Imibuzo Evela Kubafundi

◼ Ngaba kufanelekile ngomKristu ukuba avumele ukutyandwa kwesalamane sakhe sakuba sifile?

IBhayibhile ayithethi ngokungqalileyo ngokutyandwa kwesidumbu, kodwa kukho iingcamango ezithile ezicacileyo ezingokweBhayibhile umKristu asenokuziqwalasela. Ngenxa yeenkcukacha ezinjalo nangenxa yemeko enikelweyo kunokuthi ke kwenziwe isigqibo sobuqu.

Utyando lwesidumbu kukuxilongwa kwesidumbu (ngokuqhaqhwa) ukuze kufunyaniswe unobangela wokufa. Lukwanokunikela inkcazelo ngemiphumo okanye ngokusebenza kwesifo. Imbono yeenkonzo ezithile ngokutyandwa kwezidumbu iye yachatshazelwa ziimfundiso ezingezozazibhalo. Ngokomzekelo, intyilalwazi (encyclopedia) yamaKatolika ithi: “Umzimba womntu ofileyo ufanele uphathwe ngentlonelo njengendawo obuhlala kuyo umphefumlo wakhe ngaphambili . . . Umiselwe ukuvuka nomphefumlo wawo, ebudeni bovuko lukawonke wonke, uvukela kubomi obungunaphakade . . . Kusenokubakho ithuba elithile phakathi kokufa okuqinisekiswe ngugqirha nokuphuma komphefumlo.” Noko ke, iBhayibhile ibonisa ukuba xa umntu (umphefumlo ophilileyo) esifa, uba ngumphefumlo ofileyo. (Genesis 2:7; 7:21-23; Levitikus 21:1, 11) Kuthekani ngomzimba wakhe? Ngokubhekisele ‘koonyana babantu’ ‘nakwiinkomo,’ sifunda oku: “Zonke ezo nto zavela eluthulini, zonke ezo nto zibuyela eluthulini.” (INtshumayeli 3:18-20) Eluvukweni, uThixo akayi kuvusa umzimba osele kade waba luthuli, kodwa uya kulungiselela umzimba akholiswayo nguwo.—Bona eyoku-1 yabaseKorinte 15:38, 47, 48.

Enye inkalo yembono engokweBhayibhile ngabafileyo inokuqwalaselwa ngokunxulumene nokutyandwa kwesidumbu. UThixo wayalela amaSirayeli oku: “Ize ningazicenti inyama yenu ngenxa yomfi, ningenzi mbhalo wamvambo kuni: ndinguYehova.” (Levitikus 19:28; Duteronomi 14:1, 2; Yeremiya 47:5; Mika 5:1) Ewe, abantu bakaThixo babengamele baxelise iintlanga ezazibangqongile ekonakaliseni inyama yabo njengomqondiso wokuva ubuhlungu ngenxa yabafileyo okanye ngenxa yezinye izizathu zonqulo lobuxoki. Lo myalelo ukwamele ukuba wawakhuthaza amaSirayeli ukuba abonakalise ukuyihlonela imizimba yawo njengendalo kaThixo.—INdumiso 100:3; 139:14; Yobhi 10:8.

Ngokukwanjalo amaKristu afanele abuhlonele ngokufanelekileyo ubomi nemizimba yawo, ayahlulele kuThixo. (Roma 12:1) Bambi baye bagqiba kwelokuba le mbono yokuhlonela umzimba ifanele ilawule ukucinga kwabo ngotyando lwezidumbu. Baye banoluvo lokuba ngaphandle kokuba bekukho sizathu sithile sinyanzelisayo ngandlel’ ithile, bebeya kukhetha ukuba umzimba wesalamane abasithandayo ungaqhaqhwa ngenjongo yokuxilongwa. Basenokuba bayazi ukuba kwiindawo ezithile igazi elithatyathwe kwimizimba yabantu abafileyo liye lasetyenziselwa ukutofela igazi okanye ezinye iinjongo, nto leyo abebengayi kuyifuna.a

Ngoko, kutheni le nto wambi amaKristu eye akuvumela ukutyandwa kwezidumbu? Ayaqonda ukuba iBhayibhile ayithethi ngokungqalileyo ngale nkqubo yonyango. Kwakhona asenokuba aye aphawula ukuba amaSirayeli eYiputa avumela amagqirha aseYiputa ukuba aqhole uYakobi noYosefu, nto leyo ekunokwenzeka ukuba yabandakanya amanyathelo otyando ukuze kushenxiswe amalungu angaphakathi. (Genesis 50:2, 3, 26) Namhlanje kwiimeko ezithile, umthetho welizwe uye ufune ukuba kwenziwe utyando lwesidumbu. Ngokomzekelo, ukuba umntu oselula nosempilweni ufa ngaphandle kwesizathu esicacileyo, kunokunyanzeliswa utyando lwesidumbu. Ngokucacileyo, xa umthetho ufuna ukuba kwenziwe utyando lwesidumbu, amaKristu akhumbula isiluleko ‘sokuthobela amagunya awongamileyo.’—Roma 13:1, 7; Mateyu 22:21.

Kwanakwimeko yomntu obenyanyekelwa ngugqirha, yaye ngaloo ndlela oko kusenokuba kungunobangela wokufa kusaziwa, utyando lwesidumbu lusenokunikela inkcazelo eluncedo. Abantwana abafelweyo basenokufuna ukwazi unobangela ochanileyo ukuze bandise ulwazi lwabo ngembali engonyango lwentsapho yakowabo. Ulwazi olulolo hlobo lunokuchaphazela indlela yobomi okanye unyango lwabo lwexesha elizayo. Kukwakho nezinye izizathu ezibangele ukuba bambi bakuvumele ukutyandwa kwezidumbu. Ingxelo engotyando lwesidumbu eyabhalwa ngabaphengululi abafundisisa ngezihlunu isenokubangela ukuba intsapho ikufanelekele ukufumana amalungelo abantu abafelweyo, njengokunikela ubungqina besifo somphunga omnyama esinxulunyaniswa nokumba amalahle. Bambi bade baba noluvo lokuba ukutyandwa kwesidumbu kunokwandisa uxolo lwabo lwengqondo ngokubanceda baqonde oko kuye kwabangela ukuba othandekayo afe okanye okungakubangelanga. Abantu abangengomalungu aloo ntsapho nabo banokubandakanyeka. Izalamane zisenokuvakalelwa ngokunyanisekileyo kukuba ukuvumela ukutyandwa kwesidumbu kusenokunceda ugqirha ukuba aqonde uhlobo lwesifo, aze ngaloo ndlela akuxhobele kakuhle ukunyanga abanye.

Ngenxa yoko, kufanelekile ngamaKristu ukuba abonakalise intlonelo ngemizimba yawo, kodwa kukho ezinye izibakala anokuziqwalasela ekugqibeni enoba amele aluvumele na utyando lwesidumbu kwimeko ekhethekileyo.

[Umbhalo osemazantsi]