Ubukumkani Obuza Kulawula Ngonaphakade

Ngobunye ubusuku uKumkani uNebhukadenetsare waphupha into engaqhelekanga. Lamkhathaza eli phupha de kwanzima nokulala. Wabiza abantu bakhe bemilingo wathi: ‘Ndixeleleni iphupha lam.’ Bathi: ‘Kumkani, uphuphe ntoni?’ Wathi: ‘Ndixeleleni nina okanye ndiza kunibulala.’ Bona bathi: ‘Sixelele into oyiphuphileyo, siza kukutolikela.’ Wathi: ‘Nindiqhathelani? Ndixeleleni ukuba ndiphuphe ntoni!’ Bathi: ‘Inzima le nto ufuna siyenze kumkani. Akukho mntu unokukwazi ukuyenza.’

UNebhukadenetsare wacaphuka kakhulu de wayalela ukuba kubulawe onke amadoda azizilumko. Kwakuza kubulawa noDaniyeli, uShadraki, uMeshaki noAbhednego. UDaniyeli wacela ukumkani ukuba akhe abanike ixeshana. Yena nabahlobo bakhe bacela uYehova ukuba abancede. Wenza ntoni uYehova?

UYehova wabonisa uDaniyeli iphupha likaNebhukadenetsare waza wamxelela nento eliyithethayo. Ngosuku olulandelayo uDaniyeli waya kwisicaka sikakumkani wathi: ‘Ungawabulali amadoda azizilumko. Ndiza kulichaza iphupha likakumkani.’ Isicaka samsa kuNebhukadenetsare. UDaniyeli wathi kukumkani: ‘UThixo ukuxelele into eza kwenzeka. Nali iphupha lakho: Uphuphe umfanekiso omkhulu onentloko yegolide, isifuba neengalo izezesilivere, isisu namathanga ziyikopolo, imilenze iyintsimbi, zona iinyawo ziyintsimbi exube nodongwe. Kuye kwawa ilitye entabeni laza latyumza iinyawo zalo mfanekiso. Waqhekeka wangumgubo oye waphephetheka nomoya, ilitye lona laba yintaba enkulu ezalise umhlaba.’

Emva kokuba elichazile wathi: ‘Nantsi into eliyithethayo: Intloko yegolide imela ubukumkani bakho. Isilivere bubukumkani obuza kulawula emva kwakho. Kuza kubakho obufana nekopolo, obuza kulawula umhlaba wonke. Obulandela obo buza komelela njengentsimbi. Obokugqibela buza kwahlulelana, buza komelela njengentsimbi, buze kwangaxeshanye buthambe njengodongwe. Ilitye eliye laba yintaba buBukumkani bukaThixo. Buza kuzityumza zonke ezi zikumkani buze bulawule ngonaphakade.’

UNebhukadenetsare waguqa phambi koDaniyeli, wagoba intloko. Wathi: ‘UThixo wakho ukutyhilele eli phupha. Akakho uThixo ofana naye.’ UNebhukadenetsare akazange ambulale uDaniyeli, wamenza umphathi wawo onke amadoda azizilumko nomlawuli wephondo laseBhabhiloni. Uyayibona indlela uYehova awawuphendula ngayo umthandazo kaDaniyeli?