UYesu Wenza Imimangaliso Emininzi

UYesu weza emhlabeni ukuze ashumayele iindaba ezilungileyo zoBukumkani bukaThixo. Ukuze abonise into eza kwenziwa nguYesu xa enguKumkani, uYehova wamnika umoya oyingcwele ukuze enze imimangaliso. Wayephilisa nasiphi na isigulo. Naphi na apho wayesiya khona, abantu abagulayo babesiya kuye ukuze abaphilise, ibe wayebaphilisa bonke. Iimfama zazibona, abantu abangevayo besiva, abakhubazekileyo behamba, ibe wayekhupha needemon. Nokuba babambe nje into ayinxibileyo, babephila. Naphi na apho akhoyo, abantu babemlandela. Naxa uYesu efuna ukuba yedwa, wayengabagxothi.

Ngenye imini, abantu beza nendoda ekhubazekileyo kwindlu awayehlala kuyo uYesu. Kodwa loo ndlu yayigcwele ngabantu kangangokuba abazange bakwazi ukungena. Ngoko bagqobhoza uphahla lwayo baza bayehlisela kuYesu. UYesu wathi kuyo: ‘Phakama uhambe.’ Nyhani yaphakama yahamba, abantu bamangaliswa.

Xa uYesu wayefika kwenye ilali, amadoda ayi-10 aneqhenqa amela kude aza akhwaza athi: ‘Yesu, sincede!’ Ngaloo mihla, abantu abaneqhenqa babengavumelekanga ukuba basondele kwabanye abantu. UYesu wawaxelela ukuba aye etempileni kuba uMthetho kaYehova wawusithi abantu abaneqhenqa bamele baye khona emva kokuba benyangiwe. Ngoxa esendleleni eya khona, aphila. Xa enye yaloo madoda ibona ukuba iphilile, yaya kubulela uYesu yaza yadumisa uThixo. Kumadoda ayi-10 aphiliswayo, yiyo qha eyambulelayo uYesu.

Umfazi owayegula iminyaka eyi-12, wayenokwenza nantoni na enokumphilisa. Waya kuYesu owayephakathi kwabantu abaninzi waza wabamba impahla awayeyinxibile. Waphila ngoko nangoko. UYesu wabuza: “Ngubani ondibambileyo?” Lo mfazi wayesoyika kakhulu, kodwa waya kuye wamxelela ukuba nguye ombambileyo. UYesu wamthuthuzela wathi: ‘Ntombi yam, hamba ngoxolo.’

Igosa elinguYayiro lathi kuYesu: ‘Ndicela siye emzini wam! Intombazana yam encinci igula kakhulu.’ Kodwa loo ntombazana yasweleka ngaphambi kokuba uYesu afike emzini kaYayiro. Xa efika, wabona abantu abaninzi ababeze kulilisana nale ntsapho iswelekelweyo. UYesu wathi kubo: ‘Sanukulila; intombazana ilele.’ Emva koko, wabamba isandla sayo wathi: “Ntombazana, vuka!” Yavuka ngoko nangoko, waza uYesu waxelela abazali bayo ukuba bayinike ukutya. Khawucinge indlela abasenokuba babevuya ngayo abazali bayo!