Isahluko 25

Ukushumayela Ekuhleni Nakwizindlu Ngezindlu

XA UYESU KRISTU wathuma abafundi bakhe, wabayalela: “Ekuhambeni kwenu ke [“shumayelani,” NW], nisithi, Ubukumkani bamazulu busondele.” (Mat. 10:7) Yaye kumyalelo wakhe osisiprofeto oya kumaKristu okwenyaniso awayeya kuphila ebudeni bokuqosheliswa kwale nkqubo yezinto, wathi: “Ezi ndaba zilungileyo zobukumkani [“ziya kushunyayelwa,” NW] kulo elimiweyo liphela, zibe bubungqina.” (Mat. 24:14) Kwakuthetha ukuthini oko?

Kwakungathethi ukuba babemele bakhe iicawa, bakhalise intsimbi, baze balindele ukuba ibandla lihlanganisane ukuze libaphulaphule xa beshumayela kanye ngeveki. Apha isenzi sesiGrike esiguqulelwe ngokuthi “shumayela” (ke·rysʹso) ngokusisiseko, sithetha “ukuvakalisa.” Injongo asikokushumayela kwiqela labafundi elilinganiselweyo kodwa, kunoko, kukuvakalisa ekuhleni.

UYesu wamisela umzekelo ngendlela okwakumele kwenziwe ngayo oku. Wayesiya kwiindawo awayenokufumana kuzo abantu. Ngenkulungwane yokuqala, abantu babehlanganisana rhoqo kwizindlu zesikhungu ukuza kuphulaphula xa kufundwa iZibhalo. UYesu wawasebenzisa amathuba okushumayela kubo apho, kungekhona kwisixeko esinye kodwa kwimizi ngemizi nakwimizana ngemizana kulo lonke elaseGalili nelakwaYuda. (Mat. 4:23; Luka 4:43, 44; Yoh. 18:20) Iingxelo zeVangeli zibonisa ukuba izihlandlo ezininzi ngakumbi wayeshumayela ngaselunxwemeni lolwandle, ecaleni lentaba, endleleni, kwimizana nasemakhayeni abo babemamkela. Naphi na apho wayefumana khona abantu, wayethetha nabo ngenjongo kaThixo ngoluntu. (Luka 5:3; 6:17-49; 7:36-50; 9:11, 57-62; 10:38-42; Yoh. 4:4-26, 39-42) Yaye xa wathuma abafundi bakhe, wabayalela ukuba baye emakhayeni abantu ukuze bafune abo bafanelekayo baze banikele ubungqina kubo ngoBukumkani bukaThixo.—Mat. 10:7, 11-13.

AmaNgqina kaYehova kumaxesha anamhlanje aye azabalazela ukulandela umzekelo owamiselwa nguYesu nangabafundi bakhe benkulungwane yokuqala.

Ukuvakalisa Iindaba Ezingobukho BukaKristu

Njengokuba uCharles Taze Russell nezinxulumani zakhe babeqalisa ukuqonda indlela evisisana ngayo inyaniso eyandlalwe kwiLizwi likaThixo, bachukumiseka ngokunzulu koko babekufunda ngenjongo nangendlela abuya ngayo uKristu. UMzalwan’ uRussell wayibona imfuneko nokungxamiseka kokuba azise abanye ngayo. Wahlengahlengisa imicimbi yakhe ukuze atyelele kwimimandla apho kwakukho abantu awayenokuthetha nabo ngeenyaniso zeBhayibhile. Wayesiya kwiintlanganiso zonqulo aze asebenzise amathuba okuthetha nabo, njengoko uYesu wayeshumayela kwizindlu zesikhungu. Kodwa kungekudala waqonda ukuba kwakunokufezwa okungakumbi ngezinye iindlela. Ufundisiso lwakhe lweZibhalo lwabonisa ukuba uYesu nabapostile bakhe babeshumayela gqitha ngoxa babethetha ngasese nabantu ngabanye naxa babetyelela kwizindlu ngezindlu. Kwakhona, wakuqonda ukuxabiseka kokuba emva kwencoko anike abantu okuthile okushicilelweyo.

Ngowe-1877 wayesele epapashe incwadana ethi The Object and Manner of Our Lord’s Return. Kwiminyaka emibini kamva waqalisa ukupapasha rhoqo iphephancwadi elithi Zion’s Watch Tower and Herald of Christ’s Presence. Ewe, injongo yayikukushumayela, okanye ukuvakalisa, iindaba ezibalulekileyo eziphathelele ubukho bukaKristu.

Kwangowe-1881, uncwadi lwaBafundi beBhayibhile lwaluhanjiswa ngesisa kufutshane neecawa—kungekhona kanye kwiminyango yeecawa kodwa kufutshane nazo ukuze abantu ababetyekele elunqulweni bakwazi ukulufumana. ABafundi beBhayibhile abaninzi uncwadi olunjalo babelunika abantu ababeqhelene nabo okanye baluthumele ngeposi. Ngowe-1903 IMboniselo (yesiNgesi) yancomela ukuba bazabalazele ukufikelela wonk’ ubani ngokusasaza amaphecana kwizindlu ngezindlu, kunokuba banikele ingqalelo kubantu abahamba icawa. Asingabo bonke aBafundi beBhayibhile abakwenzayo oku, kodwa abaninzi basabela ngenzondelelo yokwenene. Ngokomzekelo, kwanikelwa ingxelo yokuba kwizixeko ezikhulu ezininzi eUnited States, nakwiidolophana zazo ezikumgama oziikhilomitha ezili-16 okanye ngaphezulu macala onke, kwatyelelwa phantse zonke izindlu. Izigidi zezigidi zamaphecana, okanye iincwadana, zazisasazwa ngale ndlela. Ngelo xesha inkoliso yaBafundi beBhayibhile yayinesabelo ekusasazeni iindaba ezilungileyo ikwenza oko ngokusebenzisa iindlela ezahlukahlukeneyo zokusasaza ngesisa amaphecana nolunye uncwadi.

Bambi aBafundi beBhayibhile—abambalwa ngenani—babekhonza njengabahambisi bevangeli abangoovulindlela, besebenzisa ixesha labo elininzi ngokukhethekileyo kulo msebenzi.

Oovulindlela Abanenzondelelo Bayakhokela

Isimemo sokuqala esasisiya kumadoda namabhinqa azahluleleyo awayenokusebenzisa ixesha lawo elininzi kule nkonzo sakhutshwa ngoAprili 1881. Ayeza kunikela kubaninimzi nakoosomashishini incwadi encinane ecacisa iinyaniso zeBhayibhile nomrhumo weMboniselo. Injongo yabo yayikukufuna abo babelambele inyaniso baze babakhanyisele. Kangangexesha elithile babezama ukuthetha nje okwaneleyo ukuvusa umdla, kwikhaya ngalinye beshiya ipakethe enoncwadi ukuze umninimzi aluhlolisise, baze ke babuyele kwiintsuku ezimbalwa. Bambi abaninimzi babedla ngokubuyisa uncwadi; abanye bafune ukuluthenga; ngokufuthi kwakubakho amathuba encoko. Ngokuphathelele injongo yabo, IMboniselo (yesiNgesi) yathi: “Asikokuthengisa ezo pakethe, okanye ukufumana imirhumo, kodwa kukusasaza inyaniso, ngokwenza ukuba abantu bafunde.”

Inani labo babenesabelo kulo msebenzi wokuhambisa ivangeli njengoovulindlela lalilincinane gqitha. Ebudeni beminyaka yokuqala engama-30, inani labo lalisusela kwabambalwa ukuya kwabangama-600 okanye abangaphezulwana. Aba yayingoovulindlela bokwenene, beqalisa amasimi amatsha. UAnna Andersen yayingomnye owazingisayo kule nkonzo kangangamashumi eminyaka, wayedla ngokuhamba ngebhayisekile, yaye wafikelela ngokobuqu phantse zonke iidolophu zaseNorway ngeendaba ezilungileyo. Abanye oovulindlela baya kwamanye amazwe yaye babengabokuqala ukusa isigidimi kumazwe anjengeFinland, iBarbados, iEl Salvador, iGuatemala, iHonduras neBurma (ngoku eyiMyanmar). Kwakhona kwakukho abanye ababengenako ukufudukela kweminye imimandla kodwa ababekhonza njengabahambisi bevangeli abangoovulindlela kummandla ababehlala kuwo.

Umsebenzi owawusenziwa ngoovulindlela wawubalasele. Omnye owayekhonza kunxweme olungasentshona lwaseUnited States ngowe-1898 wabhala ukuba ebudeni beenyanga ezidluleyo ezingama-33, wayehambe umgama oziikhilomitha ezili-12 800 ngehashe lakhe elitsala inqwelo, wayenikele ubungqina kwiidolophu ezingama-72, wayetyelele abantu abali-18 000, wayehambise iincwadi ezingama-4 500, wafumana imirhumo eli-125, wayesasaze amaphecana angama-40 000, yaye abantu abangama-40 abazange bamkele isigidimi kuphela kodwa baqalisa ukwabelana ngaso nabanye. Enye indoda nomfazi wayo ababekhonza eOstreliya baphumelela ukuhambisa iincwadi ezingama-20 000 kubantu abanomdla ebudeni bethuba nje leminyaka emibini enesiqingatha.

Ngaba ukuhambisa iincwadi ezininzi kwakuyinto engafane yenzeke okanye kwakuyinto eyayisenzeka rhoqo? Kaloku, ingxelo yowe-1909 ibonisa ukuba oovulindlela abanokuba ngama-625 (xa sibala bonke abo babekho ngelo xesha) babefumene kuMbutho iincwadi ezinkulu ezingama-626 981 ekwakufuneka bazihambise ebantwini (umlinganiselo wezingaphezu kwewaka kuvulindlela ngamnye), ukongezelela kuncwadi oluninzi olwaluhanjiswa ngesisa. Ngokufuthi babengakwazi ukuphatha iincwadi ezaneleyo kwindlu ngendlu, ngoko babethabatha iiodolo baze kamva babuye bazise ezo ncwadi.

Sekunjalo, bambi balandula ngelithi: “Le asiyondlela yokushumayela!” Kodwa, enyanisweni, njengoko uMzalwan’ uRussell wacacisayo, kwakuyindlela yokushumayela ephumelela gqitha. Kunokuba abantu beve intshumayelo enye, babefumana iintshumayelo ezininzi ezishicilelweyo yaye ngaloo ndlela babenokuzinandipha ngokuphindaphindiweyo ibe babenokuhlolisisa oko zazikuqulethe kwiiBhayibhile zabo. Le yayiyindlela yokuhambisa ivangeli ekwathi kuyo kwanikelwa ingqalelo kwisibakala sokuba imfundo eqhelekileyo yayibaxhobisile abantu ukuba bakwazi ukufunda. Incwadi ethi The New Creation yathi: “Isibakala sokuba aba bahambisi bevangeli besebenzisa iindlela ezisetyenziswa kumhla wethu kunokusebenzisa ezo zazisetyenziswa kwixesha elidluleyo, asiwenzi ube ngongafanelekanga lo msebenzi kanye njengokuba sinjalo isibakala sokuba behamba ngololiwe nangamandla ombane kunokuhamba ngeenyawo okanye ngeenkamela. Ivangeli ihanjiswa ngokushunyayelwa kweNyaniso . . . , iLizwi likaThixo.”

Umdla wokwenene waBafundi beBhayibhile ekuncedeni abantu wabonakaliswa ngokusebenza ngokucokisekileyo nto leyo eyathi ekuhambeni kwexesha yaba yinto ebalaselisa umsebenzi wabo wokushumayela. IMboniselo (yesiNgesi) kaMatshi 1, 1917, yandlala inkqubo ngale ndlela ilandelayo: Okokuqala, oovulindlela babeya kutyelela amakhaya kummandla othile, benikela imiqulu yeStudies in the Scriptures. Bandule ke, abasebenzi abangabalusia babuyele kubantu abanamagama abhalwe ngoovulindlela okanye abhaliswe kwiintlanganiso zesidlangalala. Babezabalazela ukuvuselela umnqweno wokufunda uncwadi, bekhuthaza abanomdla ukuba baye kwiintetho ezilungiselelwe ngokukhethekileyo, yaye babesenza umgudu wokulungiselela iiklasi zesifundo seBhayibhile samaBhereya. Xa kwakunokwenzeka, oovulindlela babedla ngokuwugubungela kwakhona ummandla omnye, baze abasebenzi abangabalusi babuyele ukuze bahlale benxibelelene nabo babonakalise umdla. Kamva, abanye abasebenzi ababekuloo klasi babedla ngokutyelela kwaloo makhaya benoncwadi olusisipho, njengoko babewabiza ngolo hlobo amaphecana nolunye uncwadi lwesisa ababelunikela. Oku kwenza ukuba wonk’ ubani ubuncinane afumane into ethile eyayisenokuvuselela umqweno wokufunda okungakumbi ngenjongo kaThixo.

Xa kwakukho uvulindlela omnye okanye ababini kuphela abakhonza kummandla othile, yaye kungekho bandla, ngokufuthi oovulindlela babewenza ngokwabo umsebenzi wokubuyela. Ngaloo ndlela, xa uHermann Herkendell neqabane lakhe baya eBielefeld, eJamani, njengoovulindlela ngowe-1908, bayalelwa ngokukhethekileyo ukuba benze abantu abanomdla kuloo mmandla bazane baze baseke ibandla. Kwiminyaka embalwa kamva, IMboniselo yakhankanya abanye oovulindlela ababenikela ingqalelo yobuqu kwabanomdla ukusa kwinqanaba lokuba babeseka iklasi yaBafundi beBhayibhile kwidolophu okanye kwisixeko ngasinye ababekhonza kuso.

Uncedo oluxabisekileyo kulo msebenzi lwanikelwa ngowe-1921 kwincwadi ethi UHadi lukaThixo. Ngokukhethekileyo le ncwadi yayiyilelwe ukuba kungenelwe abasandul’ ukuqalisa, ekugqibeleni kwasasazwa imibhalo yale ncwadi ezizi-5 819 037 ngeelwimi ezingama-22. Ukuze uncede abo babefumene le ncwadi, uMbutho walungiselela isifundo seBhayibhile sembalelwano esilungelelaniswe ngokwemixholo. Esi sifundo sasiquka amaxwebhu emibuzo ali-12, awayethunyelwa kangangethuba leeveki ezili-12. Kusetyenziswa le ncwadi, kwakhona kwenziwa amalungiselelo eengxubusho zeBhayibhile zamaqela emakhayeni abantu abanomdla. ABafundi beBhayibhile abaninzi babedla ngokuya kwisifundo esinjalo.

Noko ke, la maNgqina ayeqonda kakuhle ukuba intsimi yayinkulu yaye wona ayembalwa.—Luka 10:2.

Ukufikelela Abaninzi Ngoxa Babembalwa

IMboniselo yathi abo ngokwenyaniso babengamaKristu athanjiswe ngomoya babenembopheleleko abayinikwe nguThixo yokufuna nokunceda bonke abo bangamaKristu anyanisekileyo, enoba babengabahambi becawa okanye kwakungenjalo. (Isa. 61:1, 2) Kwakunokwenziwa njani oko?

ABafundi beBhayibhile ababini (uJ. C. Sunderlin noJ. J. Bender) ababethunyelwe eNgilani ngowe-1881 babenokuphumeza okuncinane xa bebodwa; kodwa ngoncedo lwabafana abangamakhulu ababehlawulwa ngomsebenzi ababewenza, bakwazi ukusasaza imibhalo engama-300 000 yencwadi ethi Food for Thinking Christians ngethuba nje elifutshane. UAdolf Weber, owabuyela eSwitzerland neendaba ezilungileyo phakathi kwiminyaka yee-1890, wayenentsimi enkulu eyayifikelela kumazwe aliqela awayefanele ashumayele kuyo. Wayenokuyigubungela njani yonke? Waya kwiindawo ezikude ngokobuqu njengovulindlela, kodwa kwakhona wenza izibhengezo kumaphephandaba yaye wenza amalungiselelo okuba abathengisi beencwadi baquke iimpapasho zeWatch Tower kwiincwadi ababezithengisa. Iqela elincinane laBafundi beBhayibhile eJamani ngowe-1907 lalungiselela ukuba amaphecana anamaphepha amane azizi-4 850 000 aposwe kunye namaphephandaba. Kungekudala emva kwemfazwe yehlabathi yokuqala, omnye umzalwana waseLatvia owayelilungu labasebenzi bekomkhulu loMbutho eNew York wahlawulela izibhengezo ezazenziwe kumaphephandaba kwilizwe lakhe lokuzalwa. Enye indoda eyasabela kwesinye sezo zibhengezo yaba nguMfundi weBhayibhile wokuqala eLatvia. Noko ke, ukusetyenziswa kweendlela ezinjalo zokubhengeza, akuzange kukuthabathel’ indawo ukunikela ubungqina ngokobuqu nephulo lokubafuna kwizindlu ngezindlu abo bafanelekayo. Kunoko, zazisetyenziselwa ukuvakalisa ngokubanzi.

Noko ke, kwakupapashwa okungakumbi kunezibhengezo kumaphephandaba. Ebudeni beminyaka engaphambi kweMfazwe Yehlabathi I, phantsi kokuvelelwa nguMzalwan’ uRussell, iintshumayelo zakhe zazipapashwa rhoqo. Ngethuba elifutshane, oku kwanda ngendlela emangalisayo. Amaphephandaba angaphezu kwama-2 000, afundwa ngabantu xa bebonke abazizi-15 000 000, ayethwala ezi ntshumayelo ngaxeshanye eUnited States, eKhanada, eBritani, eOstreliya naseMzantsi Afrika. Ngaba kwakunokwenziwa okungakumbi? UMzalwan’ uRussell wayecinga ngolo hlobo.

Emva kweminyaka emibini yokulungiselela, umboniso wokuqala we-“Photo-Drama of Creation” wenziwa ngoJanuwari 1914. Le-“Photo-Drama” yaboniswa ngamacandelo amane. Olu cwangciso lweeyure ezisibhozo lwaluquka imifanekiso eshukumayo neyeeslides, eyayihambisana namazwi arekhodiweyo. Yayingumboniso omangalisayo ngokwenene owawuyilelwe ukwakha uxabiso ngeBhayibhile nangenjongo kaThixo njengoko yandlalwe kuyo. Kwakulungiselelwa imiboniso ukuze ngosuku ngalunye iboniswe kwizixeko ezingama-80. Kwakusenziwa izibhengezo kusengaphambili kumaphephandaba, kwimiqondiso emininzi exhonywe ezifestileni, nangokusasazwa ngesisa koncwadi oluninzi olushicilelweyo olwaluyilelwe ukuvuselela umdla kwi-“Photo-Drama.” Naphi na apho yayiboniswa khona, yayibukelwa zizihlwele. Kungaphelanga nonyaka i-“Photo-Drama” yayibukelwe ngabantu abafikelela kwizi-8 000 000 eUnited States naseKhanada, yaye ezinye izihlwele ezininzi ezingakumbi zaziyibukela eBritani nakwilizwekazi laseYurophu naseOstreliya naseNew Zealand. I-“Photo-Drama” yalandelwa ngomnye umboniso omfutshane (owawungenayo imifanekiso eshukumayo) owawenzelwe ukuba usetyenziswe kwiidolophu ezincinane nakwimimandla esemaphandleni. Kwiilwimi ezahlukahlukeneyo lo Mboniso waqhubeka usetyenziswa ubuncinane kangangamashumi amabini eminyaka. Kwavuswa umdla kubantu abaninzi, kwakubhaliswa amagama abantu abanomdla, yaye kwakusenziwa amabuyelo.

Kwandula ke, ngeminyaka yee-1920, kwafumaneka esinye isixhobo sokusasaza ngokubanzi isigidimi soBukumkani. UMzalwan’ uRutherford wayeqinisekile ukuba isandla seNkosi sasibonakalisiwe ekulungiselelweni kwaso. Sisiphi esi sixhobo? Yayingunomathotholo. Kungaphelanga neminyaka emibini emva kokuba iziko losasazo elizimeleyo lokuqala ehlabathini liqalise ukusasaza rhoqo (ngowe-1920), uJ. F. Rutherford, umongameli weWatch Tower Society, wathetha kunomathotholo esasaza inyaniso yeBhayibhile. Esi yayisisixhobo esasinokufikelela abantu abazizigidi ngaxeshanye. Kwiminyaka emibini engakumbi, ngowe-1924, uMbutho waba neziko lawo likanomathotholo, iWBBR, elalisebenza eNew York. Ngowe-1933, unyaka ekwafikelelwa ngawo incopho, kwakusetyenziswa izikhululo ezingama-408 ukuthwala isigidimi kumazwekazi amathandathu. Ukongezelela kusasazo olwalusenziwa ngokuthe ngqo, kwakurekhodwa kwangaphambili ucwangciso ngemibandela emininzi. Ekuhlaleni kwakubhengezwa kakhulu ngokusasazwa kwezaziso ezishicilelweyo ukuze abantu bazi oko kwakuza kusasazwa baze bangenelwe kuko. Olu sasazo lwaphelisa ikhethe lwaza lwavula amehlo abantu abantliziyo zinyanisekileyo. Abantu abaninzi, ngenxa yokoyika abamelwane babo nabefundisi, babengayi kwiintlanganiso ezazilungiselelwa ngaBafundi beBhayibhile, kodwa oku akuzange kubayekise ukuphulaphula unomathotholo xa bengabonwa mntu emakhayeni abo. Usasazo aluzange luthabathele indawo imfuneko yokunikela ubungqina kwindlu ngendlu; kodwa lwaluthwalela inyaniso yeBhayibhile kwiindawo ekwakunzima ukufikelela kuzo, yaye lwaluvula amathuba amahle okuqalisa iingxubusho xa amaNgqina etyelela amakhaya ngokobuqu.

Imbopheleleko Yomntu Ngamnye Yokunikela Ubungqina

Imbopheleleko yokuba nesabelo ngokobuqu ekunikeleni ubungqina yayibethelelwa kwiMboniselo kangangamashumi eminyaka. Kodwa ukususela ngowe-1919 ukusa phambili, bekusoloko kuxutyushwa ngayo kwiimpapasho nakwiindibano. Sekunjalo, kubantu abaninzi kwakungelula ukuya ebantwini abangabaziyo ezindlwini zabo, yaye ekuqaleni libathwana laBafundi beBhayibhile kuphela elaba nesabelo rhoqo ekunikeleni ubungqina kwindlu ngendlu.

Kwakunikelwa ukhuthazo lweZibhalo oluvuyisayo. Kwinkupho yeMboniselo (yesiNgesi) ka-Agasti 1 neka-15, 1919 kwaxutyushwa umxholo othi “Basikelelwe Abangoyikiyo.” Walumkisa nxamnye nokoyika umntu, watsalela ingqalelo kubaphumi-mkhosi abangamagorha bakaGidiyon abangama-300 ababephaphile nababekulungele ukukhonza nangayiphi na indlela iNkosi eyayiyalathisa yaye phantsi kweemeko ezazibonakala zinzima gqitha, waza wancoma ukuthembela kukaElisha ngoYehova ngokungenaloyiko. (ABagwe. 7:1-25; 2 Kum. 6:11-19; IMize. 29:25) Ngowe-1921 inqaku elalinomxholo othi “Yiba Nenkalipho” labalaselisa kungekuphela nje umsebenzi kodwa ilungelo ekulilo ukukhonza ngakwicala leNkosi nxamnye nemikhosi kaSathana yobumnyama ngokuba nesabelo ekwenzeni umsebenzi owaxelwa kwangaphambili kuMateyu 24:14. Abo iimeko zabo zazibasikela umda babongozwa ukuba bangadimazeki yaye kwangaxeshanye bangarhoxobisi ekwenzeni oko banokukwenza.

Ngeengxubusho zeZibhalo ezingafihlisiyo, IMboniselo yenza bonke ababesithi bangabakhonzi bakaThixo abathanjisiweyo bayiqonda imbopheleleko yabo yokuba ngabavakalisi boBukumkani bukaThixo. Inkupho (yesiNgesi) ka-Agasti 15, 1922, yayinenqaku elifutshane nelingqalileyo elalinomxholo othi “Inkonzo Ibalulekile”—oko kukuthi, inkonzo yokuxelisa uKristu, inkonzo eyayiza kwenza ukuba ubani aye emakhayeni abantu aze abaxelele ngoBukumkani bukaThixo. Ngasekupheleni kwaloo nyaka, kwaboniswa ukuba inkonzo enjalo, ukuze ixabiseke emehlweni kaThixo, ifanele ishukunyiswe luthando. (1 Yoh. 5:3) Inqaku elalikwinkupho (yesiNgesi) kaJuni 15, 1926, lachaza ukuba uThixo akakholiswa konke konke yinkonzo yokudlulisela usana kunina; ufuna ukuthotyelwa, yaye oko kuquka ukuxabisa nayiphi na indlela ayisebenzisayo ukuphumeza injongo yakhe. (1 Sam. 15:22) Kunyaka olandelayo, xa kwakuqwalaselwa umxholo othi “Uthumo LwamaKristu Emhlabeni,” kwanikelwa ingqalelo kwindima kaYesu ‘njengengqina elithembekileyo neliyinyaniso’ nakwisibakala sokuba umpostile uPawulos washumayela “ekuhleni nakwizindlu ngezindlu.”—ISityhi. 3:14; IZe. 20:20.

Iintshumayelo ezineenkcukacha ezazenzelwe ukuba abavakalisi bazicengceleze zazibhalwa kwiBulletin, iphepha labo elaliphuma kanye ngenyanga elalinemiyalelo yenkonzo. Kwakunikelwa ukhuthazo lokuba nesabelo rhoqo kwinkonzo yasentsimini veki nganye. Kodwa inani labo babenikela ubungqina kwindlu ngendlu lalilincinane ekuqaleni, yaye bambi ababeqalisile abazange baqhubeke nalo msebenzi. Ngokomzekelo, eUnited States, ngokwesilinganiso abo babenikela iingxelo njengabo babeba nesabelo kwinkonzo yasentsimini veki nganye ngowe-1922 babengama-2 712. Kodwa ngowe-1924 eli nani lalihlile laya kuma-2 034. Ngowe-1926 esi silinganiso sanyuka saya kuma-2 261, kwabakho incopho yabangama-5 937 ababa nesabelo ngeveki enye yomsebenzi okhethekileyo.

Kwandula ke, ngasekupheleni kowe-1926, uMbutho waqalisa ukukhuthaza amabandla ukuba aquke inxalenye yangeCawa njengexesha lokunikela ubungqina njengeqela aze ngelo xesha anikele kungekuphela amaphecana kodwa kwaneencwadi zokufundisisa iBhayibhile. Ngowe-1927, IMboniselo (yesiNgesi) yakhuthaza abanyanisekileyo emabandleni ukuba basuse ezikhundleni zobudala nabani na ontetho yakhe okanye onezenzo ezazibonakalisa ukuba akayamkeli imbopheleleko yokunikela ubungqina ekuhleni nakwizindlu ngezindlu. Ngaloo ndlela, ngokungathi kunjalo, amasebe awayengathwali ziqhamo agawulwa, yaye lawo asalayo athenwa ukuze akwazi ukuthwala iziqhamo ezingakumbi ukuze kudunyiswe uThixo. (Thelekisa umzekeliso kaYesu kuYohane 15:1-10.) Ngaba oku ngokwenene kwaphumela ekubeni adunyiswe ekuhleni ngakumbi uYehova? Ngonyaka we-1928 kwabakho ulwando lwama-53 ekhulwini kwabo babesiba nesabelo ekunikeleni ubungqina iiveki ngeeveki eUnited States!

AmaNgqina ayengasabaniki iphecana lesisa kuphela abantu aze agqithele phambili. Angakumbi ayethetha nabaninimzi ngokufutshane, ezabalazela ukuvuselela umdla kwisigidimi seBhayibhile, aze abanike iincwadi ukuba bazifunde.

Ngokuqinisekileyo loo maNgqina okuqala ayenenkalipho, nangona ingengawo onke awayenobuchule. Sekunjalo, ahlala ahlukile kwamanye amaqela onqulo. Akazange nje athi ngamnye ufanele anikele ubungqina ngokholo lwakhe. Ngamanani awayesanda ngokuqhubekayo, ayekwenza oko ngokoqobo.

Amaqweqwe Obungqina Neegramafoni

Ngasekupheleni kowe-1933 kwaqaliswa enye indlela eyahlukileyo yokushumayela. Njengentshayelelo, amaNgqina ayenika abantu iqweqwe lobungqina elalinesigidimi esifutshane esasifanele sifundwe ngumninimzi. Oku kwakuluncedo gqitha ngokukodwa kubavakalisi abasebatsha, ababengazange bafumane uqeqesho olungako ngaloo mihla. Ngokuqhelekileyo, babesithi gqaba gqaba nje ngokufutshane nomninimzi emva kokuba lifundiwe iqweqwe; bambi babethetha ixesha elide, besebenzisa iBhayibhile. Amaqweqwe obungqina aqhubeka esetyenziswa de kwaphakathi kwiminyaka yee-1940. Ayebangela ukuba intsimi igutyungelwe ngokukhawuleza, yaye esenza ukuba amaNgqina afikelele abantu abangakumbi, adlulisele ebantwini abaninzi uncwadi lweBhayibhile oluxabiseke kakhulu, anikele ubungqina obufanayo yaye anikele isigidimi nakubantu angakwaziyo ukuthetha ulwimi lwabo. Kwakhona kwakuphumela nakwezinye izihlandlo eziphoxayo xa abaninimzi babelithabatha iqweqwe baze bavale iminyango yabo, besenza ukuba iNgqina liphinde linkqonkqoze ukuze lilifumane!

Neentetho zeBhayibhile ezirekhodiweyo zaba nendima ebalulekileyo ebudeni beminyaka yee-1930 nasekuqaleni kweminyaka yee-1940. Ngowe-1934 amanye amaNgqina aqalisa ukuphatha igramafoni encinane xa esiya kunikela ubungqina. Lo matshini wawunzima, ngoko babesenokuwubeka kwinqwelo-mafutha yabo okanye bawushiye kwindawo efanelekileyo de bafumane abantu ababekulungele ukuphulaphula intetho yeBhayibhile erekhodiweyo. Kwandula ke, ngowe-1937, kwaqalisa ukuba kusetyenziswe igramafoni kanye emnyango. Oku kwakulula: Emva kokuchaza ukuba lalinesigidimi seBhayibhile esibalulekileyo, iNgqina lalidlala icwecwe. UKasper Keim, uvulindlela waseJamani owayekhonza eNetherlands, wayenombulelo gqitha ngo-“Aron” wakhe, njengoko wayeyibiza ngolo hlobo igramafoni, kuba wayekufumanisa kunzima ukunikela ubungqina ngesiDatshi. (Thelekisa iEksodus 4:14-16.) Ngenxa yokufuna ukubona okwakuqhubeka maxa wambi iintsapho ziphela zaziwaphulaphula la macwecwe.

Ngowe-1940, kwakusetyenziswa iigramafoni ezingaphezu kwama-40 000. Ngaloo nyaka amaNgqina ayila aza enza uhlobo olutsha olume nkqo, yaye lwalusetyenziswa ngokukodwa kumazwe aseMerika. Lwavusa umdla ongakumbi kuba abaninimzi babengenako ukulibona icwecwe ngoxa lalidlala. Icwecwe ngalinye lalijikeleza izihlandlo ezingama-78 ngomzuzu yaye lalidlala kangangemizuzu emine enesiqingatha. Imixholo yayimifutshane yaye ingqalile: “UBukumkani,” “Umthandazo,” “Indlela Esa Ebomini,” “UBathathu Emnye,” “INtlambululo-miphefumlo,” “Isizathu Sokuba Abefundisi Beyichasa Inyaniso.” Kwarekhodwa iintetho ezahlukahlukeneyo ezingaphezu kwama-90; kwakusetyenziswa amacwecwe angaphezu kwesigidi. Iintshumayelo zazicacile yaye kulula ukuziqonda. Abaninimzi abaninzi babephulaphula ngoxabiso; abambalwa babesabela ngogonyamelo. Kodwa kwakunikelwa ubungqina obuphumelelayo nobufanayo.

Ukuvakalisa Ngenkalipho Iindaba Ezilungileyo Ekuhleni

Nangona okuninzi “kwakuthethwa” ngamaqweqwe obungqina namacwecwe eegramafoni, kwakufuneka inkalipho egqithiseleyo ukuba ube liNgqina ngaloo minyaka. Lo msebenzi wawufuna ukuba iNgqina ngalinye liye ebantwini.

Emva kwendibano yowe-1931 eColumbus, eOhio, amaNgqina kaYehova asasaza incwadana ethi The Kingdom, the Hope of the World, eyayinesigqibo esasinomxholo othi “Isilumkiso Esivela KuYehova” esasibhekiswe “Kubalawuli Nakubantu.” Ayeqonda ukuba njengamaNgqina kaYehova, ayenembopheleleko enzulu yokuvakalisa isilumkiso esandlalwe eLizwini lakhe. (Hez. 3:17-21) Akazange nje azipose ezo ncwadana okanye azifake phantsi kweminyango. Ayezihambisa ngokobuqu. Ayesiya kubo bonke abefundisi yaye, kangangoko ayenako, kwabezobupolitika, kumagosa omkhosi nakubalathisi bamashishini amakhulu. Ukongezelela, ayesiya ebantwini ngokubanzi kumazwe anokuba likhulu amaNgqina kaYehova ngoko awayenikela ubungqina ngokulungelelanisiweyo kuwo.

Ngowe-1933 ayesebenzisa iigramafoni ezinamandla ukudlala amacwecwe eentetho zeBhayibhile ezingqalileyo kwiindawo zikawonke wonke. UMzalwan’ uSmets noPoelmans babezikhwelisa izixhobo zabo kwinqwelo enamavili amathathu baze beme ecaleni kwazo ngoxa zivakalisa isigidimi kwiindawo zentengiso nakufutshane neecawa eLiège, eBelgium. Ngokufuthi babedla ngokuhlala apho kangangeeyure ezilishumi ngosuku. Abantu baseJamaica babehlanganisana ngokukhawuleza xa besiva umculo, ngoko abazalwana apho babeqala badlale umculo. Xa izihlwele zaziphuma kwimimandla esemahlathini zithontelana ukuza kwiindlela ezinkulu ukuza kubona oko kwakuqhubeka, zazifumana amaNgqina kaYehova evakalisa isigidimi soBukumkani.

Ezinye iigramafoni zazifakelwa kwiinqwelo-mafutha nakumaphenyane, nezandisi-lizwi ngaphezulu ukwenzela ukuba ilizwi livakale kude. UBert noVi Horton, eOstreliya, babesebenzisa inqwelo-mafutha eyayinesandisi-lizwi esikhulu ngaphezulu esasibhalwe la magama “Isigidimi SoBukumkani.” Ngomnye unyaka baphantse bazizalisa zonke izitrato zaseMelbourne ngesigidimi esasilubhenca ngokuqatha unqulo lobuxoki nangenkcazelo yeentsikelelo zoBukumkani bukaThixo. Ebudeni baloo minyaka uClaude Goodman wayenguvulindlela eIndiya. Ukusebenzisa inqwelo-mafutha enesandisi-lizwi, namacwecwe angeelwimi zasekuhlaleni, kwamenza wakwazi ukufikelela izihlwele ezikhulu kwiindawo zentengiso, kwiipaki, ecaleni kwendlela—naphi na apho kwakufumaneka khona abantu.

ELebanon xa abazalwana bamisa inqwelo-mafutha yabo enesandisi-lizwi endulini baza basasaza iintetho, isandi sasivakala ezintlanjeni. Abantu ababekwezo dolophana, bengaboni apho livela khona ilizwi, maxa wambi babesoyika, becinga ukuba uThixo wayethetha nabo esemazulwini!

Noko ke, ngezihlandlo ezimbalwa abazalwana babejamelana nobunzima. Ngesinye isihlandlo, eSiriya, omnye umfundisi wakwenye idolophana washiya isidlo sakhe etafileni, wathabatha intonga yakhe enkulu yokusimelela, waza wabaleka waphuma waya kwisihlwele esasihlanganisene ukuza kuphulaphula intetho yeBhayibhile eyayisasazwa kwinqwelo-mafutha enesandisi-lizwi. Ephakamisa intonga yakhe ngomsindo yaye ekhwaza, wayalela wathi: “Cimani! Ndithi cimani loo nto!” Kodwa abazalwana baqonda ukuba asinguye wonk’ ubani owayevumelana naye; kwakukho abo babefuna ukuphulaphula. Kungekudala, bambi ababekweso sihlwele ngenkalipho bamthabatha lo mfundisi baza bamthwala bambuyisela endlwini yakhe, bafika bambeka kwitafile yokutyela! Phezu kwako nje ukuchaswa ngabefundisi, amaNgqina ngenkalipho aqinisekisa ukuba abantu bayalifumana ithuba lokuva.

Kwakhona ebudeni beli thuba kwakusetyenziswa kakhulu iiplacards ezinezibhengezo ezazinxitywa ngamaNgqina kwimimandla yamashishini ngoxa ayesasaza izimemo zeentetho ezikhethekileyo. Oku kwaqalisa ngowe-1936 eGlasgow, eSkotlani. Kwangaloo nyaka kwasetyenziswa indlela efanayo yokubhengeza eLondon, eNgilani kwaza kwalandela neUnited States. Kwiminyaka emibini kamva ukubhengeza ngolo hlobo kwandiswa ngokuphakanyiswa kwemiqondiso phezulu kusetyenziswa iintonga. Le miqondiso yayivakalisa oku, “Unqulo Lusisabatha Nesirhintyelo”b nokuthi, “Khonza UThixo NoKristu UKumkani.” Ngexesha lendibano, umngcelele wabo babephethe le miqondiso wawusenokuba ziikhilomitha eziliqela ubude. Njengoko babehamba ngokuzolileyo, benze umngcelele, ecaleni kwezitrato ezinabantu abaninzi, umphumo wawusiba njengalowo womkhosi wakwaSirayeli wamandulo owawujikeleza iYeriko ngaphambi kokudilika kweendonga zayo. (Yosh. 6:10, 15-21) Ukususela eLondon, eNgilani, ukusa eManila, kwiiPhilippines, kwakunikelwa ubungqina ekuhleni ngenkalipho ngolo hlobo.

Sekunjalo kwaqaliswa enye indlela yokunikela ubungqina ekuhleni ngowe-1940. Ngokuvisisana nesibhalo esithi ‘ubulumko bumemeza ezitratweni,’ ngoFebruwari waloo nyaka amaNgqina kaYehova aqalisa ukusasaza ezitratweni IMboniselo neConsolation (ngoku eyaziwa ngokuba nguVukani!).c (IMize. 1:20) Ayedla ngokukhwaza amazwi awayetsalela ingqalelo kula maphephancwadi nakwisigidimi esikuwo. Kwizixeko ezikhulu nakwiidolophu ezincinane kuyo yonke imimandla yehlabathi, kuye kwayinto eqhelekileyo ukubona amaNgqina kaYehova enikela amaphephancwadi awo. Kodwa ukwenza loo msebenzi kufuna inkalipho, yaye yayifuneka ngokukodwa loo nkalipho xa kwakuqaliswa lo msebenzi, kuba ngelo xesha ayetshutshiswa gqitha yaye kugquba nomoya wobuhlanga wexesha lemfazwe.

Xa ayalelwa ukuba abe nesabelo ekunikeleni ubungqina esidlangalaleni ngolo hlobo, amaNgqina asabela ngokholo. Inani labo babeba nesabelo ngokobuqu kulo msebenzi laqhubeka lisanda. Ayekugqala kulilungelo ukubonakalisa ingqibelelo yawo kuYehova ngale ndlela. Kodwa kwakusekho okungakumbi awayefanele akufunde.

Ngamnye Ufanele Akwazi Ukucacisa Ukholo Lwakhe

Ngowe-1942 kwaqaliswa inkqubo yemfundo ebalaseleyo. Yaqalisa kwikomkhulu lehlabathi lamaNgqina kaYehova, yaye kunyaka olandelayo, yaqalisa ukusetyenziswa kumabandla amaNgqina emhlabeni wonke. Enentembelo yokuba ayenomoya kaThixo nokuba wayebeke ilizwi lakhe emilonyeni yawo, ayezimisele ukulishumayela elo lizwi nakuba abo babewatshutshisa babewahlutha iimpapasho zeWatch Tower okanye kwaneBhayibhile. (Isa. 59:21) Kwakusele kukho amazwe, njengeNigeria, apho amaNgqina ayenokusebenzisa iBhayibhile kuphela xa eshumayela, ekubeni urhulumente wayeluvalile lonke uncwadi lweWatch Tower yaye ethimbe iimpapasho ababenazo abazalwana abaninzi kumathala abo obuqu.

NgoFebruwari 16, 1942, uMzalwan’ uKnorr wasungula izifundo ezikumgangatho ophakamileyo kubulungiseleli bobuthixo kwiKhaya laseBheteli eBrooklyn, eNew York. Ezi zifundo zanikela imiyalelo kwimibandela enjengokuphanda, ukuthetha ngokucacileyo nangokuchanileyo, ukwenza ulwandlalo lokunikela iintetho, ukunikela iintetho ngokuphumelelayo, ukunikela iingcamango ngendlela eyeyisayo nokuba nobuchule. Abazalwana noodade babevumelekile ukuba bangakho, kodwa ngamadoda kuphela awamenywa ukuba abhalise aze anikele iintetho zabafundi awayeya kululekwa ngazo. Iingenelo zabonakala ngokukhawuleza kungekuphela ekuthetheni eqongeni kodwa kwanasekuphumeleleni kakhulu ekushumayeleni kwindlu ngendlu.

Kunyaka olandelayo esi sikolo saqaliswa kumabandla asekuhlaleni amaNgqina kaYehova ehlabathini lonke. Ekuqaleni sasiqhutywa ngesiNgesi, saza saqhutywa nangezinye iilwimi. Injongo yesi sikolo yayikukunceda iNgqina likaYehova ngalinye likwazi ukufundisa abanye xa lityelela abantu kwizindlu ngezindlu, xa lisenza amabuyelo naxa liqhuba izifundo zeBhayibhile. Ngqina ngalinye laliza kuncedwa libe ngumlungiseleli ofanelekileyo. (2 Tim. 2:2) Ngowe-1959, noodade banikwa ithuba lokuba babhalise kwesi sikolo baze banikele iintetho ngendlela ekwenziwa ngayo kubulungiseleli basentsimini—banganikeli intetho kubo bonke abaphulaphuli kodwa, kunoko, bathethe nalowo wabelwe ukuba abe ngumninimzi. Ibe kwakungaphelelanga apho.

Ukususela ngowe-1926, abameli abahambahambayo boMbutho babesebenza neNgqina ngalinye kwinkonzo yasentsimini, ukuze bawancede aphucule ubuchule bawo. Noko ke, kwindibano yezizwe ngezizwe eyayiseNew York ngowe-1953, abaveleli besiphaluka nabesithili behleli ngaphambili eqongeni, uMzalwan’ uKnorr wathi umsebenzi ophambili wazo zonke izicaka, okanye abaveleli, ufanele ube kukunceda iNgqina ngalinye libe ngumlungiseleli othe rhoqo kwindlu ngendlu. Wathi, “Wonk’ ubani ufanele akwazi ukushumayela iindaba ezilungileyo kwindlu ngendlu.” Kwaqaliswa iphulo lokuphumeza oku ehlabathini lonke.

Kwakutheni kugxininiswa ngolo hlobo kulo mbandela? Ngokomzekelo khawuqwalasele elaseUnited States: Ngelo xesha amaNgqina angama-28 ekhulwini ayephelela ekusasazeni izimemo okanye eme ezitratweni ephethe amaphephancwadi. Yaye amaNgqina angaphezu kwama-40 ekhulwini ayexhiphulisa kwinkonzo yasentsimini, eyeka kude kuqengqeleke iinyanga enganikelanga bungqina kwaphela. Kwakufuneka uncedo lothando ngendlela yokuba baqeqeshwe ngokobuqu. Kwenziwa amalungiselelo awayeza kwenza onke amaNgqina kaYehova awayengekabi ngamaNgqina asebenza kwindlu ngendlu ancedwe ekuthetheni nabantu ezindlwini zabo, ethetha nabo esebenzisa iBhayibhile, yaye ephendula imibuzo yabo. Ayeza kufunda ukulungiselela iintshumayelo zeZibhalo awayeza kuzinikela mhlawumbi ngemizuzu emithathu kubantu abaxakekileyo, okanye ngemizuzu esibhozo kwabanye. Injongo yayikukunceda iNgqina ngalinye libe ngumhambisi wevangeli ongumKristu oqolileyo.

Yayingengobaveleli abahambahambayo kuphela ababefundisa ngolu hlobo. Izicaka zasekuhlaleni, okanye abaveleli, nabo babefundisa; yaye kwiminyaka eyalandelayo, namanye amaNgqina afanelekayo abelwa ukuqeqesha abathile. Kangangeminyaka, kwakusenziwa imiboniso ngendlela yokwenza lo msebenzi kwiNtlanganiso Yenkonzo yebandla yeeveki ngeeveki. Kodwa ngoku oku kwakuquka ukubethelelwa kakhulu koqeqesho lobuqu entsimini.

Imiphumo yayimangalisa. AmaNgqina awayeshumayela kwindlu ngendlu anda, nabo babenenxaxheba rhoqo kubulungiseleli basentsimini. Kungaphelanga neminyaka elishumi amaNgqina ehlabathini lonke anda nge-100 ekhulwini. Kwakhona ayesenza amabuyelo angakumbi kangange-126 ekhulwini ukuze aphendule imibuzo yeBhayibhile yabantu abanomdla, yaye ayeqhubela izifundo ezingakumbi zeBhayibhile zamakhaya rhoqo ezili-150 ekhulwini abo babebonakalise ukulambela inyaniso yeBhayibhile. Ngokwenyaniso ayezingqina engabalungiseleli abafanelekileyo.

Ngenxa yeemvelaphi ezahlukahlukeneyo ngokwemfundo nangokwesithethe zala maNgqina, nesibakala sokuba ayesasazeke ngamaqela amancinane kuwo wonke umhlaba, sicacile isizathu sokuba amaNgqina engazukisi nawuphi na umntu, kodwa ezukisa uYehova uThixo ngendlela aye axhotyiswa aza aqeqeshwa ngayo ukuze avakalise iindaba ezilungileyo.—Yoh. 14:15-17.

Ukushumayela Kwindlu Ngendlu—Uphawu Olwahlulayo

Maxa wambi amanye amaqela onqulo aye akhuthaza amarhamente awo ukuba aye emakhayeni abantu ekuhlaleni ukuze athethe nabo ngonqulo. Bambi baye bakuzama oko. Abanye basenokukwenza oko njengabahambisi bevangeli kangangeminyaka eliqela, kodwa baphinde bakuyeke. Noko ke, kuphakathi kwamaNgqina kaYehova kuphela apho bonke, abancinane nabakhulileyo, amadoda nabafazi, benenxaxheba unyaka wonke, kubulungiseleli bendlu ngendlu. NgamaNgqina kaYehova kuphela azabalazela ngokwenyaniso ukugubungela elimiweyo liphela ngesigidimi soBukumkani, ethobela umyalelo osisiprofeto okuMateyu 24:14.

Asikokuba onke amaNgqina kaYehova awufumanisa lo msebenzi ulula.d Ngokwahlukileyo koko, amaninzi, xa aqalisa ukufundisisa iBhayibhile, ayesithi: ‘Inye into endingasoze ndiyenze, yaye loo nto kukuya kwindlu ngendlu!’ Kodwa, ngumsebenzi phantse onke amaNgqina kaYehova anesabelo kuwo ukuba impilo iyawavumela ukuba enjenjalo. Yaye amaninzi angakwaziyo ukuwenza ngenxa yempilo awenza ngezinye iindlela—ekwizihlalo ezinamavili, ehamba ngemisimelelo, njalo njalo. Amanye—angakwaziyo ukuphuma kwaphela emakhayeni awo, okanye avalelekileyo okwexeshana, okanye ukuze afikelele abantu abangenakufikelelwa ngezinye iindlela—anikela ubungqina ngomnxeba okanye ngokubhala iileta. Kutheni esenza lo mgudu wokuzimisela?

Njengoko efikelela ekumazini uYehova, uthando lwawo ngaye luyayiguqula imbono yawo ngobomi. Afuna ukuthetha ngaye. Izinto ezimangalisayo azibekele abo bamthandayo zilunge gqitha ukuba angangathethi ngazo. Yaye avakalelwa kukuba anembopheleleko phambi koThixo yokulumkisa abantu ngembandezelo enkulu esemnyango. (Mat. 24:21; thelekisa uHezekile 3:17-19.) Kodwa kutheni ekwenza oko ngokuya kwindlu ngendlu?

Ayazi ukuba uYesu wafundisa abafundi bakhe ukuba baye emakhayeni abantu ukuze bashumayele baze bafundise. (Mat. 10:11-14) Ayaqonda ukuba emva kokuba umoya oyingcwele uthululwe ngePentekoste yowama-33 C.E., abapostile baqhubeka bengayeki ukuvakalisa iindaba ezilungileyo “etempileni [eYerusalem] nakwizindlu ngezindlu.” (IZe. 5:42, NW) INgqina ngalinye liyazazi IZenzo 20:20, ezithi umpostile uPawulos wafundisa “ekuhleni nakwizindlu ngezindlu.” Yaye kula maxesha anamhlanje abona ubungqina obuninzi bokuba uYehova uyawusikelela lo msebenzi. Ngaloo ndlela, njengoko efumana amava kubulungiseleli bendlu ngendlu, umsebenzi awayewoyika ngaxa lithile ngokufuthi uba yinto ayilangazelelayo.

Yaye awenza ngokucokisekileyo. Agcina iingxelo ngenyameko ukuze abuyele athethe naye nabani na obengekho ekhaya. Akenzi oko kuphela, kodwa atyelela ngokuphindaphindiweyo kwikhaya ngalinye.

Ngenxa yokuphumelela kobulungiseleli bendlu ngendlu, abachasi kumazwe amaninzi baye bazama ukubuphelisa. Ukuze ahlonelwe ngabasemagunyeni ngelungelo lawo lokushumayela kwindlu ngendlu, amaNgqina kaYehova aye enza izicelo kwabesemagunyeni eburhulumenteni. Xa kuyimfuneko, aye aya enkundleni ukuze afumane ngokusemthethweni ilungelo lokusasaza iindaba ezilungileyo ngale ndlela. (Fil. 1:7) Yaye apho oorhulumente abacinezelayo baye bazingisa ekuwuvaleni lo msebenzi, maxa wambi amaNgqina kaYehova aye awenza ngokufihlakeleyo okanye, ukuba kuyimfuneko, aye asebenzisa ezinye iindlela zokufikelela abantu ngesigidimi soBukumkani.

Nangona kuye kwasetyenziswa unomathotholo nomabonwakude ukusasaza isigidimi soBukumkani, amaNgqina kaYehova ayazi ukuba ukudibana nabantu ngokobuqu ngokutyelela kwizindlu ngezindlu kuphumelela gqitha. Kuvula ithuba elilunge ngakumbi lokuphendula imibuzo yomninimzi ngamnye nelokufuna abo bafanelekayo. (Mat. 10:11) Eso sesinye sezizathu ezabangela ukuba, ngowe-1957, iWatch Tower Society isithengise isikhululo sikanomathotholo iWBBR eNew York.

Noko ke, emva kokuba aye anikela ubungqina ngokobuqu ebantwini, amaNgqina kaYehova akavakalelwa kukuba umsebenzi wawo uphelile. Eso isesisiqalo nje.

‘Yenzani Abafundi . . . Nibafundisa’

UYesu wayalela abalandeli bakhe ukuba benze okungakumbi kunokushumayela. Bexelisa yena, nabo bafanele bafundise. (Mat. 11:1) Ngaphambi kokunyukela kwakhe ezulwini, wabayalela wathi: “Hambani ngoko niye kuzenza abafundi zonke iintlanga, . . . nibafundisa ukuba bazigcine zonke izinto endiniwisele umthetho ngazo.” (Mat. 28:19, 20) Ukufundisa (di·daʹsko, ngesiGrike) kwahlukile ekushumayeleni kuba umfundisi wenza okungakumbi kunokuvakalisa; uyayalela, acacise, anikele ubungqina.

IMboniselo, (yesiNgesi) kwangoAprili 1881, yanikela amacebiso amafutshane ngendlela yokufundisa. Abanye oovulindlela bokuqala babeqinisekisa ukuba baya buyela kwabo babebonakalise umdla, ukuze babakhuthaze bafunde iincwadi zoMbutho baze bahlanganisane nabanye ukwenzela isifundo esithe rhoqo seLizwi likaThixo. Ngokufuthi incwadi ethi UHadi lukaThixo (eyapapashwa ngowe-1921) yayisetyenziselwa loo njongo. Noko ke, ekuhambeni kwexesha, kwenziwa okungakumbi ekunikeleni ingqalelo yobuqu kwabanomdla. Iintetho zeBhayibhile ezirekhodiweyo neencwadi ezishicilelweyo ezincedayo ekufundisiseni zazisetyenziswa kakhulu kulo msebenzi. Oko kwaqalisa njani?

Ukususela ekuqaleni kowe-1933, uMbutho wathabathel’ indawo ukusasaza ngonomathotholo ngeentetho ezirekhodiweyo ezazidlalwa kwigramafoni encinane kwiiholo zeentlanganiso, kwiipaki, kumasango emizi-mveliso, njalo njalo. Kwithuba nje elifutshane, amaNgqina awayefumene abantu abanomdla xa etyelela kwindlu ngendlu ayesenza amalungiselelo okubuyela aze abadlalele ezinye zezi ntetho zirekhodiweyo emakhayeni abo. Xa kwafumaneka incwadi ethi Ubutyebi ngowe-1936, kwakusetyenziswa iingxubusho ezazikuyo, emva kokuba kudlalwe iintetho ezirekhodiweyo, ngenjongo yokuqalisa izifundo ekwakuza kuza kuzo abantu ababenomdla kuloo mmandla. Kwagxininiswa kulo msebenzi ngakumbi ngenjongo yokunceda abo babeza kuba ngamalungu ‘endimbane enkulu’ ukuba bafunde inyaniso.—ISityhi. 7:9, KJ.

Malunga nelo xesha, abefundisi bamaKatolika baphembelela abo babenamaziko kanomathotholo nabo babewalawula namagosa aseburhulumenteni ngomgudu wokuphelisa ukusasazwa kweenkqubo zeWatch Tower. Isicelo esatyobelwa ngabantu abazizi-2 630 000 eUnited States sacela ukuba kubekho ingxoxo yasekuhleni phakathi koJ. F. Rutherford negosa eliphezulu leCawa yamaRoma Katolika. Akukho namnye umfundisi kubefundisi bamaKatolika owayekulungele ukulwamkela olo celomngeni. Ngoko, ngowe-1937, uMzalwan’ uRutherford warekhoda intetho enomxholo othi “Ibhenciwe” nothi “Unqulo NobuKristu,” ezazinikela iimfundiso ezisisiseko zeBhayibhile, ngokuyintloko ezazizingqina zibubuxoki iimfundiso zamaKatolika ezingezizo ezezibhalo. Umbandela ofanayo wapapashwa kwincwadana ethi Ikhusi nethi Zityhiliwe, incwadana ethi Zityhiliwe yasasazwa ngokobuqu kuye wonk’ ubani owayetyobele eso sicelo ukuze abantu bazifundele ngokwabo iinyaniso zeBhayibhile abefundisi bamaKatolika ababezama ukuzifihla.

Ukuze kuncedwe abantu bayibone ngokucacileyo le mibandela baze bahlolisise ukuma kweZibhalo ngayo, kwashicilelwa incwadana ethi Model Study No. 1 ukuze isetyenziswe kwiintlanganiso ezazilungiselelwe abantu abanomdla. Le ncwadana yayinemibuzo, iimpendulo nezibhalo ezixhasa iimpendulo ezinikelweyo. Okokuqala, umqhubi wayedlala icwecwe elinye okanye angakumbi anezi ntetho zirekhodiweyo zikhankanyiweyo ukuze wonk’ ubani akwazi ukuphulaphula yonke into ekuthethwa ngayo. Kwakusandula ke kulandele ingxubusho, kusetyenziswa umbandela onikelwe kwincwadana ethi Model Study baze bahlolisise nezibhalo. Incwadana ethi Model Study No. 1 yalandelwa nguNo. 2 no 3, ezazihambisana nezinye iintetho ezirekhodiweyo. Ekuqaleni ezi zifundo zazilungelelaniswa kwiindawo ayehlanganisana kuzo amaqela abantu abanomdla, kodwa kungekudala zaziqhutywa nabantu ngabanye kunye neentsapho.

Ukususela ngelo xesha kuye kwalungiselelwa iincwadi ezininzi ezibalaseleyo ezenzelwe ngokukodwa ukuba zisetyenziswe ngamaNgqina kaYehova ekuqhubeni izifundo zeBhayibhile zamakhaya. Ezo ziye zahanjiswa kakhulu zezi “UThixo MaKabe NgoneNyaniso,” INyaniso eKhokelela kuBomi ObungunaPhakade, nethi Unokuphila Ngonaphakade KwiParadisi Esemhlabeni. Kwakhona bekukho iincwadana ezinamaphepha angama-32—“Ezi Ndaba Zilungileyo Zobukumkani,” INdlela kaThixo luThando, “Khangela! Izinto Zonke Ndizenza Ntsha,” nezinye ezininzi. Ezi zalandelwa ziincwadana ezinemifanekiso ezinjengethi Bunandiphe Ubomi Ngonaphakade Emhlabeni!, equlethe inkcazelo yeemfundiso ezisisiseko zeBhayibhile elula gqitha nekulula ukuyiqonda.

Ukusetyenziswa kwezi zixhobo, nokuqeqeshwa njengebandla nangokobuqu, kuye kwaphumela kulwando olubalaseleyo kwinani lezifundo zeBhayibhile zamakhaya eziqhutywayo. Ngowe-1950, izifundo zeBhayibhile zamakhaya, ngokufuthi ezaziqhutywa veki nganye, ngokwesilinganiso zazingama-234 952. Izifundo ezazingenzi nkqubela yaneleyo zaziyekwa. Izifundo ezininzi zenza inkqubela ukusa kwinqanaba lokuba nazo zibe ngabafundisi. Phezu kwako nje oku, inani lezifundo liye laqhubeka lisanda, ngokufuthi belisanda ngokukhawuleza. Ngowe-1992, amaNgqina ebeqhuba izifundo zeBhayibhile zamakhaya ezizizi-4 278 127 ehlabathini lonke.

Ukuze aphumeze lo msebenzi mkhulu wokushumayela nokufundisa, kwiilwimi ezithethwa kuwo wonke umhlaba, amaNgqina kaYehova aye alusebenzisa kakhulu uncwadi olushicilelweyo. Oku kuye kwafuna ukuba kwenziwe umsebenzi omkhulu wokupapasha.

[Footnote]

[Blurb on page 556]

Naphi na apho wayefumana khona abantu, uYesu wayethetha nabo ngenjongo kaThixo ngoluntu

[Blurb on page 559]

Intsikelelo Ekhethekileyo Kumsebenzi Wendlu Ngendlu

“Ngokufanayo nangexesha lobukho bayo bokuqala [“advent”], umsebenzi wendlu ngendlu, kunokushumayela eqongeni, ubonakala usikelelwa ngokukhethekileyo yiNkosi.”—“IMboniselo” (yesiNgesi), kaJulayi 15, 1892.

[Box on page 570]

Isizathu Sokuba AmaNgqina Equqa Ebuyelela

Ichaza isizathu sokuba amaNgqina kaYehova equqa ebuyelela kwikhaya ngalinye, “IMboniselo” kaJanuwari 1, 1963 (NgesiNgesi, Julayi 1, 1962), yathi: “Iimeko ziyaguquka. Namhlanje umntu usenokuba akakho ekhaya, kodwa kwixesha elilandelayo usenokubakho. Namhlanje usenokuba uxakeke gqitha ukuba angaphulaphula, kodwa kwixesha elilandelayo usenokuba akaxakekanga. Namhlanje elinye ilungu lentsapho likuvulela emnyango, kwixesha elilandelayo uvulelwa lelinye ilungu; yaye amaNgqina axhalabele ukufikelela kungekuphela nje indlu nganye kwizabelo zawo kodwa kwakhona, ukuba kunokwenzeka, mntu ngamnye oqolileyo kwikhaya ngalinye. Ngokufuthi iintsapho ziyahlulelana ngokonqulo, ngoko akusoloko kusenzeka ukuba elinye ilungu lithethele intsapho iphela. Ngaphandle koko, abantu basoloko befuduka yaye ngenxa yoko amaNgqina awanakuqiniseka ukuba aya kudibana nabani kumnyango othile.

“Ayizomeko kuphela eziguqukayo, kodwa kwanabantu bayaguquka. . . . Ngenxa yento engenamsebenzi umntu usenokuba ebengonwabanga yaye ebengakulungelanga kwaphela ukuxubusha ngonqulo okanye nangantoni na eyenye kungakhathaliseki ukuba kungena bani emnyango, kodwa akukho sengqiqweni ukwenza isigqibo sokuba nangelinye ixesha uya kuba ekwisimo sengqondo esinjalo. Okanye, ngenxa nje yokuba umntu wayengenamdla kwaphela ekuxubusheni ngonqulo kwinyanga edluleyo oko akuthethi ukuba kule nyanga akakabi nawo. Ukususela ngexesha elidluleyo iNgqina belithethe naye lo mntu usenokuba uye wanengxaki eye yamkhathaza okanye ngenye indlela uye wafunda into eye yamenza wathobeka kunokuba abe nekratshi, yamenza wayilambela waza wayiphaphela intswelo yakhe yokomoya kunokuba aneliseke ngesiqu sakhe.

“Ngaphezu koko, isigidimi samaNgqina sivakala singaqhelekanga kubantu abaninzi yaye bayasilela ukuqonda ukungxamiseka kwaso. Kuphela kungokusiva ngokuphindaphindiweyo abathi ngokuthe ngcembe basiqonde.”

[Box/Picture on page 574]

Ukusebenzisa “Zonke Iindlela”

“Thina bakwintlangano yeNkosi siye sazama, ngazo zonke iindlela, ukwalathisela ingqalelo [yehlabathi] kwisigidimi sobomi. Siye sasebenzisa amazwi athile, izibhengezo ezibhalwe kwiphepha lonke, unomathotholo, iinqwelo-mafutha ezinesandisi-lizwi, iigramafoni, iindibano ezinkulu, imingcelele yabantu abaphethe imiqondiso, nomkhosi owandayo wabalungiseleli bendlu ngendlu. Ngalo msebenzi bekusahlulwa abantu—kwelinye icala abo bangakuBukumkani bukaThixo obumiselweyo, kwelinye icala ingabo babuchasayo. Lo ngumsebenzi owaxelwa kwangaphambili nguYesu ukuba uya kwenziwa kwisizukulwana endiphila kuso.”—Oku kwabhalwa ngowe-1987 nguMelvin Sargent, eneminyaka engama-91 ubudala.

[Umfanekiso]

UMelvin Sargent

[Graph on page 574]

(For fully formatted text, see publication)

Ulwando Lwezifundo ZeBhayibhile Zamakhaya

4 000 000

3 000 000

2 000 000

1 000 000

1950 1960 1970 1980 1992

[Pictures on page 557]

Kwasasazwa ngesisa amashumi ezigidi ala maphecana, kufutshane neecawa, kwizindlu ngezindlu nangeposi

[Pictures on page 558]

Abahambisi bevangeli abangoovulindlela basasaza iincwadi ezicacisa iBhayibhile

[Picture on page 559]

UAnna Andersen wazifikelela phantse zonke iidolophu zaseNorway ngoncwadi lweBhayibhile

[Pictures on page 560]

Izibhengezo zamaphephandaba zanceda ukufikelela abantu ababengafikelelwa ngezinye iindlela

[Pictures on page 561]

Amaphephandaba angaphezu kwama-2 000 kumazwekazi amane ayethwala iintshumayelo zikaMzalwan’ uRussell ngaxeshanye

[Pictures on page 562]

I-“Photo-Drama of Creation” yanikela ubungqina obunamandla kwizigidi zabantu kumazwe amaninzi

[Picture on page 563]

Esebenzisa unomathotholo, uJ. F. Rutherford wakwazi ukunikela ubungqina kwizigidi zabantu ehlabathini lonke besemakhayeni abo

[Picture on page 564]

Belungele ukunduluka ngebhayisekile ukuya kunikela ubungqina njengeqela eNgilani

[Picture on page 565]

Ukususela ngowe-1933, kwakusetyenziswa amaqweqwe obungqina ashicilelweyo

[Picture on page 566]

Iintetho zeBhayibhile ezirekhodiweyo zanikela ubungqina obunamandla ebudeni beminyaka yee-1930 neyee-1940

[Picture on page 567]

Iinqwelo-mafutha ezinesandisi-lizwi, maxa wambi ezininzi (njengalapha eOstreliya), zazisetyenziselwa ukusasaza inyaniso yeBhayibhile kwiindawo zikawonke wonke

[Picture on page 568]

Imiqondiso encanyathiselwe kwiifestile zamakhaya amaNgqina kaYehova yayinikela ubungqina ngalo lonke ixesha

[Picture on page 568]

Ii-“placards” ezinezibhengezo nemiqondiso yafak’ isandla ekunikeleni ubungqina ekuhleni ngenkalipho (njengalapha eSkotlani)

[Picture on page 569]

Ukusasaza esitratweni “IMboniselo” ne-“Consolation” (njengoko kuboniswe apha eUnited States) kwaqalisa ngowe-1940

[Picture on page 569]

Ukususela ngowe-1943, abazalwana emabandleni babeqeqeshelwa ukuthetha esidlangalaleni

[Pictures on page 571]

Kuqhutywa izifundo zeBhayibhile zamakhaya nabantu abanomdla. Ezi mpapasho zingezantsi zazenzelwe oko ngokukhethekileyo—zapapashwa okokuqala ngesiNgesi, zandula ke zapapashwa ngezinye iilwimi ezininzi

[Pictures on page 572, 573]

AmaNgqina aselula nakhulileyo, angamadoda nangamabhinqa, emhlabeni wonke anesabelo ekunikeleni ubungqina kwindlu ngendlu

ERomania

EBolivia

EZimbabwe

EHong Kong

EBelgium

Euruguay

EFiji