Ubomi Nobulungiseleli BukaYesu

Basikelelwa Ngemfundiso Engakumbi

ABAFUNDI basandul’ ukufumana ingcaciso engomzekeliso womhlwayeli. Kodwa ngoku bafuna ukufunda okungakumbi. Benza isicelo besithi, “Sixelele umzekeliso womdiza wentsimi.”

Hayi indlela esahluke ngayo isimo sengqondo sabafundi kweso sesihlwele esiselunxwemeni! Abo bantu abanawo umnqweno onyanisekileyo wokufunda intsingiselo ethethwa yimizekeliso, banelisekile nje zizinto ezaziphathelele naloo mizekeliso. Ethelekisa abo baphulaphuli balapho elunxwemeni lolwandle kunye nabafundi bakhe abanolangazelelo lokwazi, uYesu uthi:

“Umlinganiselo enilinganisela ngawo niya kulinganiselwa ngawo nani, kongezwe kuni nina nivayo.” Abafundi benza ngokomlinganiselo othile kuYesu ngokubonakalisa umdla onyanisekileyo nengqalelo yaye ngaloo ndlela basikelelwa ngokufumana imfundiso engakumbi. Ngaloo ndlela, enikela impendulo kumbuzo wabafundi bakhe, uYesu uyacacisa:

“Lo uhlwayela imbewu entle nguNyana woMntu; intsimi ke lihlabathi; imbewu ke entle ngoonyana bobukumkani abo; umdiza ke ngoonyana bongendawo; utshaba ke olwawuhlwayelayo wona nguMtyholi; ukuvuna ke kukupheliswa kwephakade eli; abavuni ke zizithunywa zezulu.”

Emva kokuchaza inkalo nganye yomzekeliso wakhe, uYesu uchaza umphumo. Ekuphelisweni kwale nkqubo yezinto, uthi, “abavuni,” okanye izithunywa zezulu, ziya kwahlula amaKristu obuxoki afana nokhula ‘koonyana bokwenyaniso bobukumkani.’ “Oonyana bongendawo” baya kwandula ke baphawulelwe intshabalalo, kodwa oonyana boBukumkani bukaThixo, “amalungisa,” baya kubengezela ngokuqaqambileyo eBukumkanini boBawo wawo.

Ngokulandelayo uYesu usikelela abafundi bakhe abanolangazelelo lokwazi ngemizekeliso emithathu engakumbi. Okokuqala, uthi: “Kanjalo ubukumkani bamazulu bufana nobutyebi obufihlwe entsimini, athe umntu akubufumana wabufihla; aze ngenxa yovuyo lwakhe aye athengise ngeento zonke anazo, ayithenge loo ntsimi.

Uyaqhubeka esithi, “Kanjalo ubukumkani bamazulu bufana nomrhwebi, efuna iiperile ezintle; owathi akuyifumana iperile inye, exabiso likhulu, wemka waya wananisa ngeento zonke abenazo, wayithenga.”

UYesu ufana nendoda efumana ubutyebi obufihliweyo yaye ufana nomrhwebi ofumana iperile exabiso likhulu. Ngokungathi kunjalo, wathengisa ngayo yonke into awayenayo, encama isikhundla esizukileyo sasezulwini ukuze abe ngumntu othobekileyo. Ngoko, njengomntu osemhlabeni, uyabandezeleka ngenxa yogculelo nentshutshiso emanyumnyezi, oku kumcikida ukuba afanelekele ukuba nguMlawuli woBukumkani bukaThixo.

Olu celomngeni lukwabekwe phambi kwabalandeli bakaYesu ukuba nabo bathengise yonke into abanayo khon’ ukuze bafumane umvuzo ozukileyo wokuba ngumlawuii noKristu okanye wokuba ngumlawulwa wasemhlabeni woBukumkani. Ngaba ukuba nesabelo kuBukumkani bukaThixo siya kukugqala njengento exabiseke ngakumbi kunayo nantoni na eyenye ebomini, njengobutyebi obuxabisekiieyo okanye iperile exabiso likhulu?

Ekuqukumbeleni, uYesu ufanisa “uBukumkani bamazulu” nomnatha wokuloba obambisa zonke iintlobo zeentlanzi. Xa iintlanzi zahlukanisiwe, ezingafanelekanga zilahlelwa kude kodwa ezilungileyo ziyagcinwa. Ngoko, uYesu uthi, kuya kuba njalo ekuphelisweni kwale nkqubo yezinto; izithunywa zezulu ziya kwahlula abangendawo kwabangamalungisa, abangendawo zibalondolozele intshabalalo.

UYesu uqalisa eli phulo lokuloba, ebiza abafundi bakhe bokuqala ‘njengabalobi babantu.’ Phantsi kweliso lezithunywa zezulu, umsebenzi wokuloba uyaqhubeka ukuhlisa iinkulungwane. Ekugqibeleni yafika ixesha lokuba kutsalwe “umnatha,” ofuzisela iintlangano ezisemhlabeni ezizivakalisa zizezamaKristu.

Nangona iintlanzi ezingafanelekanga zisisiwa kwantshabalalo, hayi indlela esinombulelo ngayo kuba sibalelwe singakwezo ‘ntlanzi zilungileyo’ nezigciniweyo. Ngokubonakalisa loo mnqweno mnye unyanisekileyo unjengalowo wabonakaliswa ngabalandeli bakaYesu ukuze bafumane ulwazi nokuqonda okungakumbi, siya kusikelelwa kungekhona nje kuphela ngemfundiso ethe chatha kodwa ngentsikelelo kaThixo yobomi obungunaphakade. Mateyu 13:36-52; 4:19; Marko 4:24, 25.

◆ Abafundi bahluke ngantoni kwizihiwele eziselunxwemeni?

◆ Ngubani okanye yintoni emelwa ngumhlwayeli, yintsimi, yimbewu

entle,lutshaba,kukuvuna nangabavuni?

◆ Yiyiphi imizekeliso emithathu engakumbi eyanikelwa nguYesu, yaye sinokufunda ntoni kuyo?