Angoobani?

AMANGQINA KAYEHOVA anqwenela ukuba uqhelane nawo kakuhle. Kusenokwenzeka ukuba wazana nawo njengabamelwane okanye usebenza nawo mhlawumbi udibene nawo kweminye imicimbi yemihla ngemihla yobomi. Usenokuba uwabone esitratweni, ehambisa amaphephancwadi awo kubantu abadlulayo. Okanye usenokuba uye wathetha nawo ixeshana nje elifutshane endlwini yakho.

Eneneni, amaNgqina kaYehova anomdla kuwe nakwimpilo-ntle yakho. Afuna ukuba ngabahlobo bakho nokukuxelela okungakumbi ngawo, iinkolelo zawo, intlangano yawo nangendlela avakalelwa ngayo ngabantu nangehlabathi thina sonke esiphila kulo. Ukuze afeze oku, akulungiselele le ncwadana inemifanekiso.

Kwiinkalo ezininzi amaNgqina kaYehova afana nje nabantu bonke. Aneengxaki eziqhelekileyo—ezoqoqosho, ukugula, neemvakalelo. Maxa wambi ayazenza iimpazamo, kuba kaloku akafezekanga, akanamandla angaphaya kwawemvelo, okanye akangobantu abangenakusilela. Kodwa azama ukufunda kumava awo aze ngenkuthalo afundisise iBhayibhile ukuze alungise apho kufuneka khona. Azahlulele kuThixo ukuze enze ukuthanda kwakhe, yaye ayazibhokoxa ukuze aphumeze oku. Kuzo zonke izinto azenzayo akhangela ulwalathiso oluvela kwiLizwi likaThixo nakumoya wakhe oyingcwele.

Kubaluleke gqitha kuwo ukuba iinkolelo zawo zibe zisekelwe eBhayibhileni kungekhona kwiingcamango zabantu okanye kwiimfundiso zonqulo. Avakalelwa ngendlela awavakalelwa ngayo umpostile uPawulos xa wathi ephefumlelwe: “UThixo makafunyaniswe enenyaniso, nakuba wonke umntu efunyaniswa elixoki.” (Roma 3:4, INguqulelo Yehlabathi Elitshaa) Xa kufikelelwa kwiimfundiso ezidluliselwa njengenyaniso yeBhayibhile, amaNgqina alixhasa ngamandla ikhondo elalandelwa ngabemi baseBhereya xa beva umpostile uPawulos eshumayela: “Balamkela ilizwi ngeyona ntumekelelo inkulu yengqondo, bezincina ngenyameko iZibhalo mihla le mayela nokuba zinjalo kusini na ezo zinto.” (IZenzo 17:11) AmaNgqina kaYehova akholelwa ukuba zonke iimfundiso zonqulo zimele zivavanywe ngokuvumelana neZibhalo eziphefumlelweyo, enoba loo mfundiso inikelwa ngawo okanye ngomnye umntu. Ayakumema—ekubongoza—ukuba wenze oku xa uncokola nawo.

Ngokuphuma koku kucacile ukuba amaNgqina kaYehova akholelwa ukuba iBhayibhile iliLizwi likaThixo. Iincwadi zayo ezingama-66 azigqala njengeziphefumlelweyo nezichanileyo ngokwembali. Ezo ngokuqhelekileyo zibizwa ngokuba yiTestamente Entsha abhekisela kuzo njengeZibhalo zamaKristu zesiGrike, nezo kuthiwa yiTestamente Endala azibiza ngokuba ziZibhalo zesiHebhere. Asebenzisa iZibhalo zesiGrike nezesiHebhere yaye azamkela njengokuba zinjalo ngaphandle kwaxa amazwi okanye indlela ezibhalwe ngayo ibonisa ngokucacileyo ukuba iyafuzisela. Ayaqonda ukuba uninzi lweziprofeto zeBhayibhile luzalisekile, yaye ezinye ziyaqhubeka zizaliseka yaye ezinye ziseza kuzaliseka.

IGAMA LAWO

Ngaba angamaNgqina kaYehova? Ewe angawo, leyo yindlela azibiza ngayo. Elo ligama elizichazayo, elibonisa ukuba angqinela uYehova, ukuba unguThixo, yaye angqinela neenjongo zakhe. “UThixo,” “Nkosi,” “Mdali”—njengokuthi “Mongameli,” “Kumkani,” “Njengele”—ezo zizibizo nje yaye zisenokusetyenziswa kubantu abahlukeneyo abaliqela. Kodwa igama elithi “Yehova” lelobuqu yaye libhekisela kuThixo usomandla noMdali wendalo iphela. Oku kuboniswe kwiNdumiso 83:18, ngokutsho kweBhayibhile yesiXhosa: “Bazi ukuba wena, ugama linguYehova, unguwe wedwa osenyangweni phezu kwehlabathi lonke.”

Igama elithi Yehova (okanye Yahweh, ngokweJerusalem Bible yamaRoma Katolika nanjengoko abanye abaphengululi bekhetha ukutsho) livela izihlandlo ezimalunga nama-7 000 kwiZibhalo zesiHebhere zantlandlolo. Inkoliso yeeBhayibhile azilibonisi njengoko linjalo, kodwa endaweni yalo zisebenzisa elithi “Thixo” okanye “Nkosi.” Noko ke, ngokuqhelekileyo kwanakwezi Bhayibhile umntu unokubona apho kwisiHebhere santlandlolo kusetyenziswe khona elithi Yehova kuba kwezo ndawo amagama asetyenziswe endaweni yalo abhalwe ngoonobumba abakhulu, ngale ndlela: THIXO, NKOSI. Iinguqulelo eziliqela zanamhlanje zisebenzisa igama elithi Yehova okanye igama elithi Yahweh. Ngenxa yoko, INguqulelo Yehlabathi Elitsha ifundeka ngolu hlobo, kuIsaya 42:8, “NdinguYehova. Lilo elo igama lam.”

AmaNgqina kaYehova athabathe igama lawo kwingxelo yeZibhalo ekuIsaya isahluko sama-43. Apho imeko yeli hlabathi ijongwa njengesiganeko esenzeka ngokungathi kusenkundleni: Oothixo beentlanga bamenywa ukuba bazise ngaphambili amangqina abo ukuza kungqina ibango labo lobulungisa okanye beve amangqina kaYehova baze bayivume inyaniso. Apho uYehova uvakalisa oku kubantu bakhe: “Ningamangqina am, utsho uYehova, nina ningumkhonzi wam endimnyulileyo; ukuze nazi, nikholwe ndim, niqonde ukuba ndim; phambi kwam akubunjwanga thixo, nasemva kwam akuyi kubakho namnye. Mna ke, mna ndinguYehova, akukho msindisi ingendim.”—Isaya 43:10, 11, iBhayibhile yesiXhosa.

UYehova uThixo wayenamangqina emhlabeni ebudeni beminyaka engamawaka ngaphambi kokuzalwa kukaYesu. Emva kokuba eyamaHebhere isahluko 11 ichaze amanye aloo madoda okholo, eyamaHebhere 12:1 ithi: “Ngoko ke, ngenxa yokuba sinelifu elikhulu kangaka lamangqina elisingqongileyo, masithi nathi sibothule bonke ubunzima nesono esisithandela ngokulula, yaye masilubaleke ngonyamezelo ugqatso olubekwe phambi kwethu.” UYesu wathi phambi koPontiyo Pilato: “Ndizalelwe oku, yaye ndizele oku ehlabathini, ukuze ndiyingqinele inyaniso.” Ubizwa ngokuba ‘lingqina elithembekileyo neliyinyaniso.’ (Yohane 18:37; ISityhilelo 3:14) UYesu wabaxelela oku abafundi bakhe: “Niya kwamkela amandla xa umoya oyingcwele ufika kuni, yaye niya kuba ngamangqina am eYerusalem nakulo lonke elakwaYuda naseSamariya kude kuse nakwezona nxalenye zikude zomhlaba.”—IZenzo 1:8.

Ngenxa yoko, namhlanje kukho abantu abamalunga nezi-6 000 000 abashumayela iindaba ezilungileyo zoBukumkani bukaYehova obulawulwa nguKristu Yesu kumazwe angaphezu kwama-230 abavakalelwa kukuba bazibiza ngokufanelekileyo xa besithi bangamaNgqina kaYehova.

[Umbhalo osemazantsi]

[Amagama acatshulweyo akwiphepha 4]

Azahlulele ukwenza ukuthanda kukaThixo

[Amagama acatshulweyo akwiphepha 4]

Akholelwa ukuba iBhayibhile iliLizwi likaThixo

[Amagama acatshulweyo akwiphepha 5]

Eli gama linxulunyaniswa nesiganeko esenzeka ngokungathi kusenkundleni

[Amagama acatshulweyo akwiphepha 5]

Kukho amaNgqina amalunga nezi-6 000 000 kumazwe angaphezu kwama-230

[Umfanekiso okwiphepha 3]

Anomdla kuwe

[Umfanekiso okwiphepha 4]

Igama likaThixo lobuqu kwisiHebhere santlandlolo