Indlela Ebuncoko Yokunikela Intetho

ABANTU badla ngokuziva bekhululekile xa bencokola nabahlobo. Bathetha ngokukhululekileyo. Abanye bathetha ngodlamko; bambi bayazibamba. Noko ke, into enomtsalane kuloo ndlela yokuthetha kukuthetha ngendlela abaqhele ukuthetha ngayo.

Noko ke, xa usiya kumntu ongamqhelanga, akufanelekanga ukuthetha naye ngathi umqhelile okanye ukukhululeka ngokugqithiseleyo. Enyanisweni, kwezinye iindawo nayiphi na incoko phakathi kwabantu abangazaniyo iqalisa ngendlela engokwesithethe. Emva kokuba kuye kwaboniswa intlonelo efanelekileyo, xa imeko ivuma kusenokusetyenziswa ulwimi olukhululekileyo kuze kuncokolwe.

Naxa unikela intetho kufuneka ulumke. Ukukhululeka ngokugqithiseleyo xa uthetha kunokusithoba isidima sentlanganiso yamaKristu ize ingavakali ibalulekile loo nto ithethwayo. Kwezinye iilwimi, kufuneka usebenzise amabinzana athile xa uthetha nomntu omdala, umfundisi-ntsapho, igosa, okanye umzali. (Bona amabinzana asetyenziswe kwiZenzo 7:2 nakwisahluko 13:16.) Kusetyenziswa amabinzana awahlukileyo xa kuthethwa neqabane lomtshato okanye umhlobo osenyongweni. Ngoxa kungeyomfuneko ukubamba umzimba ngokugqithiseleyo xa sithetha eqongeni, sifanele sibe nentlonelo.

Noko ke, zikho izinto ezenza ubani avakale ebambe umzimba ngokungeyomfuneko xa enikela intetho. Enye yazo yindlela azakha ngayo izivakalisi. Ingxaki ibangelwa kukuba isithethi sizame ukuthetha amabinzana kanye ngendlela avela ngayo ephepheni. Ulwimi olubhaliweyo ludla ngokwahluka kakhulu kulwimi oluthethwayo. Kuyinyaniso ukuba, xa ubani elungiselela intetho udla ngokwenza uphando kumbandela opapashiweyo. Kudla ngokuba lulwandlalo olushicilelweyo oluba sisiseko sentetho. Kodwa ukuba iingcamango zakho uzidlulisela kanye ngendlela ezivela ngayo kuloo nto ishicilelweyo okanye uzifunda ngokungqalileyo ngokusuka kulwandlalo xa unikela intetho, intetho yakho isenokungavakali iyincoko. Ukuze uyigcine iyincoko, dlulisela iingcamango zakho ngawakho amazwi uze uphephe izivakalisi ezintsonkothileyo.

Enye into kukuguquguqula isantya. Ukunikela intetho ubambe umzimba kudla ngokubandakanya umntyangampo wamagama abizwa ngesantya esilinganayo. Kwincoko eqhelekileyo siye siguquguqulwe isantya sokuthetha kuze kusetyenziswe unqumamo lobude obahlukeneyo.

Kakade ke, xa uthetha nabaphulaphuli abaninzi, ukuthetha ngendlela ebuncoko kufanele kukhatshwe kukuphakanyiswa kwelizwi, ukucinezela kunye nehlombe ukuze uthimbe ingqalelo yabo.

Ukuze uncokole ngendlela efanelekileyo kubulungiseleli, kufuneka ukwenze umkhwa wakho ukuthetha kakuhle ngalo lonke ixesha. Oku akuthethi kuthi ufanele ufumane imfundo enomsila. Kodwa kuhle ukuhlakulela imikhwa yokuthetha eya kwenza abanye bakuphulaphule ngentlonelo oko ukuthethayo. Ucinga ngaloo nkalo, khawukhangele enoba kukho iingongoma ekufuneka usebenzele kuzo kwincoko yemihla ngemihla kwezi zilandelayo.

1. Waphephe amabinzana angquzulanayo nemigaqo yentetho okanye akunxulumanisa nabantu abaphila ubomi obungquzulana nemilinganiselo yobuthixo. Ngokuvisisana nesiluleko esikweyabaseKolose 3:8, luphephe ulwimi olurhabaxa okanye olukrwada. Kwelinye icala, intetho eqhelekileyo ifanelekile. Intetho eqhelekileyo, okanye intetho yemihla ngemihla, ikhululekile, kodwa kwangaxeshanye ivisisana nemigaqo eyamkelekileyo yentetho.

2. Kuphephe ukuphindaphinda amagama namabinzana amanye ukuze udlulisele kwanto iyingcamango onayo. Funda ukusebenzisa amagama akuchaza ngokucacileyo oko ukuthethayo.

3. Kuphephe ukuphindaphinda into osandul’ ukuyithetha ngokungeyomfuneko ngokuyicingisisa kakuhle into ofuna ukuyithetha; wandule ukuqalisa ukuthetha.

4. Kuphephe ukugqubuthela iingcamango ezintle ngokuthetha amagama amaninzi. Qhelisela ukuthetha ingongoma ofuna ukuba ikhunjulwe ngendlela ecacileyo nangesivakalisi esilula.

5. Thetha ngendlela ebonisa intlonelo kwabanye.