Uyakhumbula Na?
Ngaba uye wacinga nzulu ngeenkupho zakutshanje zeMboniselo? Ukuba kunjalo, kunokwenzeka ukuba uza kukukhumbula oku kulandelayo:
◻ Kutheni umKristu engafanele ayibhiyozele iKrismesi?
Esinye isizathu sikukuba umsitho weKrismesi wavela kumbhiyozo wabahedeni kaSaturnalia, umsitho wamaRoma wokubhiyozela uthixo wezolimo uSaturn. ILizwi likaThixo lithi: “Musani ukunxulumana nabolunye uhlobo, abangakholwayo ke.” (2 Korinte 6:14-17) UmKristu akanakwahluka kwabangakholwayo ngoxa esabhiyozela umsitho onemvelaphi yobuhedeni.—12/15, iphepha 6.
◻ Iyintoni iNtlokoma yamaKristu?
Iyinkululeko ebandakanya “inyaniso” enokukhulula abantu ‘kumthetho wesono nokufa.’ Le nyaniso isekelwe ‘kuNyana,’ uYesu Kristu. (Yohane 8:31-36; Roma 8:1, 2, 21)—1/1, iphepha 21.
◻ Ibhiyozelwa nini iNtlokoma yamaKristu?
NgePentekoste yowama-33 C.E., iNtlokoma yamaKristu yaqalisa ukubhiyozelwa ngabo bamiselwe ubomi basezulwini. Uluntu olukhoIwayo oluya kunandipha ubomi obungunaphakade emhlabeni, luya kufumana iNtlokoma yamaKristu ezukileyo ebudeni boLawulo Lweminyaka Eliwaka, njengokuba yonke imizila yesono esizuzw’ ilifa nokungafezeki ziya kushenxiswa.—1/1, iphepha 21, 22, 27.
◻ Kutheni le nto amaNgqina kaYehova engaqhubi izikolo zabantwana eAsia nakwezinye iindawo?
Ngenxa yoko kuthethwa yiBhayibhile, amaNgqina kaYehova amele azixhalabise ngokuyintloko ngothumo lwawo lokushumayela isigidimi esibalulekileyo esingoBukumkani bukaThixo. (Mateyu 24:14; 28:19, 20) Ayakuqonda ukubandezeleka kwabantu nokungekho sikweni kule nkqubo ikhoyo, yaye anceda kangangoko anako. Kanti ayaqonda ukuba isicombululo sokwenyaniso asikho ebantwini, kodwa sikwintlangulo uBukumkani bukaThixo obuya kuylzisa kungekudala. (INdumiso 146:3-10)—1/15, iphepha 7.
◻ Ziziphi iinkalo zokholo esinokuzifunda kumzekelo ka-Abheli, kaEnoki, kaNowa, ka-Abraham nokaMoses?
Ukholo olunjengoluka-Abheli lwandisa ukulixabisa kwethu idini likaYesu. Ukholo lokwenyaniso lusinceda ukuba sibe nenkalipho, njengoEnoki. Ngokubhekisele kuNowa, ukholo lusishukumisela ukuba silandele imiyalelo kaThixo. Ukholo luka-Abraham lubethelela kuthi imfuneko yokuthobela uThixo nokuthembela kumadinga akhe. Sifanele sihlale singenabala ehlabathini size sime ngokunyanisekileyo ngakubantu bakaThixo, njengokuba uMoses wamisela umzekelo.—1/15, iphepha 20.
◻ Kungayiphi indlela ekunokuthi ukufun’ ukwazi kube yintsikelelo okanye kube sisiqalekiso?
Ukufun’ ukwazi okufanelekileyo ngoMdali wethu, ngokuthanda kwakhe nangeenjongo zakhe kunokwanelisa kuze kube yingenelo kunene, kusizisa uvuyo nokuhlaziyeka kubomi bethu. Kwelinye icala, ukufun’ ukwazi okungalawulwayo kunokusikhokelela kumgibe wentelekelelo noweengcamango zabantu, kusingele phantsi ukholo lokwenyaniso nokuhlonel’ uThixo.—2/1, iphepha 29.
◻ Wayethetha ukuthini uYesu xa wathandaza wathi: “Bawo, ukuba kunokwenzeka, mayidlule kum le ndebe”? (Mateyu 26:39)
UYesu wayexhalabele ukunyeliswa awakubona esiya kumangalelwa ngako. Olu yayilulwaphulomthetho olubi gqitha awayenokuba netyala lwalo umYuda. Ngoko ke, ukufa kwakhe phantsi kwaloo meko kwakusenokubonakala kusizisa ungcikivo kuYise wakhe wasemazulwini.—2/15, iphepha 13.
◻ Ukuba umntu kufuneka enyamezele ukubandezeleka okanye ukuphathwa kakubi, liliphi ikhondo lobulumko afanele alithabathe?
Kuyeyona nto ilungileyo ukuba abe nomonde, akhangele inkululo kuThixo ngethemba, yaye asondele ngakumbi kuYe. Oku kuya kwenza kube lula ngomntu ukuba afumane amava afanayo ebomini ngaphandle kokulahla ithemba. (IZililo 3:25-31)—2/15, iphepha 24.
◻ Ziingobani “izizwe ezilishumi elinazibini zakwaSirayeli” awathetha ngazo uYesu kuLuka 22:28-30?
Ezi zizwe zimela bonke abantu boluntu abaza kugwetywa nguKrtistu nababingeleli abangaphantsi kwakhe abali-144 000 ngokunxulumene nokubuyiselwa kwako konke oko uYehova anenjongo yako ngalo mhlaba. (Mateyu 19:28)—3/1 iphepha 28.
◻ Kusingiselwe entwenini ngoxolo lobuthixo, yaye lunokuzuzwa njani?
Uxolo lobuthixo luyimeko yokuzola kwengqondo nentliziyo, ukuzola kwangaphakathi kungakhathaliseki oko kusenokuba kuyaqhubeka. (INdumiso 4:8) Lunokuthi luzuzwe kuphela xa ubani enolwalamano olukholekileyo noThixo, oluthi lubekho ngedini lentlawulelo likaKristu Yesu. (Kolose 1:19, 20)—3/15, iphepha 11, 14, 15.
◻ Ngawaphi amancedo esinawo namhlanje asinceda ukuze simazi kakuhle uThixo?
SineBhayibhile yaye sizibonile zizaliseka iziprofeto zeBhayibhile kangangeenkulungwane. Kwakhona, sineengxelo zeVangeli zobomi, zemisebenzi nezamazwi kaYesu Kristu, lowo uPawulos wabhala oku ngaye: “Ngokuba kuhleli kuye [uKristu] konke ukuzaliseka kobuthixo ngokomzimba.” (Kolose 2:9)—4/1, iphepha 6.