Isahluko Seshumi

Ngubani Onokuma Nxamnye NeNkosana Yeenkosana?

1, 2. Kutheni ubalulekile nje kuthi umbono owabonwa nguDaniyeli ngonyaka wesithathu wolawulo lukaBheleshatsare?

SELE kudlule iminyaka engama-57 itshatyalalisiwe itempile kaYehova eseYerusalem. NguBheleshatsare noyise, uNabonidus, ababambe iintambo kuBukhosi baseBhabhiloni, obuligunya lehlabathi lesithathu kwisiprofeto seBhayibhile.a Umprofeti kaThixo uDaniyeli uthinjiwe eBhabhiloni. Ibe “ngonyaka wesithathu wobukumkani bukaBheleshatsare ukumkani,” uYehova ubonisa uDaniyeli umbono otyhila iinkcukacha ezithile zokubuyiselwa konqulo lokwenyaniso.—Daniyeli 8:1.

² Lo mbono ungokwesiprofeto kaDaniyeli wamkhanyisela okuthile ibe ubalulekile nakuthi thina baphila ‘kwixesha lokuphela.’ Ingelosi enguGabriyeli ixelela uDaniyeli oku: “Yabona, ndiyakwazisa oko kuya kwenzeka ekupheleni kwesiqalekiso, ngokuba lo mbono ngowexesha elimisiweyo lesiphelo.” (Daniyeli 8:16, 17, 19, 27) Makhe siyicoselele ukuyiqwalasela oku le nto yabonwa nguDaniyeli kunye nentsingiselo yayo kuthi namhlanje.

INKUNZI YEGUSHA ENEEMPONDO EZIMBINI

3, 4. Silwanyana sini esabonwa nguDaniyeli simi phambi komfula, ibe sifuzisela ntoni?

³ UDaniyeli uyabhala: “Kulo mbono ke ndazifumana ndikwinqaba iShushan, kwiphondo lase-Elam; yaye kulo mbono ndabona ndimi ngasemfuleni waseUlayi.” (Daniyeli 8:2) Apha akuchazwanga nokuba uDaniyeli wayeseShushan (eSusa)—ikomkhulu lakwaElam elikwiikhilomitha ezinokuba ngama-350 kwimpuma yeBhabhiloni—okanye wazibona elapho embonweni kusini na.

⁴ UDaniyeli uyaqhubeka: “Ndaphakamisa amehlo am, ndabona inkunzi yegusha imi phambi komfula lowo, ineempondo ezimbini.” (Daniyeli 8:3a) Ethubeni uDaniyeli uyayiqonda ukuba imela ntoni le nkunzi yegusha. Kamva ingelosi uGabriyeli iyamxelela: “Inkunzi yegusha oyibonileyo ineempondo ezimbini imela ookumkani bamaMedi namaPersi.” (Daniyeli 8:20) AmaMedi ayevela kweleentaba elikwimpuma yeAsiriya, ibe amaPersi ayekade engoosithubeni kummandla okumntla weNyoba yamaPersi. Noko ke, bathi bakuya bukhula uBukhosi bamaMedi namaPersi, abalawulwa babo baqalisa ukuphila ubomi obutofotofo.

5. Kwenzeka njani ukuba uphondo ‘olwavela mva’ lube lude?

⁵ UDaniyeli uthi: “Ezi mpondo zombini zazinde, kodwa olunye lwalulude kunolunye; olu lude lwavela mva.” (Daniyeli 8:3b) Uphondo olude olwavela kamva yayingamaPersi, ngoxa olunye uphondo lwalufuzisela amaMedi. Ekuqaleni yayingamaMedi awayekhonya. Kodwa ngowama-550 B.C.E., uKoreshi umlawuli wasePersi wamthi qwaka-qwaka lula nje uKumkani uAstyages wamaMedi. UKoreshi wazidibanisa izithethe nemithetho yala maqela mabini abantu, wamanyanisa oorhulumente bazo waza wandisa nemihlaba yazo. Ukususela ngoko, obo bukhosi baba ntlu-mbini.

INKUNZI YEGUSHA IYAZIGWAGWISA

6, 7. Kwenzeka njani ukuba ‘kungabikho rhamncwa linako ukumelana’ nenkunzi yegusha?

⁶ Eqhubeka echaza le nkunzi yegusha, uDaniyeli uthi: “Ndayibona le nkunzi yegusha ilekuza ibhekisa ngasentshona nangasemntla nangasemzantsi, yaye kwakungekho rhamncwa linako ukumelana nayo, kungekho nabani na uhlangulayo esandleni sayo. Yayisenza unothanda, izigwagwisa.”—Daniyeli 8:4.

⁷ Kumbono wangaphambili kaDaniyeli, iBhabhiloni yayifuziselwe lirhamncwa lasendle elalivele elwandle elinjengengonyama nelinamaphiko okhozi. (Daniyeli 7:4, 17) Elo rhamncwa lahlaliswa phantsi yile “nkunzi yegusha” yalo mbono mtsha. IBhabhiloni yawela ezandleni zikaKoreshi Omkhulu ngowama-539 B.C.E. Kwiminyaka emalunga nama-50 emva koko, “kwakungekho rhamncwa,” okanye oorhulumente bezobupolitika, abakwaziyo ukumelana noBukhosi bamaMedi namaPersi—igunya lehlabathi lesine lesiprofeto seBhayibhile.

8, 9. (a) “Inkunzi yegusha” ‘yahlaba njani isiya ngasentshona nangasemntla nangasemzantsi’? (b) Ithini incwadi kaEstere ngalowo wangena ezihlangwini zoKumkani wamaPersi uDariyo I?

⁸ Lisithi gqi “empumalanga,” iGunya Lehlabathi lamaMedi namaPersi lalidakasa, ‘lilekuza libhekisa ngasentshona nangasemntla nangasemzantsi.’ (Isaya 46:11) UKumkani uCambyses II, owangena ezihlangwini zikaKoreshi Omkhulu, wayoyisa iYiputa. Emva kwakhe kwangena uKumkani uDariyo I wasePersi, owaxwesa esinge entshona enqumla kwiirhangi zaseBosporus ngowama-513 B.C.E. waza wahlasela inxalenye yaseYurophu yomhlaba waseThrace, owawunekomkhulu eliyiByzantium (ngoku eyi-Istanbul). Ngowama-508 B.C.E., wayigagamela iThrace waza woyisa iMakedoniya ngowama-496 B.C.E. Ngaloo ndlela, ngexesha likaDariyo, “inkunzi yegusha” engamaMedi namaPersi yawuwolela kuyo umhlaba okwiimbombo ezintathu ezingundoqo: okumntla oya kuqabela eBhabhiloni naseAsiriya, osentshona otyhubela iAsia Minor, nosemzantsi ukuya kuthi xhaxhe ngeYiputa.

⁹ Ingqina ubukhulu boBukhosi bamaMedi namaPersi, iBhayibhile ichaza owangena esihlalweni sikaDariyo, uXerxes I, isithi “uAhaswerosi owayelawula njengokumkani ukusuka eIndiya ukuya eTiyopiya, amaphondo angaphezu kwekhulu elinamashumi amabini anesixhenxe.” (Estere 1:1) Kodwa ke nobu bukhosi bukhulu babuza kudedel’ obunye, ibe ngokuphathelele oku, umbono kaDaniyeli uza nenye ingcombolo ebangel’ umdla efanele ilomeleze ukholo lwethu kwilizwi likaThixo lesiprofeto.

INKUNZI YEBHOKHWE IYINGQULA PHANTSI INKUNZI YEGUSHA

10. Kumbono kaDaniyeli, sisiphi isilwanyana esayingqula phantsi “inkunzi yegusha”?

¹⁰ Khawube nombono wendlela uDaniyeli akhwankqiswe ngayo yinto ayibonayo ngoku. Ingxelo ithi: “Ndathi ndisaqwalasele njalo, kwavela inkunzi yebhokhwe ngasentshonalanga ihamba phezu komhlaba uphela, ingawuchukumisi umhlaba. Le nkunzi yebhokhwe yayinophondo oluphawulekayo phakathi kwamehlo ayo. Yasinga kulaa nkunzi yegusha ineempondo ezimbini ndandiyibone imi phambi komfula; yangqala kuyo ngamandla inomsindo omkhulu. Ndayibona isondela kwinkunzi yegusha, yayihlasela ngoburhalarhume, yayihlaba yazaphula iimpondo zayo zombini, yaza inkunzi yegusha ayabi namandla okumelana nayo. Ngoko yayikhahlela phantsi inkunzi yegusha leyo, yayinyathela, ayabi namhlanguli esandleni sayo.” (Daniyeli 8:5-7) Kutheth’ ukuthini konke oku?

11. (a) Ingelosi uGabriyeli yayichaza njani “inkunzi yebhokhwe exhonti” kunye ‘nophondo lwayo olukhulu’? (b) Ngubani owayefuziselwa luphondo oluzibaluleyo?

¹¹ UDaniyeli kunye nathi asishiywa enyanyeni ngokuphathelele intsingiselo yalo mbono. Ingelosi uGabriyeli ixelela uDaniyeli oku: “Inkunzi yebhokhwe exhonti imela ukumkani waseGrisi; ke lona uphondo olukhulu olwaluphakathi kwamehlo ayo, lumela ukumkani wokuqala.” (Daniyeli 8:21) Ngowama-336 B.C.E., ukumkani wokugqibela woBukhosi bamaPersi, uDariyo III (uCodommanus), wathweswa ubukhosi. Kwangaloo nyaka mnye, uAleksandire waba ngukumkani eMakedoniya. Imbali ibonisa ukuba uAleksandire Omkhulu wangqineka ‘engukumkani waseGrisi’ wokuqala owayexelwe kwangaphambili. UAleksandire wagqadaza esusela “entshonalanga,” ngowama-334 B.C.E. Wayiwanqa imihlaba waza wayingqula phantsi “inkunzi yegusha,” sele engathi ‘akawuchukumisi umhlaba.’ Ngaloo ndlela iGrisi yaba ligunya lehlabathi lesihlanu kulawo kuthethwa ngawo eBhayibhileni, iphelisa ulawulo lwamaMedi namaPersi olwaluthabathe ixesha elimalunga neenkulungwane ezimbini. Enjani ukubalasela inzaliseko yesiprofeto sikaThixo!

12. “Lwaphuka” njani “uphondo olukhulu” lwebhokhwe yokomfuziselo, ibe ziziphi iimpondo ezine ezakhula endaweni yalo?

¹² Kodwa ke igunya lika-Aleksandire laliza kutshitsha kungekudala. Lo mbono uhlabela mgama usithi: “Yaza le nkunzi yebhokhwe yazigwagwisa ngokugqithileyo; kodwa kamsinya nje yakuba namandla, lwaphuka uphondo lwayo olukhulu, kwaza esikhundleni salo kwavela ezine eziphawulekayo, zibheke ngasemimoyeni yomine yamazulu.” (Daniyeli 8:8) Echaza esi siprofeto, uGabriyeli uthi: “Njengoko lwaphulwe, kwaza kwema ezine esikhundleni salo, zona zimela izikumkani ezine kuhlanga lwakhe, kodwa amandla azo aya kuba nganeno kwawakhe.” (Daniyeli 8:22) Njengoko kwakuprofetiwe, wathi uAleksandire esathwele intshinga enjalo, “waphuka,” okanye wafa, eneminyaka engama-32 nje kuphela ubudala. Ibe ekugqibeleni iinjengele zakhe ezine zabelana ngobukhosi bakhe.

UPHONDO OLUNCINANE OLUMANGALISAYO

13. Yintoni eyakhulayo kolunye lweempondo ezine, ibe yintoni olwayenzayo?

¹³ Inxalenye elandelayo yalo mbono igubungela iminyaka engaphezu kwama-2 200, ibe inzaliseko yayo ifikelela kule mihla. UDaniyeli uyabhala: “Kolunye lwazo [iimpondo ezine] kwaphuma olunye uphondo oluncinane, lwaza lwaya lusiba lukhulu kakhulu lwabhekisa ngasemzantsi nangasempumalanga nangakwilizwe Eliligugu. Lwakhula lwafikelela nakumkhosi wamazulu, lwayikhahlela phantsi emhlabeni inxalenye yomkhosi nenxalenye yeenkwenkwezi, lwazinyathela. Lwazigwagwisa lwada lwafunza kuyo iNkosana yomkhosi, lwawuphelisa umbingelelo owenzelwa yona rhoqo, lwayikhahlela phantsi nendawo emisiweyo yengcwele yayo. Wanikelwa kulo umkhosi, nombingelelo owenziwa rhoqo, ngenxa yokunxaxha; yaye lwayiphosa inyaniso emhlabeni, lwaza lwaba nempumelelo kuyo yonke into oluyenzayo.”—Daniyeli 8:9-12.

14. Yathini ingelosi uGabriyeli ngemisebenzi yophondo oluncinane lokomfuziselo, ibe kwakuza kwenzeka ntoni kulo?

¹⁴ Kodwa ngaphambi kokuba singene kwintsingiselo yala mazwi asandul’ ukucatshulwa, makhe sibek’ indlebe koko kuthethwa yingelosi kaThixo. Emva kokuchaza ngolawulo lwezikumkani ezine eziphuma kubukhosi buka-Aleksandire, ingelosi uGabriyeli ithi: “Yaye ekupheleni kobukumkani bazo, njengoko abanxaxhayo begqibezela, kuya kuma ukumkani onkangeleko indlongondlongo nowaqondayo amazwi antsonkothileyo. Yena uya komelela kunene, kodwa kungabi ngokwamandla akhe. Uya kwenza umonakalo omkhulu, kwaye uya kuphumelela kuko konke akwenzayo. Okunene uya kubatshabalalisa abo banamandla, kwanabo bangcwele. Ngenxa yobuqhokolo bakhe ngokuqinisekileyo iya kuba nempumelelo inkohliso yakhe. Kwaye uya kuzigwagwisa entliziyweni yakhe, abatshabalalise abaninzi bengalindelanga. Uya kusuka eme nxamnye neNkosana yeenkosana, kodwa uya kwaphulwa kungengasandla.”—Daniyeli 8:23-25.

15. Yintoni ingelosi eyathi uDaniyeli makayenze ngokuphathelele umbono?

¹⁵ Le ngelosi ixelela uDaniyeli isithi: ‘Uze uwugcine uyimfihlelo lo mbono, kuba usengowemihla emininzi ezayo.’ (Daniyeli 8:26) Lo mbono wawungayi kuzaliseka de kube ‘yimihla emininzi,’ yaye uDaniyeli wayemele ‘awugcine uyimfihlelo umbono.’ Kuyabonakala ukuba intsingiselo yawo yahlala iyimfihlelo kuDaniyeli. Kodwa ke kungokunje siqinisekile ukuba loo ‘mihla mininzi’ imele ukuba idlule. Ngoko nanku umbuzo ophakamayo: ‘Ityhila ntoni imbali yehlabathi ngenzaliseko yalo mbono wesiprofeto?’

UPHONDO OLUNCINANE LUBA NAMANDLA AMAKHULU

16. (a) Uphondo oluncinane lwavela kuluphi uphondo lokomfuziselo? (b) IRoma yaqalisa njani ukuba ligunya lehlabathi lesithandathu lesiprofeto seBhayibhile, kodwa kutheni ingazange ibe luphondo oluncinane lokomfuziselo?

¹⁶ Ngokutsho kwembali, olu phondo luncinane lwavela kolunye lweempondo ezine zokomfuziselo—olona lukude ngasentshona. Obo yayibubukhosi bamaGrike obabuphantsi koNjengele uCassander baseMakedoniya naseGrisi. Kamva, uNjengele Lysimachus, ukumkani waseThrace naseAsia Minor wabuwolela ngakuye obu bukumkani. Ngenkulungwane yesibini ngaphambi kweXesha lethu Eliqhelekileyo, le mimandla ingasentshona yobukhosi bamaGrike yahluthwa yiRoma. Ibe wathi ufika owama-30 B.C.E., iRoma yabe izithabathe zonke izikumkani zamaGrike, yaza yazenza igunya lehlabathi lesithandathu lesiprofeto seBhayibhile. Kodwa ke uBukhosi bamaRoma babungekabi luphondo oluncinane lombono kaDaniyeli, kuba obo bukhosi abuzange buhlale bukho de kube ‘lixesha elimisiweyo lokuphela.’—Daniyeli 8:19.

17. (a) Luluphi ulwalamano olwalukho phakathi kweBritani noBukhosi bamaRoma? (b) UBukhosi baseBritani bunxibelelene njani nobukumkani bamaGrike baseMakedoniya naseGrisi?

¹⁷ Imbali ithi ngubani lo “kumkani onkangeleko indlongondlongo” nonguphuma-silwe? Kaloku iBritani yayilihlumelo elikumntla-ntshona loBukhosi bamaRoma. Ukuhla ukuza kutsho ngasekuqaleni kwenkulungwane yesihlanu yeXesha lethu Eliqhelekileyo, oko namhlanje kubizwa ngokuba yiBritani kwakungamaphondo amaRoma. Ethubeni, uBukhosi bamaRoma baphelelwa, kodwa impucuko eyayivela kumaGrike nakumaRoma yaqhubeka inempembelelo eBritani nakwezinye iindawo zaseYurophu ezazifudula ziphantsi kolawulo lwamaRoma. Imbongi ekwangumbhali yaseMexico eyafumana iBhaso likaNobel uOctavio Paz yabhala: “Bathi bakuwa uBukhosi baseRoma, iCawa yathabath’ apho babuyeke khona.” Yongezelela: “Abaxhasi beemfundiso zeCawa, kunye nabaphengululi abalandelayo, baxokomezela intanda-bulumko yamaGrike kwimfundiso yamaKristu.” Ukanti isithandi sobulumko nesazi ngezezibalo senkulungwane yama-20 uBertrand Russell wathi: “Impucuko yaseNtshona, engcambu yayo ikumaGrike, isekelwe kwintanda-bulumko nakwinzululwazi eyayisuka eMileto [isixeko samaGrike esiseAsia Minor] kwiminyaka engamawaka amabini anesiqingatha eyadlulayo.” Ngaloo ndlela kunokutshiwo umlom’ uzale ukuba inkcubeko yoBukhosi baseBritani yayivela kubukumkani bamaGrike baseMakedoniya naseGrisi.

18. Luyintoni uphondo oluncinane olwaba ‘ngukumkani onkangeleko indlongondlongo’ ‘ngexesha lokuphela’? Cacisa.

¹⁸ Ngowe-1763, uBukhosi baseBritani babunyalasa kuba babuzoyisile iintshaba zabo ezinamandla, iSpeyin neFransi. Ukususela ngoko bazibonakalisa njengengqonyela yeelwandle negunya lehlabathi lesixhenxe lesiprofeto seBhayibhile. Kwanasemva kokuba amathanga ali-13 aseMerika ezahlule kwiBritani ngowe-1776 aza aseka iUnited States of America, uBukhosi baseBritani baqhubeka bukhula baza bagubungela ikota yomhlaba bulawula nekota yabemi bawo. Lada lagqithisa ukomelela eli gunya lehlabathi lesixhenxe xa iUnited States of America yadibanis’ imihlambi neBritani zaza zayila igunya lehlabathi elintlu-mbini lamaNgesi namaMerika. Ngokwenene eli gunya laba ‘ngukumkani onkangaleko indlongondlongo’ kwezoqoqosho nasemkhosini. Ngoko ke, uphondo oluncinane olwaba ligunya lezobupolitika elindlongondlongo ‘ngexesha lokuphela,’ liGunya Lehlabathi elintlu-mbini lamaNgesi namaMerika.

19. Liliphi “ilizwe Eliligugu” elikhankanywe kulo mbono?

¹⁹ UDaniyeli waphawula ukuba uphondo oluncinane “lwaya lusiba lukhulu kakhulu” lwaya kutsho “kwilizwe Eliligugu.” (Daniyeli 8:9) ILizwe Ledinga, uYehova awalinika abantu bakhe abanyulileyo, lalilihle kangangokuba lalibizwa ngokuba “lalingumhombiso emazweni onke,” ngamany’ amazwi emhlabeni wonke. (Hezekile 20:6, 15) Liyinyaniso elokuba, iBritani yayingqula phantsi iYerusalem ngoDisemba 9, 1917, nangowe-1920, uManyano Lwezizwe lwagunyazisa iBritani ukuba inyamekele iPalestina, ibe oko kwaqhubeka de kwangoMeyi 14, 1948. Kodwa ke lo ngumbono osisiprofeto, ibe ufuzisela izinto ezininzi. Kwaye “ilizwe Eliligugu” elichazwe kulo mbono alifuziseli iYerusalem, kodwa lifanekisela imeko yasemhlabeni yabantu uThixo abajonga njengabangcwele ebudeni bolawulo lwegunya lehlabathi lesixhenxe. Makhe sibone indlela iGunya Lehlabathi lamaNgesi namaMerika elizama ngayo ukugrogrisa abangcwele.

‘INDAWO YENGCWELE’ IPHOSWA PHANTSI

20. Ngoobani abayila “umkhosi wamazulu” kunye ‘neenkwenkwezi’ uphondo oluncinane oluzama ukuziwisa?

²⁰ Uphondo oluncinane “lwakhula lwafikelela nakumkhosi wamazulu, lwayikhahlela phantsi emhlabeni inxalenye yomkhosi nenxalenye yeenkwenkwezi.” Ngokutsho kwengcaciso yengelosi, “umkhosi wamazulu” kunye ‘neenkwenkwezi’ uphondo oluncinane oluzama ukuzikhahlela phantsi ‘ngabo bangcwele.’ (Daniyeli 8:10, 24) Aba “bangcwele” ngamaKristu athanjiswe ngomoya. Ekubeni eye enziwa anolwalamano noThixo ngomnqophiso omtsha, ayangcwaliswa, ahlanjululwe, aze ahlulelwe inkonzo epheleleyo kaThixo ngegazi elaphalalayo likaYesu Kristu. (Hebhere 10:10; 13:20) Ekubeni ewavave ngesabelo sokuba ziindlalifa zasezulwini kunye noNyana wakhe, uYehova uwagqala njengabangcwele. (Efese 1:3, 11, 18-20) Ngoko ke, kumbono kaDaniyeli, “umkhosi wasezulwini” yintsalela esesemhlabeni ‘yabangcwele’ abali-144 000, abaza kulawula ezulwini kunye neMvana.—ISityhilelo 14:1-5.

21. Ngoobani abahlala ‘kwindawo engcwele’ igunya lehlabathi lesixhenxe elizama ukuyiphanzisa?

²¹ Namhlanje intsalela yabali-144 000 ingabameli basemhlabeni ‘beYerusalem yasezulwini’—uBukumkani bukaThixo obunjengesixeko—nelungiselelo layo letempile. (Hebhere 12:22, 28; 13:14) Ngaloo ngqiqo bemi ‘kwindawo engcwele’ elizama ukuyinyathela lize liyiphanzise igunya lehlabathi lesixhenxe. (Daniyeli 8:13) Kwakhona echaza le ndawo ingcwele ‘njengendawo emisiweyo yengcwele [kaYehova],’ uDaniyeli uthi: ‘Wapheliswa umbingelelo owenziwa rhoqo [kuYehova], nendawo emisiweyo yengcwele yakhe yakhahlelwa phantsi. Nomkhosi ngokwawo wanikelwa, ndawonye nombingelelo owenziwa rhoqo, ngenxa yokunxaxha; yaye lwayiphosa inyaniso emhlabeni, lwaza lwaba nempumelelo kuyo yonke into oluyenzayo.’ (Daniyeli 8:11, 12) Yazaliseka njani ke le into?

22. Ebudeni beMfazwe Yehlabathi II, kungayiphi indlela elathi igunya lehlabathi lesixhenxe lagqithisa ‘ukunxaxha’?

²² Ayephatheke njani amaNgqina kaYehova ebudeni beMfazwe Yehlabathi II? Atshutshiswa kanobom! Kwaqala ilizwe lamaNazi nelamaFasi. Kwaza ke kungekudala ‘inyaniso yaphoswa phantsi emhlabeni’ kubo bonke ubukhosi ‘bophondo oluncinane olwalube namandla omeleleyo.’ “Umkhosi” wabavakalisi boBukumkani nomsebenzi wabo wokushumayela “iindaba ezilungileyo” wavalwa phantse kuwo onke aMazwe Anobudlelane neBritani. (Marko 13:10) Xa la mazwe ayefuna amadoda aza kunceda emkhosini, akazange avume ukugqala amaNgqina kaYehova njengabalungiseleli ababengamele baye emkhosini, ngaloo ndlela ebonisa ukungakuhloneli ukumiselwa kwawo njengabalungiseleli bakaThixo. EUnited States abakhonzi abathembekileyo bakaYehova babehlaselwa ngamahlokondiba anogonyamelo yaye bephathwa ngendlela ethob’ isidima. Ngaloo ndlela, igunya lehlabathi lesixhenxe lazama ukulishenxisa idini lendumiso—“isiqhamo semilebe”—elalinikelwa rhoqo kuYehova ngabantu bakhe ‘njengombingelelo owenziwa rhoqo’ kunqulo lwabo. (Hebhere 13:15) Ngaloo ndlela, elo gunya lehlabathi ‘lanxaxha’ ngokuhlasela umhlaba wOyena Thixo Uphakamileyo—‘indawo emisiweyo yengcwele.’

23. (a) Ebudeni beMfazwe Yehlabathi II, iGunya Lehlabathi lamaNgesi namaMerika lama njani “nxamnye neNkosana yeenkosana”? (b) Ngubani ‘iNkosana yeenkosana’?

²³ Ngokutshutshisa “abangcwele” ebudeni beMfazwe Yehlabathi II, uphondo oluncinane lwazigwagwisa “ukuya kutsho kwiNkosana yomkhosi.” Okanye, njengoko ingelosi uGabriyeli isitsho, lwema “nxamnye neNkosana yeenkosana.” (Daniyeli 8:11, 25) Isibizo esithi “iNkosana yeenkosana” sisebenza kuYehova uThixo kuphela. Igama lesiHebhere elithi sar, eliguqulelwe ngokuthi “inkosana,” linentsingiselo eyeleleyo kwisenzi esithetha “ukulawula.” Ukongezelela ekusetyenzisweni kwalo ukubhekisela kunyana kakumkani okanye kwitshawe, eli gama lisetyenziswa nakumntu oyintloko, okanye oyena uphezulu. Incwadi kaDaniyeli ikhankanya ezinye iinkosana eziziingelosi—ngokomzekelo, uMikayeli. Ngokuqinisekileyo uThixo yEyona Nkosana yazo zonke ezo nkosana. (Daniyeli 10:13, 21; thelekisa INdumiso 83:18.) Ngaba sinokuze sibe nabo ubuganga bokucinga ukuba ukho umntu onokumelana noYehova—iNkosana yeenkosana?

‘INDAWO ENGCWELE’ IBUYISELWA KWIMEKO YAYO ELUNGILEYO

24. Usiqinisekisa ngantoni uDaniyeli 8:14?

²⁴ Akakho umntu onokumelana neNkosana yeenkosana—nkqu naloo kumkani ‘unkangeleko indlongondlongo’ uliGunya Lehlabathi lamaNgesi namaMerika! Imigudu yalo kumkani yokuphanzisa ingcwele kaThixo ayiphumeleli. Ingelosi ithi emva ‘kweengokuhlwa neentsasa ezingamawaka amabini anamakhulu amathathu, indawo engcwele ngokuqinisekileyo iya kubuyiselwa kwimeko yayo elungileyo,’ okanye “iya koyisa.”—Daniyeli 8:13, 14; The New English Bible.

25. Lide kangakanani ixesha elingokwesiprofeto lemihla engama-2 300, ibe limele linxityelelaniswe nasiphi isiganeko?

²⁵ Imihla engama-2 300 ilixesha elingokwesiprofeto. Ngenxa yoko, siza kusebenzisa unyaka wesiprofeto wemihla engama-360. (ISityhilelo 11:2, 3; 12:6, 14) Ngoko imihla engama-2 300 yenza iminyaka ebalwa ngeenyanga emi-6 eneenyanga ezi-4 neentsuku ezingama-20. Lalinini elo xesha? Kaloku, ngeminyaka yee-1930, abantu bakaThixo baqalisa ukuhlangabezana nentshutshiso eyandayo kumazwe ahlukahlukeneyo. Yaye ebudeni beMfazwe Yehlabathi II, amaNgqina kaYehova atshutshiswa kabuhlungu kumazwe egunya lehlabathi elintlu-mbini lamaNgesi namaMerika. Kwakutheni? Kwakungenxa yokubetha kwawo ngenqindi phantsi esithi aza ‘kuthobela uThixo njengomlawuli kunabantu.’ (IZenzo 5:29) Ngoko ke, imihla engama-2 300 imele inxulunyaniswe naloo mfazwe.b Kodwa ngaba ikho into esiyaziyo ngesiqalo nesiphelo selo xesha lingokwesiprofeto?

26. (a) Ubuncinane kufanele kuqaliswe nini ukubalwa kwemihla engama-2 300? (b) Yaphela nini imihla engama-2 300?

²⁶ Ukuze ‘indawo engcwele’ kaThixo ‘ibuyiselwe,’ okanye yakhiwe kwakhona ize ibuyele kwimeko efanele ibe yiyo, ngoko imihla engama-2 300 yayimele isusele kwixesha le ndawo ‘yayikwimeko elungileyo’ emehlweni kaThixo. Ubuncinane, oko kwenzeka ngoJuni 1, 1938, xa IMboniselo (yesiNgesi) yapapasha icandelo 1 lenqaku elinomxholo othi “Intlangano.” Icandelo 2 lavela kwinkupho yeMboniselo (yesiNgesi) kaJuni 15, 1938. Xa sibala iintsuku ezingama-2 300 (iminyaka emi-6, iinyanga ezi-4, neentsuku ezingama-20 ngokwekhalenda yesiHebhere) ukususela ngoJuni 1 okanye 15, 1938, sifika kuOktobha 8 okanye 22, 1944. Ngosuku lokuqala lwendibano ekhethekileyo eyayiqhutywa ePittsburgh, ePennsylvania, eUnited States, ngoSeptemba 30 ukusa kuOktobha 1, 1944, umongameli weWatch Tower Society waxubusha ngombandela othi “Ukulungelelaniswa Kobuthixo Namhlanje.” Kwintlanganiso yonyaka eyaqhutywa ngo-Oktobha 2, umgaqo-siseko woMbutho walungiswa ukuze usondele kwilungiselelo lobuthixo kangangoko umthetho unokuwuvumela. Zathi zakudandalaziswa izinto ezifunwa yiBhayibhile, ngokukhawuleza ulungelelwano lobuthixo lwasebenza ngokupheleleyo kumabandla amaNgqina kaYehova.

27. Bubuphi ubungqina obukhoyo bokubekwa kwemiqathango ‘kumbingelelo owenziwa rhoqo’ ebudeni beminyaka eyayibalasele ngentshutshiso yeMfazwe Yehlabathi II?

²⁷ Ngoxa imihla engama-2 300 yaqhubeka ebudeni bexesha leMfazwe Yehlabathi II, eyaqalisa ngowe-1939, idini ‘lombingelelo owenziwa rhoqo’ kwingcwele kaThixo labekelwa imiqathango engqongqo ngenxa yentshutshiso. Ngowe-1938 iWatch Tower Society yayinamasebe angama-39 awayemiselwe ukuze alathise umsebenzi wamaNgqina emhlabeni wonke, kodwa kwathi kufika owe-1943, labe elo nani lihle laya kutsho kuma-21. Nenani labavakalisi boBukumkani landa kancinane ngelo xesha.

28, 29. (a) Njengoko iMfazwe Yehlabathi II yayifikelela esiphelweni, yintoni eyenzeka kwintlangano kaYehova? (b) Yintoni enokuthethwa ngemigudu yolunya yotshaba yokuphanzisa nokutshabalalisa ‘indawo engcwele’?

²⁸ Ebudeni beenyanga zokugqibela zeMfazwe Yehlabathi II, amaNgqina kaYehova aluqinisa uzimiselo lwawo lokuzukisa ulawulo lukaThixo nokumkhonza njengentlangano. Kungoko umsebenzi wawo walungelelaniswa ngokutsha ibe ngowe-1944 kwaqaliswa ukulungelelaniswa kwabo bakhokelayo. Phofu ke, IMboniselo (yesiNgesi) kaOktobha 15, 1944, yayinenqaku elinomxholo othi “Ukulungelelaniselwa Umsebenzi Wokugqibela.” Eli kwanamanye amanqaku elo xesha awayexubusha ngenkonzo abonisa ukuba imihla engama-2 300 yayiphelile nokuba ‘indawo engcwele’ yayiphinde ‘yakwimeko yayo elungileyo.’

²⁹ Imigudu ekhatshwa lulunya yotshaba yokuphanzisa nokutshabalalisa ‘indawo engcwele’ yawa phantsi. Baba ke boyise ngokwenene “abangcwele” ababesasele emhlabeni, kunye namaqabane abo ‘esihlwele esikhulu.’ (ISityhilelo 7:9) Ibe unanamhl’ oku ingcwele, ekwimeko efanelekileyo ngokobuthixo, isaqhubeka inikela inkonzo engcwele kuYehova.

30. Yintoni eza kwenzeka kungekudala ‘kukumkani onkangeleko indlongondlongo’?

³⁰ IGunya Lehlabathi lamaNgesi namaMerika lisaqhubeka libambe iintambo. ‘Kodwa liya kwaphulwa kungengasandla,’ yatsho ingelosi uGabriyeli. (Daniyeli 8:25) Kungentsuku zatywala, eli gunya lehlabathi lesixhenxe lesiprofeto seBhayibhile—lo kumkani ‘unkangeleko indlongondlongo’—uza kwaphulwa, kungengazandla zamntu, kodwa ngamandla angaphaya kwawemvelo eArmagedon. (Daniyeli 2:44; ISityhilelo 16:14, 16) Hayi indlela ekuchulumancisa ngayo ukwazi ukuba ngelo xesha ulongamo lukaYehova uThixo, iNkosana yeenkosana, luya kube luthethelelwe!

[Imibhalo esemazantsi]

UZUZE NTONI?

• Yintoni efuziselwa

‘yinkunzi yegusha eneempondo ezimbini’?

‘yibhokhwe exhonti nophondo lwayo olukhulu’?

ziimpondo ezine eziphuma endaweni ‘yophondo olukhulu’?

luphondo oluncinane olwaphuma kolunye lweempondo ezine?

• Ebudeni beMfazwe Yehlabathi II, iGunya Lehlabathi lamaNgesi namaMerika lazama njani ukuphanzisa ‘indawo engcwele,’ yaye ngaba laphumelela?

[Imaphu/Umfanekiso okwiphepha 166]

(Ukuba ufuna inkcazelo ehlahlelwe kakuhle, yiya kwimpapasho)

UBukhosi bamaMedi namaPersi

IMAKEDONIYA

IYIPUTA

IMemphis

ITIYOPIYA

IYerusalem

IBhabhiloni

IEcbatana

ISusa

IPersepolis

I-INDIYA

[Imaphu/Umfanekiso okwiphepha 169]

(Ukuba ufuna inkcazelo ehlahlelwe kakuhle, yiya kwimpapasho)

UBukhosi baseGrisi

IMAKEDONIYA

IYIPUTA

IBhabhiloni

UMlambo i-Indus

[Imaphu ekwiphepha 172]

(Ukuba ufuna inkcazelo ehlahlelwe kakuhle, yiya kwimpapasho)

UBukhosi baseRoma

IBRITANI

I-ITALI

IRoma

IYerusalem

IYIPUTA

[Umfanekiso ozalise iphepha, kwiphepha 164]

[Imifanekiso ekwiphepha 174]

Abanye babantu abaye bazibalula kwiGunya Lehlabathi LamaNgesi NamaMerika:

1. UGeorge Washington, umongameli wokuqala waseUnited States (1789-97)

2. UKumkanikazi uVitoliya waseBritani (1837-1901)

3. UWoodrow Wilson, umongameli waseUnited States (1913-21)

4. UDavid Lloyd George, inkulumbuso yaseBritani (1916-22)

5. UWinston Churchill, inkulumbuso yaseBritani (1940-45, 1951-55)

6. UFranklin D. Roosevelt, umongameli waseUnited States (1933-45)