Ileta Evela KwiQumrhu Elilawulayo

Bavakalisi Abathandekayo Beendaba Ezilungileyo:

Ayikholeleki inyhweba esinayo yokukhonza kunye uThixo oyinyaniso, uYehova! “Sisebenza noThixo” yaye usinike umsebenzi ongcwele nosindisa ubomi wokuba sishumayele size sifundise iindaba ezilungileyo ezingoBukumkani bakhe. (1 Kor. 3:9; Mat. 28:19, 20) Ukuze siwenze siseluxolweni yaye simanyene lo msebenzi wenziwa ehlabathini lonke, kufuneka silungelelane.​—1 Kor. 14:40.

Le ncwadi iza kukunceda uqonde indlela elisebenza ngayo ibandla lamaKristu namhlanje. Ithetha ngemisebenzi nangezinye izinto omele uzenze njengeNgqina LikaYehova. Ukuba uyayixabisa le misebenzi uze uyenze kakuhle, uza kuba “nokholo olomeleleyo.”​—IZe. 16:4, 5; Gal. 6:5.

Ngoko ke, siyakukhuthaza ukuba uyifunde kakuhle le ncwadi. Khangela iindlela onokuyisebenzisa ngazo ebomini bakho inkcazelo oyifumana kuyo. Ngokomzekelo, ungafumana iimpendulo zale mibuzo ilandelayo. Ukuba usandokuba ngumvakalisi ongabhaptizwanga, ziintoni onokuzenza ukuze ube liNgqina LikaYehova? Kwelinye icala, ukuba ubhaptiziwe ungenza ntoni ukuze ukhule elukholweni yaye umsebenzele ngakumbi uYehova? (1 Tim. 4:15) Yintoni wena onokuyenza ukuze kubekho uxolo ebandleni?​—2 Kor. 13:11.

Ukuba uyindoda ebhaptiziweyo, yintoni onokuyenza ukuze ukwazi ukuba sisicaka solungiselelo uze kamva ube ngumdala? Baninzi abantu abangena kwintlangano kaThixo, ngoko ke bafuneka ngokungxamisekileyo abazalwana abaza kukhokela. Le ncwadi iza kukunceda ubone into efunekayo ukuze ‘uzimisele’ ukumsebenzela ngakumbi uThixo.​—1 Tim. 3:1.

Sithandaza ngokusuka emazantsi eentliziyo zethu ukuba le ncwadi ikuncede uyibone yaye uyixabise indawo yakho kwintlangano kaYehova. Sinithanda nonke yaye siyaqhubeka sithandazela ukuba nibe phakathi kwabantu abaza konwaba ngonaphakade ekukhonzeni uYehova, uTata wethu wasezulwini.​—INdu. 37:10, 11; Isa. 65:21-25.