UYesu Ufundisa Ezinye Izinto Ezibalulekileyo

UYesu usandokufundisa abalandeli bakhe ukuba bamele babe ngabantu abanjani. Bamele babe njengabantwana, bathobeke baze bangaziphakamisi. Ude wathi, “nabani na owamkela umntwana omncinci njengalo egameni lam, wamkela nam.”​—Mateyu 18:5.

Into abayifundisiweyo nguYesu ibibaluleke kakhulu kuba bebephikisana ngokuba ngubani oyena umkhulu phakathi kwabo. Emva kokuba ebafundise ngendlela ekubaluleke ngayo ukuthobeka, umpostile uYohane uthetha ngenye into esandokwenzeka. Uthi: “Sibone umntu ekhupha iidemon egameni lakho, sazama ukumnqanda, kuba akanguye omnye wethu.”​—Luka 9:49.

Ngaba uYohane ucinga ukuba ngabapostile kuphela abanegunya lokuphilisa abantu baze bakhuphe needemon? Ukuba kunjalo, kutheni le ndoda ingumYuda ikwazi ukukhupha iidemon? Kubonakala ngathi uYohane ufuna le ndoda ingayenzi le mimangaliso kuba ayihambi nabapostile kunye noYesu Kristu.

Impendulo kaYesu iyamothusa uYohane. Ithi: “Myekeni, kuba akukho mntu unokwenza imimangaliso egameni lam aze ajike athethe kakubi ngam. Kuba nabani na ongasichasiyo ungakuthi. Ndiyaniqinisekisa ukuba, nabani na oninika amanzi okusela ngenxa yokuba ningabakaKristu, nakanjani na uza kuwufumana umvuzo wakhe.”​—Marko 9:39-41.

Okwangoku, le ndoda ayinyanzelekanga ukuba ihambe noYesu ukuze ibonise ukuba ingakwicala lakhe. Kaloku alikabikho ibandla lamaKristu. Ngoko xa le ndoda ingahambi noYesu, loo ayithethi ukuba iyamchasa okanye ikhuthaza iindlela ezimbi zokukhonza. Kucacile ukuba inokholo kuYesu, ibe into ayithethayo ibonisa ukuba le ndoda iza kuwufumana umvuzo wayo.

Kwelinye icala, ibiza kuba yingxaki le ukuba le ndoda ibiye yaphelelwa lukholo ngenxa yento ethethwe okanye eyenziwe ngabapostile. Kaloku uYesu uthi: “Nabani na owenza omnye waba bancinci aphelelwe lukholo, ngekubhetele ukuba ebebotshelelwe ilitye elikhulu lokuguba entanyeni waza waphoswa elwandle.” (Marko 9:42) Emva koko uYesu uthi abalandeli bakhe mabasuse nento ebaluleke njengesandla, unyawo, okanye ilihlo ukuba loo nto ibenza bone. Kubhetele umntu angabi naso isandla, unyawo, okanye ilihlo aze afumane uBukumkani BukaThixo kunokuba abe nazo ezo zinto aze aphoswe eGehena (okanye kwiNtlambo kaHinom). Kusenokwenzeka ukuba abapostile bayayazi le ntlambo ikufutshane neYerusalem nekutshiswa kuyo inkunkuma, ngenxa yaloo nto bayaqonda ukuba uYesu uthetha ngokutshatyalaliswa ngokupheleleyo.

UYesu uyabalumkisa athi: “Lumkani, ningadeleli namnye kwaba bancinci, kuba ndiyaniqinisekisa ukuba, iingelosi zabo ezulwini zihlala zibubona ubuso bukaTata osezulwini.” UTata ubathanda nyhani aba “bancinci.” UYesu ubaxelela ngendoda eneegusha eziyi-100, kuze kulahleke ibe nye. Le ndoda iyazishiya ezo ziyi-99 ize iyokukhangela leyo ilahlekileyo. Xa iyifumana iyivuyela ngaphezu kwezo ziyi-99 bezingalahlekanga. Emva koko uYesu uthi: “NoTata osezulwini akafuni kulahleke nokuba abe mnye kwaba bancinci.”​—Mateyu 18:10, 14.

Mhlawumbi kuba ecinga ngento ebebephikisana ngayo abafundi bakhe, uthi: “Yibani nencasa yetyiwa, kuhlale kukho uxolo phakathi kwenu.” (Marko 9:50) Ityiwa yenza ukutya kube mnandi. Ngoko xa umntu enencasa yetyiwa loo nto yenza into ayithethayo kube lula ukuyamkela, ibe kubakho uxolo kuze kungaphikiswana.​—Kolose 4:6.

Ngamanye amaxesha kuza kuvela iingxaki ezinkulu, ibe uYesu uyayichaza indlela ezimele zilungiswe ngayo. Uthi: “Ukuba umzalwana wakho uyakona, hamba uyokuthetha naye ngaloo nto ninobabini kuphela. Ukuba uyakumamela, uya kuba umncedile umzalwana wakho.” Umele wenze ntoni ukuba akakumameli? UYesu uthi: “Yiya kuye uhamba nomntu omnye okanye ababini, ukuze kubekho amangqina amabini okanye amathathu xa kugwetywa ityala.” Ukuba loo nto ayiyilungisi ingxaki, nimele nithethe “nebandla,” ngabadala ke abo, ukuze benze isigqibo. Ukuba akabamameli abadala, umele wenze ntoni? “Kuwe makabe njengomntu weentlanga nomqokeleli werhafu.”​—Mateyu 18:15-17.

Abadala bebandla bamele bathobele iLizwi LikaThixo. Ukuba bafumanisa ukuba umoni unetyala, umele ohlwaywe okanye akhutshelwe ngaphandle. Isigqibo sabo sibonisa isigqibo ‘esele sibotshiwe ezulwini.’ Kodwa ukuba bafumanisa ukuba akanatyala, isigqibo sabo sibonisa isigqibo ‘esele sikhululwe nasezulwini.’ Le migaqo yayiza kunceda nyhani xa sele likhona ibandla lamaKristu. Xa kulungiswa iingxaki ezinjengezi, uYesu uthi: “Ukuba kukho abantu ababini okanye abathathu abadibene egameni lam, nam ndikhona phakathi kwabo.”​—Mateyu 18:18-20.