Imibuzo Evela Kubafundi
■ KuSirayeli wamandulo umjikelo weminyaka engama-49 wawulandelwa ngumnyaka weNtlokoma (umnyaka wama-50). Ngaba loo Ntlokoma ingqinelana nexesha elilandela iveki yokudala kukaThixo eyiminyaka engama-49 000?
Ngenxa yokuba eli nani lama-49 likho kuzo zombini ezi meko, kunokubonakala ukuba iNtlokoma yayiya kufanekisela kwangaphambili ixesha elalilandela ukuphela kweveki yokudala eyiminyaka engama-49 000. Kodwa kuluntu ngokuqhelekileyo akholiswayo lulo uThixo, okwenzekayo ebudeni beNtlokoma yakwaSirayeli kungqinelana ngakumbi nokuya kwenzeka ebudeni beMinyaka Eliwaka, iminyaka eliwaka yokugqibela yeveki yokudala, kungekhona okulandelayo emva kwaloo veki. Khawuqwalasele isiseko soku:
Okokuqala, uMthetho kaMoses wafuna ukuba wonke umnyaka wesixhenxe ube ngunyaka wesabatha elizweni; kwakumele kuhlwayelwe, kulinywe, okanye kuvunwe izilimo. Emva konyaka wesixhenxe weSabatha (unyaka wama-49), kwabakho unyaka okhethekileyo weNtlokoma, unyaka wama-50. Wawuyisabatha ekwathi ebudeni bayo ilizwe laphumla kwakhona. Okubaluleke ngakumbi kukuba, kwavakaliswa inkululeko. AmaHebhere awayezithengise ebukhobokeni akhululwa ekubeni netyala nasebukhobokeni. Kwakhona, ilizwe lokudliw’ ilifa labuyiselwa kwiintsapho ezazinyanzelwe ukuba zilithengise. Ngoko iNtlokoma yayilixesha lokukhululwa nelokubuyiseIwa kwamaSirayeli.—Levitikus 25:1-46.
Okwesibini, ukufundisisa inzaliseko yesiprofeto seBhayibhile nendawo esikuyo kumsinga wexesha kubonisa ngamandla ukuba umhla ngamnye wemihla yokudala (Genesis, isahluko 1) uyiminyaka engama-7 000 ubude. Kuyaqondwa ukuba ulawulo lukaKristu Iweminyaka eliwaka luya kuphelisa ‘umhla wokuphumla’ kukaThixo oyiminyaka engama-7 000, ‘umhla’ wokugqibela weveki yokudala. (ISityhilelo 20:6; Genesis 2:2, 3) Ngokusekelwe kule ngqiqo, iyonke iveki yokudala ibiya kuba yiminyaka engama-49 000 ubude.
Bephawula ukufana kumanani, bambi baye bathelekisa iminyaka engama-49 yomjikelo weNtlokoma yamandulo neminyaka engama-49 000 yeveki yokudala. Beqiqa ngale ndlela, baye bacinga ukuba unyaka (wama-50) weNtlokoma yakwaSirayeli ufanele ufuzisele, okanye ufanekisele kwangaphambili, okuza kuza emva kokuphela kweveki yokudala.
Noko ke, khumbula ukuba iNtlokoma ngokukodwa yayingunyaka wokukhululwa nokubuyiselwa kwabantu. Iveki yokudala ikakhulu ihlobene nesijikelezi-langa esinguMhlaba nokuvela kwaso. Kodwa ngokubhekisele ekuphunyezweni kwenjongo kaThixo ngomntu emhlabeni, igaqa lomhlaba ngokunokwalo alizange lithengiswe ebukhobokeni yaye ngaloo ndlela alifuni nkululeko. Luluntu oluyifunayo, yaye abantu baye bakho, kungekhona kwiminyaka engama-49 000, kodwa malunga neminyaka engama-6 000. IBhayibhile ibonisa ukuba kwixesha elithile emva kokuba uAdam noEva bedaliwe, bamvukela uThixo, ngaloo ndlela besiba sekuthinjweni sisono, kukungafezeki nakukufa. Ngokutsho kwamaRoma 8:20, 21, uYehova uThixo unenjongo yokukhulula uluntu olukholwayo kobu bukhoboka. Ngenxa yoko, abanquli bokwenyaniso abasemhlabeni ‘baya kukhululwa ebukhobokeni bokonakala, basingiswe enkululekweni yozuko lwabantwana bakaThixo.’—Bona kwanamaRoma 6:23.
Ngoxa iqela elincinane elanyuleIwa ukuba lithatyathelwe ezulwini laye laxolelwa izono zalo ukususela ngePentekoste yowama-33 C.E. kuse phambili yaye ngaloo ndlela elisele linandipha iNtlokoma, iZibhalo zibonisa ukuba ukukhululwa koluntu olukholwayo kuya kwenzeka ebudeni bolawulo lukaKristu IweMinyaka Eliwaka. Oko kuya kwenzeka xa esebenzisa kuluntu iingenelo zedini lakhe lentlawulelo. Ngasekupheleni kweMinyaka Eliwaka, uluntu luya kube luvuseIwe kwimfezeko, lukhululeke ngokupheleleyo kwisono esizuzw’ ilifa nokufa. Ngaloo ndlela akuba ephelise utshaba lokugqibela (ukufa okwatyhutyhayo ukusuka kuAdam), uKristu uya kubuyisela uBukumkani kuYise ekupheleni konyaka wama-49 000 weveki yokudala.—1 Korinte 15:24-26.
Okokugqibela, kuluntu olukholwayo olunamathemba asemhlabeni, inkululeko nokubuyiselwa okwaphawula umnyaka weNtlokoma kuSirayeli wamandulo ngokufanelekileyo ziya kufana ebudeni beSabatha yeMinyaka Eliwaka ezayo. Kuya kuthi ke kubekho inkululeko nokubuyiselwa. Oko kuya kuba phantsi kolawulo lukaKristu, “kuba uNyana woMntu uyiNkosi yayo nesabatha.”—Mateyu 12:8.