Abavakalisi BoBukumkani Bayabalisa
Isakhiwo Esandisiweyo Ukuze Kuhlangatyezwane Nolwando LoBukumkani
USUKU lokunikezelwa kwesakhiwo sesebe esisandul’ ukwandiswa samaNgqina kaYehova yayilusuku olwaluvuyisa gqitha kwisiqithi iCaribbean saseJamaica. Oku kwandisa kwaye kwafuneka ngenxa yentsikelelo kaYehova kwimigudu yokuthembeka yabazalwana ekushumayeleni iindaba ezilungileyo kwesi siqithi sihle sikwinjiko.
Ngowe-1946 kwamiselwa ikhaya labavangeli basemazweni eJamaica. Njengoko abavangeli basemazweni babekhokela umsebenzi, ulwando kubavakalisi lwakhawuleza, kangangokuba kwiminyaka nje elishumi umlinganiselo wenani lamaNgqina awayefak’ ingxelo inyanga ngenyanga wanda ukusuka kwangama-732 ukuya kwangama-3 216. Ukuze kunyanyekelwe olu lwando, kwafuneka ukuba kwenziwe ilungiselelo lesakhiwo esitsha.
Ngowe-1954 kwafunyanwa isiza esifanelekileyo kwaza kwaqaliswa isakhiwo esitsha esomeleleyo nesinemigangatho emibini kummandla ozolileyo olihlomela ledolophu yaseKingston. Sagqitywa ngoMeyi we-1958. Ngaloo nyaka inani labavakalisi lalande laya kutsho kwincopho yabangama-4 367.
‘Ukutyala’ ‘nokunkcenkcesha’ kwaqhubeka yaye uYehova ‘wahlumisa’, kangangokuba ngowe-1983 inani labavakalisi lalande laba ngaphezu kwabangama-7 000, nto leyo eyabangela ukuba kufuneke kwandiswe ngokubhekele phaya. (1 Korinte 3:6) Ngemvume yeQumrhu Elilawulayo, iKomiti Yesebe yagqiba kwelokuba yandise isakhiwo esikhoyo. Abazalwana abangaphezu kwama-250 ababevela kuso sonke isiqithi beza kuncedisa. Abasebenzi bokuzithandela abanobuchule nabangenabuchule basebenza njengababeki bezitena, abachweli, iincutshe zombane nabasebenza ngemibhobho yamanzi. Ubudala babo babususela kwabane-10 kuse kwabanama-86 eminyaka. Bambi banikela imali kwisakhiwo, abanye banikela ngokutya kokondla abasebenzi, yaye kananjalo abanye bawenza amakhaya abo afumaneka ukuze kuhlale abasebenzi bokuzithandela ababevela kwiindawo ezikude. Kwisithuba nje esingangonyaka esi sakhiwo, esinomgangatho wesithathu owongezeleIweyo onamagumbi amahlanu nendawo yokuzihlaziya, esinegumbi kumgangatho wesibini, nesinendawo yokugcina izinto ezizikwemitha ezingama-37, sagqitywa, silungele ukusetyenziswa ngamalungu ali-11 entsapho yaseBheteli.
UMilton Henschel, olilungu leQumrhu Elilawulayo lamaNgqina kaYehova, wanikela intetho yonikezelo ngoFebruwari 22, 1986. Wathetha ngomxholo othi ‘Umngcelele Woloyiso.’ (2 Korinte 2:14, TE) Bebonke abo babephulaphule kucwangciso lonikezelo babengama-2 949. Kwaba baphulaphuli, ababengama-380 babekwiHolo yoBukumkani nakwezinye iindawo zesakhiwo, yaye abanye kwanxityelelanwa nabo ngeemfonomfono nangokusetyenziswa koonomathotholo kwezinye iiHolo zoBukumkani ezisesixekweni nakwiholo yemiboniso yesikolo.
Inkoliso yabo babemenyelwe kwiHolo yoBukumkani yesebe yayingabazalwana noodade ababesenyanisweni kangangeminyaka engama-30 okanye ngaphezulu. Kweviwa amazwi amaninzi oxabiso ngenxa yenxalenye entle eyongezelelwe kwesi sakhiwo. Sithemba ukuba abaninzi abangakumbi ‘besihlwele esikhulu’ ‘sezinye izimvu’ basaza kuthelela kumngcelele woloyiso njengokuba isakhiwo esitsha sesebe sisetyenziswa ekunyamekeleni ulwando loBukumkani eJamaica.