Babaleka Umlawuli Okhohlakeleyo

UYosefu uvusa uMariya aze amxelele into engxamisekileyo. Ingelosi kaYehova isandokubonakala kuye ephupheni isithi: “Vuka, thatha umntwana nomama wakhe, nibalekele eYiputa, nihlale apho de ndithi buyani, kuba ngoku uHerode uza kumkhangela lo mntwana ukuze ambulale.”​—Mateyu 2:13.

Ngoko nangoko uYosefu noMariya bathatha unyana wabo baze babaleke ngobusuku. Bayenza ngexesha elihle le nto kuba uHerode ufumanisa ukuba abavumisi ngeenkwenkwezi bamqhathile. Ebethe mababuyele kuye kodwa endaweni yoko bahamba babuyela kwilizwe labo. Uyavutha ngumsindo uHerode. Ufuna nyhani ukumbulala uYesu, ibe ngenxa yaloo nto ukhupha umyalelo wokuba abulawe onke amakhwenkwe aneminyaka emibini nangaphantsi eBhethelehem nakwiindawo eziyingqongileyo. Uqikelela le minyaka ngenxa yento ebeyixelelwe ngabavumisi ngeenkwenkwezi.

Imbi kakhulu into yokubulawa kwawo onke amakhwenkwe! Asazi ukuba kwabulawa amakhwenkwe amangaphi, kodwa isikhalo soomama sazalisekisa isiprofeto seBhayibhile esenziwa nguYeremiya umprofeti kaThixo.​—Yeremiya 31:15.

Ngelo xesha uYosefu nentsapho yakhe babalekele eYiputa ibe bahlala khona. Ngobunye ubusuku kufika ingelosi kaYehova kuYosefu ephupheni, ithi: “Vuka, uthathe umntwana nomama wakhe uye kwaSirayeli, kuba bafile abo bebefuna ukumbulala.” (Mateyu 2:20) UYosefu ugqiba ekubeni intsapho yakhe ingabuyela kwikhaya labo. Le nto izalisekisa isiprofeto esiseBhayibhileni esithi, unyana kaThixo uyabuya eYiputa.​—Hoseya 11:1.

Kuyabonakala ukuba uYosefu ufuna intsapho yakhe ihlale kwaYuda, kufutshane nedolophu yaseBhetelehem, apho bebehlala khona ngaphambi kokuba babalekele eYiputa. Kodwa ufumanisa ukuba unyana kaHerode okhohlakeleyo uArkelawo ngukumkani wakwaYuda. UThixo uphinda alumkise uYosefu ephupheni ngale ngozi. Ngoko uYosefu nentsapho yakhe bayenyuka baya kwisixeko saseNazarete esiseGalili, kude nendawo amaYuda akhonzela kuyo. UYesu ukhulela apha ibe loo nto izalisekisa esinye isiprofeto esithi: “Kuza kuthiwa ngowaseNazarete.”​—Mateyu 2:23.