Utata Wawo NguAbraham Okanye NguMtyholi?

UYesu useseYerusalem kwiTheko Leentente (okanye leMinquba), ibe usashumayela ngenyani ebalulekileyo. Amanye amaYuda alapha asandokuthi kuye: “Siyinzala ka-Abraham, ibe zange sibe ngamakhoboka.” UYesu uthi kuwo: “Ndiyazi ukuba niyinzala ka-Abraham. Kodwa nifuna ukundibulala, kuba alingeni kuni ilizwi lam. Mna ndithetha izinto endizibone ngokuya ndandikunye noTata, kodwa nina nenza izinto enizive ngotata wenu.”​—Yohane 8:33, 37, 38.

Eyona nto ayithethayo icacile, uTata wakhe akafani notata wawo. AmaYuda awayiqondi le nto uYesu ayithethayo, ngoko ayaphinda athi: “Utata wethu nguAbraham.” (Yohane 8:39; Isaya 41:8) Bayinzala ka-Abraham, ngenxa yaloo nto bathi ukholo lwabo luyafana noluka-Abraham, umhlobo kaThixo.

UYesu uwaphendula ngendlela eyothusayo. Uthi: “Ukuba beningabantwana baka-Abraham, beniza kwenza izinto ezenziwa nguAbraham.” Nyhani ke, unyana wenza izinto ezenziwa ngutata wakhe. Uqhubeka athi: “Kodwa naku nifuna ukundibulala, ndakugqiba ukunixelela inyani endiyive kuThixo. UAbraham ebengasoze ayenze loo nto.” Emva koko uthi: “Nenza izinto ezenziwa ngutata wenu.”​—Yohane 8:39-41.

Nangoku amaYuda awakayazi ukuba uYesu uthetha ngabani. Athi: “Asizalelwanga ngaphandle emtshatweni; sinoTata omnye, uThixo.” UThixo nguTata wawo nyhani ke? UYesu uthi: “Ukuba uThixo ebenguTata wenu, ngenindithanda, kuba ndilapha nje ndivela kuye. Andizizelanga apha, kodwa ndithunywe nguye.” Ubuza umbuzo kodwa aphinde aziphendule. Uthi: “Kutheni ningandiva nje? Kungenxa yokuba anizamkeli izinto endizithethayo.”​—Yohane 8:41-43.

Ebezama ukucacisela amaYuda ukuba, ukuba akakholwa kuye, loo nto ibonisa ukuba utata wawo nguMtyholi. Kodwa ngoku utsho phandle athi: “Utata wenu nguMtyholi, ibe nithanda ukwenza izinto ezithandwa nguye.” Unjani utata wawo? UYesu uyamchaza, uthi: “Yena wayengumbulali kwasekuqaleni, ibe wayilahla inyani.” Uqhubeka athi: “Umntwana kaThixo uyazimamela izinto ezithethwa nguThixo. Nina aningobantwana bakaThixo, yiloo nto ningandimameli.”​—Yohane 8:44, 47.

Le nto ithethwa nguYesu iyawacaphukisa amaYuda, ibe athi: “Asinyanisanga ke xa sisithi, ‘UngumSamariya, ibe unedemon’?” Xa esithi “ungumSamariya,” abonisa indlela amcaphukela ngayo. Kodwa uYesu akayihoyi le nto, endaweni yoko uthi: “Andinademon, ndihlonipha uTata, kodwa nina niyandidelela.” Ukuze abonise ukuba into amaYuda ayithethayo inokuba nemiphumo emihle okanye emibi, uthi: “Nabani na ozenzayo izinto endizifundisayo, soze afe.” Akathethi ukuba abapostile bakhe nabanye abantu abamlandelayo soze bafe nyhani. Kodwa uthetha ukuba soze bafe ngokupheleleyo, okanye bafe “ukufa kwesibini,” bengenathemba lokuvuswa.​—Yohane 8:48-51; ISityhilelo 21:8.

Kodwa amaYuda acinga ukuba uthetha ngokufa kokoqobo. Athi: “Ngoku siyazi ukuba nyhani unedemon. UAbraham wafa, nabaprofeti bafa, kodwa wena uthi, ‘Nabani na ozenzayo izinto endizifundisayo, soze afe.’ Uzama ukusixelela ukuba wena umkhulu kunotata wethu uAbraham, lo yena wafayo? . . . Ucinga ukuba ungubani ke wena?”​—Yohane 8:52, 53.

UYesu ebenokubaphendula athi unguMesiya, kodwa akayenzi loo nto. Endaweni yokuba abachazele ngqo ukuba ungubani, uthi: “Ukuba ndiyazizukisa, uzuko lwam aluyonto. NguTata ondizukisayo, lo nina nithi nguThixo wenu, kodwa ningamazi. Mna ke ndiyamazi. Ukuba bendisithi andimazi, bendiza kuba ndilixoki njengani.”​—Yohane 8:54, 55.

Ngoku uYesu ubuyela kumzekelo ka-Abraham owayethembekile, uthi: “UAbraham utata wenu wayekuvuyela ukuza kwexesha lokufika kwam, ibe walibona waza wavuya.” AmaYuda awamkholelwa, ibe athi: “Utsho njani ukuba wakhe wambona uAbraham, kodwa awukabi nayo neminyaka eyi-50?” UYesu uthi kuwo: “Ndiyaniqinisekisa ukuba, ndabakho uAbraham engekazalwa.” Uthetha ngexesha awayephila ezulwini, ngaphambi kokuba eze aph’ emhlabeni engumntu.​—Yohane 8:56-58.

AmaYuda aba nomsindo xa emva esithi wayekho ngaphambi kokuba uAbraham abekho, ibe achola amatye efuna ukumbetha. Kodwa uyemka engamenzanga nto.