Imibuzo Evela Kubafundi

◼ Kusingiselwe entwenini kweyesi-2 kaSamuweli 18:8, ethi: “Ihlathi ladla ebantwini into eninzi, ngaphezu kokudla kwekrele”?

UAbhisalom, unyana oyinzwana kaKumkani uDavide, wazirhwaphilizela itrone waza wanyanzela uyise ukuba abhace eYerusalem. Emva koko, kwihlathi lakwaEfrayim (mhlawumbi kwimpuma yoMlambo iYordan) kwabakho umlo phakathi kwemikhosi kaAbhisalom nabo babenyanisekile kukumkani othanjisiweyo kaYehova, uDavide. Ingxelo ekweyesi-2 kaSamuweli 18:6, 7 ichaza ukuba kumlo owoyikekayo amadoda kaDavide abulala abavukeli abangama-20 000. Ngokuyinxenye, indinyana elandelayo yalek’ umsundulo 2Sa 18:8 isithi: “Ihlathi ladla ebantwini into eninzi, ngaphezu kokudla kwekrele, ngaloo mini.”

Bambi baye bathi oku kubhekisela kumajoni angabavukeli awayeqwengwa ngamarhamncwa asendle awayehlala ehlathini.(1 Samuweli 17:36; 2 Kumkani 2:24) Kodwa ukudliwa kokoqobo okunjalo zizilwanyana akumele kubhekisewe kuko kanye njengokuba “ikrele” lingazange libadle ngokoqobo abo babebulewe kumlo. Enyanisweni, umlo ‘waphangalala phezu kwelizwe lonke.’ Ngoko inkcazelo engakumbi efanayo yeyokuba amadoda ka-Abhisalom awayoyikisiwe, awayesaba esoyika kwihlathi elinamatye, mhlawumbi awela emingxunyeni nakwimiwonyo efihlakeleyo, aza arhintyeleka kumatyholwana ashinyeneyo. Okubangel’ umdla kukuba, ingxelo iqhubeka ibalisa ukuba uAbhisalom waba lixhoba kwelo hlathi. Kuyabonakala ukuba ngenxa yeenwele zakhe ezazininzi, intloko yakhe yabambeka kumthi omkhulu, nto leyo eyamshiya echanabeke ngokungenathemba ekuhlaselweni okubulalayo nguYowabhi namadoda akhe. Umzimba kaAbhisalom ‘waphoswa ehlathini emgongxweni omkhulu, yaye kwafunjwa imfumba enkulu kakhulu yamatye phezu kwakhe.’—2 Samuweli 18:9-17.