Isifundo 11

Iinkolelo Namasiko Angamkholisiyo UThixo

Ziinkolelo namasiko anjani aphosakeleyo? (1)

Ngaba amaKristu afanele akholelwe ukuba uThixo unguBathathu Emnye? (2) Kutheni amaKristu okwenyaniso engayibhiyozeli iKrismesi, i-Ista, okanye imihla yokuzalwa? (3, 4)

Ngaba abafileyo bangabenzakalisa abaphilileyo? (5) Ngaba uYesu wafela emnqamlezweni? (6)

Kubaluleke kangakanani ukukholisa uThixo? (7)

1. Asizizo zonke iinkolelo namasiko amabi. Kodwa uThixo akawamkeli ukuba avela kunqulo lobuxoki okanye achasene neemfundiso zeBhayibhile.—Mateyu 15:6.

2. UBathathu Emnye: Ngaba uYehova unguBathathu Emnye—abantu abathathu kuThixo omnye? Akunjalo! UYehova, uBawo, “ukuphela koThixo oyinyaniso.” (Yohane 17:3; Marko 12:29) UYesu unguNyana Wakhe wamazibulo, yaye ungaphantsi koThixo. (1 Korinte 11:3) UBawo mkhulu kunoNyana. (Yohane 14:28) Umoya oyingcwele awungomntu; ngamandla uThixo awasebenzisayo.—Genesis 1:2; IZenzo 2:18.

3. IKrismesi NeIsta: UYesu akazange azalwe ngoDisemba 25. Wazalwa malunga no-Oktobha 1, ixesha lonyaka xa abalusi babezigcina ezindle izimvu zabo ebusuku. (Luka 2:8-12) UYesu akazange ayalele amaKristu ukuba abhiyozele umhla wokuzalwa kwakhe. Kunoko, wabaxelela abafundi bakhe ukuba benze isikhumbuzo, okanye bakhumbule ukufa kwakhe. (Luka 22:19, 20) IKrismesi namasiko ayo ivela kwiinkonzo zamandulo zobuxoki. Oku kunjalo nangamasiko eIsta, anjengokusetyenziswa kwamaqanda nemivundla. AmaKristu okuqala akazange ayibhiyozele iKrismesi okanye i-Ista, namaKristu okwenyaniso namhlanje akayibhiyozeli.

4. Imihla Yokuzalwa: IBhayibhile ikhankanya iziganeko ezibini kuphela zokubhiyozelwa kwemihla yokuzalwa yabantu ababengamnquli uYehova. (Genesis 40:20-22; Marko 6:21, 22, 24-27) AmaKristu okuqala ayengayibhiyozeli imihla yokuzalwa. Isiko lokubhiyozelwa kwemihla yokuzalwa lisuka kwiinkonzo zamandulo zobuxoki. AmaKristu okwenyaniso anikana izipho yaye ayazonwabisa kunye ngamanye amaxesha ebudeni bonyaka.

5. Ukoyikwa Kwabafileyo: Abafileyo akukho nto banokuyenza okanye bayive. Asinakubanceda nganto, yaye nabo abanakusenzakalisa. (INdumiso 146:4; INtshumayeli 9:5, 10) Umphefumlo uyafa; awuphili emva kokufa. (Hezekile 18:4) Kodwa maxa wambi iingelosi ezingendawo, ezibizwa ngokuba ziidemoni, zizenza imimoya yabantu abafileyo. Nawaphi na amasiko anokuthanani nokoyikwa okanye nokunqulwa kwabafileyo aphosakele.—Isaya 8:19.

6. Umnqamlezo: UYesu akazange afele emnqamlezweni. Wafela esibondeni. Igama lesiGrike eliguqulelwe ngokuthi “umnqamlezo” kwiiBhayibhile ezininzi lithetha nje kuphela isiqobo esinye somthi. Umqondiso womnqamlezo uvela kwiinkonzo zamandulo zobuxoki. Umnqamlezo wawungasetyenziswa okanye unqulwe ngamaKristu okuqala. Ngoko ke, ngaba ucinga ukuba kufanelekile ukusebenzisa umnqamlezo ekunquleni?—Duteronomi 7:26; 1 Korinte 10:14.

7. Kusenokuba nzima ukuziyeka ezinye zezi nkolelo na-masiko. Abahlobo nezalamane basenokuzama ukukweyisela ekubeni ungaziguquli iinkolelo zakho. Kodwa ukukholisa uThixo kubaluleke ngakumbi kunokukholisa abantu.—IMizekeliso 29:25; Mateyu 10:36, 37.

[Umfanekiso okwiphepha 22]

UThixo akanguye uBathathu Emnye

[Umfanekiso okwiphepha 23]

IKrismesi neIsta zivela kwiinkonzo zamandulo zobuxoki

[Umfanekiso okwiphepha 23]

Akukho sizathu sakunqula abafileyo okanye uboyike