Ukuphulaphula UYehova Njengoko Isiphelo Sisondela
“Hayi, uyolo lomntu ondivayo . . . Kuba ofumana mna, ufumene ubomi.”—IMIZEKELISO 8:34, 35.
1, 2. (a) Phezu kwako nje ukungabikho koxolo kuyo yonke imbali yabantu, bathini abanye ngoku? (b) Kutheni le nto lungenakubakho uxolo lokwenyaniso ngemigudu yabantu?
NGAPHEZU kwako nje ukungabikho koxolo kuyo yonke imbali, ingakumbi kule nkulungwane yama-20, bambi bathi iintlanga zithabatha amanyathelo okucombulula ukungavisisani kwazo. Bathi iinkokeli zehlabathi ziqhuba iintlanganiso eziphambili ukuze zithethe ngoxolo yaye zityobele izivumelwano ezahlukahlukeneyo. Ewe, IZizwe Ezimanyeneyo zada zavakalisa unyaka ophelileyo ‘njengoNyaka Woxolo Wezizwe Ngezizwe’! Kwakuthenjwa ukuba oku kwakuya kuba sisiqalo somgudu othe chatha weentlanga wokuba zikhuthaze uxolo, kuthenjwa ukuba kuya kubakho impumelelo kwikamva elingekude.
2 Noko ke, kuyo yonke imbali, ngaba imigudu efana naleyo yakha yezisa uxolo olusisigxina? Ukuba babenokukwazi ukukwenza oko abantu, kwakufanele ukuba lube lwabakho kwakudala uxolo—kude kudala ngaphambi kokuba kubekho abantu abangamawaka amahlanu ezigidi abahlulelene ekubeni zizizwe ezingaphezu kwe-160, ezineentlobo ngeentlobo ezingenakubalwa zeengcamango zobupolitika, zoqoqosho nezonqulo. Kodwa akuzange kubekho luxolo; kungasayi kuze kubekho xolo lungemigudu yeenkokeli zeli hlabathi. Ngoba kutheni? Phakathi kwezinye izizathu, kungenxa yokuba iingxaki zoluntu ngoku sele zinkulu kangangokuba azinakuconjululwa yimigudu yabantu iyodwa. Kunjengokuba uYeremiya 10:23 ngokuchan’ ucwethe esithi: “Akukhona endodeni ehambayo ukuqinisela ukunyathela kwayo.”
Isizathu Sokuba Imigudu Yabantu Ingenakuphumelela
3. Kungenxa yasiphi esinye isizathu le nto abantu neentlanga bengenakuze bazise uxolo lokwenyaniso?
3 Kukho esinye isizathu sokuba imigudu yabantu neyeentlanga ingenakuze izise uxolo lokwenyaniso. IBhayibhile ibhekisela kuso kweyoku-1 kaYohane 5:19, isithi: “Ihlabathi liphela lilele kongendawo.” ISityhilelo 12:9 sibonisa ukuba lowo “ongendawo” “nguMtyholi, uSathana ke, lowo ulilahlekisayo elimiweyo liphela.” EyeSibini yabaseKorinte 4:4 imbiza ngokuthi ‘nguthixo weli phakade.’ Ngaloo ndlela, inkqubo ekhoyo iphela eyolawulo lwezobupolitika, yezoqoqosho nezonqulo eye yavelisa ugonyamelo olungaka iyimveliso yolawulo lukaSathana, kungekhona yolawulo lukaThixo. Yiyo loo nto, xa ithetha ngobulumko obuvela kuThixo, eyoku-1 yabaseKorinte 2:8 (TE) isithi: “Akubangakho namnye ke wabaphathi beli hlabathi ubazileyo obo bulumko.”—Luka 4:5, 6.
4. Yintoni eyathi yaba ngumphumo emva kokuba abazali bethu bokuqala bayekayo ukuphulaphula uYehova?
4 Xa uSathana wathi wavukela uThixo, wenza ukuba abazali bethu bokuqala baphulaphule yena kunokuba baphulaphule uThixo. Ngenxa yoko, abazange bamthobel’ uThixo baza bezisa iminyaka engama-6 000 yokungcungcutheka kwentsapho yabantu. IBhayibhile isixelela ngokucacileyo ukuba uSathana wenza ukuba abantu bakholelwe ukuba babeya kuba bayalungisa ngokungamphulaphuli uMdali wabo. (Genesis 3:1-5) Ngobulumko bakhe, uYehova uye wavumela ihlabathi loluntu lulonke ukuba lihambe ngeliyibonayo, lingakhokelwa nguye, ukuza kuthi ga ngeli xesha. Yaye ngokuqinisekileyo, kuzo zonke ezi nkulungwane, kuye kwaboniswa ngokupheleleyo ukuba ulawulo lomntu lube lolungenampumelelo.—Duteronomi 32:5; INtshumayeli 8:9.
5. Kwanokuba uxolo belungathi luziswe ngemigudu yabantu, ziintoni ebesiya kusala nazo?
5 Ukongezelela, xa uAdam noEva bathi bayeka ukuphulaphula uYehova, uMthombo wobomi obufezekileyo, bathi ke bayeka ukufezeka baza ekugqibeleni bafa. Ngaloo ndlela, yonke inzala yabo yazalwa ingafezekanga. Ukugula, ukwaluphala nokufa kwaba sisabelo soluntu. (Roma 5:12) Ngoko ke, kwanokuba abantu bebengaphumelela ekuziseni uxolo, sekunjalo bebengenakuba nako ukunyanga ukungafezeki okuzuzw’ ilifa. Besisaya kugula, saluphale, size sife. Ekubeni uSathana wayebophelelekile ngako oku, uYesu wathi ngaye: “Yena waye esisibulala-mntu [umbulali] kwasekuqaleni; akemi enyanisweni.” (Yohane 8:44) Eneneni, xa ucinga ngamawaka ezigidi zabo baye baphila baza bafa kwixesha elidluleyo, kufana nokungathi uSathana wababulala bonke.
6. Ngoobani abachithachithi boxolo, ibe yintoni emele yenzeke kubo?
6 USathana wakwalukuhla ukuba ezinye izidalwa zokomoya zimthelele kwimvukelo, yaye zonke ezi zidalwa zingendawo zala ukuphulaphula xa uYehova wayethetha. Ngoko nguSathana, iidemon zakhe nabantu abanemvukelo abaye bezisa eli hlabathi kwimeko elikuyo ngoku. Bonke kufuneka beshenxisiwe, ukuze kuphele le mizamo iyintlekele yokuzimela geqe kuThixo ithabathe iminyaka engama-6 000. AmaRoma 16:20 aqinisekisa esithi, “UThixo ke woxolo uya kumtyumza uSathana kamsinya,” kunye needemon zakhe nabo bonke abantu abangakuvumiyo ukuphulaphula xa uThixo ethetha.—Mateyu 25:41.
Ngoku Kukho Imfuneko Engakumbi Yokuphulaphula
7. Kutheni le nto kufuneka sizimisele ngakumbi kwimigudu yethu yokukhonza uYehova ngoku?
7 Ngoku singene nzulu kwinxalenye yokugqibela yale “mihla yokugqibela.” (2 Timoti 3:1-5) Ngenxa yoko, kusoloko kukho imfuneko yokuphulaphula oko uYehova akuthethayo kuthi. Kukho nemfuneko ehambisana noko yokuzimisela ngakumbi ekubeni sizincame ukuze simkhonze. Kungani simele sizimisele kwimigudu yethu? Kungenxa yokuba uSathana uyazi ukuba “ixesha [eliseleyo] analo lincinane.” (ISityhilelo 12:12) Ngoko ngokuqinisekileyo uya kuzimisela kwimigudu yakhe yokonakalisa neyokutshabalalisa.
8. (a) Kutheni le nto umsebenzi wokushumayela ungenakuthintelwa ziintshaba zabo? (b) Yintoni esimele siyenze ukuze sihlale sixhaswa nguThixo?
8 Eyona nto uSathana ebengathanda gqitha ukuba awayekise yona amaNgqina kaYehova kukushumayela iindaba ezilungileyo zoBukumkani. Kodwa akanako, kuba uYehova uye wawathembisa esithi: “Zonke izixhobo ezikhandelwe ukulwa nawe aziyi kuba nampumelelo.” (Isaya 54:17) Abo bachasa abakhonzi bakhe ‘baya kufunyanwa bengabalwa kwanoThixo.’ (IZenzo 5:38, 39) Ngoko, ngokuxhaswa ngamandla ngumoya kaYehova, uKristu Yesu, nenkitha yemikhosi yezithunywa zezulu, umsebenzi wokuvakaliswa koBukumkani uthabath’ unyawo nyaka ngamnye. Ukuze bahlale bexhaswa nguThixo, abakhonzi bakaYehova bayiphaphele into yokuba bathobele isiluleko esikuYakobi 4:7, 8: “Mthobeleni ngoko uThixo. Mchaseni ke uMtyholi, wonibaleka. Sondelani kuye uThixo, wosondela kuni.”
9. Kutheni le nto singamele simjongele phantsi uSathana?
9 Ungawadeleli amandla kaSathana okukhohlisa nawokwenzakalisa. ILizwi likaThixo lilumkisa lisithi: “Yibani nobungcathu, phaphani; ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo; mchaseni lowo, nizimasekile elukholweni.” (1 Petros 5:8, 9) Ukuba ubusazi ukuba kuphuncule ingonyama enoburhalarhume kufuphi nawe, ubuya kuthabatha amanyathelo okuzikhusela wena nentsapho yakho. Mayela noSathana, simele siphaphe ngakumbi, njengoko enokusenzakalisa ngonaphakade. Okubuhlungu kukuba, inkoliso yabantu ayikhuselekanga ngenxa yokuba ayazi nokwazi oku ukuba uSathana ukho. Kutheni kunjalo nje? Kungenxa yokuba ikhetha ukungaliphulaphuli iLizwi likaYehova. Ibe uya kuba yintoni umphumo wolo khetho lubi? “Into athe wahlwayela yona umntu, wovuna kwayona.”—Galati 6:7.
Xa Bedanduluka Besithi ‘Luxolo Nonqabiseko’
10, 11. (a) Simele sikhumbule ntoni ngayo nayiphi impumelelo iintlanga ezinokuba nayo ekuziseni uxolo? (b) Sisiphi isiprofeto seBnayibhile esithetha ngokufunwa koxolo ziintlanga kwixesha lethu? (c) Uxolo olunjalo luya kuhlala ixesha elingakanani?
10 Ungabhajiswa yiyo nayiphi na impumelelo ezisenokuba nayo iintlanga ekuziseni uxolo. Hlala ukhumbula ukuba uYehova akasebenzisi nawuphi na umbutho wehlabathi mayela nento enjalo. UYehova unendlela yakhe yokuzisa uxolo lokwenyaniso, ibe kuphela ingoBukumkani bakhe abuphathise uKristu. Ngoko nayiphi na impumelelo ezisenokuba nayo iintlanga ekuziseni uxolo, iya kuba yeyokwexeshana yaye iyeyenkohliso nje. Akuyi kubakho nto iya kube iguqukile ngokwenene. Ulwaphulo-mthetho, ugonyamelo, imfazwe, indlala, ubuhlwempu, ukwahlukana kweentsapho, ukuziphatha okubi, ukugula, ukufa, noSathana needemon zakhe konke kuya kube kusezizinto ezikhoyo de uYehova akuphelise konke. “Ukuba akayakhi uYehova indlu, bafumana besaphuka yiyo abakhi bayo.”—INdumiso 127:1.
11 Isiprofeto seBhayibhile siyabonisa ukuba iintlanga zaziya kwenza umgudu omanyeneyo wokufumana uxolo kwixesha lethu. Sithi: “Nani ngokwenu niyazi ngokucacileyo, ukuba imini yeNkosi, njengesela ebusuku, yenjenjalo ukuza kwayo. Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo, kwanjengenimba komithiyo; baye bengayi kukha basinde.” (1 Tesalonika 5:2, 3) Eso sibhengezo ‘Soxolo Nonqabiseko’ asiyi kuthetha ukuba ukubola kweli hlabathi kuphelisiwe. EyeSibini kuTimoti 3:13 ithi “abantu abangendawo noosiyazi, kukhona beya kuhambela phambili ebubini.” Eyona nto liyiyo eli hlabathi isaya kuba njengokuba intloko yentlangano yemekobume yakuthethayo xa yathi: “Ingxaki ephambili ejamelene nebutho labantu yeyokuba alilawuleki.”
12. Abakhonzi bakaYehova bazi ntoni ngentsingiselo yokwenene yesibhengezo esizayo ‘soxolo nonqabiseko’?
12 Abaninzi ehlabathini baya kukhohliswa ngamathemba alilize ebudeni besibhengezo esizayo ‘soxolo nonqabiseko.’ Kodwa abakhonzi bakaYehova abasayi kukhohliswa, kuba bayaphulaphula xa uThixo ethetha. Ngaloo ndlela bayazi ukuba ngokweLizwi lakhe isibhengezo esinjalo asiyi kuluzisa uxolo nonqabiseko lokwenyaniso. Kunoko, eneneni siya kuba ngumqondiso wokugqibela ‘wokufikelwa yintshabalaliso ngebhaqo.’ Iya kutshayelela isiqalo esisondeleyo ‘sembandezelo enkulu’ uYesu awathetha ngayo kwangaphambili ukuba iya kubakho ngexesha lethu. Wathi: “Kuba ngelo xesha kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.”—Mateyu 24:21.
13. IBhayibhile isichaza njani isiphelo solawulo lwabantu?
13 Ebudeni ‘bembandezelo enkulu,’ ulawulo lomntu luya kupheliswa. INdumiso 2:2-6 ithi: “Ookumkani behlabathi bazimisile, izidwangube zabhunga ngoYehova nangomthanjiswa wakhe; besithi, Masiziqhawule iimbophelelo zabo, sizilahle izintya zabo kuthi. Ohleli emazulwini uyahleka, iNkosi iyabagculela. Iya kwandula ithethe kubo ngomsindo wayo, ibakhwankqise ngokuvutha kwayo. Ithi, Mna ke ndimmisile ukumkani wam phezu kweZiyon [esemazulwini], intaba yam engcwele.” INdumiso 110:5, 6 yalek’ umsundulo ngokuthi: “INkosi [uYehova]”. iya kuphalusa ookumkani ngemini yomsindo wayo. Iya kugweba phakathi kweentlanga, kuzale zizidumbu; iphaluse intloko ezweni elibanzi.” Onke amacebo obupolitika aya kuphela, kuba uIsaya 8:9 neye-10 uvakalisa oku: “Bhinqani, niqotywe; bhinqani, niqotywe. Cebani icebo, lotshitsha; thethani ilizwi, aliyi kuma; ngokuba uThixo unathi.”
Ukuba Nentembelo Yokusinda
14. Kutheni siqinisekile nje ukuba kuya kubakho abaya kusinda kwisiphelo seli hlabathi?
14 Sinentembelo yokuba uYehova uya kubagcina benolwazi oluhle abantu bakhe ukuze bathabathe amanyathelo afanelekileyo okusinda ‘kwimbandezelo enkulu’ ezayo. Kutheni sinokuqiniseka kangako nje? Kungenxa yokuba isiprofeto esikwiSityhilelo 7:9, 14 sibonisa ukuba “isihlwele esikhulu” eneneni siyasinda. Ngoba? Ngenxa yokuba siyaphulaphula xa uYehova ethetha size ke sifundiswe ngendlela efanelekileyo. Ngale ndlela abo ‘besihlwele esikhulu’ bayakwazi ukwenza oko ISityhilelo 7:15 sikutshoyo: “Bemkhonza imini nobusuku etempileni yakhe.” Ngaloo ndlela senza ukuthanda kukaThixo, sikholiseke kuye size sikhuselwe ukuze sisinde kwisiphelo seli hlabathi.—1 Yohane 2:15-17.
15. UYoweli ukuchaza njani ukucunyuzwa kwale nkqubo, yaye kuphumela enini kubakhonzi bakaThixo?
15 UYoweli 3:13-16 ukwabhekisela ekusindeni kwabakhonzi bakaThixo xa le nkqubo icunyuzwa njengeediliya kwisixovulelo sewayini. Uthi: “Fakani irhengqa, kuba ukudla kuvuthiwe; . . . iyaphalala imikhombe yokukhongozela; kuba bukhulu ububi bazo. Yimbuthumbuthu, yimbuthumbuthu entilini yesigqibo! Kuba isondele imini kaYehova . . . ilanga nenyanga zenziwe mnyama, neenkwenkwezi zikufinyezile ukukhanya kwazo. UYehova ubharhula eZiyon [yasezulwini], . . . linyikime izulu nehlabathi; ke uYehova ulihlathi kubantu bakhe.”
16. Ziziphi ezinye iziprofeto ezibonisa ukuba uYehova uya kubalondoloza abantu bakhe kwintshabalalo yehlabathi?
16 Ngendlela efanayo, kuIsaya 26:20, 21, uYehova uthetha oku ngelo xesha lizayo: “Hambani, bantu bam, ningene ezingontsini zenu, nivale iingcango zenu ngasemva kwenu, nizimele umzuzwana, kude kudlule ukubhavuma. Kuba, yabona, uYehova uphuma endaweni yakhe, ukuze abuvelele kubo ubugwenxa babemi beblabathi.” Ngoko ke, uZefaniya 2:2, 3 wenza esi sibongozo: “Ingekanifikeli imini yomsindo kaYehova. Funani uYehova, nonke balulamileyo belizwe, bakwenzileyo okusesikweni kwakhe; funani ubulungisa, funani ululamo, mhlawumbi nositheliswa ngemini yomsindo kaYehova.”
‘Ukugidimela’ KuYehova
17. (a) Yintoni emele yenziwe ukuze kuzuzwe inkuselo kaYehova? (b) Yiyiphi into ephosakeleyo eyenziwa ngabantu bangaphambi koMkhukula?
17 IMizekeliso 18:10 ithi: “Yinqaba ende eliqele igama likaYehova; ilungisa ligidimela kulo, libe sengxondeni.” Ngaba ‘ugidimela’ kuYehova? Khumbula oko uYesu wakuthethayo ngabantu bomhla kaNowa. ‘Babesidla, besela, bezeka, besendisa kwada kwayimini uNowa awangena ngayo emkhombeni, bengaqondanga, wada wafika unogumbe, wabakhukulisa bonke.’ (Mateyu 24:38, 39) Okwakuphosakele kukuba bazixakekisa kwangaphambili ngento yonke eyenye bengenamsebenzi nokuphulaphula uThixo xa wayethetha ngomkhonzi wakhe uNowa ‘owayengumshumayeli wobulungisa.’ (2 Petros 2:5) Ngenxa yokuba bengazange baphulaphule, xa wathi wafika uNogumbe “wabakhukulisa bonke” batshabalala.
18. Ukuba ngabantu “abazilungeleyo” nje kwabo kwakutheni ze kungabasindisi abo batshatyalaliswa ngoMkhukula?
18 Uninzi lwabo bafa ngoMkhukula ngokungathandabuzekiyo bazigqala bengabantu “abazilungeleyo,” bengabandakanyeki kugonyamelo olwaluzalise ibutho labantu baloo mihla. Kodwa ukuba nje ngabantu “abazilungeleyo” kwabo akuzange kubasindise. Ngokungakhathali kwabo babubetha ngoyaba ububi bomhla wabo. Into ebalulekileyo yeyokuba abazange ‘bagidimele’ kuYehova; abazange baphulaphula xa umkhonzi kaThixo wayethetha. Ngoko abazange bathabathe manyathelo afanelekileyo ukuze basinde. Kwelinye icala, abo baphulaphulayo basinda.
19 Namhlanje uThixo uthetha ngoxolo kwabo bamphulaphulayo. Umphumo uba yintoni ke kubo? UIsaya 54:13 uthi: “Bonke abantwana bakho baya kuba ngabafundi bakaYehova, lube lukhulu uxolo lwabantwana bakho.” Ewe, “uYehova uya kubasikelela abantu bakhe ngoxolo.” (INdumiso 29:11) Ngaloo ndlela, phakathi kweli hlabathi linogonyamelo, amaNgqina kaYehova anoxolo lokwenyaniso nolungenakuphela phakathi kwawo. Anobuzalwana obunothando kwizizwe ngezizwe obo iinkokeli zehlabathi, iintlanga zazo, neenkonzo zazo zingenako ukubuxelisa. Ngoba kutheni? Kungenxa yokuba aba abamphulaphuli ngokwenene uThixo xa ethetha. Ngoko abenzi njengokuba esitsho. Kodwa amaNgqina kaYehova ayamphulaphula uThixo. Awajonga nzulu amazwi akwiNtshumayeli 12:13: “Yoyika uThixo, ugcine imithetho yakhe; ngokuba indawo leyo yimfanelo yoluntu lonke.”
20. Yintoni emele yenziwe ngumntu ngamnye ukuze asindele kwihlabathi elitsha likaThixo?
20 Oko koko wonke umntu—ewe, wonke ofuna ukuphila kwihlabathi elitsha likaThixo—amele akwenze. Bamele ‘bagidimele’ kuYehova ngaphandle kokuphozisa amaseko. Eneneni, bamele bakhokelwe bubulumko obunikelwa nguThixo ekuthethwa ngabo njengobuthi: “Ndiveni; hayi, uyolo lwabazigcinayo iindlela zam! Yivani uqeqesho, nibe nobulumko ningaluyeki. Hayi uyolo lomntu ondivayo . . . Kuba ofumana mna, ufumene ubomi.”—IMizekeliso 8:32-35.
Ubungaphendula Njani?
◻ Kutheni le nto imigudu yabantu ingasokuze iphumelele ekuziseni uxolo?
◻ Kutheni le nto ngoku kukho imfuneko enkulu yokuphulaphula uYehova?
◻ Isibhengezo esizayo ‘soxolo nonqabiseko’ ngokwenene siya kuthetha ntoni?
◻ Yintoni esimele siyenze ukuba sifuna ukusindela kwinkqubo entsha kaThixo?
19. Yiyiphi ingenelo emangalisayo efunyanwa ngabakhonzi bakaYehova kwanangoku, yaye ngoba?
[Umfanekiso okwiphepha 17]
Njengengonyama egqumayo, uSathana uzimisele kwimigudu yakhe yokonakalisa neyokutshabalalisa
[Umfanekiso okwiphepha 18]
Xa le nkqubo icunyuzwa njengeediliya kwisixovulelo, ‘uYehova uya kuba lihlathi kubantu bakhe’