Indlela AmaNgqina KaYehova Ayijonga Ngayo Imfundo

Njengabo bonke abazali, amaNgqina kaYehova alixhalabele ikamva labantwana bawo. Ngoko ke ayijonga imfundo njengebaluleke gqitha. “Imfundo ifanele incede abantu babe luncedo kwabanye abantu. Kwakhona ifanele ibancede bayazi kakuhle imvelaphi yabo baze baphile ubomi obanelisa ngakumbi.”

NJENGOKUBA esi sicatshulwa sikwiThe World Book Encyclopedia sibonisa, enye yeenjongo eziphambili zemfundo kukuqeqeshela abantwana ubomi bemihla ngemihla, nto leyo equka ukubaqeqeshela ukuba ngaminazan’ ithile banyamekele iintswelo zentsapho. AmaNgqina kaYehova akholelwa kwelokuba le yimbopheleleko engcwele. NeBhayibhile ithi: “Ukuba ke umntu akabakhathalele abakhe, ngokukodwa abendlu yakhe, ulukhanyele ukholo, unobubi ngaphezu kongakholwayo.” (1 Timoti 5:8) Iminyaka abantwana abayichithela esikolweni ibaxhobisela iimbopheleleko abaza kuzithwala ebomini. Ngenxa yoko, amaNgqina avakalelwa kukuba imfundo kufuneka ithatyathwe nzulu.

AmaNgqina azabalazela ukuphila ngokuvisisana nomyalelo weBhayibhile othi: “Konke enisukuba nikwenza, kusebenzeni ngentliziyo yenu yonke, ngokungathi nisebenzela iNkosi anisebenzeli bantu.” (Kolose 3:23, Today’s English Version) Lo mgaqo usebenza kuzo zonke izinto zobomi, kuquka isikolo. Ngaloo ndlela amaNgqina akhuthaza abaselula bawo bazibhokoxe baze bayithabathe nzulu imisebenzi abayinikwa esikolweni.

Kwakhona iBhayibhile ifundisa ukuba umntu athobele imithetho yelizwe ahlala kulo. Ngoko xa kunyanzelekile ukuba ahambe isikolo de abe neminyaka ethile, amaNgqina kaYehova ayawuthobela lo mthetho.—Roma 13:1-7.

Ngoxa ingakujongeli phantsi ukubaluleka kokuqeqeshelwa kwabo ubomi bemihla ngemihla, iBhayibhile ibonisa ukuba le asikuphela kweyona njongo iphambili yemfundo. Imfundo ephumelelayo ikwafanele ibenze babe novuyo ebomini ize ibancede babe ngabantu abalungeleleneyo phakathi kwabanye abantu. Ngaloo ndlela, amaNgqina kaYehova avakalelwa kukuba kubaluleke gqitha ukuba babe nelungelo lokuzikhethela kwizinto ezenziwa ukuphuma kwesikolo. Ayakholelwa ukuba ukuzihlaziya okwakhayo, umculo, ukuzonwabisa, ukwenza umthambo, ukuya kwimizi yogcino-zincwadi nakwiimyuziyam, njalo njalo, kunendima ebalulekileyo kwimfundo elungeleleneyo. Ukongezelela, afundisa abantwana bawo ukuba bahlonele abantu abadala baze bajonge amathuba okubanceda.

Kuthekani Ngemfundo Eyongezelelekileyo?

Ngenxa yobugcisa obutsha, iindlela zokufumana umsebenzi ziyatshintshatshintsha. Ngenxa yoko, abaselula abaninzi kuya kufuneka basebenze kwimisebenzi okanye benze izinto ababengaqeqeshelwanga zona ngokukhethekileyo. Ngenxa yoko, eyona nto iya kubanceda kakhulu, yindlela abasebenza ngayo nabaziqeqesha ngayo, ngokukodwa ubuchule babo bokulungela iimeko. Ngokuvisisana noko, kuhle ukuba abafundi bakhule babe ngabantu abakhulu, ‘abami kakuhle entloko kunokuba neentloko ezizaliswe lulwazi,’ ngokutsho komnye umbhali wezincoko ngeXesha loHlaziyo uMontaigne.

Ukungaqeshwa, okuthwaxa amazwe ami kakuhle nahlwempuzekileyo, ngokufuthi kuyaboyikisa abantu abaselula abangenamfundo yaneleyo. Ngoko ke, ukuba kufuneka bongezelele imfundo kuleyo ifunwa ngumthetho ukuze bafumane umsebenzi, kuxhomekeke kubazali ukucebisa abantwana babo ekwenzeni isigqibo sokongezelela imfundo, behlola iingenelo abaza kuzifumana nezinto ekuya kufuneka bazincame ngenxa yokongezelela imfundo.

Noko ke, mhlawumbi uya kuvumelana nelokuba impumelelo ebomini ayixhomekekanga nje ekumeni kakuhle ngezinto eziphathekayo. Kutshanje amadoda namabhinqa abezibhokoxa kwimisebenzi yawo athe akuphulukana naloo misebenzi ayimipha echutywe yalahlwa. Abanye abazali bade bancama iintsapho zabo nexesha abebemele balichithe nabantwana babo, bengenalo nethuba eli lokubanceda bakhule, kuba bexinwe ngumsebenzi wempangelo.

Licacile elokuba kwimfundo elungeleleneyo kufanele kukhunjulwe ukuba asikokuma kakuhle ngezinto eziphathekayo kuphela okunokusenza sonwabe ngokwenene. UYesu Kristu wathi: “Kubhaliwe kwathiwa, Akaphili ngasonka sodwa umntu, uphila ngamazwi onke aphuma emlonyeni kaThixo.” (Mateyu 4:4) NjengamaKristu, amaNgqina kaYehova ayakuqonda ukubaluleka kokwakha iimpawu zokuziphatha okuhle nezokomoya nokuziqeqeshela ukwanelisa intswelo yawo yezinto eziphathekayo.

[Amagama acatshulweyo akwiphepha 5]

“Konke enisukuba nikwenza, kusebenzeni ngentliziyo yenu yonke, ngokungathi nisebenzela iNkosi anisebenzeli bantu.”—Kolose 3:23, Today’s English Version

[Amagama acatshulweyo akwiphepha 6]

“Imfundo ifanele incede abantu babe luncedo kwabanye abantu. Kwakhona ifanele ibancede bayazi kakuhle imvelaphi yabo baze baphile ubomi obanelisa ngakumbi.”—The World Book Encyclopedia

[Amagama acatshulweyo akwiphepha 7]

Ukuzihlaziya okwakhayo, umculo, ukuzonwabisa, ukwenza umthambo, ukuya kwimizi yogcino-zincwadi nakwiimyuziyam, kunendima ebalulekileyo kwimfundo elungeleleneyo

[Ibhokisi/Imifanekiso ekwiphepha 8, 9]

Imfundo Ngamaxesha Okubhalwa KweBhayibhile

IBHAYIBHILE ifundisa ukuba imfundo ibaluleke gqitha. Ichaza uThixo ngokuthi ‘nguMyaleli Ozukileyo’ wabantu bakhe, yaye kuyo yonke imema abakhonzi bakhe bandise ulwazi lwabo ngaye.—Isaya 30:20, NW.

Ngamaxesha okubhalwa kweBhayibhile, yayingabantu abakumgangatho okhethekileyo kuphela ababefundile, njengababhali baseMesopotami naseYiputa. Ngokwahluke mpela koko, wonk’ ubani kuSirayeli wamandulo wayekhuthazwa ukuba afunde ukulesa nokubhala. “Ngokungathandabuzekiyo lo mahluko wawubangelwa kukuba inkqubo yokubhala ngoonobumba eyayisetyenziswa ngamaHebhere yayilula ngakumbi. . . . Ukubaluleka kokubhala ngoonobumba kwimbali yemfundo akumele kutyeshelwe. Kwabangela ukulahlwa kwezithethe zababhali baseYiputa, eMesopotami, nakwaKanan ngewaka lesibini leminyaka. Ukukwazi ukulesa nokubhala kwakungaseyonto yahlula udidi lwababhali nababingeleli abafundileyo, ababenolwazi lwemibhalo entsonkothileyo yoonobumba abasixwexwe nemifanekiso.”—Encyclopaedia Judaica.

Iindlela Zokufundisa

KuSirayeli wamandulo, abantwana babefundiswa besebancinane ngooyise noonina. (Duteronomi 11:18, 19; IMizekeliso 1:8; 31:26) KwiDictionnaire de la Bible, umphengululi weBhayibhile uE. Mangenot wabhala: “Akukwazi nje ukuthetha, umntwana wayefunda iindawana ezimbalwa zoMthetho. Unina wayephindaphinda indinyana; xa eyazi, wayemnika enye. Kamva, iindinyana ezibhaliweyo ababekwazi ukuzicengceleza ngentloko babezinikwa. Ngaloo ndlela, babefundiswa indlela yokufunda, yaye xa bebadadlana, babeqhubeka nokufunda izinto zonqulo, ngokufunda nokucamngca ngomthetho weNkosi.”

Ukuze kuncedwe abadala nabancinane bakhumbule, kwakusetyenziswa iindlela ezahlukahlukeneyo zokubakhumbuza. Ezi zaziquka iialphabetic acrostics (iindinyana ezilandelelanayo kumbongo eziqalisa ngonobumba owahlukileyo, ngokulandelelana kwabo), imfano-zandi, nokusetyenziswa kwamanani. Okubangel’ umdla kukuba iKhalenda iGezer (ekwiArchaeological Museum of Istanbul), omnye weyona mizekelo midala yendlela yokubhala yamandulo yesiHebhere, abanye abaphengululi bacinga ukuba yabhalwa ngumntwana wesikolo ezama ukubethelela izinto kwinkumbulo.

Oko Kwakufundiswa

Ngamaxesha okubhalwa kweBhayibhile imfundiso yabazali yayiquka ukuqeqeshela umsebenzi. Amantombazana ayefundiswa ubuchule kwimisebenzi yekhaya. Isahluko sokugqibela sencwadi yeMizekeliso sibonisa ukuba le yayimininzi yaye yahlukahlukene; yayiquka ukusingatha ezoshishino nokwenza ishishini elincinane, kunye nokusonta, ukuluka, ukupheka, ukurhweba nokunyamekela umzi ngokubanzi. Amakhwenkwe ngokuqhelekileyo ayefundiswa umsebenzi kayise wokuziphilisa, enoba kukwezolimo okanye kurhwebo okanye ubugcisa obuthile. Iinkokeli zonqulo zamaYuda zazidla ngokuthi: “Lowo ungamfundisi umsebenzi oluncedo unyana wakhe umkhulisela ukuba abe lisela.”

Ngaloo ndlela, ngamaxesha okubhalwa kweBhayibhile, imfundo yayixatyiswe gqitha.

[Inkcazelo]

Schoolboy’s tablet: © British Library Board/Robana/Art Resource, NY; scroll: Bibelmuseum, Münster

[Inkcazelo Ngomfanekiso okwiphepha 6]

Galleria degli Uffizi, Firenze