Isifundo 14

Indlela AmaNgqina KaYehova Alungelelaniswe Ngayo

AmaNgqina kaYehova aqale nini kule mihla yanamhlanje? (1)

Ziqhutywa njani iintlanganiso zamaNgqina kaYehova? (2)

Kuhlangatyezwana njani neendleko? (3)

Ngubani okhokelayo kwibandla ngalinye? (4)

Ziziphi iintlanganiso ezinkulu eziqhutywa nyaka ngamnye? (5)

Nguwuphi umsebenzi owenziwayo kwikomkhulu nakwiiofisi zawo zamasebe? (6)

1. AmaNgqina kaYehova kule mihla yanamhlanje aqalise ngeminyaka yee-1870. Ekuqaleni, ayebizwa ngokuba ngaBafundi beBhayibhile. Kodwa ngowe-1931 amkela igama elingokweZibhalo elithi amaNgqina kaYehova. (Isaya 43:10) Isusela kwiziqalelo ezincinane le ntlangano iye yakhula yafikelela kumaNgqina azizigidi, axakekileyo eshumayela kumazwe angaphezu kwangama-230.

2. Inkoliso yamabandla amaNgqina kaYehova aba neentlanganiso kathathu ngeveki. Uyamenywa ukuba ubekho kuyo nayiphi na kwezi. (Hebhere 10:24, 25) Okufundiswayo kusekelwe eBhayibhileni. Iintlanganiso zivulwa zize zivalwe ngomthandazo. Phantse kuzo zonke iintlanganiso kuculwa “iingoma zokomoya” ngokusuk’ entliziyweni. (Efese 5:18, 19) Akungenwa ngamali, yaye akukho nkongozelo.—Mateyu 10:8.

3. Inkoliso yamabandla iqhuba iintlanganiso zawo kwiHolo yoBukumkani. Ngokuqhelekileyo ezi iba zizakhiwo ezingenabugoci-goci ezakhiwa ngabasebenzi bokuzithandela abangamaNgqina. Akusayi kubona mifanekiso iqingqiweyo, iminqamlezo, okanye izinto ezinjengezo kwiHolo yoBukumkani. Iindleko zihlawulwa ngeminikelo yokuzithandela. Kwabo bafuna ukunikela, kukho ibhokisi yeminikelo.—2 Korinte 9:7.

4. Kwibandla ngalinye, kukho abadala, okanye abaveleli. Bayakhokela ekufundiseni ebandleni. (1 Timoti 3:1-7; 5:17) Bancediswa zizicaka zolungiselelo. (1 Timoti 3:8-10, 12, 13) La madoda akaphakanyiswa ngaphezu kwabo bonke ebandleni. (2 Korinte 1:24) Akabizwa ngamagama akhethekileyo. (Mateyu 23:8-10) Akanxibi ngokwahlukileyo kwabanye abantu. Akahlawulwa nangomsebenzi awenzayo. Ngokuzithandela abadala banyamekela iintswelo zokomoya zebandla. Bayakwazi ukunikela intuthuzelo nokhokelo ngamaxesha eengxaki.—Yakobi 5:14-16; 1 Petros 5:2, 3.

5. Kwakhona amaNgqina kaYehova aba neendibano ezincinane nezinkulu nyaka ngamnye. Ngezi zihlandlo amabandla amaninzi ayahlanganisana ukuze afumane ucwangciso olukhethekileyo lwemfundiso yeBhayibhile. Kuzo zonke iindibano ezincinane nezinkulu kubakho ucwangciso lokubhaptizwa kwabafundi abatsha.—Mateyu 3:13-17; 28:19, 20.

6. Ikomkhulu lehlabathi lamaNgqina kaYehova liseNew York. Apho kukho iQumrhu Elilawulayo, iqela labadala abanamava abongamela ibandla ehlabathini lonke. Kwakhona kukho iiofisi zamasebe angaphezu kwe-100 ehlabathini lonke. Kwezi ndawo, ngokuzithandela abanye bancedisa ekushicileleni nasekuthumeleni uncwadi lweBhayibhile kwezinye iindawo. Kwakhona kunikelwa ulwalathiso lokulungelelanisa umsebenzi wokushumayela. Kutheni ungacebi ukutyelela eyona ofisi yesebe ekufuphi nawe?