Icandelo 5
Ubomi Bunenjongo Ezukileyo
1, 2. Sinokuqonda njani ukuba uThixo usikhathalele, yaye sinokuphethukela phi ukuze sifumane iimpendulo ngemibuzo yobomi?
Indlela umhlaba nezinto eziphilayo ezikuwo ezenziwa ngayo ibonisa ukuba uMdali wawo nguThixo onothando nonenkathalo ngokwenene. Yaye iLizwi lakhe, iBhayibhile, libonisa ukuba unenkathalo; linikela eyona mpendulo kule mibuzo: Kutheni silapha emhlabeni? nothi, Lisifumbathele ntoni ikamva?
2 Kufuneka sihlolisise iBhayibhile ukuze sifumane ezo mpendulo. ILizwi likaThixo lithi: “Ukuba nithe namquqela, nomfumana; ukuba nithe namshiya, wonishiya nani.” (2 Kronike 15:2) Ngoko ke, ukuhlolisisa iLizwi likaThixo kutyhila ntoni ngeenjongo zakhe ngathi?
Isizathu Sokuba UThixo Adale Abantu
3. UThixo wawudalela ntoni umhlaba?
3 IBhayibhile ibonisa ukuba uThixo wawulungiselela umhlaba ecinga ngokukhethekileyo ngabantu. UIsaya 45:18 uchaza ukuba ihlabathi uThixo “akalidalelanga ukuba kube senyanyeni, [kodwa] walibumba ukuba limiwe.” Yaye umhlaba wawenza wanayo yonke into abantu ababeya kuyifuna, kungekhona ukuze baqhubeke bephila nje kuphela, kodwa ukuze babunandiphe ngokupheleleyo ubomi.—Genesis, isahluko 1 nesesi-2.
4. UThixo wabadalela ntoni abantu bokuqala?
4 KwiLizwi lakhe, uThixo usixelela ngokudala kwakhe abantu bokuqala, uAdam noEva, yaye utyhila injongo yakhe ngentsapho yabantu. Wathi: “Masenze umntu ngokomfanekiselo wethu ngokufana nathi. Mababe nobukhosi ezintlanzini zolwandle, nasezintakeni zezulu, nasezintweni ezizitho zine, nasemhlabeni wonke, nasezinambuzaneni zonke ezinambuzela emhlabeni.” (Genesis 1:26) Abantu babemele bawuvelele ‘umhlaba wonke’ kunye nendalo yawo ezizilwanyana.
5. Babekwa phi abantu bokuqala?
5 UThixo wenza umyezo omkhulu, onjengepaki kwindawo ebizwa ngokuba yiEden, ekuMbindi Mpuma. Waza “wamthabatha umntu, wambeka emyezweni we-Eden, ukuba awusebenze, awugcine.” Wawuyiparadisi enazo zonke izinto abantu bokuqala ababeya kufuna ukuzitya. Yaye yayiquka “yonke imithi enqwenelekayo ngokukhangeleka, nelungele ukudliwa,” kwanezinye izityalo neentlobo ezininzi ezibangel’ umdla zezilwanyana.—Genesis 2:7-9, 15.
6. Abantu badalwa banaziphi iimpawu engqondweni nasemzimbeni?
6 Imizimba yabantu bokuqala yadalwa yafezeka, ukuze bangaguli, baluphale, okanye bafe. Kwakhona benziwa banezinye iimpawu, ezifana nenkululeko yokuzikhethela. Indlela ababenziwe ngayo ichazwa kwiGenesis 1:27: “Wamdala ke uThixo umntu ngokomfanekiselo wakhe; wamdala ngokomfanekiselo kaThixo; wadala indoda nenkazana.” Ekubeni sidalwe ngokomfanekiselo kaThixo, sanikwa kungekuphela nje iimpawu zomzimba nezengqondo kodwa kwaneenkalo zokuziphatha nezokomoya, yaye nezi zimele zaneliswe ukuba siza konwaba ngokwenene. UThixo wayeya kulungiselela iindlela zokwanelisa ezo ntswelo kwanokufuna ukutya, amanzi, nomoya. Njengokuba uYesu Kristu watshoyo, “akaphili ngasonka sodwa umntu, uphila ngamazwi onke aphuma emlonyeni kaThixo.”—Mateyu 4:4.
7. Luluphi uthumo olwanikwa isibini sokuqala?
7 Ngaphezu koko, uThixo wasinika uthumo olumangalisayo isibini sokuqala ngoxa sasise-Eden: “Qhamani, nande, niwuzalise umhlaba.” (Genesis 1:28) Ngoko sasiya kukwazi ukuvelisa abantwana abafezekileyo. Yaye njengokuba abantu babesanda, babeya kuba nomsebenzi ovuyisayo wokwandisa imida yaloo mmandla wase-Eden uyiparadisi efana nepaki. Ekugqibeleni, umhlaba uphela wawuya kwenziwa ube yiparadisi, emiwe ngabantu abafezekileyo, abonwabileyo ababenokuphila ngonaphakade. IBhayibhile isixelela ukuba emva kokuqaliswa kwako konke oku, “wakubona uThixo konke akwenzileyo, nanko, kulungile kunene.”—Genesis 1:31; bona kwaneNdumiso 118:17.
8. Abantu babefanele bawunyamekele njani umhlaba?
8 Licacile elokuba abantu babeza kuwusebenzisa umhlaba ababeza kuweyisa ukuze bangenelwe. Kodwa oku kwakumele kwenziwe ngendlela ebonisa inkathalo. Abantu babefanele babe ngamagosa anentlonelo omhlaba, kungekhona abonakalisi bawo. Ukonakaliswa komhlaba esikubonayo namhlanje kuchasene nokuthanda kukaThixo, yaye abo banesabelo kuko baphikisana nenjongo yobomi emhlabeni. Kuya kufuneka bahlawuliswe ngenxa yako, kuba iBhayibhile ithi uThixo uya “konakalisa abo bawonakalisayo umhlaba.”—ISityhilelo 11:18.
Kuseyinjongo KaThixo
9. Kutheni siqinisekile ukuba injongo kaThixo iya kuzaliseka?
9 Ngaloo ndlela, ukususela ekuqaleni kwakuyinjongo kaThixo ukuba intsapho yabantu abafezekileyo ihlale emhlabeni ngonaphakade eparadisi. Yaye kuseyinjongo yakhe! Loo njongo iya kuzaliseka, ayiyi kusilela. IBhayibhile ithi: “Ufungile uYehova wemikhosi wathi, Inyaniso, njengoko ndicinge ngako, koba njalo; njengoko ndicebe ngako, koma ngolo hlobo.” “Nditshilo, ewe, ndiya kukufeza; ndiyilile, ewe, ndiya kukwenza.”—Isaya 14:24; 46:11.
10, 11. UYesu, uPetros nomdumisi uDavide bathetha bathini ngeParadisi?
10 UYesu Kristu wathetha ngenjongo kaThixo yokubuyisela iparadisi emhlabeni xa waxelela indoda ethile eyayifuna ithemba ngekamva wathi: “Uya kuba nam eParadisi.” (Luka 23:43) Nompostile uPetros wathetha ngehlabathi elitsha elizayo xa waxela oku kwangaphambili: “Thina ke ngokwedinga [likaThixo] silinde elitsha izulu [ilungiselelo elitsha lorhulumente olawula esezulwini], nomtsha umhlaba [ibutho elitsha labantu emhlabeni], apho kumi ubulungisa.”—2 Petros 3:13.
11 Umdumisi uDavide naye wabhala ngehlabathi elitsha elizayo nexesha elaliya kulihlala. Waxela kwangaphambili ukuba: “Amalungisa aya kulidla ilifa ilizwe, ahlale kulo ngonaphakade.” (INdumiso 37:29) Kungenxa yoko le nto uYesu wathembisa wathi: “Banoyolo abanobulali; ngokuba umhlaba baya kuwudla ilifa bona.”—Mateyu 5:5.
12, 13. Shwankathela injongo kaThixo ezukileyo ngoluntu.
12 Hayi indlela elizuke ngayo elo themba, ukuphila ngonaphakade kumhlaba oyiparadisi apho kungekho bungendawo, ulwaphulo-mthetho, ukugula, usizi nazintlungu! Kwincwadi yokugqibela yeBhayibhile, iLizwi likaThixo lesiprofeto liyishwankathela le njongo izukileyo ngokuthi: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” Lize longezelele lithi: “Waza lowo uhleli phezu kwetrone wathi, Uyabona, izinto zonke ndizenza ntsha. Athi kum, Bhala; ngokuba lawo ngamazwi ayinyaniso, athembekileyo.”—ISityhilelo 21:4, 5.
13 Ewe, uThixo usigcinele injongo ezukileyo. Iya kuba lihlabathi elitsha lobulungisa, iparadisi kanaphakade, eyaxelwa kwangaphambili nguLowo unako yaye uya kukwenza oko akuthembisayo, kuba ‘amazwi akhe ayinyaniso, athembekile.’
[Imifanekiso ekwiphepha 20, 21]
UThixo wayenenjongo yokuba abantu baphile ngonaphakade kumhlaba oyiparadisi. Leyo iseyinjongo yakhe
[Umfanekiso okwiphepha 22]
Umnini-ndlu unokubaphendulisa abaqeshi abayonakalisayo indlu yakhe