Inyaniso Ngomphefumlo Ibalulekile
“Niya kuyazi inyaniso, ibe inyaniso iya kunikhulula.”—YOHANE 8:32.
I INKOLELO ezingokufa noBomi Basemva Kokufa ubukhulu becala zingumphumo wemvelaphi kabani yonqulo nengokwesithethe sakhe. Njengokuba sele sibonile, abanye bakholelwa ukuba umphefumlo ufika kwindawo oza kuphelela kuyo emva kokuba uzelwe kaninzi ninzi, abanye bathi ubomi obuphilayo ngoku buza kugqiba enoba uza kuphelela phi umphefumlo wakho. Ngenxa yoko, omnye umntu usenokuqiniseka ukuba ekufeni kwakhe uya kuba kunye nengweletshetshe, omnye usenokuqiniseka ngokuya eNirvana, ukanti omnye usenokuba ufunzele ukuya ezulwini. Ngoko ide ibe phi inyaniso? Ekubeni iinkolelo zilawula indlela esicinga ngayo, izenzo nezigqibo zethu, ngaba asifanele sizikhathaze ngokufuna impendulo kuloo mibuzo?
2 Eyona ncwadi indala ehlabathini, iBhayibhile, imbali yomntu iyilanda emva phayaa ekudalweni komntu wokuqala. Iimfundiso zayo azinantanda-bulumko nazithethe zabantu. Licacile elokuba iBhayibhile ithetha inyaniso emsulwa ngomphefumlo: Wena ungumphefumlo, abafileyo abaphili, yaye abo bakwimkumbulo kaThixo baya kuvuswa ngexesha elifanelekileyo. Ukwazi oku kuthetha ntoni kuwe?
3 UYesu Kristu wathi kubalandeli bakhe: “Niya kuyazi inyaniso, ibe inyaniso iya kunikhulula.” (Yohane 8:32) Ewe, inyaniso iyakhulula. Kodwa inyaniso engomphefumlo iza kukukhulula entwenini?
Ukukhululeka Kuloyiko Nasekuphelelweni Lithemba
4 “Inkoliso yabantu iyakoyika ukufa yaye ayifuni nokucinga ngako,” itsho njalo iThe World Book Encyclopedia. “Igama elithi ‘ukufa’ kunzima nokuba liphume emlonyeni kwabaseNtshona,” utsho omnye umbhali-mbali. Yaye kwezinye iindawo izihlonipho ezifana nokuthi “utshabile” nesithi “uswelekile” zisetyenziswa gqitha xa kuchazwa umntu ofileyo. Oku koyika ukufa kukoyika into engaziwayo nokwaziwa, ekubeni ebantwini abaninzi ukufa kuyimfihlelo. Ukwazi inyaniso ngoko kwenzekayo ekufeni kuyaluphungula olu loyiko.
5 Ngokomzekelo, cinga ngokwakusengqondweni kaMichaelyn oneminyaka eli-15 ubudala. Le ntwazana yayinomhlaza osegazini yaye yayiza kufa kabuhlungu. Unina, uPaula, ukhumbula oku: “UMichaelyn wathi yena akakhathali nokuba ufile kuba wayesazi ukuba ukufa kuyinto yokomzuzwana. Sasisoloko sithetha ngehlabathi elitsha likaThixo nabo bonke abo baya kuvuselwa kulo. UMichaelyn wayenokholo olungummangaliso kuYehova uThixo nakuvuko—engathandabuzi nakancinane.” Ithemba lovuko layikhulula le ntwazana ekoyikeni ukufa.
6 Inyaniso yenza ntoni kubazali bakaMichaelyn? Uyise uJeff uthi: “Ukufa kwentwazana yethu kwakuyeyona nto ibuhlungu yakha yasehlela. Kodwa sithembele kwisithembiso sikaYehova sovuko, yaye sikhangele phambili kuloo mini siya kube sithe khuu uMichaelyn. Hayi indlela ekuya kuvuyisa ngayo ukumbona kwakhona!”
7 Ewe, inyaniso engomphefumlo ikhulula abantu ekuphelelweni lithemba okunokuziswa kukufa komntu abamthandayo. Kakade ke, akukho nto inokuyiphelisa kuthi cwaka intlungu yaxa ufelwe ngumntu omthandayo. Noko ke, ithemba lovuko liyakuthomalalisa ukukhathazeka yaye likwenza kube lula ukuyinyamezela intlungu okuyo.
8 Inyaniso yeZibhalo engemeko yabafi ikwasikhulula ekoyikeni abafi. Ekubeni befunde inyaniso, abaninzi ababekhonkxwe ngamakhamandela amasiko eenkolelo ezingabafi abasazikhathazi ngokucinga ngamashwa, ngamabekelo, ngamathumelo namakhubalo, baze bachithe iimali bexhelela izinyanya zabo bezicenga ukuba zingabakhathazi. Eneneni, ekubeni abafileyo ‘bengazi lutho,’ ukwenza ezo zinto yinkcitha-xesha nje.—INtshumayeli 9:5.
9 Inyaniso engomphefumlo, efumaneka eBhayibhileni, iyakhulula ngokwenene yaye inokuthenjwa. Kodwa kwakhona cinga ngethemba elibalaseleyo eliseBhayibhileni olifumanayo koku.
[Imibuzo YeSifundo]
1. Kutheni kubalulekile ukuhlolisisa iinkolelo zethu ngomphefumlo nokufa?
2, 3. (a) Kutheni sinokuba nentembelo koko kuthethwa yiBhayibhile ngomphefumlo? (b) Njengokuba kubonisiwe eBhayibhileni, yintoni eyinyaniso ngomphefumlo?
4, 5. (a) Luluphi uloyiko inyaniso engomphefumlo esikhulula kulo? (b) Ithemba lovuko lamkhaliphisa njani owayekwishumi elivisayo owayegulel’ ukufa?
6, 7. Inyaniso isikhulula koluphi uloyiko ngabafi? Zekelisa.
8, 9. Inyaniso isikhulula koluphi uloyiko olungemeko yabafi?
[Amagama acatshulweyo akwiphepha 29]
Inyaniso engomphefumlo isikhulula ekoyikeni ukufa, ekoyikeni abafi, ekuphelelweni lithemba xa umntu esimthandayo esifa