Ubomi Nobulungiseleli BukaYesu

UYesu—Kuphikiswana Ngaye

KUNGEKUDALA ngemva kokuba amkelwe kwikhaya likaSimon, uYesu uqalisa ukhenketho lwesibini lokushumayela eGalili. Kukhenketho lwakhe lwangaphambili kulo mmandla, wayephelekwe ngabafundi bakhe bokuqala, uPetros, uAndreya, uYakobi noYohane. Kodwa ngoku uphelekwe ngabapostile abali-12, nangabafazi abathile. Kubo kukho uMariya waseMagadala, uSusana noYohana, ondoda yakhe iligosa likaKumkani uHerode.

Njengoko inkqubela yobulungiseleli bukaYesu ithabath’ unyawo, injalo nempikiswano ephathelele nomsebenzi wakhe. Indoda ephethwe ziidemon, ekwayimfama yaye engenako nokuthetha, iziswa kuYesu. Xa uYesu eyiphilisa, kangangokuba ide ikhululeke ekuphathweni ziidemon ize ibe nokuthetha yaye ibone, izihlwele azikwazi kuzibamba. Ziqalis’ ukuthetha zisithi: “Ngunyana kaDavide kanti na lo?”

Izihlwele ziyawungungela lo mzi uYesu ahleli kuwo kangangokuba yena nabafundi bakhe abanako nokufumana isidlo. Ngaphandle kwabo bathi mhlawumbi ‘unguNyana kaDavide’ ekuthenjiswe ngaye, kukho ababhali nabaFarisi abahambe ukusuka eYerusalem beze kumnyelisa. Xa izalamane zikaYesu zisiva ngesiwiliwili esiqhubekayo ngakuYesu, ziza kumbamba. Ngenxa yantoni?

Kaloku, abantakobo Yesu abakamkholelwa ukuba unguNyana kaThixo. Kwakhona, esi siphithiphithi sabantu abaninzi nale mbambano aye wayenza ngokupheleleyo asizozinto abamazi ngazo uYesu ngoxa wayekhulela eNazarete. Ngoko ke bakholelwa kwelokuba kukho ntw’ ithile yonakeleyo kwingqondo kaYesu. “Uyageza,” bagqiba ngelitshoyo, ibe bafuna ukumbamba baze bahambe naye.

Kanti bona ubungqina bokuba uYesu uyiphilisile le, ndoda ebiphethwe ziidemon bucacile. Ababhali nabaFarisi bayazi ukuba abanakubukhanyela ubunyaniso bale nto, kwaneminye imimangaliso kaYesu. Ngoko ukuze bathandabuzise igunya likaYesu babaxelela oku abantu: “Lo yena akazikhuphi iidemon, kuphela kungoBhelezebhule, umphathi weedemon.”

Esazi ngoko bakucingayo, uYesu ubabizela kuye ababhali nabaFarisi aze athi: “Ubukumkani bonke obahlulelene bodwa buyaphanza, nomzi wonke nendlu yonke eyahlulelene yodwa ayisayi kuma. Ukuba ke uSathana ukhupha uSathana, wahlulelene yedwa; bothini na ngoko ukuma ubukumkani bakhe?”

Hayi indlela anengqiqo ngayo amazwi akhe! Ekubeni abaFarisi bebanga ukuba abanye babo baye bakhupha iidemon, kwakhona uYesu uyababuza: “Ukuba mna ndizikhupha iidemon ngoBhelezebhule, bazikhupha ngabani na oonyana benu?” Ngamanye amazwi, indlela abamtyhola ngayo uYesu imele ibe yindlela ababatyhola ngayo nabo. Wandula ke uYesu abalumkise esithi: “Kodwa ukuba ndizikhupha iidemon ngoMoya kaThixo mna, ngoko bunifikele kanti ubukumkani bukaThixo.”

Ukuze ababonise ukuba ukukhupha kwakhe iidemon kububungqina bamandla akhe phezu koSathana, uYesu uthi: “Angathini na umntu ukuba nako ukungena endliwini yegorha elo, ayiphange impahla yalo, ukuba akathanga tanci alibophe igorha, andule ke ukuyiphanga indlu yalo? Lowo ungengakum uchasene nam, nalowo ungandibuthisiyo uyachithachitha.” AbaFarisi ngokucacileyo banxamnye noYesu, bezibonisa bengabameli bakasathana. Bawachithachithela kude naye amaSirayeli.

Ngenxa yoko, uYesu uyabalumkisa aba bachasi babuSathana ngelithi “ukumnyelisa uMoya oyiNgcwele [akusayi] kuxolelwa.” Uyacacisa esithi: “Nothe wathetha ilizwi elichasene noNyana woMntu uya kuxolelwa; kodwa othe wathetha elichasene noMoya oyiNgcwele, akasayi kuxolelwa yena, nakweli phakade, nakwelo lizayo.” Abo babhali nabaFarisi benze eso sono singenakuxolelwa ngokuthi ngolunya kwenziwa nguSathana oko ngokucacileyo kukukusebenza okungummangaliso komoya oyingcwele kaThixo. Mateyu 12:22-32; Marko 3:19-30; Yohane 7:5.

◆ Ukhenketho lukaYesu lwesibini eGalili lwahluke njani kolo lokuqala?

◆ Kutheni le nto izalamane zikaYesu zizama ukumbamba nje?

◆ Bazama njani abaFarisi ukuthandabuzisa imimangaliso kaYesu. yaye ngoko uYesu ubabonisa njani bengamaxoki?

◆ Banetyala lantoni abaFarisi, yaye ngoba?