Imibuzo Evela Kubafundi

■ Ngaba umntu owahlulela ubomi bakhe kuYehova uThixo unokutsho ngokufanelekileyo ukuba oko kuzahlulela kusisibhambathiso

Abantu abathi bamthande uThixo oyinyaniso nabathi bazimisele ukumkhonza ngokupheleleyo bafanele bahlulele ubomi babo kuYehova baze ke babhaptizwe. Ngoxa iBhayibhile ingalisebenzisi igama elithi “isibhambathiso” ngokubhekisele kuzahlulelo lomKristu, ukwenjenjalo akubonakali kuchasekile.

IAid to Bible Understanding ichaza ukuba ngokweZibhalo isibhambathiso “sisithembiso esinyanisekileyo sokuphumeza isenzo esithile, kukwenza umnikelo okanye kukunikela ngesipho esithile, okanye kukungenela inkonzo okanye imeko ethile; sisifungo, esisenokuba sesingqalileyo okanye sesingangqalanga.” Zimbi izibhambathiso ezibhalwe eBhayibhileni zabandakanya isifungo sokulandela ikhondo elithile ukuba kuqala uThixo wayesithi abe nento ayenzayo. Ngokomzekelo, iNumeri 21:2 ibalisa oku: “Abhambathisa amaSirayeli isibhambathiso kuYehova, athi, Ukuba uthe wabanikela inene aba bantu esandleni sam, ndoyisingela phantsi imizi yabo.” (Genesis 28:20-22; ABagwebi 11:30-39) Ukwahlulela komKristu ubomi bakhe kuThixo ngokuqinisekileyo akusiso isibhambathiso esenziwa phantsi kweemeko ezithile. Ngokungathi kunjalo, akathi: ‘Ukuba wena, Yehova, undenza ndonwabe yaye ndiphumelele ngoku yaye undiqinisekisa ngobomi obungunaphakade kwinkqubo entsha yezinto, ndithembisa ukuba ndiya kukukhonza ubomi bam bonke.’

IBhayibhile ithetha ngezibhambathiso ezithile njengezingaceIwanga. Ngegama lesiHebhere elibandakanyekileyo iWilson’s Old Testament Word Studies ithi: “[una·daŕ] kukubhambathisa, oko kukuthi kukwenza isithembiso ngokuzithandela sokunikela okanye sokwenza into ethile; ingcamango eyintloko yileyo yokwahlula.” Ngoko umntu wenza isibhambathiso kuThixo ngokuzithandela. Ngaloo ndlela ngaba bekunokuqiqwa ngelokuba ukuba umntu uba ngumfundi kaYesu ozahluleleyo nobhaptiziweyo bekungayi kufuneka isibhambathiso ngenxa yokuba ngoku uThixo efuna uzahlulelo lwabo bonke abaya kufuna ukukholeka Kuye?a

Noko ke, isibakala sokuba uYehova enezinto ezithile azifunayo ukuze umntu abe sisihlobo sakhe asithethi ukuba akukho lukhetho lobuqu lubandakanyekileyo. UMoses waxelela amaSirayeli oku: “Ndibeke phambi kwenu ubomi nokufa, intsikelelo nesiqalekiso. Nyula ubomi, ukuze uphile, wena nembewu yakho.” (Duteronomi 30:19, 20; INdumiso 15:1-5; thelekisa uYoshuwa 24:15; 1 Kumkani 18:21.) Khumbula amazwi kaYesu athi: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla imiphefumlo yenu.” (Mateyu 11:28, 29) Ngaba leyo yinto efunwa ngegunya, yinto efunwa ngesinyanzelo? Okanye ngaba sisimemo esivumela umntu asabele ngokuzithandela?

UYesu wazalelwa kuhlanga olwaluzahlulele kuThixo; iinkalo ezininzi zobomi nokufa kwakhe zazichazwe kwangaphambili esiprofetweni; yaye uThixo walungiselela umzimba kaYesu ukuba ube lidini. Sekunjalo, isigqibo sikaKristu sokuzithandela ekuzinikeleni ngenxa yenkonzo ekhethekileyo sibonakaliswa kumazwi akhe athi: “Ndaza ndathi, Yabona, ndiyeza (encwadini esongwayo kubhalwe ngam), ndiza kwenza ukuthanda kwakho, Thixo.” (Hebhere 10:5-10) Ngendlela efanayo, mntu ngamnye umele azigqibele ngokobuqu ngokuba ngumKristu ozahluleleyo nobhaptiziweyo.

Ngaphezu koko, amaKristu namhlanje ayaqonda ukuba ukusetyenziswa kwegama elinjengelithi “isibhambathiso” akupheleliselwanga nje kwindlela elasetyenziswa ngayo eBhayibhileni. AmaNgqina kaYehova kudala esebenzisa “izibhambathiso zomtshato” kwimitshato eqhutyelwa kwiiHolo zawo zoBukumkani.b Oku kuvumelana nentsingiselo eqhelekileyo yegama elithi “isibhambathiso,” njengokuba lichazwa ngale ndlela: “sisithembiso okanye sisenzo esinyanisekileyo, ngokukhethekileyo esiluhlobo lokufunga kuThixo.”—Oxford American Dictionary, 1980, iphepha 778.

Ngenxa yoko, akubonakali kuyimfuneko ukukusikel’ umda ukusetyenziswa kwegama elithi “isibhambathiso.” Umntu ogqiba kwelokuba akhonze uThixo unokuba noluvo lokuba, kuye, ukuzahlulela kwakhe ngokupheleleyo kufana nesibhambathiso sobuqu—isibhambathiso sokuzahlulela. ‘Ngokunyanisekileyo uthembisa okanye uzimisela ukwenza into,’ nto leyo esiso isibhambathiso. Kule meko, kukusebenzisa ubomi bakhe ukuze akhonze uYehova, esenza ukuthanda kwakhe ngokuthembekileyo. Umntu onjalo ufanele anyaniseke koku. Kufanele kube njengakumdumisi, owathi, ebhekisela kwizinto awayenze isibhambathiso ngazo, wathetha oku: “Ndiya kumbuyisela ngantoni na uYehova konke ukundiphatha kwakhe kakuhle? Ndophakamisa indebe yosindiso, ndinqule igama likaYehova. Ewe, ndozizalisa izibhambathiso zam kuYehova.”—INdumiso 116:12-14; bona kwaneNdumiso 50:14

[Imibhalo esemazantsi]