Ngaba Uya Kubambelela Kwinyaniso?
UKUBA sowuqalisile ukufundisisa iBhayibhile namaNgqina kaYehova, umbuzo oyintloko omele uwuphendule ukuze waneliseke ngulo, Ngaba le yinyaniso? Ukuba ufumanisa ukuba yiyo, ngaba uya kubambelela kuyo? Abantu bemihla kaYesu Kristu neyabapostile bakhe bajongana nemibuzo efana nale.
Xa abapostile babeshumayela ngoYesu, babesabela njani abantu? Kaloku, iindaba ezingoBukumkani bukaKristu, ezingemimangaliso yakhe, ezingedini lakhe lentlawulelo, ezingovuko lwakhe nobomi obungunaphakade zavakala zilungile, yaye abaninzi oko bakuvayo bakwamkela njengokuyinyaniso. Kodwa inkoliso yabo ayizange ikwamkele. Enyanisweni, intlangano yamaKristu yelo xesha ‘yayichasiwe’ kwiindawo zonke. (IZenzo 28:22) Ngoko ukwamkela iinyaniso ezazishunyayelwa ngabafundi bakaYesu kwathetha ukuchasana nembono ethandwayo yaye kwathetha ukudibana nenkcaso. Ngoko ke abantu ababenomdla kwafuneka bengqinile ukuze baneliseke ukuba iimfundiso zamaKristu zaziyinyaniso. Kuphela kwakungelo xesha ababenokuthi beme ngokuqinileyo.
Xa uPawulos noBharnabhas batyelela kwa-Antiyokhwe eAshiya Mayina, abantu abaninzi basiphulaphula ngomdla omkhulu isigidimi sabo. Ingxelo yeBbayibhile ithi: “Ke kaloku, akubon’ ukuba ayaphuma amaYuda endlwini yesikhungu, babongoza abeentlanga, ukuba la mazwi athethwe kubo ngesabatha ezayo. Kuthe ke ngelandelayo isabatha, waphantsa ukuhlanganisana umzi wonke, ukuba ulive ilizwi likaTbixo.” (IZenzo 13:42, 44) Kodwa loo mdla wawukho kuqala waphela kubantu abaninzi xa bathi beva abachasi abaqhutywa ziimvakalelo betbetha izinto ezinxamnye nabapostile.
Indinyana yama-45 yeZenzo isahluko 13 ithi: “Ke kaloku amaYuda, akuzibona izihlwele, azala ngumona, aziphika izinto ezibe zithethwa nguPawulos.” Yandula ke indinyana yama- ihlabele mgama isithi: “Ke kaloku amaYuda abaxhokonxa abafazi ababehlonela uThixo, ababekekileyo, nabaninimzi; abaxhoxhela intshutshiso ooPawulos noBbarnabhas, abakhupba emideni yawo.” Abantu ababenomdla kwafuneka benze isigqibo enoba babeya kuqhubeka bebaphulaphula abalandeli bakaYesu phezu kwayo nje inkcaso. Kwakufuneka bekwamkele oko babekuve kuyinyaniso okanye bangakukhathaleli.
Inkcaso Namhlanje
Kwananjengokuba amaKristu achaswayo ngenkulungwane yokuqala yeXesha Eliqhelekileyo, bakho nanamhlanje abachasi abazama ukuvala iindlebe zabantu abanomdla kwiinyaniso ezingokweZibhalo amaNgqina kaYehova azifundisayo. Izihlobo, izalamane neenkokeli zonqulo ngokufuthi zizama kangangoko zinako ukubadimaza abanomdla ekufundisiseni iBhayibhile namaNgqina. Bengenabungqina bungokweZibhalo, abachasi bayakuphikisa oko kufundiswayo baze benze izimangalo zobuxoki.
Abantu abanomdla bafanele benze ntoni? Ngaba bafanele bavumele amazwi abachasi ukuba avale iingqondo neendlebe zabo njengokuba abathile benzayo kwa-Antiyokwe? Okanye ngaba bafanele bazibonele ngokwabo eBhayibhileni enoba oko bakufundisisayo kuyinyaniso okanye akuyiyo?
Abantu ababephulaphula kwisixeko saseBhereya banconywa ngenxa yokuba bazihlolisisa iZibhalo ukuze babone enoba oko uPawulos wayebaxelele kona kwakuyinyaniso na. Bakufumanisa ukuba wayethetha inyaniso, bayimela ngokuqinileyo. Sixelelwa oku: “[AmaBhereya] aye enobuntu kunawaseTesalonika; la wona alamkela ilizwi ngentumekelelo yonke, ezincina izibhalo imihla ngemihla, ukuba zingaba zinjalo na ezi zinto.”—IZenzo 17:10, 11.
Abantu baseBhereya abazange bawavumele amazwi abachasi ukuba avale iingqondo zabo kwiindaba ezilungileyo. Kunoko, bazihlolisisa iZibhalo imihla ngemihla ukuze baqinisekise ukuba izinto ababezivile zaziyinyaniso. Babefumene ubutyebi obuxabisekileyo yaye babengayi kubavumela abachasi ukuba babatyekise kubo. Ngaba oku bekungayi kuba likhondo elisengqiqweni lokuthatyathwa ngokubhekisele kwiindaba ezilungileyo ezifanayo ezivakaliswa ngamaNgqina kaYehova namhlanje?
Isizathu Sokuba Abanye Bachase
Maxa wambi abachasi bazizalamane ezinyanisekileyo ozithandayo nozihlonelayo, yaye unokukholelwa ngokupheleleyo ukuba banomdla ngokwenyaniso kwimpilontle yakho. Kodwa kufuneka uqwalasele isizathu sokuba bakuchase ukufundisisa kwakho iBhayibhile namaNgqina kaYehova. Ngaba banobungqina obuqinileyo obungokweZibhalo bokuba oko ukufundayo akuyonyaniso? Okanye ngaba ukuchasa kwabo kubangelwa koko abanye baye babaxelela kona? Ngaba baluswele ulwazi oluchanileyo ngoko amaNgqina afundisa ngako? Abaninzi abamchasayo uYesu benjenjalo ngenxa yokungakwazi oko wayekufundisa nangenxa yokuba babekholelwa kwizimangalo zobuxoki ezazisenziwa ngabachasi.
Xa uYesu wayejinga emthini wentuthumbo, abantu ababedlula ngendlela ‘babemnyelisa, behlunguzela iintloko zabo, besithi, Uha! Wena uchitha itempile, uyakhe ngeentsuku ezintathu, zisindise, uhle emnqamlezweni. Ngokukwanjalo nababingeleli abakhulu, bedlala ngaye phakathi kwabo, benababhali, babesithi, Abanye wabasindisa; yena ngokwakhe akanakuzisindisa. UKristu, uKumkani wakwaSirayeli, makehle kalokunje emnqamlezweni, ukuze sibone, sikholwe.’ (Marko 15:29-32) Sasiyintoni isizathu esibangela esi simo sengqondo sibi?
Abantu babevumele ukuba uluvo lwabo ngoYesu lulawulwe ziinkokeli zonqulo ezazimthiyile ngenxa yokuba wayezibhence njengabafundisi bobuxoki ababesenza izenzo ezazingavisisani namabango abo okuba ngabameli boThixo oyinyaniso. Ethetha ngokuphandle, uYesu wayethe kubo: “Nani, kungani na ukuba niwugqithe umthetho kaThixo ngenxa yesithethe senu? Bahanahanisindini, watyapha ukuprofeta ngani uIsaya esithi. Aba bantu basondela kum ngomlomo wabo bandibeke ngemilebe yomlomo wabo; kanti intliziyo yabo ikude lee kum; bafumana ke bendihlonela, befundisa iimfundiso eziyimithetho yabantu.”—Mateyu 15:3, 7-9.
Iinkokeli zonqulo zazimthiye kakhulu gqitha uYesu neenyaniso awayezifundisa kangangokuba zenza iyelenqe lokumbulala yaye zenza wonke umgudu wokutyekisa abantu kuye. Namhlanje, iinkokeli zonqulo ezininzi ziwachasa kakhulu ngendlela efanayo amaNgqina kaYehova. Ibe njengokuba kwakunjalo kumaKristu angaphambili, amaNgqina ‘achasiwe’ kwiindawo zonke. Kodwa ngaba kububulumko ukuvumela le nkcaso ithandwayo ukuba ilawule indlela acinga ngayo?
Iinyaniso ezifanayo ezingokweZibhalo nezingoBukumkani bukaThixo obo uYesu nabapostile bakhe bashumayela ngabo namhlanje zivakaliswa ngamaNgqina kaYehova. Amakhulu amawaka abantu emhlabeni wonke ayazamkela ezi ndaba zilungileyo phezu kwako nje ukuchaswa okukhulu zizihlobo, zizalamane naziinkokeli zonqulo. Ukuze baneliseke abo basamkelayo isigidimi soBukumkani baye bangqina ukuba siyinyaniso, yaye bazimisele ukubambelela kuyo.
Ngoko kutheni ufana nabo benkulungwane yokuqala abathi bavumela abanye ukuba babatyekise kwiinyaniso ezingokweZibhalo ezinik’ ubomi ezaziswa kubo ngabalandeli bakaYesu Kristu ababengathandwa? Endaweni yoko, qhubeka ufundisisa iBhayibhile namaNgqina, usebenzisa iLizwi likaThixo elibhaliweyo ukungqina ukuze waneliseke ukuba oko ukufundayo ngokwenene kuyinyaniso. (Yohane 8:32) Yaye ngoncedo lukaThixo bambelela kwinyaniso.