Ukusetyenziswa Kolwandlalo

INGCAMANGO yokuthetha ngokusuka kulwandlalo ibenza boyike abantu abaninzi. Baziva bekhululeke ngakumbi xa yonke into abaza kuyithetha ibhalwe phantsi okanye inkqayiwe.

Kodwa ke, xa sithetha inyaniso, kwincoko yethu yemihla ngemihla asisebenzisi mbhalo-ngqangi. Asiwusebenzisi xa sincokola namalungu entsapho kunye nabahlobo. Asiwusebenzisi xa sinesabelo kubulungiseleli basentsimini. Kwaye asiwufundi naxa sithandaza ngokusuka entliziyweni, enoba kungasese okanye simela iqela labantu ngomthandazo.

Xa unikela intetho, ngaba ubakho umahluko xa usebenzisa umbhalo-ngqangi okanye ulwandlalo? Ngoxa ukufunda umbhalo-ngqangi olungiselelweyo kunokunceda ekuqinisekiseni ukuchana nasekusebenziseni amagama akhethiweyo, kuneentsilelo zako ekufikeleleni iintliziyo. Xa ufunda izivakalisi ezingaphezu kwesinye, ngokuqhelekileyo uya kuthetha ngesantya nangelizwi elahlukileyo kunendlela oqhele ukuthetha ngayo. Ukuba unikela ingqalelo engakumbi kumanqaku akho kunakubaphulaphuli bakho, abaninzi basenokungaphulaphuli ngenyameko ngendlela ebebeya kwenza ngayo ukuba bebevakalelwa kukuba ucinga ngabo yaye umbandela wakho uwenza ufanele iimeko zabo. Ukuze unikele intetho eshukumisa ngokwenene, ukuthetha ungajonganga lwandlalo kuyeyona ndlela ilungileyo.

ISikolo Sobulungiseleli Sobuthixo silungiselelwe ukusinceda kubomi bethu bemihla ngemihla. Xa sidibana nabahlobo, asithi rhuthu iphepha size sibafundele iingcamango zethu ukuze siqiniseke ukuba sisebenzisa amagama afanelekileyo. Kwinkonzo yasentsimini, asiphathi umbhalo-ngqangi esiza kuwufunda, kuba sisoyika ukulibala ezinye zeengongoma esifuna ukwabelana nabantu ngazo. Xa usenza umboniso esikolweni wendlela yokunikela ubungqina kwiimeko ezinjalo, ziqhelise ukuthetha ngendlela oqhele ukuthetha ngayo kangangoko unako. Xa ulungiselele kakuhle, uya kufumanisa ukuba ulwandlalo, enoba lolubethelelwe engqondweni okanye lolubhaliweyo, ludla ngokwanela ukukukhumbuza ngeengongoma eziziintloko ofuna ukuzixubusha. Kodwa unokuyihlakulela njani intembelo efunekayo ukuze unikele intetho ngokusuka kulo?

Hlengahlengisa Iingcamango Zakho. Ukuze usebenzise ulwandlalo xa unikela intetho, kufuneka uhlengahlengise iingcamango zakho. Oku akuthethi kuthi ukhethe amagama oceba ukuwasebenzisa. Kuthetha ukucinga ngaphambi kokuba uthethe.

Kubomi bemihla ngemihla, umntu odyuduzelayo usenokuzifumana ethetha izinto aza kuthi kamva azisole ngokuzithetha. Omnye umntu usenokushwaqa nje, athethe leya naleya. Yomibini le mikhwa inokuncedwa ngokuba ubani anqumame ukuze acinge ngaphambi kokuba athethe. Cinga ngosukelo lwakho kuqala, ulandelise ngokukhetha amanyathelo ekufuneka uwathabathe ukuze ulufikelele, wandule ke ukuqalisa ukuthetha.

Ngaba ulungiselela inkonzo yasentsimini? Ziphe ixesha, kungekhona elokuhlengahlengisa ingxowa yakho yasentsimini kuphela, kodwa nelokuhlengahlengisa iingcamango zakho. Ukuba ukhetha ukusebenzisa enye yeentshumayelo ezikuBulungiseleli Bethu Bobukumkani, yifunde kangangezihlandlo eziliqela ukuze ubethelele iingcamango eziziintloko engqondweni. Khawuchaze iingongoma eziziintloko zayo ngesivakalisi esinye okanye ezibini. Guqula amazwi ayo ukuze afanele ubuntu bakho kunye neemeko zentsimi yenu. Uya kukufumanisa kuluncedo ukuba nolwandlalo engqondweni yakho. Kusenokuquka ntoni oko? (1) Kwintshayelelo, unokukhankanya into exhalabisa abantu abaninzi kwindawo ohlala kuyo. Cela umninimzi ukuba aveze olwakhe uluvo. (2) Cinga ngento oza kuyithetha ngaloo mbandela, kuquka isibhalo esinye okanye ezibini ezibonisa isithembiso sikaThixo sokuzisa isiqabu. Ukuba imeko iyavuma, gxininisa into yokuba uYehova uya kukwenza oko ngoBukumkani bakhe, urhulumente wakhe wasezulwini. (3) Mkhuthaze loo mntu ukuba athabathe amanyathelo ngoko ukuxubushileyo. Unokumnika uncwadi okanye ucele isifundo seBhayibhile uze wenze amalungiselelo okuqhubeka naloo ngxubusho.

Okuphela kolwandlalo oza kulufuna kwintshumayelo enjalo lolubethelelwe engqondweni. Ukuba ufuna ukujonga ulwandlalo lwakho ngaphambi kotyelelo lwakho lokuqala, mhlawumbi olo lwandlalo lunokuba namagama ambalwa nje oza kuwasebenzisa kwintshayelelo, isibhalo sibe sinye okanye ezibini, kunye namagama ambalwa ofuna ukuwaquka kumqukumbelo wakho. Ukulungiselela nokusebenzisa ulwandlalo olunjalo kusenza siyeke ukugwegweleza, kusinceda ukuba sishiye umntu nesigidimi esicacileyo nekulula ukusikhumbula.

Ukuba kukho umbuzo okanye ingcamango edla ngokuphikiswa kwintsimi yenu, unokukufumanisa kuluncedo ukwenza uphando ngayo. Ngokuqhelekileyo kuye kufuneke iingongoma ezimbini okanye ezintathu ezisisiseko kunye nezibhalo ezizixhasayo. “Imixholo YeBhayibhile Yengxubusho” okanye imixholwana ebhalwe ngqindilili yencwadi ethi Ukuqiqa NgeZibhalo inokukunika ulwandlalo olufunayo. Usenokufumana enye incwadi enombandela ofanelekayo nofuna ukuwuquka. Bhala ulwandlalo olufutshane kunye naloo mbandela ufuna ukuwusebenzisa, uze uzifake kwingxowa yakho yenkonzo yasentsimini. Xa umninimzi ebuza umbuzo okanye ephikisa, mchazele ukuba uyalivuyela ithuba lokucacisa isizathu soko ukukholelwayo. (1 Pet. 3:15) Impendulo yakho yisekele kulwandlalo.

Xa uza kumela intsapho yakho, isifundo sencwadi seqela okanye ibandla ngomthandazo, kukwayingenelo ukulungisa iingcamango zakho. Ngokutsho kukaLuka 11:2-4, uYesu wanika abafundi bakhe ulwandlalo olulula lomthandazo onentsingiselo. Xa kwakunikezelwa itempile eYerusalem, uSolomon wenza umthandazo omde. Ngokuqinisekileyo wacinga kusengaphambili ngoko wayeza kukuthandazela. Waqala ngokujolisa ingqalelo kuYehova nakwisithembiso awayesenze kuDavide; walandelisa ngokuthetha ngetempile; emva koko wakhankanya nganye kwiimeko ezikhethekileyo kunye namaqela abantu. (1 Kum. 8:22-53) Nathi sinako ukungenelwa kule mizekelo.

Lwenze Lula Ulwandlalo Lwakho. Ngaba ulwandlalo lwakho uza kulusebenzisa ukunikela intetho? Lufanele luqulathe inkcazelo engakanani?

Khumbula ukuba ulwandlalo lwenzelwe ukuba lukuncede ukhumbule iingcamango. Usenokuvakalelwa kukuba kuya kuba yingenelo ukubhala izivakalisi ezimbalwa oza kuzisebenzisa njengentshayelelo. Kodwa emva koko, nikela ingqalelo kwiingcamango, kungekhona kumagama. Ukuba ezo ngcamango uzibhala njengezivakalisi, sebenzisa izivakalisi ezifutshane. Iingongoma eziziintloko ezimbalwa ofuna ukuzixubusha zifanele zicace kulwandlalo lwakho. Oku unokukwenza ngokuzibhala ngoonobumba abakhulu, uzikrwelele okanye uziphawule ngombala othile. Phantsi kwengongoma nganye eyintloko, bhala iingcamango ofuna ukuzisebenzisa xa uxubusha loo ngongoma. Bhala izibhalo oceba ukuzifunda. Kudla ngokuba kuhle ukufunda ngokusuka eBhayibhileni. Bhala imizekeliso ofuna ukuyisebenzisa. Usenokufuna ukucaphula incwadi ethile yehlabathi efanelekayo. Amanqaku akho wenze abe maninzi ngokwaneleyo ukuze abe nezibakala ezicacileyo oza kuzidlulisela. Kuya kuba lula ukulusebenzisa olo lwandlalo ukuba lulungelelaniswe kakuhle.

Abanye basebenzisa ulwandlalo oluneengongoma ezisisiseko. Ulwandlalo lunokuquka amagama ambalwa aziintloko, izibhalo isithethi esiza kuzicaphula ngentloko, kunye nemizobo okanye imifanekiso esinceda sikhumbule ezo ngcamango. Ngala manqaku alula, isithethi siyakwazi ukunikela umbandela waso ngendlela evakalayo kwaye siwunikele buncoko. Nantso ke eyona njongo yesi sifundo.

Kwiphepha 39 ukusa kwelama-42 kule ncwadi, uya kufumana ingxubusho ethi “Indlela Yokwenza Ulwandlalo.” Kuya kuba luncedo gqitha ukuwufunda lo mbandela xa usebenzela kwisifundo esithi “Ukusetyenziswa Kolwandlalo.”

Indlela Yokusebenzisa Ulwandlalo. Noko ke, usukelo lwakho asikokulungiselela intetho yakho ukuba ibe lulwandlalo. Kukusebenzisa ulwandlalo ngendlela ephumelelayo.

Inyathelo lokuqala ekusebenziseni ulwandlalo lwakho kukulungiselela indlela yokunikela intetho. Jonga umxholo, funda nganye kwiingongoma eziziintloko, uze uzibuze ngendlela ingongoma nganye eyintloko edibana ngayo nomxholo. Jonga ukuba lingakanani ixesha onokulichitha kwingongoma eyintloko nganye. Khawubuyele emva ke ngoku uze uhlolisise ingongoma eyintloko yokuqala. Phinda uhlolisise izibakala, izibhalo, imizekeliso kunye nemizekelo oceba ukuyisebenzisa xa uxubusha loo ngongoma. Wuphindaphinde kangangezihlandlo eziliqela loo mbandela de loo nxalenye yentetho yakho icace engqondweni yakho. Yenza okufanayo kwingongoma eyintloko nganye. Khangela ukuba yintoni na onokuyikhupha kwintetho yakho ukuze ugqibe ngexesha. Emva koko khawuphinde uyihlole yonke intetho. Jolisa ingqalelo kwiingcamango, kungekhona kumagama. Musa ukuyinkqaya intetho.

Xa unikela intetho, ufanele ukwazi ukubajonga abaphulaphuli bakho. Emva kokufunda isibhalo, ngokufuthi ufanele ukwazi ukuqiqa ngaso usebenzisa iBhayibhile yakho, kodwa ungakhange ujonge amanqaku akho. Ngendlela efanayo, xa usenza umzekeliso, wuchaze ngendlela obuya kwenza ngayo xa uxelela abahlobo kunokuba uwufunde. Njengoko uthetha, musa ukujonga amanqaku akho ukuze ubone isivakalisi ngasinye. Thetha ungajonganga lwandlalo, ibe uya kuzifikelela iintliziyo zabo bakuphulaphuleyo.

Xa ukwazi ukunikela intetho ngolwandlalo, uya kube uthabathe inyathelo elibaluleke gqitha lokuba sisithethi sesidlangalala esiphumelelayo.