Ukuzimisela Kwandinceda Ukuba Ndiphumelele
Ngokubaliswa nguJoseph A. Oakley
OLUNJANI lona uvuyo okwakululo ukuba ngowe-1950 ndibe phakathi kwe-123 707 lababeye kwindibano yezizwe ngezizwe yamaNgqina kaYehova eYankee Stadium kwisiXeko saseNew York eUnited States! Yaye elinjani lona ilungelo kamva ukuya kwiklasi ye-16 yesikolo sobuvangeli basemazweni eGiliyadi kumantla eNew York!
Emva kokuphumelela apho ndabelwa kumsebenzi wobuvangeli basemazweni kwiPakistan ekude, nelinye iqela lamaOstreliya angoowethu. Safika apho ehlotyeni lowe-1951. Unyaka wokuqala uwodwa nje wezisa iimvavanyo eziqatha.
Olunye lwezi mvavanyo yayibubushushu bokubalela nolophu, nto leyo eyayahluke gqitha kukuphola kwe Victoria neTasmania ezisemazantsi eOstreliya apho ndandihlala khona. Kwandula ke kwakho icesina yamathumbu, isifo senyongo, nezinye izifo ezasulelayo ezathi zabandezela uninzi lwethu basandul’ ukufika. Omnye umfundi esasikunye naye oselula wafa kwangaloo nyaka wokuqala.
Olunye uvavanyo lwalulolobuhlwempu neemeko ezahlukileyo zokuphila. Kungekudala emva kokufika kwethu, ndabelwa njengomlungiseleli ohambahambayo, nto leyo efuna uhambo olude uwedwa ngololiwe yaye maxa wambi kubandakanya ukulala kwiindawo zokulindela uloliwe esikhululweni.
Kanti olunye uvavanyo lwalukukungabikho kwentsabelo kwisigidimi soBukumkani esasisiphethe phakathi kwabemi ababesebelawulwa kakade bubuSilamsi. Yaye kwakuluvavanyo lokwenene ukuzama ukuvakalisa esi sigidimi ngolwimi olutsha nolunzima lwesiUrdu.
Kwakungayinto elula ukuncama uze ke ubuyele ekhaya. Ukuhlala kwafuna ukuzimisela okukhulu. Iyandivuyisa into yokuba amava am angaphambili andincedayo ukuba ndihlangabezane ngempumelelo nezi mvavanyo.
Amava Awalungelelanisa Ubomi Bam
Ndakhuliselwa kwifama emalunga neekhilomitha ezili-18 ukusuka eGeelong, isixeko esiselunxwemeni kwilizwana laseOstreliya eliyiVictoria. Ngaminazana ithile kuAprili ngowe-1935, ngoxa ndandiye edolophini, uNkosazana Hudson wancokola nam waza wandibongoza ukuba ndiye kwintetho yeBhayibhile. Iveki le yonke ndandikhathazekile kuba ndandilithembisile eli nenekazi lalupheleyo, elithandekayo nelinyanisekileyo ekubonakala ukuba lizinikele ukuba ndandiza kuya. Eneneni ndandingakufuni ukuya, kodwa ndandingazimisele konke ukulidanisa.
Ngoko xa lafikayo ixesha, ngokuthandabuza okuthile ndaligcina idinga lam ndaza ndaya. Into endimangalisayo kukuba, ndayinandipha intlanganiso kangangokuba ndaqalisa ukuya ngokuthe rhoqo. Endakufundayo kwandenza ndeyiseka kukuba ndandiyifumene inyaniso, yaye ndabhaptizwa kwindibano eyayiseGeelong kwangaloo nyaka.
Kwiinyanga ezimbalwa kamva, oodade ababini ababengoovulindlela abanenzondelelo babehamba ngaphezu kwesi-1,6 sekhilomitha kwintsimi elinyiweyo ukuze bafike kwifama yethu. Okwandichukumisayo ngabo yayilukholo nenzondelelo yabo. Ndikhumbula ndibabuza ngendawo ababeya kulala kuyo ngobo busuku, kuba babethe bakuhambo olusinga kwisabelo sentsimi esitsha esikwidolophana yaseBacchus Marsh, emalunga neekhilomitha ezingama-56 qelele.
“Okwangoku asazi, kodwa siza kuyifumana indawo ngaphambi kokuba kurhatyele,” baphendula ngelitshoyo. “Ukuba ke asiyifumani, siya kuzigxumekela intente yethu.”
Yayisele ibethile intsimbi yesine, ibe iimini zazimfutshane yaye zibanda. Ndavakala ndisithi ngaphakathi: ‘Ngenene bubuvulindlela obu!’ Kwakhona ndaqalisa ukuzicingela ngokuthi: ‘Yintoni kanye endiyihlaleleyo apha efama, ndikude kangangeekhilomitha ezingaka ebantwini? Yintoni endithintelayo ukuba ndibe ngumlungiseleli onguvulindlela kanye njengala mantombazana? Ndiselula yaye ndiphile qethe. Ukuba banokuba ngoovulindlela, kutheni ndingenakuba nguye nje mna?’ Ndazimisela kanye ngoko ukuba kungekudala nam ndandiza kuba nguvulindlela.
Ukuzimisela Ukubambelela Kwisigqibo Sam
Ubawo wayekuchase gqitha ukushiya kwam ikhaya ndize ndingenele umsebenzi wokushumayela ixesha elizeleyo namaNgqina kaYehova. Wayengumongameli wesikolo seCawa kangangeminyaka emalunga nama-30 yaye wayewathiye gqitha amaNgqina. Noko ke, ndandineminyaka engama-21 ubudala, yaye umama akazange achase ngenene xa ndandlala amacebo am kuye. Ngoko, ekugqibeleni, umhla wama-30 kuJuni, ngowe-1936, wamiswa njengomhla endandiya kunduluka ngawo ekhaya.
Ubawo wacela oosomashishini abaliqela ababalaseleyo ukuba bathethe nam ngeli “shishini licekisekayo” njengoko wayelibiza ngaloo ndlela. La madoda azama nzima ukundeyisela kwelokuba ndihlale ekhaya, esebenzisa zonke iindlela zokuphikisa, ezinjengokuthi: ‘Uza kuzisa ihlazo kunqulo lwentsapho yakowenu.’ ‘Uthelela iqela elingaziwayo nelona lingathandwayo.’ Yaye, ‘Sisiphi isiqinisekiso onaso sokuxhaswa ngemali?’
Oku kuzama ukundenza ndeyiseke—ekunokwenzeka ukuba kwakucetywe kakuhle—kwaqhuba iiveki. Noko ke, okumangalisayo kukuba okukhona babezama ukundenza ndeyiseke, kokukhona ndazimiselayo ukungenela ubuvulindlela.
UJuni 30 wagaleleka, ilusuku olubandayo nolwalubhudla umoya! Ndafumba konke okwam ndaza ndakuthi ngcu kwisithuthuthu sam ndaza ndanduluka ukusinga eMelbourne, malunga neekhilomitha ezingama-64 kude. Apho ndandimenyelwe ukusebenza neqela loovulindlela. Ubomi obutsha nobunenjongo baqalisa ukuvuleka kum, kodwa kwakukho iimvavanyo ezininzi.
Ukujongana Nenkcaso Ngozimiselo
Ngezo mini indlela eyintloko yokusasaza isigidimi soBukumkani yayikukusebenzisa iinqwelo-mafutha ezinesandisi-lizwi ukuze kusasazwe iintetho zeBhayibhile ezishicilelweyo zomongameli weWatch Tower Society, uJ. F. Rutherford. Kangangeminyaka enokuba mihlanu, ndandisebenzisa enye yezi “nqwelo-mafutha,” eyiveni exhotyiswe kakuhle ngezinto eyayisaziwa kuyo yonke indawo ngokuba yi-“Red Terror.”
Ilizwi elinamandla nelinzulu likaMzalwan’ uRutherford elaliphuma kwisigodlo selizwi kubafuni benyaniso abambalwa “lalinencasa,” kodwa kubachasi benyaniso lalifana netyhefu. (Thelekisa eyesi-2 yabaseKorinte 2:14-16.) Ngamathuba athile, ithumbu lokunkcenkceshela lalijongiswa ngakum, okanye iveni igityiselwe ngamatye.
Kwelinye icala, iintetho zikaMzalwan’ uRutherford ezazibhenca ubuxoki bonqulo, ngenene zazinomtsalane kwabathile. Ngokomzekelo, elinye inene elalisisinhanha, lacela umbhalo wentetho nganye eshicilelweyo kaRutherford nencwadi nganye ayibhalileyo. Xa satyelela ikhaya lalo elikhulu, kwakunzima gqitha ukuba ndiwathwale onke loo macwecwe nezo ncwadi. Le ndoda yachwayita gqitha kukuzifumana, ibhala itsheki ye-£15 (ngoku eziirandi ezingama-48) kanye kuloo ndawo. Yayilolona ncwadi luninzi kwendakha naluhambisa!
Ngowe-1938 kwacwangciselwa ukuba uMzalwan’ uRutherford atyelele eOstreliya aze anikele intetho yeBhayibhile eSydney, kwiHolo yeDolophu eseNew South Wales. Ndandiphakathi kwabanye abagubungela izitrato zaseSydney ngenqwelo-mafutha enesandisi-lizwi, besazisa indawo olwaluza kuba kuyo utyelelo olusondelayo. I-“Red Terror” yayixhotyiswe ngokukhethekileyo ngocwangciso lweeveki ezintandathu kukho nesibhengezo esibhalwe ngoonobumba abakhulu macala omabini eveni. Lo msebenzi wokuhlasela okukhawulezileyo wazisa inkcaso enkulu.
Ngenxa yengcinezelo eqatha yonqulo, ukuqeshwa kweHolo yeDolophu yaseSydney kwarhoxiswa. Ngoku ndabelwa ukuba ndisebenzise inqwelo-mafutha enesandisi-lizwi ukuze ndifumane abantu ababeza kutyobela isicelo sokuchasa oko. Satyelela amaqela amakhulu abasebenzi ebudeni bokuphumla kwabo ngexesha lesidlo yaye, phezu kwako nje ukuchaswa kwiindawo ezininzi, saphumelela ekufumaneni amakhulukhulu amagama atyobelweyo abantu ababevumelana nenkululeko yokuthetha. Abantu abangamashumi amawaka batyobela amagama kulo lonke ilizwe. Kodwa phezu kwako nje ukunikela esi sicelo sikhulu kwibhunga ledolophu yaseSydney, akuzange kuvunywe ukuba sisebenzise iHolo yeDolophu.
Kanti, njengokuba kwakusenzeka ngokufuthi, oku kwasebenzela ingenelo yabantu bakaYehova. ISydney Sports Grounds, yaqeshwa yaye ngenxa yokubhengezwa okukhulu okwakubangeIwa yinkcaso, abantu abezayo kwintetho kaMzalwan’ uRutherford baba nokuba ngama-12 000, ngokutsho koqikelelo lwabakwantsasana. Ekubeni iHolo yeDolophu yayinokuhlalisa kuphela abantu abamalunga nama-5 000, inkcaso yaphumela ekubeni kubekho abantu abaninzi gqitha abaphulaphula loo ntetho!
Ukuzimisela Ebudeni Bokubhangiswa Komsebenzi
Ngenxa yokuqhambuka kweMfazwe Yehlabathi II ngowe-1939, inkcaso yakhula. Ngoko, ngoJanuwari 1941, umsebenzi wamaNgqina kaYehova wabhangiswa kuyo yonke iOstreliya. Ngelo xesha ndandinguvulindlela eMelbourne yaye ndihlala kwindawo yokugcina uncwadi loMbutho.
Ngaminazana ithile apho kwafika izigantsontso ezithandathu ezingamapolisa eCommonwealth aza adibana nesicaka sendawo yokugcina uncwadi uJack Jones kunye nam. Ndanikwa nje imizuzu emihlanu ukuba ndiphume ndiphele kwigumbi lam eliphezulu. Ngaba wakhe wazama ukuqokelela zonke izinto zakho kwimizuzu nje emihlanu? Ndandingekazukugqiba xa abakwantsasana bathi gangqa endlwini baza ngoburhabaxa bazilahla ngefestile zonke iimpahla zam nezixhobo ezazisele.
Noko ke, ukubhangiswa akuzange kuwunqumamise umsebenzi wethu. Sisebenzisa iBhayibhile kuphela, saqhubeka sishumayela kwindlu ngendlu yaye siqhuba iintlanganiso ngokuthe rhoqo eMelbourne. Ebudeni bowe-1942, owawungunyaka wesibini wokubhangiswa komsebenzi, ndabizelwa eSydney kwakhona, ngeli xesha ukuya kunceda ekulungelelaniseni umsebenzi kumabandla asixhenxe amaNgqina kaYehova apho.
Ikhaya laseBheteli eSydney ngelo xesha lalisetyenziswa ngamagosa oburhulumente eCommonwealth. Kwikhaya elikhulu elimigangatho mibini kwizakhiwo ezimbalwa nje qelele, sacwangcisa wonke umsebenzi wethu wentlangano. Isabelo sam sasikukutyelela ibandla ngalinye kwawaseSydney ndize, ngokusebenzisa isithuthuthu esinenqwelwana ecaleni, ndinikele ulwandlalo lweentlanganiso nezinye izinto ezazifuneka ukugcina amabandla elungelelanisiwe yaye ehambela phambili.
Ukukhonza ETasmania
Xa ukubhangiswa kwashenxiswayo ngoJuni we-1943, ndabelwa ukuncedisa ekumiselweni kwakhona kwendawo yokugcina uncwadi eMelbourne. Ngoko, ngowe-1946, ndamiselwa ukuba ndikhonze njengesicaka sobuzalwana (ngoku, ekuthiwa ngumveleli wesiphaluka) esihambahambayo kwilizwana laseTasmania elisisiqithi saseOstreliya. Ngokokuma kwemimandla, iTasmania sisiqithi esibukekayo nesineentaba ezineencochoyi ezininzi, ezigutyungelwa likhephu ebudeni bonyaka.
Xa ndandikhonza njengomveleli ohambahambayo, kwakukho amabandla asixhenxe kuphela namaqela aliqela akwanti kweso siqithi sisonke. Xa ndingekayi kutyelela amabandla, ndandiba nguvulindlela kwidolophana eyiMole Creek. Ebudeni bemfazwe kwakuqhambuke inkcaso enogonyamelo kumaNgqina apho. Kodwa ngesi sihlandlo yayiphelile, yaye iqela labantu endandilinike uncwadi ekugqibeleni laba ngamaNgqina azahluleleyo.
Kwakuxa ndandiseTasmania, ngowe-1950, endathi ndafumana isimemo sokuya kwiklasi ye-16 yaseGiliyadi. Emva kokuphumelela kuyo, njengoko ndiye ndachaza ngaphambilana, ndabelwa ukuya ePakistan.
Ukutshata Nokuba Nentsapho
Xa ndandineminyaka emithandathu ndisePakistan, ndatshata noEdna Marsh, owayekhonza njengomvangeli wasemazweni eJapan. UEdna wandithelela, yaye savula ikhaya elitsha labavangeli basemazweni eQuetta, ekummandla ophakamileyo wasePakistan. Sachitha iminyaka emibini siseQuetta, kodwa ke, njengoko izibulo lethu laliza kuzalwa, sathi sagqiba kwelokuba sibuyele eOstreliya. Yintoni eyayingaphambi kwethu ngoku?
Indawo esasiza kuhlala size sikhulise intsapho yethu kuyo sasingayithandabuzi. Ndandithembise ukuba ukuba kungaze kufuneke ndiyishiye inkonzo yasemazweni, bendingabuyela eTasmania. Noko ke, phantse sasingenamali konke konke, yaye imisebenzi yomntu onama-45 eminyaka ubudala yayinqabile. Kanti sasenze isigqibo sokuba singaze sivumele umsebenzi wempangelo usahlukanise neentlanganiso zebandla nenkonzo yasentsimini.
Ngoncedo lobubele lwabazalwana bokomoya, ndakwazi ukuqalisa ishishini lam lokucoca iifestile. Kwiminyaka enokuba ngaphezu kwama-20, andizange ndiphoswe yintlanganiso okanye yinkonzo yasentsimini kuba ndibandakanyeke kumsebenzi wempangelo, nangona maxa wambi bekufuna uzimiselo ukuze ndigatye umsebenzi endiwunikwayo nemali eyongezelelekileyo. Ngaloo ndlela sakwazi ukukhulisa abantwana bethu ababini endleleni yenyaniso nokuba nesabelo esithe rhoqo kuyo yonke imisebenzi yoBukumkani.
Abantwana bethu ngoku sebekhulile yaye abasaxhomekekanga kuthi. Bobabini bomelele enyanisweni, intombi yethu iye yanandipha iminyaka eliqela yokuba nguvulindlela ngaphambi kokutshata kwayo. Unyana wethu nowakwakhe ngoku balungele ukukhonza apho imfuneko inkulu khona kwinkonzo yobuvulindlela.
Ubomi Obunomvuzo
Kutshanje besityelelwe ngumhlobo okhulileyo owayengumntu wokuqala ukumela inyaniso kwidolophu yaseQuetta ePakistan. Emva kwentlanganiso kwiBandla lethu laseLaunceston apha eTasmania, wabalisela ibandla ukuba kangangezihlandlo ezibini wayalela isicakakazi sakhe ukuba sindixelele ukuba wayengekho ekhaya xa ndandifika. Phofu ke, kamva, xa ndadibana naye esesitiyeni yaye kungekho ndawo yakuzimela, waqalisa ukubuza imibuzo, ekugqibeleni evuma ukuqhutyelwa isifundo seBhayibhile. Wabalisa indlela anombulelo ngayo kuba ndandibonakalise uzimiselo ngokuzingisa kweso sabelo sasemzini sasinzima sasePakistan.
Kwiminyaka embalwa ngaphambilana, kwindibano eyayiseSydney, omnye umfazana weza kum ebaleka waza wandiwola ngobubele. Ndimangalisiwe, ndathi wayephazamile. Waphendula ngelithi, “Andiphazamanga, akunguye na uJoe Oakley? Wena noAlex Miller nanifundisisa nentsapho yakowethu eLahore, ePakistan, yaye ngoku mna nomama nomsakwethu sisenyanisweni yaye sihlala eSydney.”
Amava anjengala ngenene aye afak’ isandla kulwaneliseko lokuba nesabelo esizeleyo ekuvakaliseni uBukumkani. Hayi indlela ekukuhle ngayo ukubona intsikelelo kaThixo emsebenzini! Xa ndakhonza okokuqala eTasmania ngowe-1946, kwakukho abavakalisi boBukumkani abasithoba kwisixeko sonke saseLaunceston. Ngoku kukho amabandla amathathu, ngalinye linabavakalisi abangaphezu kwama-90!
Enyanisweni, ngokwamava anelisayo eminyaka engaphezu kwama-50 ndikwinkonzo yobuKristu, ngaphandle kokuthandabuza ndinokuthi ukuzimisela kuye kwandinceda ukuba ndiphumelele.
[Umfanekiso okwiphepha 24]
Inqwelo-mafutha enesandisi-lizwi yayisetyenziselwa ukubhengeza isigidimi soBukumkani eSydney
[Umfanekiso okwiphepha 25]
UJoe Oakley ekunye nebandla elincinane eQuetta, ePakistan, xa iHolo entsha yoBukumkani yavulwayo ngoDisemba 15, 1955