ISAHLUKO 22

Abafundi Abane Baza Kuba Ngabalobi Babantu

MATEYU 4:13-22 MARKO 1:16-20 LUKA 5:1-11

UYESU UTHI KUBALANDELI BAKHE MABASOLOKO BEMLANDELA
ABALOBI BABA NGABALOBI BABANTU

Emva kokuba abantu baseNazarete bezame ukumbulala uYesu, uya kwisixeko saseKapernahum kufutshane noLwandle LwaseGalili olukwabizwa ngokuba ‘lichibi laseGenesarete.’ (Luka 5:1) Le nto izalisekisa isiprofeto esikwincwadi kaIsaya sokuba abantu baseGalili abakufutshane nolwandle, baza kubona ukukhanya okuqaqambe kakhulu.—Isaya 9:1, 2.

Apha eGalili uYesu uqhubeka echazela abantu ukuba “sele buza kufika uBukumkani bamazulu.” (Mateyu 4:17) UYesu udibana nabafundi bakhe abane. Ekuqaleni bebehamba kunye noYesu, kodwa xa bebesuka kwaYuda kunye naye, baye babuyela kwimisebenzi yabo. (Yohane 1:35-42) Ngoku lixesha lokuba bahlale bekunye noYesu ukuze abaqeqeshe baze baqhubeke nomsebenzi wokushumayela xa sele emkile.

Njengoko uYesu ehamba ngaselwandle, ubona uSimon Petros nomntakwabo uAndreya kunye nabanye abahlobo babo belungisa iminatha yabo. UYesu uya kubo aze akhwele kwisikhephe sikaPetros, amcele ukuba asingenise kancinci apha echibini. Bathi bakubhekela kancinci esantini, uYesu ahlale phantsi aze afundise abantu abangaselwandle ngoBukumkani.

Emva koko uYesu uthi kuPetros: “Qhubela esi sikhephe kwindawo enzulu, nize nihlise iminatha yenu ukuze nibambise iintlanzi.” UPetros uthi: “Mfundisi, sibulaleke ubusuku bonke, asabambisa nto, kodwa ke kuba usitsho, ndiza kuyihlisa iminatha.”—Luka 5:4, 5.

UAndreya, uYakobi noYohane bayasokola ukufaka iminatha kwisikhephe; uPetros uguqe phambi koYesu

Bayayihlisa iminatha baze babambise iintlanzi ezininzi ide iqalise ukuqhaqheka iminatha. Ngokukhawuleza la madoda abiza abanye abasebenza nabo abakwisikhephe esikufutshane ukuba bazokubanceda. Emva koko zombini ezi zikhephe zigcwala ziintlanzi zide ziqalise ukutshona. Xa uPetros ebona le nto uguqa phambi koYesu aze athi: “Ndiyeke mna Nkosi, kuba ndingumoni.” UYesu uthi: “Sukoyika. Ukususela ngoku uza kubambisa abantu bephila.”—Luka 5:8, 10.

UYesu uthi kuPetros noAndreya: “Ndilandeleni, ndiza kunenza abalobi babantu.” (Mateyu 4:19) Ubiza nabanye abalobi ababini, uYakobi noYohane, oonyana bakaZebhedi. Nabo abalibazisi bayamlandela. Bobane aba balobi bashiya ishishini labo lokuloba baze babe ngabalandeli bakaYesu.