UPetros Uphika UYesu

Emva kokuba uYesu ebanjiwe kwigadi yaseGetsemane, abapostile bayamshiya baze babaleke kuba besoyika. Kodwa uPetros “nomnye umfundi” ekubonakala ukuba ngumpostile uYohane, bayema bayeke ukubaleka. (Yohane 18:15; 19:35; 21:24) Basenokumfumana uYesu njengoko esiwa kuAnas. Xa uAnas esisa uYesu kuMbingeleli Omkhulu uKayafa, uPetros noYohane bayalandela kodwa bahambela kude. Kusenokwenzeka ukuba boyikisela ubomi babo kodwa babe benexhala lokuba kuza kwenzeka ntoni kwiNkosi yabo.

UYohane uyaziwa ngumbingeleli omkhulu uKayafa ngenxa yaloo nto uyakwazi ukungena eyadini yakhe. UPetros yena ushiyeka ngaphandle de uYohane abuye aze athethe nesicakakazi esisemnyango. Emva koko uPetros uyavunyelwa angene.

Kuyabanda ngobu busuku ibe abantu abakule yadi babase umlilo. UPetros uhlala kunye nabo ukuze angagodoli nokuze abone ukuba ‘liza kuphelela phi’ ityala likaYesu. (Mateyu 26:58) Ngoku ngenxa yokuba umlilo wenze kwakhanya, isicakakazi ebesingenise uPetros sitsho simbone kakuhle. Sithi: “Awunguye na omnye wabafundi bale ndoda?” (Yohane 18:17) Ayisiso sodwa esimqaphelayo nesimtyhola ngokuba ebekunye noYesu.​—Mateyu 26:69, 71-73; Marko 14:70.

Le nto imcaphukisa kakhulu uPetros. Akafunʼ ukwaziwa kwaziwa, ngoko uya ngase mnyango. Uyamphika uYesu, ude athi: “Andimazi lo mntu, andiyazi nale nto uthetha ngayo.” (Marko 14:67, 68) ‘Uyaqalekisa aze afunge’ ukuba uthetha inyani ibe ukuba akunjalo ukulungele ukohlwaywa.​—Mateyu 26:74.

Ityala likaYesu lona lisaqhuba kwalapha kwindlu kaKayafa kodwa kumgangatho ophezulu. UPetros nabanye abalapha ezantsi bayawabona amangqina angenayo naphumayo.

Indlela uPetros athetha ngayo iyamchaza ukuba ungowaseGalili ibe iyamchaza nokuba uyaxoka. Enye into, omnye wabantu abalapha uzalana noMalko lo uPetros ebemqhawule indlebe. Uthi lo mntu: “Ayinguwe lo bendimbone emyezweni ukunye naye?” Xa uPetros ephika okwesithathu, uyakhonya umqhagi njengoko bekutshiwo.​—Yohane 13:38; 18:26, 27.

Ngelo xesha uYesu ukwiveranda ephezulu ibe ujonge ezantsi apha kule yadi. INkosi iyajika ize ijonge ngqo kuPetros, ibe inoba ukhathazeka ngeyona ndlela. Ukhumbula into ibithethwe nguYesu kwiiyure nje ezimbalwa ngaphambili, xa bebekwigumbi eliphezulu. Khawucinge indlela aziva ngayo xa eyiqonda le nto ayenzileyo. Uphuma phandle aze akhale kabuhlungu.​—Luka 22:61, 62.

Yenzeka njani into enje? UPetros lo ebezithembile nobethembekile, uyiphika njani iNkosi yakhe? Ngalo lonke eli xesha, kugqwethwa izinto uYesu ebezithethile ibe wenziwa umntu ombi. UPetros bekumele ukuba uye wammela uYesu kuba akanatyala, endaweni yaloo nto uye wamjikela Lowo ‘unamazwi anika ubomi obungunaphakade.’​—Yohane 6:68.

Le nto imbi yenzeke kuPetros ibonisa ukuba nomntu onokholo nozinikeleyo angaphuma endleleni ukuba akazilungelanga iingxaki nokuvavanywa okunokuvela. Le nto imele ibe sisilumkiso kubo bonke abakhonzi bakaThixo.