Hlalani Nimanyene Ebandleni

Xa sikunye nabazalwana noodade, siye sizive njengoKumkani uDavide owathi: “Kulungile ibe kuthandeka ngeyona ndlela ukuhlala kwabazalwana kunye bemanyene!” (INdumiso 133:1) Kodwa ke indlela esimanyene ngayo ayiveli nje izenzekele. Sonke sinento esimele siyenze ukuze sihlale simanyene.

1. Yintoni entle neyahlukileyo ngabantu bakaThixo?

Xa usiya kwiintlanganiso zebandla kwelinye ilizwe, usenokungaluqondi ulwimi oluthethwayo, kodwa uza kuziva ukhululekile, wamkelekile ibe uthandwa. Ngoba? Kaloku emhlabeni wonke sisebenzisa iincwadi zeBhayibhile ezifanayo. Ibe sizama ngandlela zonke ukubonisa ukuba siyathandana. Nokuba sihlala phi, sonke ‘sibiza egameni likaYehova, simkhonza simanyene.’​—Zefaniya 3:9.

2. Yintoni onokuyenza ukuze kubekho umanyano?

“Thandanani kakhulu ngokusuka entliziyweni.” (1 Petros 1:22) Ungayenza njani le nto ithethwa kule vesi? Endaweni yokuba ujonge iimpazamo zabanye, zama ukujonga iimpawu ezintle abanazo. Khawuzame ukubazi abazalwana noodade abangafaniyo nawe, ungasoloko uchith’ ixesha nabo bafana nawe nabathanda izinto ozithandayo. Ukuba ubona ngathi uyabakhetha abanye, zama ukuyilungisa loo nto.​—Funda 1 Petros 2:17.a

3. Xa kukho into eningavumelani ngayo nomntu okhonza naye, uza kwenza ntoni?

Simanyene, kodwa siyazenza iimpazamo. Ngamanye amaxesha sinokubaphoxa abanye okanye sibakhathaze. Yiloo nto iLizwi LikaThixo lisithi: “Qhubekani . . . nixolelana,” liphinde lithi, “kanye njengoko uYehova wanixolela ngokusuka entliziyweni.” (Funda amaKolose 3:13.) Kudala simkhathaza uYehova, kodwa usoloko esixolela. Ngoko, ulindele ukuba nathi sibaxolele abazalwana noodade. Ukuba ubona ngathi kukho umntu omkhathazileyo, yiya kuye uyoyilungisa loo ngxaki.​—Funda uMateyu 5:23, 24.b

FUNDA NEZINYE IZINTO

4. Yeka ukubakhetha abantu

Sifuna ukubathanda bonke abazalwana noodade. Kodwa kusenokuba nzima ukwamkela umntu ongafaniyo nathi. Yintoni enokusinceda? Funda iZenzo 10:34, 35, nize nincokole ngale mibuzo:

• UYehova uvumela bonke abantu ukuba babe ngamaNgqina akhe. Ungamlinganisa njani kwindlela oziva ngayo ngabantu abangafaniyo nawe?

• Kwindawo ohlala kuyo, zeziphi iindlela abantu ababakhetha ngazo abanye ofuna ukuziphepha?

Funda 2 Korinte 6:11-13, nize nincokole ngalo mbuzo:

• Ungenza njani ukuze ubathande kakhulu bonke abazalwana noodade?

5. Xolela ngokusuka entliziyweni uze wenze kubekho uxolo

Soze ibe khona imfuneko yokuba thina sixolele uYehova, kodwa yena usoloko esixolela ngokusuka entliziyweni. Funda iNdumiso 86:5, nize nincokole ngale mibuzo:

• Ukuxolela kukaYehova kukhulu kangakanani?

• Kutheni unombulelo ngendlela axolela ngayo?

• Ziintoni ezinokwenza kube nzima ukuhlala simanyene nabanye?

Singamlinganisa njani uYehova size sihlale simanyene nabazalwana noodade? Funda iMizekeliso 19:11, nize nincokole ngalo mbuzo:

• Xa umntu ekudika okanye ekucaphukisa, yintoni onokuyenza ukuze kube bhetele?

Ngamanye amaxesha, siyabacaphukisa abanye. Xa isenzeka loo nto, simele senze ntoni? Dlala IVIDIYO, nize nincokole ngalo mbuzo.

IVIDIYO: Ukudala Uxolo Kuzisa Iintsikelelo (6:01)

• Kule vidiyo, lo dade wenze ntoni ukuze kubekho uxolo?

6. Khangela izinto ezintle kubazalwana noodade

Xa sisiya sibazi bhetele abazalwana noodade, siye sazi izinto ezintle ngabo. Kodwa siye sazi kwaneempazamo zabo. Singenza njani ukuze sijonge kuphela izinto ezintle abazenzayo? Dlala IVIDIYO, nize nincokole ngalo mbuzo.

IVIDIYO: Yiba Ngumzekelo Omhle! (5:10)

• Yintoni enokukunceda ubone izinto ezintle kubazalwana noodade?

UYehova ujonga izinto ezintle esizenzayo. Funda 2 Kronike 16:9a, nize nincokole ngalo mbuzo:

• Ukwazi ukuba uYehova ujonga izinto ezintle kuwe kukwenza uzive njani?

UFUNDE NTONI?

Nawe ungakwazi ukuncedisa ekwenzeni ibandla limanyane, ngokubaxolela nangokubathanda bonke abazalwana noodade.

Khawutsho

• Ungayeka njani ukubakhetha abantu?

• Xa kukho into eningavumelani ngayo nomntu okhonza naye, uza kwenza ntoni?

• Kutheni ufuna ukulinganisa uYehova ngokubaxolela abanye?

JONGA NEZI ZINTO

Jonga ukuba umzekelo owenziwa nguYesu ungasinceda njani singabacingeli kakubi abanye.

Susa Umqadi (6:56)

Ngaba kunyanzelekile ukuba sixolise xa singenzanga nto irongo?

“Ukucela Uxolo​—Undoqo Wokudala Uxolo” (IMboniselo, Novemba 1, 2002)

Jonga ukuba yintoni eyanceda amadoda amabini awakhulela kwindawo enobuhlanga amanyana.

UJohny NoGideon: Babeziintshaba, Ngoku Bangabazalwana (6:42)

Jonga ukuba ungayilungisa njani ingxaki onayo nomnye umntu ngaphambi kokuba iphazamise uxolo ebandleni.

“Lungisa Ukungavisisani Ngomoya Wothando” (IMboniselo, Meyi 2016)