobomi bentsapho esahluka kumazwe ngamazwe, amaNgqina kaYehova ayaqonda ukuba imilinganiselo eyandlalwe eBhayibhileni isebenza kuzo zonke iindawo. Njengoko umsebenzi wawo wawuqalisa eAfrika kule nkulungwane yama-20, amaNgqina afundisa apho, njengokuba esenza ezindaweni zonke, ukuba umtshato wamaKristu uvumela iqabane lomtshato elinye kuphela. (Mat. 19:4, 5; 1 Kor. 7:2; 1 Tim. 3:2) Kanti, kwakukho amakhulu awakwamkelayo ukubhenca kweBhayibhile unqulo-zithixo aza akwamkela ngovuyo oko kufundiswa ngamaNgqina kaYehova ngoBukumkani bukaThixo kodwa awabhaptizwa engekahlukani nesithembu. Ukuze kulungiswe le meko, IMboniselo (yesiNgesi) kaJanuwari 15, 1947, yagxininisa ukuba ubuKristu abusivumeli isithembu, kungakhathaliseki ukuba ayasivumela na amasiko asekuhlaleni. Ileta eyathunyelwa emabandleni yazisa nabaphi na ababesithi bangamaNgqina kaYehova kodwa besenesithembu ukuba babenikwe iinyanga ezintandathu zokuba benze imicimbi yabo yomtshato ivisisane nemigaqo yeBhayibhile. Oku kwabethelelwa yintetho eyanikelwa nguMzalwan’ uKnorr ngoxa wayetyelele eAfrika kwangaloo nyaka.

ENigeria, abantu behlabathi abaninzi babesithi imigudu yokuphelisa isithembu phakathi kwamaNgqina kaYehova yayiya kuthetha ukuphelisa amaNgqina kaYehova. Kwaye liyinyaniso elokuba asingabo bonke ababenesithembu ababebhaptizwe njengamaNgqina ngaphambilana abalwenzayo olu tshintsho luyimfuneko nangowe-1947. Ngokomzekelo, uAsuquo Akpabio, umveleli ohambahambayo, ubalisa ukuba iNgqina awayefikele kulo eIfiayong lamvusa ezinzulwini zobusuku laza lathi makaguqule isaziso esasenziwe ngokuphathelele imfuneko yokuba nomfazi omnye. Ngenxa yokuba engazange avume ukwenjenjalo, lowo wayefikele kuye wamgxotha nangona imvula yayigalela ngamandla ngobo busuku.

Kodwa uthando ngoYehova luye lwabanika amandla ayimfuneko abanye okuba bathobele imithetho yakhe. Naba abambalwa kubo. EZaire indoda eyayingumKatolika yaye inesithembu yalahla ababini kubafazi bayo ukuze ibe ngomnye wamaNgqina kaYehova, nangona ukuhambisa oyena yayimthanda ngenxa yokuba wayengenguye ‘umfazi wobutsha bayo’ kwakuluvavanyo oluqatha lokholo lwayo. (IMize. 5:18) EDahomey (ngoku eyiBenin) omnye owayesakuba ngumWesile owayesenabafazi abahlanu woyisa imiqobo enzima ngokwenene engokwasemthethweni ukuze akwazi ukuyiqhawula eminye imitshato ukuze afanelekele ukubhaptizwa. Sekunjalo, waqhubeka ebanyamekela ngezinto eziphathekayo abo babesakuba ngabafazi bakhe nabantwana babo, njengokuba benzayo nabanye abahambisa abafazi abancinane. UWarigbani Whittington, waseNigeria, wayengowesibini kubafazi bendoda yakhe. Xa wagqiba kwelokuba ukukholisa uYehova, uThixo wokwenyaniso, kwakuyeyona nto ibalulekileyo kuye, wajamelana nomsindo wendoda yakhe kwaza kwalandela nowentsapho yakowabo. Indoda yakhe yamkhulula, kunye nabantwana bakhe ababini, kodwa ayabaxhasa ngokwemali—nditsho nangeyento yokuhamba. Kodwa, wathi: ‘Akukho nanye kwiingenelo zokuphathekayo endazishiya ngasemva enokuthelekiswa nokukholisa uYehova.’

Kuthekani Ngoqhawulo-mtshato?

Kumazwe aseNtshona isithembu asixhaphakanga, kodwa ezinye iingcamango ezingqubanayo neZibhalo ziyinto eqheleke gqitha. Enye yezi yingcamango yokuba kulunge ngakumbi ukuqhawula umtshato kunokuba nomtshato ongonwabisiyo. Kwiminyaka yakutshanje amanye amaNgqina kaYehova aqalise ukuxelisa lo moya, efuna uqhawulo-mtshato ngaphantsi kwezizathu ezifana “nokungafanelani.” AmaNgqina aye ahlangabezana njani noku? Ngokuthe rhoqo intlangano iba nephulo lokufundisa ngembono kaYehova ngoqhawulo-mtshato ukuze kungenelwe amaNgqina ekudala ekho kwakunye namakhulu amawaka ongezelelwa kwizintlu zawo minyaka le.

IMboniselo iye yalathisela ingqalelo kweyiphi imigaqo yeBhayibhile? Phakathi kweminye, yalatha kulo ulandelayo: Kwingxelo yeBhayibhile yomtshato wokuqala wabantu, kubethelelwa ubunye bendoda nomfazi; ithi: ‘Indoda iya kunamathela kumkayo, babe nyama-nye.’ (Gen. 2:24) Kamva, kwaSirayeli, uMthetho wakwalela ukukrexeza waza wathi makabulawe nabani na okrexezayo. (Dut. 22:22-24) Uqhawulo-mtshato lwaluvunyelwe nangaphantsi kwezinye izizathu ezingelulo ukrexezo, kodwa kuphela ‘ngenxa yobulukhuni beentliziyo zabo,’ njengokuba uYesu wacacisayo. (Mat. 19:7, 8) UYehova wayekujonga njani ukulahla iqabane likabani lomtshato ukuze utshate elinye? KuMalaki 2:16 uthi: “Ndikuthiyile ukwala.” Sekunjalo, wabavumela abo babeqhawula imitshato bahlale ebandleni likaSirayeli. Apho, ukuba babesamkela uqeqesho uYehova awayeludlulisela kubantu bakhe, iintliziyo zabo ezilukhuni ekuhambeni kwethuba zazinokuguqukela ekubeni ziintliziyo ezithambileyo, ezazinokubonakalisa uthando lokwenene ngeendlela zakhe.—Thelekisa uHezekile 11:19, 20.

Ngokufuthi IMboniselo iye yathi xa uYesu wayexubusha ngoqhawulo-mtshato olwalusenziwa kwaSirayeli, wabonisa ukuba kwakuza kubakho umgaqo ophakame ngakumbi phakathi kwabalandeli bakhe. Wathi ukuba nabani na wayeqhawula umtshato nomfazi wakhe ngezizathu ezingezizo ezohenyuzo (por·neiʹa, “iintlobano zesini ezingekho mthethweni”) aze atshate nomnye, wayeya kuba uyakrexeza; kwanokuba akatshatanga, wayeya kuba uyamkrexezisa umfazi wakhe. (Mat. 5:32; 19:9) Ngaloo ndlela, IMboniselo iye yathi, kumaKristu naluphi na uqhawulo-mtshato lungumbandela onzulu ngakumbi kunokuba lwalunjalo kwaSirayeli. Ngoxa iZibhalo zingathi wonk’ ubani oqhawula umtshato umele agxothwe ebandleni, abo bakrexezayo yaye bangaguqukiyo bayasuswa kubudlelane ngamabandla amaNgqina kaYehova.—1 Kor. 6:9, 10.

Kwiminyaka yakutshanje kuye kwenzeka iinguqulelo eziphawulekayo kwisimo sengqondo sehlabathi ngomtshato nobomi bentsapho. Phezu kwako konke oku, amaNgqina kaYehova aqhubekile ebambelele kwimilinganiselo elungiselelwe nguThixo, umSunguli womtshato, njengoko yandlalwe eBhayibhileni. Esebenzisa loo migaqo, aye azabalazela ukunceda abantu abantliziyo zinyanisekileyo bahlangabezane neemeko ezinzima abaninzi abazifumana bekuzo.

Ngenxa yoku, ubomi babaninzi abaye bamkela imfundo yeBhayibhile kumaNgqina kaYehova buye baguquka ngokuphawulekayo. Amadoda awayesakubetha abafazi bawo, amadoda awayengazinyamekeli iimbopheleleko zawo, amadoda awayelungiselela iintswelo zokuphathekayo kodwa engazinanzanga ezeemvakalelo nezokomoya—amawaka amadoda anjalo aye angabayeni nootata abanothando abazinyamekela kakuhle izindlu zabo. Abafazi ababengalawuleki, abafazi ababengabakhathalele abantwana babo nababengazikhathalele bona okanye amakhaya abo—abaninzi baba baye baba ngamakhosikazi ahlonela ubuntloko nasukela ikhondo eliwabangela athandwe ngokunzulu ngabayeni nabantwana bawo. Ulutsha olwalungabathobeli kwaphela abazali balo nolwaluziinjubaqa ezaziwayo ebuthweni, ulutsha olwaluzibhubhisa ngezinto olwaluzenza yaye ngaloo ndlela lutyumza iintliziyo zabazali balo—baninzi kwaba abaye banenjongo yobuthixo ebomini babo, yaye oku kuye kwanceda kwaguqula ubuntu babo.

Kambe ke, into ebalulekileyo ukuze intsapho iphumelele kukunyaniseka komnye komnye. Ukunyaniseka kukwabalulekile kulo naluphi na ulwalamano.

Ukunyaniseka Kufuneka Kangakanani?

AmaNgqina kaYehova ayaqonda ukuba kufuneka ukunyaniseka kuyo yonke into ayenzayo. Imbono yawo ayisekele kwizibhalo ezinjengezi zilandelayo: uYehova ‘unguThixo wenyaniso.’ (INdu. 31:5) Kwelinye icala, njengokuba uYesu watshoyo, uMtyholi ‘nguyise wamaxoki.’ (Yoh. 8:44) Ngoko ke, ngesizathu esivakalayo phakathi kwezinto uYehova azithiyileyo “lulwimi oluxokayo.” (IMize. 6:16, 17) ILizwi lakhe lisixelela oku: “Lahlani ubuxoki, thethani inyaniso.” (Efe. 4:25) Yaye amaKristu awamele aphelele nje ngokuthetha inyaniso kodwa, njengompostile uPawulos, kufuneka ‘aziphathe ngokunyaniseka ezintweni zonke.’ (Heb. 13:18, NW) Azikho iinkalo zobomi anokuthi kuzo amaNgqina kaYehova ngokufanelekileyo asebenzise eminye imilinganiselo.

Xa uYesu wayetyelele indlu yombuthi werhafu uZakeyu, le ndoda yavuma ukuba indlela ebisebenza ngayo yayingafanelekanga, yaza yathabatha amanyathelo okulungisa izenzo zayo zangaphambili zokuqhatha. (Luka 19:8) Kwiminyaka yakutshanje, ukuze babe nesazela esicocekileyo phambi koThixo, bambi abantu abaqalise ukunxulumana namaNgqina kaYehova baye benza okufanayo. Ngokomzekelo, umntu owayelisela elivunyiweyo eSpeyin waqalisa ukufundisisa iBhayibhile namaNgqina kaYehova. Kungekudala isazela sakhe saqalisa ukumkhathaza; wandula ke wabuyisela impahla ebiweyo kumqeshi wakhe wangaphambili nakubamelwane bakhe, waza wasa ezinye izinto emapoliseni. Kwafuneka ahlawule aze avalelwe entolongweni okwethutyana, kodwa ngoku unesazela esicocekileyo. ENgilani, emva kokufundisisa iBhayibhile namaNgqina kaYehova iinyanga ezimbini kuphela, umntu owayesakuba lisela leedayimani wazisa emapoliseni, awakhwankqiswayo; kwakusele kuziinyanga ezintandathu emfuna. Ebudeni beminyaka emibini enesiqingatha awayichithela entolongweni, wafundisisa iBhayibhile ngenkuthalo waza wafunda ukwabelana ngeenyaniso zeBhayibhile nabanye. Emva kokukhululwa kwakhe wazinikezela ukuba abhaptizwe njengomnye wamaNgqina kaYehova.—Efe. 4:28.

Udumo lwamaNgqina kaYehova lokunyaniseka lwaziwa kakhulu. Abaqeshi bayazi ukuba amaNgqina awayi kuphelela nje ekungababelini izinto zabo kodwa akayi kuxoka okanye agqwethe iingxelo xa umqeshi ewayalela ukuba enjenjalo—nakanye, nditsho naxa esongelwa ngokulahlekelwa ngumsebenzi wawo. KumaNgqina kaYehova ulwalamano oluhle noThixo lubaluleke ngakumbi kunokuthandwa ngabantu. Yaye ayaqonda ukuba, ingakhathaliseki indawo akuyo okanye into ayenzayo, “izinto zonke ke zize, zityhilekile, emehlweni alowo esinokuthana ni naye.”—Heb. 4:13; IMize. 15:3.

EItali iphephandaba iLa Stampa lathi ngokuphathelele amaNgqina kaYehova: “Ayakwenza oko akushumayelayo . . . Imigaqo yawo yokuphila yokuthanda ummelwane, ukungakwamkeli ukuba segunyeni, ukuluchasa ugonyamelo nokunyaniseka ngokobuqu (nto ezo kumaKristu amaninzi ‘eziyimithetho yangeCawa’ ekufanele kushunyayelwe ngazo epulpitini kuphela) ingena kubomi bawo ‘bemihla ngemihla.’ ” Yaye eUnited States, uLouis Cassels, umhleli wezonqulo weUnited Press International, eWashington, D.C., wabhala: “AmaNgqina abambelela kwiinkolelo zawo ngokuthembeka okukhulu, kwanaxa ukwenjenjalo kusenokuwabangela ubunzima.”

Isizathu Sokuba Ukungcakaza Kungabanga Yingxaki Kubo

Kumaxesha angaphambili, ukunyaniseka kwakunxulunyaniswa nokuzimisela ukusebenza nzima. Ukungcakaza, oko kukuthi, ukulungela ukulahlekelwa sisixa semali ngenxa yokubhejela umphumo womdlalo othile okanye isiganeko, kwakujongelwa phantsi luluntu ngokubanzi. Kodwa njengokuba umoya wokuzingca nowokufuna ukutyeba ngokukhawuleza ubuqalisa ukungena kule nkulungwane yama-20, ukungcakaza—okusemthethweni nokungekho mthethweni—kube yinto exhaphakileyo. Akuxhaswa kuphela ngabo baphila ngoondlela-mnyama kodwa ngokufuthi naziicawa noorhulumente ukuze bandise imali. AmaNgqina kaYehova ahlangabezene njani noku kuguquka kwesimo sabantu? Ngokusekelwe kwimigaqo yeBhayibhile.

Njengokuba kuye kwaboniswa kwiimpapasho zawo, akukho mthetho ungqalileyo eBhayibhileni othi, Uze ungangcakazi. Kodwa iziqhamo zokungcakaza zisoloko zizibi, yaye ezi ziqhamo zibolileyo ziye zadandalaziswa yiMboniselo noVukani! kangangesiqingatha senkulungwane. Ngokubhekele phaya, la maphephancwadi aye abonisa ukuba ukungcakaza kwalo naluphi na uhlobo kubandakanya izimo zengqondo iBhayibhile esilumkisayo ngazo. Ngokomzekelo, ukuthanda imali: “Ukuthanda imali yingcambu yeento zonke ezimbi.” (1 Tim. 6:10) Nokuzingca: “Uze unganqweneli [ngokuzingca, NW] . . . nanye into eyeyommelwane wakho.” (Dut. 5:21; thelekisa eyoku-1 kwabaseKorinte 10:24.) Kwanokubawa: “Maningazidibanisi nosukuba enegama lokuba ngumzalwana, ukanti . . . ulibawa.” (1 Kor. 5:11) Ukongezelela, kwakhona iBhayibhile isilumkisa ngokubhenela ‘kuThamsanqa’ ngokungathi luhlobo oluthile lwamandla angaphezu kwawomntu anokusibabala ngokuthile. (Isa. 65:11) Ngenxa yokuba enikela ingqalelo kwezi ziluleko zeZibhalo, amaNgqina kaYehova akuphepha ngamandla ukungcakaza. Yaye ukususela ngowe-1976 aye enza umgudu okhethekileyo wokukuphepha ukuba phakathi kwawo kubekho othile onomsebenzi wempangelo onokumenza ngokucacileyo abe yinxalenye yeziko lokungcakaza.

Ukungcakaza akukaze kube yimbambano yokwenene kumaNgqina kaYehova. Ayazi ukuba kunokuhlakulela umoya wokuzuza ngoxa abanye belahlekelwa, iBhayibhile iwakhuthaza ukuba asebenze ngezandla zawo, athembeke koko akuphathisiweyo, abe nesisa, abelane nabo basweleyo. (Efe. 4:28; Luka 16:10; Roma 12:13; 1 Tim. 6:18) Ngaba abanye abasebenzelana nawo bakuqonda ngokukhawuleza oku? Ewe, ngokukodwa abo asebenzelana nabo kwezoshishino. Asinto ingaqhelekanga ngabaqeshi ukuba bafune ukusetyenzelwa ngamaNgqina kaYehova ngenxa yokuba bayazi ukuba anyanisekile yaye athembekile. Bayaqonda ukuba lunqulo lwamaNgqina oluwenza abe luhlobo lwabantu alulo.

Kuthekani Ngecuba Nokusebenzisa Kakubi Iziyobisi?

IBhayibhile ayithethi nto ngecuba, yaye ingathethi nto nangazo naziphi na iziyobisi ezisetyenziswayo namhlanje. Kodwa inikela ulwalathiso oluye lwawanceda amaNgqina kaYehova abone ikhondo lehambo eliya kumkholisa uThixo. Ngaloo ndlela, kwasemva phayaa ngowe-1895, xa IMboniselo (yesiNgesi) yayithetha ngokusetyenziswa kwecuba, yayisalathisela ingqalelo kweyesi-2 kwabaseKorinte 7:1, ethi: “Sinawo nje ngoko la madinga, zintanda, masizihlambulule kuko konke ukudyobheka kwenyama nokomoya sibufeza ubungcwele, sisoyika uThixo.”

Kangangeminyaka emininzi eso siluleko sasibonakala sanele. Kodwa njengokuba iinkampani zecuba zazibhengeza zikwenza into entle ukutshaya, kwaza emva koko kwasasazeka ukusetyenziswa kakubi kweziyobisi “ezingekho mthethweni” kwakufuneka okungakumbi. Kwabalaseliswa eminye imigaqo yeBhayibhile: ukuhlonela uYehova, uMniki-bomi (IZe. 17:24, 25); ukuthanda ummelwane (Yak. 2:8), nesibakala sokuba umntu ongamthandiyo omnye umntu akamthandi ngokwenene uThixo (1 Yoh. 4:20); kwanokuthobela abalawuli behlabathi (Tito 3:1). Kwaboniswa ukuba igama lesiGrike elithi phar·ma·kiʹa, ngokusisiseko elithetha “ukusebenzisa iziyobisi,” ababhali beBhayibhile balisebenzisa ukuchaza “ukukhafula” ngenxa yokusetyenziswa kweziyobisi xa kukhafulwa.—Gal. 5:20.

Emva phayaa ngowe-1946, iphephancwadi iConsolation labhenca ukungabi nanyaniso kwamazwi adla ngokuthethwa ngabantu abaqeshelwe ukuncoma icuba kwiintengiso zemidiza. Njengokuba kwakufumaneka ubungqina bezenzululwazi, ilandela leConsolation uVukani!, naye wapapasha ubungqina bokuba ukusebenzisa icuba kubangela umhlaza, isifo sentliziyo, kwenzakalisa imveku engekazalwa yomfazi okhulelweyo, yaye kwenzakalisa abo bangatshayiyo abanyanzeleka ukuba basezele umoya ozaliswe ngumsi, kwanobungqina bokuba intshongo iyakhobokisa. Kuye kwatsalelwa ingqalelo nakumandla okunxilisa omya nakubungqina bokuba ukusetyenziswa kwawo kunokuyonakalisa ingqondo. Ngokufanayo ngokuphindaphindiweyo kuye kwaxutyushwa ngeengozi ezinzulu zezinye iziyobisi ezikhobokisayo ukunceda abafundi beempapasho zeWatch Tower.

Kwakudala ngaphambi kokuba amaziko karhulumente avumelane ngomkhamo afanele abazise ngawo abantu ngobungozi bokusebenzisa icuba, IMboniselo, kwinkupho yayo (yesiNgesi) kaMatshi 1, 1935, yakwenza kwacaca ukuba kwakungekho mntu usebenzisa icuba owayenokuba lilungu labo basebenza kwikomkhulu leWatch Tower Bible and Tract Society okanye abe ngomnye wabameli bayo abamiselweyo. Emva kokuba zonke izicaka zimiselwe nguMbutho emabandleni amaNgqina kaYehova (lungiselelo elo elaqalisa ngowe-1938), IMboniselo (yesiNgesi) kaJulayi 1, 1942, yathi isalelo sokusetyenziswa kwecuba sasisebenza nakwabo babemiselwe njengezicaka. Kwiindawo ezithile kwadlula iminyaka eliqela ngaphambi kokuba oku kusetyenziswe ngokupheleleyo. Noko ke, inkoliso yamaNgqina kaYehova yasabela kakuhle kwisiluleko seZibhalo nomzekelo omhle wabo bakhokelayo phakathi kwawo.

Njengenyathelo elibhekele phaya lokusetyenziswa kweso siluleko seBhayibhile kuzo zonke iinkalo, akukho namnye osatshayayo owayesamkelwa ukuba abhaptizwe ukususela ngowe-1973 ukusa phambili. Kwiinyanga ezalandelayo, abo babebandakanyekile ekuvelisweni kwecuba okanye ekukhuthazeni ukuthengiswa kwecuba bancedwa baqonda ukuba babengenakuqhubeka besenza oko baze bamkeleke njengamaNgqina kaYehova. Isiluleko seLizwi likaThixo simele sisetyenziswe ngokuvisisanayo kuzo zonke iinkalo zobomi. Ukusetyenziswa okunjalo kwemigaqo yeBhayibhile ekusetyenzisweni kwecuba, umya, noko kubizwa ngokuba ziziyobisi eziqinileyo kuye kwawakhusela amaNgqina. Ngokusebenzisa iZibhalo, aye akwazi nokunceda abantu abangamawaka amaninzi ababesonakalelwa bubomi babo ngenxa yokusebenzisa kakubi iziyobisi.

Ngaba Iziselo Ezinxilisayo Zijongwa Ngendlela Eyahlukileyo?

Iimpapasho zeWatch Tower azikhange zibe nembono yokuba ukusetyenziswa kweziselo ezinxilisayo kuyafana nokusetyenziswa kakubi kweziyobisi. Kutheni? Ziyacacisa: UMdali uyayazi indlela esenziwe ngayo, ibe iLizwi lakhe liyakuvumela ukusetyenziswa kweziselo ezinxilisayo ngobungcathu. (INdu. 104:15; 1 Tim. 5:23) Kodwa iBhayibhile ikwalumkisa ‘ngokusela ngokugqithiseleyo,’ yaye ikugxeka ngamandla ukunxila.—IMize. 23:20, 21, 29, 30, NW; 1 Kor. 6:9, 10; Efe. 5:18.

Ngenxa yokuba ukungasetyenziswa ngobungcathu kweziselo ezinxilisayo kwakusonakalisa ubomi babantu abaninzi, uCharles Taze Russell wayekhetha ukungaziphathi tu kwaphela. Kodwa, wayevuma ukuba uYesu wayeyisebenzisa iwayini. Ebudeni benkulungwane ye-19 nasekuqaleni kwenkulungwane yama-20, kwakukho ukuxokozela okukhulu kwelaseUnited States abantu bezama ukuphelisa ukusetyenziswa kotywala. IMboniselo ngokuphandle yavakalisa ukuvelana nabo babezama ukulwa neengozi zotywala, kodwa ayizange ilithelele iphulo labo lokulwela ukumiselwa kwemithetho yokubuphelisa. Noko ke, eli phephancwadi layibonisa kakuhle ingozi ebangelwa kukuzifica ngokugqith’ emngceni yaye ngokufuthi lathi bekuya kulunga ngakumbi ukuyiphepha kwaphela iwayini notywala. Abo babecinga ukuba babenokubusebenzisa ngobungcathu utywala bakhuthazwa ukuba baqwalasele amaRoma 14:21, athi: “Kuhle ukuba ungadli nyama, ungaseli wayini, ungenzi nto angabetheka kuyo umzalwana wakho, akhubeke kuyo.”

Noko ke, ngowe-1930, xa ingqwayingqwayi yoMbutho Olwa NeeNkanti (Anti-Saloon League) eUnited States yade yakutsho ngokuphandle ukuba intlangano yayo “yayizelwe nguThixo,” uJ. F. Rutherford, ngoko owayengumongameli weWatch Tower Society, wasebenzisa elo thuba ukuze anikele iintetho kunomathotholo ebonisa ukuba ibango elinjalo lalifana nokunyelisa uThixo. Ngoba? Ngenxa yokuba iLizwi likaThixo alikugatyi ukusetyenziswa kwewayini; nokuba imithetho yokuphelisa utywala yayingabuphelisi ubunxila, nto leyo uThixo ayigwebayo; yaye nokuba imithetho yokuphelisa utywala, endaweni yoko, yayibangele ukuvuka kokwenziwa nokuthengiswa kotywala ngoondlela-mnyama nokunganyaniseki eburhulumenteni.

Ukusetyenziswa kweziselo ezinxilisayo okanye ukungabusebenzisi kugqalwa njengombandela wobuqu ngamaNgqina kaYehova. Kodwa abambelela kwimfuneko yeZibhalo yokuba umveleli umele abe “yingcathu.” Eli binzana liguqulelwe ngokusuka kwelesiGrike elithi ne·phaʹli·on, ngokoqobo, elithetha, ‘ukuba sezingqondweni, ukuzola; ukuyiphepha iwayini, mhlawumbi ngokupheleleyo okanye ukuphepha ukubusebenzisa ngendlela engabonakalisi ubungcathu.’ Izicaka zolungiselelo nazo zimele zibe ngamadoda “angazinikeli kwiwayini eninzi.” (1 Tim. 3:2, 3, 8) Ngoko, abo basela ngokugqithiseleyo abawafanelekelanga amalungelo akhethekileyo enkonzo. Isibakala sokuba abo bakhokelayo phakathi kwamaNgqina kaYehova bemisela umzekelo omhle sibenza bakwazi ukungafihlisi xa benceda abanye abasenokuba batyekele ekubeni baxhomekeke kwiziselo ezinxilisayo ukuze bamelane noxinezeleko okanye, eneneni, ekufuneka babuyeke ngokupheleleyo ukuze bakwazi ukuhlala besezingqondweni. Oku kunayiphi imiphumo?

Ngokomzekelo, ingxelo evela kumzantsi wombindi Afrika ithi: “Xa sijonga zonke iinkalo, ezo ndawo amaNgqina kaYehova anempembelelo kakhulu kuzo phakathi kwabemi baseAfrika ngoku ziyimimandla engenankathazo xa ithelekiswa neminye. Ngokuqinisekileyo ebesilwa ngamandla nabaphembi bodushe, ukuthakatha, ubunxila nalo naluphi na uhlobo logonyamelo.”—The Northern News (Zambia).

Enye indlela ebalulekileyo ihambo yamaNgqina kaYehova eyahluke ngayo kuleyo yehlabathi kungokubhekisele koku—

Ukuhlonela Ubomi

Intlonelo enjalo izalwa kukuvuma isibakala sokuba ubomi sisipho esivela kuThixo. (INdu. 36:9; IZe. 17:24, 25) Iquka ukuqonda ukuba kwanobomi bomntwana ongekazalwa buxabisekile emehlweni kaThixo. (Eks. 21:22-25; INdu. 139:1, 16) Iquka isibakala sokuba “elowo kuthi uya kuziphendulela kuThixo.”—Roma 14:12.

Ngokuvisisana nale migaqo yeBhayibhile, amaNgqina kaYehova ebesoloko ekuphepha ukuqhomfa. Ukuze linikele ulwalathiso oluvakalayo kubafundi balo, iphephancwadi uVukani! liye labanceda baqonda ukuba uThixo ufuna ubunyulu; liye laxubusha ngokweenkcukacha imimangaliso yenkqubo yokukhawula kwanezibakala ezinokuthanani nengqondo nomzimba ezibandakanyekileyo ekuzaleni. Kwixesha lasemva kweMfazwe Yehlabathi II, njengokuba ukuqhomfa kwakusiba yinto eqhelekileyo, IMboniselo yabonisa ngokucacileyo ukuba esi senzo sichasene neLizwi likaThixo. Ingagwegwelezi, inkupho kaJuni 1, 1970, (Disemba 15, 1969, ngesiNgesi) yathi: “Uqhomfo lokushenxisa nje umntwana ongafunwayo lufana nokubulala ngabom umntu.”

Isizathu Sokungalwamkeli Utofelo-gazi

Ukuhlonela ubomi okuboniswa ngamaNgqina kaYehova kuye kwachaphazela nesimo sawo sengqondo ngakutofelo-gazi. Xa utofelo-gazi lwathi lwaba yingxaki ajongene nayo, IMboniselo (yesiNgesi) kaJulayi 1, 1945, yayicacisa ngokweenkcukacha imbono yamaKristu ngokuphathelele ubungcwele begazi.c Yabonisa ukuba isalelo esasivela kuThixo nesasisiya kuNowa nakuyo yonke inzala yakhe sasiquka igazi lezilwanyana nelabantu. (Gen. 9:3-6) Yabonisa ukuba le mfuneko yagxininiswa kwakhona ngenkulungwane yokuqala kumyalelo othi amaKristu amele ‘azile igazi.’ (IZe. 15:28, 29) Kwaelo nqaku lenza kwacaca ngosuka eZibhalweni ukuba uThixo wayevumele ukusetyenziswa kwegazi xa kusenziwa amadini kuphela, nokuba ekubeni amadini ezilwanyana awayenikelwa ngaphantsi koMthetho kaMoses ayefanekisela idini lentlawulelo likaKristu, ukuyigatya imfuneko yokuba amaKristu ‘azile igazi’ kwakuya kuba bubungqina bokungalihloneli ngokunzulu idini likaYesu Kristu. (Lev. 17:11, 12; Heb. 9:11-14, 22) Ngokuvisisana naloo ndlela yokuqonda izinto, ukususela ngowe-1961 nabaphi na ababeyityeshela le mfuneko kaThixo, bamkele utofelo-gazi, baze babonakalise isimo sokungaguquki babesuswa kubudlelane emabandleni amaNgqina kaYehova.

Ekuqaleni, imiphumo yasemzimbeni yotofelo-gazi yayingaxutyushwa kwiimpapasho zeWatch Tower. Kamva, xa loo nkcazelo yathi yafumaneka, yapapashwa—kungekhona njengesizathu sokungalwamkeli kwamaNgqina kaYehova utofelo-gazi kodwa ukuze komelezwe uxabiso lwawo ngesalelo sikaThixo esingokusetyenziswa kwegazi. (Isa. 48:17) Ukuze kufezwe oko, ngowe-1961 kwapapashwa incwadana eyayibhalwe ngenyameko ethi Blood, Medicine and the Law of God. Ngowe-1977 kwashicilelwa enye incwadana. Nayo le, enomxholo othi Jehovah’s Witnesses and the Question of Blood, yagxininisa isibakala sokuba ukuma kwamaNgqina kaYehova kungumbandela wonqulo, kusekelwe koko iBhayibhile ikutshoyo, yaye akuxhomekekanga kwiingozi zezonyango ezisenokubakho. Lo mbandela waphinda wahlaziywa kwakhona ngowe-1990 kwincwadana enemifanekiso ethi Igazi Linokubusindisa Njani Ubomi Bakho? Esebenzisa ezi mpapasho, amaNgqina kaYehova enze umgudu omkhulu wokufumana intsebenziswano yoogqirha nokubanceda baqonde ukuma kwamaNgqina. Noko ke, kangangeminyaka emininzi ukusetyenziswa kwegazi bekuxatyiswa kakhulu ngabo basebenza kwezonyango.

Nangona amaNgqina kaYehova ayebaxelela oogqirha ukuba ngokonqulo ayengakuchasanga ukusetyenziswa kolunye unyango, ukungalwamkeli utofelo-gazi bekungelula. Ngokufuthi, amaNgqina neentsapho zawo ebenyanzelwa kakhulu ukuba avume oko bekulisiko langoko kwezonyango. EPuerto Rico, ngoNovemba 1976, uAna Paz de Rosario oneminyaka engama-45 ubudala waluvuma utyando waza wafuna unyango kodwa wacela ukuba ngenxa yeenkolelo zakhe zonqulo, kungasetyenziswa gazi. Sekunjalo, beqamele ngomyalelo wenkundla, amapolisa amahlanu nabongikazi abathathu baya kwigumbi lakhe lasesibhedlele ezinzulwini zobusuku, bamqamangela kumandlalo wakhe, baza bamtofela igazi ngenkani, ngokuchasene neminqweno yakhe neyomyeni nabantwana bakhe. Wafunyanwa ngumothuko kakhulu waza wafa. Le asinto eyayingaqhelekanga ukwenzeka, yaye intlaselo enjalo ayenzekanga ePuerto Rico kuphela.

EDenmark, ngowe-1975 abazali abangamaNgqina basukelwa ngamapolisa ngenxa yokuba bengazange bavume ukuba unyana wabo omncinane atofelwe igazi kodwa, kunoko, bafuna olunye unyango. EItali, ngowe-1982, isibini esasithe ngothando safunela intombazana yaso egula ngokunganyangekiyo unyango kumazwe amane sagwetywa iminyaka eli-14 entolongweni ngesityholo sokubulala emva kokuba le ntombazana ife ngoxa itofelwa igazi ngokugunyaziswa yinkundla.

Kumaxesha amaninzi, kumalinge okunyanzelisa utofelo-gazi kubantwana bamaNgqina kaYehova, amajelo eendaba aye aphembelela intiyo enkulu phakathi kwabantu. Kwezinye iimeko, nangaphandle kokuchotshelwa kwetyala enkundleni ukuze abazali bakwazi ukuzithethela, iijaji ziye zayalela ukuba abantwana babo batofelwe igazi. Noko ke, kwiimeko ezingaphezu kwama-40 eKhanada, abantwana abaye batofelwa igazi baye babuyiselwa kubazali babo sele befile.

Asingabo bonke oogqirha neejaji abavumelanayo nezi ndlela zokulawula ngegqudu. Imbinana iqalise ukubonakalisa isimo sengqondo sokufuna ukunceda ngakumbi. Bambi oogqirha basebenzise ubuchule babo ukuze banyange ngaphandle kwegazi. Ngoxa besenjenjalo, baye bazuza amava kakhulu kuzo zonke iintlobo zokunyanga ngaphandle kwegazi. Ngokuthe ngcembe kuye kwabonakala ukuba zonke iintlobo zotyando zinokwenziwa ngokunempumelelo, kubantu abakhulu nakubantwana, ngaphandle kotofelo-gazi.d

Ukuze aphephe ungquzulwano olungeyomfuneko xa kuvela ingxaki, ekuqaleni kweminyaka yee-1960 amaNgqina kaYehova aqalisa ukubatyelela ngokukhethekileyo oogqirha bawo ukuze axubushe nabo ngemeko yawo yaye abanike noncwadi olufanelekileyo. Kamva acela ukuba kwiifayile zawo kufakwe isicelo esibhaliweyo sokuba awamele atofelwe igazi. Ngeminyaka yee-1970, akwenza uqheliselo ukusoloko ehamba neqweqwe lokwazisa abo basebenza kwezonyango ngesibakala sokuba awamele atofelwe igazi ngaphantsi kwazo naziphi na iimeko. Emva kokuthethathethana noogqirha namagqwetha, eli qweqwe laguqulwa ukuze lenziwe iqweqwe elingokwasemthethweni.

Ukuze kuxhaswe amaNgqina kaYehova kwilinge lokuzimisela ukuzikhusela kutofelo-gazi, ukuze kupheliswe nakuphi na ukungaqondi kakuhle koogqirha nezibhedlele, nokuze kudalwe umoya wentsebenziswano engakumbi phakathi kwamaziko ezonyango nabaguli abangamaNgqina, kuye kwasekwa iiKomiti Zokunxibelelana Nezibhedlele ngaphantsi kolwalathiso lweQumrhu Elilawulayo lamaNgqina kaYehova. Ukususela kwiqaqobana lezo komiti ngowe-1979, inani lazo liye lakhula lafikelela kuma-800 nangaphezulu kumazwe angama-70. Abadala abakhethiweyo baye baqeqeshwa yaye bafeza inkonzo efanayo emNtla Merika, kwiMpuma Ekude, kwiziqithi ezikhulu zoMzantsi Pasifiki, eYurophu nakuMzantsi noMbindi Merika. Ukongezelela ekuchazeni ukuma kwamaNgqina kaYehova, aba badala bachazela abo basebenza ezibhedlele ukuba zikho ezinye iindlela ezinokusetyenziswa endaweni yokutofela igazi. Xa kuvela iimeko zongxamiseko bayancedisa ekwenzeni uqhagamshelwano phakathi kwabaguli noogqirha ababanyamekelayo noogqirha abakhe basingatha iimeko ezifanayo zamaNgqina ngaphandle kwegazi. Xa kuyimfuneko, ezi komiti ziye azatyelela abo basebenza ezibhedlele kuphela kodwa kwaneejaji ebezibandakanyekile kwiimeko apho izibhedlele ziye zafuna imvume yenkundla yokutofela igazi.

Xa ukuhlonelwa kwenkolelo yawo yonqulo ngobungcwele begazi kungenakuqinisekiswa ngezinye iindlela, ngamathub’ athile, amaNgqina kaYehova aye abamangalela ezinkundleni oogqirha nezibhedlele. Ngokuqhelekileyo baye basuka nje bafuna umyalelo oza kubathintela okanye umyalelo ogunyazisiweyo. Noko ke, kwiminyaka yakutshanje, baye bamangalela ezinkundleni oogqirha nezibhedlele eziye zakunyanzelisa oku. Ngowe-1990 iNkundla Yezibheno yaseOntario, eKhanada, yasamkela eso simangalo ngenxa yokuba ugqirha walityeshela iqweqwe elalisesipajini somguli elalisitsho ngokucacileyo ukuba eli Ngqina lalingayi kulwamkela utofelo-gazi ngaphantsi kwazo naziphi na iimeko. EUnited States ukususela ngowe-1985, ubuncinane zizimangalo ezinjalo ezilishumi eziye zasiwa ezinkundleni kwimimandla eyahlukahlukeneyo yelo lizwe, yaye ngokufuthi abo baye bamangalelwa baye benza isigqibo sokuhlawula loo mali imiselweyo kunokujamelana nesibakala sokuba iqela labagwebi (jury) linokumisela imali engakumbi ngokuphathelele loo monakalo. AmaNgqina kaYehova azimisele ukusithobela ngokupheleleyo isalelo sokusebenzisa igazi. Akakuthandi ukubamangalela ezinkundleni oogqirha, kodwa aya kukwenza oku xa kuyimfuneko ukuze abanqande banganyanzeli amaNgqina ngonyango aluthiyileyo ngokwemigaqo yokuziphatha.

Uluntu ngokubanzi luya luziqonda ngakumbi iingozi ezihambisana notofelo-gazi. Ngokuyinxenye, oku kungenxa yokoyika uGawulayo. Noko ke, amaNgqina ashukunyiswa ngumnqweno onzulu wokukholisa uThixo. Ngowe-1987 iphephandaba lezonyango laseFransi eliphuma mihla le iLe Quotidien du Médecin lathi: “Mhlawumbi amaNgqina kaYehova achanile ukungakwamkeli ukusetyenziswa kweemveliso zegazi, kuba kuyinyaniso ukuba uninzi loothunywashe ababangela izifo banokudluliselwa ngegazi elitofelweyo.”

Ukuma kwamaNgqina kaYehova akusekelwanga kulwazi oluphakamileyo analo ngezonyango. Kuphela nje anentembelo yokuba indlela kaYehova ilungile nokuba ‘akayi kubavimba into elungileyo’ abakhonzi bakhe abanyanisekileyo. (INdu. 19:7, 11; 84:11) Kwanokuba iNgqina liyafa ngenxa yokopha kakhulu—ibe oku kwenzekile ngamathuba athile—amaNgqina kaYehova anentembelo ngokupheleleyo yokuba uThixo akabalibali abathembekileyo bakhe kodwa uya kubabuyisela ebomini ngovuko.—IZe. 24:15.

Xa Abathile Bekhetha Ukuyityeshela Imilinganiselo YeBhayibhile

Abantu abazizigidi baye bafundisisa iBhayibhile namaNgqina kaYehova, kodwa asingabo bonke abaye bangamaNgqina. Xa abanye abantu befunda ngemilinganiselo ephakamileyo esebenzayo, benza isigqibo sokuba olu asilohlobo lobomi abalufunayo. Bonke ababhaptizwayo baqala ngokufundiswa iimfundiso ezisisiseko zeBhayibhile, kuze emva koko (ngokukodwa ukususela ngowe-1967) abadala ebandleni bahlolisise ezo mfundiso nomntu ngamnye ofuna ukubhaptizwa. Kwenziwa wonke umgudu wokuqinisekisa ukuba abo babhaptizwayo abaqondi kakuhle imfundiso kuphela kodwa kwanoko kubandakanyekileyo kwihambo yobuKristu. Noko ke, kuthekani ukuba abanye baba kamva bavumela ukuthanda ihlabathi kubatsalele kwisenzo sobubi esinzulu?

Kwangowe-1904, kwincwadi ethi The New Creation, kwatsalelw’ ingqalelo kwimfuneko yokuthabatha amanyathelo ayimfuneko ukuze kungavunyelwa imeko ethob’ isidima sebandla. Kwaxutyushwa oko aBafundi beBhayibhile ngoko babekuqonda njengenkqubo yokuqhubana nabenzi bobubi njengokuba yandlalwe kuMateyu 18:15-17. Ngokuvisisana noku, kwakubakho, nangona kwakunqabile, ‘amatyala ebandla’ ekwakusithi kuwo ubungqina besenzo esiphosakeleyo kwiimeko ezinzulu buchazelwe ibandla liphela. Emva kweminyaka ethile, IMboniselo, kwinkupho yayo (yesiNgesi) kaMeyi 15, 1944, yawuxubusha kwakhona lo mbandela ngokuvisisana noko iBhayibhile xa iyonke ikutshoyo yaza yabonisa ukuba imicimbi enjalo echaphazela ibandla ifanele ilungiswe ngabazalwana abanembopheleleko ababelwe ukuvelela ibandla. (1 Kor. 5:1-13; thelekisa iDuteronomi 21:18-21.) Oku kwalandelwa ngamanqaku awayekwiMboniselo (yesiNgesi) kaMatshi 1, 1952, nawayegxininisa kungekuphela nje kwinkqubo efanelekileyo kodwa kwanemfuneko yokuthabatha amanyathelo okugcina intlangano icocekile. Izihlandlo eziliqela ukususela ngoko, lo mbandela uye waxutyushwa. Kodwa injongo ibisoloko inye: (1) ukugcina intlangano icocekile kunye (2) nokubethelela imfuneko yenguquko yokwenene kumenzi-bubi, unembono yokumzuza.

Ngenkulungwane yokuqala, bambi balushiya ukholo ngenxa yokuziphatha okubi. Abanye bakhukuliswa elukholweni ziimfundiso zabawexuki. (1 Yoh. 2:19) Oku kusaqhubeka phakathi kwamaNgqina kaYehova kule nkulungwane yama-20. Okulusizi kukuba kule minyaka yakutshanje kuye kwafuneka kususwe kubudlelane abenzi bobubi abangaguqukiyo abangamashumi amawaka nyaka ngamnye. Elo nani liquka nabadala abaziwayo. Iimfuneko zeZibhalo zisebenza kubo bonke. (Yak. 3:17) AmaNgqina kaYehova ayaqonda ukuba ukugcina intlangano ecocekileyo ngokokuziphatha kubalulekile ukuze aqhubeke enenkoliseko kaYehova.

Ukwambatha Ubuntu Obutsha

UYesu wabongoza abantu ukuba bacoceke kungekuphela nje ngaphandle kodwa nangaphakathi. (Luka 11:38-41) Wabonisa ukuba izinto esizenzayo nesizithethayo zibonakalisa oko kusentliziyweni yethu. (Mat. 15:18, 19) Kunjengokuba umpostile uPawulos wacacisayo, ukuba sifundiswa nguKristu ngokwenene, siya ‘kuhlaziywa kuwo umoya wengqiqo yethu’ yaye siya ‘kwambatha umntu omtsha, othe ngokokukaThixo wadalelwa ebulungiseni, nasebungcweleni benyaniso.’ (Efe. 4:17-24) Abo bafundiswa nguKristu bafuna ukuzuza “isimo sengqondo esifanayo neso uKristu Yesu wayenaso” ukuze bacinge yaye benze njengaye. (Roma 15:5, NW) Ihambo yamaNgqina kaYehova njengabantu ngabanye yimbonakaliso yomkhamo aye akwenza ngawo oku.

AmaNgqina kaYehova awathi ihambo yawo ayinabala. Kodwa anyanisekile kwimigudu yawo yokuxelisa uKristu njengokuba ezivisisanisa nemilinganiselo yehambo ephakamileyo yeBhayibhile. Awaliphiki elokuba bakho abanye abantu abasebenzisa imilinganiselo ephakamileyo yokuziphatha kubomi babo. Kodwa kwimeko yamaNgqina kaYehova, asingobantu ngabanye kuphela kodwa kwananjengentlangano yomhlaba wonke aziwa lula ngenxa yehambo evisisana nemilinganiselo yeBhayibhile. Ashukunyiswa sisiluleko esiphefumlelweyo esibhalwe kweyoku-1 kaPetros 2:12: “Ihambo yenu mayibe ntle phakathi kweentlanga, ukuze . . . bathi ngokubona imisebenzi yenu emihle, bamzukise uThixo.”

[Imibhalo esemazantsi]

[Amagama acatshulweyo akwiphepha 172]

“Anemigaqo ebalaseleyo yokuziphatha”

[Amagama acatshulweyo akwiphepha 174]

Ngaba yakha yakho imbambano ngendlela ubufanasini obabuya kujongwa ngayo?

[Amagama acatshulweyo akwiphepha 175]

Ukuwohloka kwemilinganiselo yokuziphatha ehlabathini akuwabangelanga amaNgqina angoovula-zibhuqe

[Amagama acatshulweyo akwiphepha 176]

Bambi bazama ukuba ngamaNgqina bengekahlukani nesithembu

[Amagama acatshulweyo akwiphepha 177]

Iphulo elinamandla lokufundisa imbono kaYehova ngoqhawulo-mtshato

[Amagama acatshulweyo akwiphepha 178]

Iinguqulelo eziphawulekayo kubomi babantu

[Amagama acatshulweyo akwiphepha 181]

Icuba—Alivumelekanga!

[Amagama acatshulweyo akwiphepha 182]

Iziselo ezinxilisayo—ngobungcathu, ukuba uyazisebenzisa kwaukuzisebenzisa

[Amagama acatshulweyo akwiphepha 183]

Azimisele ngamandla ukungalamekeli igazi

[Amagama acatshulweyo akwiphepha 187]

Ukususa kubudlelane—ukuze kugcinwe intlangano icocekile

[Ibhokisi ekwiphepha 173]

‘Ukuphucula Ubuntu’—Iziqhamo Zazingasoloko Zizihle

Ingxelo evela eDenmark: ‘Abaninzi, ingakumbi kwizihlobo ezidala, kwimigudu yabo enyanisekileyo yokwambatha ubuntu bobuKristu, baye bazabalazela ukuphepha yonke into ebonisa isimo sengqondo sehlabathi yaye ngale ndlela bazenza ababufanelekele ngakumbi uBukumkani bamazulu. Ngokufuthi, kwakugqalwa njengento engafanelekanga ukuncuma ezintlanganisweni, yaye inkoliso yabazalwana abadala yayinxiba iisuti ezimnyama, izihlangu ezimnyama, amaqhina amnyama kuphela. Ngokufuthi babanelisekile kukuphila ubomi obuzolileyo nobunoxolo eNkosini. Babekholelwa kwelokuba kwakwanele ukuqhuba iintlanganiso kuze kona ukushumayela kuyekelwe koovulindlela.’

[Ibhokisi ekwiphepha 179]

Iimbono Zabanye NgamaNgqina

◆ Iphephandaba laseJamani i-“Münchner Merkur,” lanikela le ngxelo ngokuphathelele amaNgqina kaYehova: “Angabona bahlawuli berhafu banyanisekileyo nabayihlawula ngexesha kule Federal Republic. Ukuyithobela kwawo imithetho kunokubonwa kwindlela aqhuba ngayo iinqwelo-mafutha kwanakumanani olwaphulo mthetho. . . . Ayabathobela abasemagunyeni (abazali, abafundisi-ntsapho, urhulumente). . . . Axhaswa yiBhayibhile, nto leyo esisiseko sako konke akwenzayo.”

◆ Usodolophu waseLens, eFransi, wathi kumaNgqina emva kokuba ayesebenzise ibala lemidlalo kwenye yeendibano zawo: “Into endiyithandayo kukuba niyazigcina izithembiso nezivumelwano zenu, ngaphezu koko, nicocekile, niqeqeshekile, nilungelelene. Ndiyawuthanda umbutho wenu. Ndikuthiyile ukungalungelelani, yaye andibafuni abantu abahamba bengcolisa yaye besaphula nezinto.”

◆ Incwadi ethi “Voices From the Holocaust” ibalisa ngomntu wasePoland owasinda kwinkampu yoxinaniso yaseAuschwitz neyaseRavensbrück owabhala oku: “Ndabona abantu ababa ngabona bona balungileyo nabantu ababa ngabona bakhohlakeleyo. Elona qela lalilungile ngamaNgqina kaYehova. Ndibothulel’ umnqwazi abo bantu. . . . Babebenzela izinto ezintle gqitha abanye abantu. Babebanceda abagulayo, babesabelana ngesonka sabo, yaye bethuthuzela ngokomoya wonk’ ubani obangqongileyo. AmaJamani ayebathiyile yaye ebahlonela kwangaxeshanye. Ayebanika owona msebenzi ungathandekiyo kodwa amaNgqina ayeyamkela le meko nomsebenzi ngentlonelo.”