Uncedo Ekwenzeni Izigqibo Zobulumko

UALICE wenza isigqibo sobudenge esaphumela kwintlekele. Uvuma ngelithi, “Ndazahlula kuYehova nakwintlangano yakhe.” Nangona wathi ekugqibeleni wabuyela, kwamthabatha ngaphezu kweminyaka eli-13 ukwenjenjalo—uyibiza ngokuba ‘yiminyaka yosizi.’

UmKristu akafanele ayidelele ingozi yokwenza izigqibo zobudenge ngokuphathelele inkonzo yakhe kuThixo. Oku akutheth’ ukuthi izigqibo eziphosakeleyo zenziwa ngabom emva kokuqwalaselwa kwezibakala ezihlobeneyo. Maxa wambi zenziwa nje ngokuqhutywa lithuku lemvelo. Zakuba nje iimvakalelo ziyisithile imbambano ize intliziyo engafezekanga iwaphembelele ngokungafanelekanga amandla okucinga, oko kungaphumela kumonakalo omkhulu nakwiintlungu ezininzi.

Ngokwenene, “intliziyo inenkohliso ngaphezu kweento zonke.” (Yeremiya 17:9) Noko ke, iBhayibhile isixelela indlela esinokuzikhusela ngayo. Ithi: “Kuba ubulumko buya kungena entliziyweni yakho, . . . ukuqonda kokulondoloza.” (IMizekeliso 2:10, 11) Kodwa sibungenisa njani ubulumko entliziyweni yethu?

Funda Kumaxesha Adluleyo

Kuzame oku. Zibeke kwimeko yabakhonzi bokuqala bakaThixo abajamelana neemeko ezilingayo ezifanayo nezakho. Ngokomzekelo, masithi uxhaliswa yimeko elikuyo ibandla lamaKristu lasekuhlaleni. Zama ukucinga ngemeko efanayo ekhankanyiweyo eBhayibhileni.

Kuthekani ngebandla lamaKristu enkulungwane yokuqala elaliseKorinte? Khawuzithelekelele nje ulilungu lebandla laseKorinte. Ubusoloko ungumKristu kangangeminyaka emibini okanye emithathu. Olunjani uvuyo owawuza kuba nalo ngokuthi uyazi inyaniso ngexesha uPawulos wayehleli apho iinyanga ezili-18! Kodwa ngoku, izinto zixhomis’ amehlo.

Utyekelo lokubumba amaqela abantu avana ngento ethile nalawo achasene nenkqubo ekhoyo lubangela ukungavisisani ebandleni, luyalusongela umanyano lwalo. (1 Korinte 1:10, 11) Ukuvunyelwa kokuziphatha okubi ngokwesini kububek’ engozini ubumoya balo. (1 Korinte 5:1-5) Ukuthetha ekuhleni kwiinkundla zamatyala zehlabathi ngokungavisisani okukhoyo phakathi kwamalungu ebandla kuyalonakalisa udumo lwalo oluhle.—1 Korinte 6:1-8.

Masithi usazithelekelela usekwiKorinte yamandulo, uxhaliswa kukuba wambi amalungu ebandla asoloko ephikisana ngemicimbi eneneni engabalulekanga kangako. (Thelekisa eyoku-1 yabaseKorinte 8:1-13.) Ukhathazwa ziingxabano, ngamakhwele, yimisindo, naziziphithiphithi ozibonayo. (2 Korinte 12:20) Ngokwenene, uphazanyiswa ngabambalwa abanekratshi nabenza ukuphila komKristu kube nzima ngokugqithiseleyo. (1 Korinte 4:6-8) Uba buhlungu xa usiva ukuba bambi bade basithandabuze isikhundla negunya lompostile uPawulos, bemtyhola ngokungekho sikweni, yaye bemgxeka njengesithethi esingenabuciko. (2 Korinte 10:10; 12:16) Ukhathazekile kukuba hleze abo babalaselisa izimvo zobuqu balusingele phantsi ukholo Iwebandla kwimfundiso esisiseko.—1 Korinte 15:12.

Ukujongana Nesigqibo

Uthetha usentlungwini, uthi, ‘Oku akufanelekanga konke konke. Kungani abadala bengazilungisi nje izinto? Kukho into ephosakele gqitha.’

Ngaba uza kumka kwibandla laseKorinte, ugqiba kwelokuba uza kumkhonza kakuhle uThixo kwenye indawo? Okanye ngaba mhlawumbi usenokude ugqibe kwelokuba eyona nto ilungileyo kukuba uyeke ngokupheleleyo ukunxulumana namaKristu angoowenu? Ngaba uza kuzivumela ezi ngxaki ukuba ziludambise uvuyo lwakho nentembelo yakho yokuba uYehova uThixo noYesu Kristu ngabo abalathisayo? Ngaba uza kubonakalisa umoya wokuhlab’ amadlala nowokukhalaza, okubangela ukuba uzithandabuze izinto ezishukumisa amaKristu angoowenu? Ngaba uza kuyekelela ekwenzeni umsebenzi wokushumayela, uqiqa ngelokuba asikho isizathu sokwalathisela abanomdla kwibandla elinjalo?

Njengokuba ujonga le meko ungabandakanyekanga yaye uthe qelele kuyo namhlanje, unokukufumanisa kulula ukuthi isigqibo sakho besiya kuba sesokuhlala usondele ngokunyanisekileyo kwibandla likaThixo, phezu kwako nje ukuba neziphako kwalo. Kodwa ukuba ujamelene nemeko efanayo namhlanje, ngaba ungakwazi ukulondoloza ingqondo ebhadlileyo nentliziyo ezolileyo? Ngaba isigqibo obuya kusenza namhlanje seso ocinga ukuba ubuya kusenza ukuba wawuphila ngoko?

Ukungenelwa Kwisiluleko Sobulumko

AmaKristu aseKorinte awathi enza isigqibo sobulumko yayingalawo ahlala esondele ebandleni. Avakalelwa ngendlela uPetros awavakalelwa ngayo kwiminyaka engaphambilana. Xa abafundi abathile bayekayo ukunxulumana noYesu, uPetros wathi: “Nkosi, sosuka siye kubani na? Nguwe onamazwi obomi obungunaphakade. Nathi sikholiwe, sazile, ukuba wena unguye uKristu, uNyana kaThixo ophilileyo.” (Yohane 6:68, 69) Ngokucacileyo, kuphela kungokuhlala sisondele kwintlangano kaThixo esinokuthi singeneIwe kwisiluleko sayo.

Kumabandla amatsha, njengelamhla-mnene eKorinte, kuyinto eqhelekileyo ukuba ukungafezeki kwabantu kubangele ingxaki enokufuna ukuba kunikelwe isiluleko esinamandla. Kodwa xa wayenikela isiluleko kumaKristu aseKorinte, uPawulos wakhumbula ukuba awona maninzi kuwo ‘ayesezintanda.’ (1 Korinte 10:14; 2 Korinte 7:1; 12:19) Akazange alibale ukuba uYehova ubonakalisa ubabalo yaye ebaxolela abo basabelayo kulwalathiso Lwakhe.—INdumiso 130:3, 4.

Kambe ke, ekubeni ibandla lamaKristu litsala zonke iindidi zabantu, bambi basabela kade kolu lwalathiso kunokuba besenza abanye. Oku kunjalo ngenxa yezizathu ezahlukahlukeneyo. Zimbi iinguqulelo kunzima ngakumbi ukuzenza kunokuba kunjalo ngezinye. Kwakhona, mntu ngamnye wahlukile ekwakhiweni ngokomzimba nangokwengqondo, ngokobume bemeko yendawo ahlala kuyo, ngokwemvelaphi nangokweemeko. Ngoko hayi indlela ekububulumko ngayo ukuphepha ukuhlab’ amadlala ngokugqithiseleyo nokukhumbula ukuba “uthando luya kugubungela inkitha yezono”! (1 Petros 4:8) Ngapha koko, ukuba uYehova noNyana wakhe bakulungele ukunyamezela ukungafezeki kwabantu nokungakhuli ebandleni abakulo, ngaba asimele sibonise umoya ofanayo?—1 Korinte 13:4-8; Efese 4:1, 2.

Ukuba wawukwibandla laseKorinte yamandulo, ukuphulaphula isiluleko sikaPawulos sothando kodwa esinamandla kwakunokukukhumbuza ukuba uKristu, njengentloko yebandla lamaKristu, unomdla obukhali kwimpilo-ntle yalo. (Mateyu 28:20) Kwakunokuyikhulisa intembelo yakho kwisithembiso sikaYesu sokugcina abalandeli bakhe bemanyene njengoko basabelayo kuncedo olwalunikelwa ‘ngomkhonzi othembekileyo noqondayo.’ (Mateyu 24:45-47; Efese 4:11-16) Ewe, namazwi kaPawulos ngewayekuncedile wahlala unovuyo yaye ungaxengaxengi kwanaphantsi kweemeko ezilingayo. Ngewawunentembelo yokuba uThixo wayeya kukomeleza ukuze umelane nabo nabuphi na ubunzima awayenokubuvumela bubekho okwexeshana.

Oku akutheth’ ukuthi umKristu akangethabathi manyathelo xa kuvela imeko embi ebandleni. Emva eKorinte, amadoda akhulileyo anjengoStefano, uFortunato, uAkayiko, namanye akuloKlowe, athabath’ amanyathelo. Kuyabonakala ukuba amcacisela uPawulos ngemeko eyayikho. (1 Korinte 1:11; 5:1; 16:17) Kodwa bakuba benze ngolo hlobo, ngentembelo bathi bayiyekela ezandleni zakhe imicimbi. Ukuzondelela ukwenza ubulungisa akuzange kubenze bangabi nantembelo kubuntloko bukaKristu okanye ‘bajalele uYehova.’—IMizekeliso 19:3.

Ukuzondelela kwethu ubulungisa namhlanje kuya kusithintela kwanasekuqwalaseleni ukhetho lokuyekelela kwisabelo esisinikwe nguThixo sokushumayela iindaba ezilungileyo. Ukwenjenjalo bekuya kubonakalisa ukungayixhalabeli impilo-ntle yabanye yaye bekuya kuba kukusilela ukwenza oko uKristu afuna sikwenze. UPawulos waluleka ngelithi, “Ngoko ke, bazalwana bam abaziintanda, qinani, ningabi nakushukuma; nihlale niphuphuma umsebenzi weNkosi, nisazi nje ukuba ukubulaleka kwenu akulambathi eNkosini.”—1 Korinte 15:58.

Wazi Amaqhinga KaSathana

Iingxaki zebandla ezifana nezo zazikho eKorinte maxa wambi kusenokuba nzima ngakumbi ukuzisingatha kunokuba kunjalo ngentshutshiso ebonakalayo. USathana uyazisebenzisa iimeko ezinjalo kwilinge lokusibangela senze izigqibo eziphosakeleyo eziya kusenza simshiye uYehova. Kodwa ‘amaqhinga kaSathana siyawazi.’—2 Korinte 2:11.

UPawulos waxelela amaKristu aseKorinte ukuba ayenokungenelwa kukuhlolisisa ingxelo yabakhonzi bokuqala bakaThixo. Wathi ngamaSirayeli: “Zonke ke ezo zinto, zabahlelayo bona, beziyimifuziselo; zabhalelwa ke ukululeka thina aba, bafikelweyo ziziphelo zawo amaphakade.” (1 Korinte 10:11) Ngokukwanjalo, nathi namhlanje sinokungenelwa kukuyihlolisisa ngenyameko ingxelo yamaKristu okuqala. Ngokomzekelo, sinokuqwalasela oko kwenzekayo eKorinte. Ukucamngca ngendlela engesasizenze ngayo izigqibo ezichanileyo ngoko kuya kusinceda siphephe ukwenza izigqibo ezingachananga ngoku.

Emva kwe-13 ‘leminyaka yosizi’ yokungabikho ebandleni, uAlice wathi ngentlanganiso yakhe yokuqala kwiHolo yoBukumkani: “Ndandisoyika ukuthetha hleze ndilile. Ndaziva ndisekhaya ngokwenene. Ndandingakholelwa ukuba kunjalo.” Ngoko phezu kwazo nje iingxaki ezisenokuvela, zimisele ukubambelela kwisigqibo sakho sobulumko sokungaze uyishiye intlangano kaYehova! Ziya kuba ninzi iintsikelelo oya kuzifumana ngokunxulumana nabantu bakaThixo. Yaye azisayi kuba nasiphelo.—IMizekeliso 2:10-15, 20, 21.