Ukubonisa Ukuhlonel’ UThixo Kubazali Abakhulileyo
“Kuqala [abantwana okanye abazukulwana] mabafunde ukuhlonela elabo ikhaya, bababuyekezele umbuyekezo ooninakhulu; kuba oko kuhle, kwamkelekile emehlweni kaThixo.”—1 TIMOTI 5:4.
1, 2. (a) IBhayibhile ithi ngubani ofanele anyamekele abazali abalupheleyo? (b) Kutheni le nto ibiya kuba ngumbandela onzulu ngomKristu ukuba ayityeshele le mfanelo?
EBUNTWANENI, wanyanyekelwa waza wakhuselwa ngabo. Wakukhula, wafuna icebiso nenkxaso yabo. Kodwa ngoku bakhulile yaye bafuna umntu wokubaxhasa. Umpostile uPawulos uthi: “Ke ukuba kukho mhlolokazi uthile unabantwana nokuba ngabazukuIwana, ukuqala mabafunde ukuhlonela elabo ikhaya, bababuyekezele umbuyekezo ooninakhulu; kuba oko kuhle, kwamkelekile emehlweni kaThixo. Ukuba ke umntu akabakhathalele abakhe, ngokukodwa abendlu yakhe, ulukhanyele ukholo, unobubi ngaphezu kongakholwayo.”—1 Timoti 5:4, 8.
2 Amawaka amaNgqina kaYehova namhlanje ayabanyamekela abazali abalupheleyo. Oko akwenza kungengenxa nje “yobubele” (The Living Bible) okanye ‘kuba kunyanzelekile’ (The Jerusalem Bible) kodwa ngenxa ‘yokuhlonela uThixo,’ oko kukuthi, ukuzithoba kuThixo. Ayaqonda ukuba ukubashiya kwesinomhlwa abazali bawo ngexesha abaswele ngalo kuya kufana ‘nokukhanyela ukholo [IwamaKristu].’—Thelekisa uTito 1:16.
‘Wuthwale Umthwalo Wakho’ Wokubanyamekela
3. Kutheni le nto bekungaba lucelomngeni lokwenene ukunyamekela abazali bakabani?
3 Ukunyamekela abazali abakhulileyo kuye kwaba lucelomngeni lokwenene, ingakumbi kumazwe asentshona. Iintsapho zidla ngokuba zezisasazekileyo. Amaxabiso ezinto aye enyuka ngendlela engalawulekiyo. Abanikazikhaya ngokufuthi bayaphangela. Ngaloo ndlela ukunyamekela umzali owalupheleyo kunokuba ngumsebenzi omkhulu, ingakumbi xa lowo umnyamekelayo engasenguye oselula. “Ngoku sikwiminyaka yethu yama-50, sinabantwana abakhulileyo nabazukulwana abakwafuna uncedo,” utsho njalo omnye udade ozabalazela ukunyamekela umzali wakhe.
4, 5. (a) IBhayibhile ibonisa ukuba ngoobani ekunokwabelwana nabo ngomthwalo wokunyamekela? (b) Abathile bomhla kaYesu bayiphepha njani imbopheleleko yokunyamekela abazali babo?
4 UPawulos wabonisa ukuba imbopheleleko yayinokuba ‘yeyabantwana okanye abazukulwana.’ (1 Timoti 5:4) Noko ke, maxa wambi abantwana abakuvumi ‘ukuthwala umthwalo wabo’ wokunyamekela. (Thelekisa amaGalati 6:5.) Omnye umdala wakhalaza esithi: “Udade wethu osele ekhulile usandul’ ukuzikhupha kule meko.” Kodwa ngaba ikhondo elinjalo linokumkholisa uYehova? Khumbula oko uYesu wakha wakuxelela abaFarisi: “UMoses wathi, Beka uyihlo nonyoko . . . ke nina nithi, ukuba umntu uthe kuyise nokuba kukunina, ingumsondezo, oko kukuthi, ingumnikelo kuThixo into ongewuba uncedwa ngayo ndim, ukholisile; ningabi samvumela ukuba amenzele nto, nokuba nguyise nokuba ngunina; niliphanga igunya ilizwi likaThixo ngesithethe senu.”—Marko 7:10-13.
5 Ukuba umYuda wayengakukhathalelanga ukunceda umzali wakhe osweleyo, wayengathi nje izinto zakhe azibalele ekuthini ‘zingumsondezo’—umnikelo obekelwe bucala wokusetyenziswa etempileni. (Thelekisa iLevitikus 27:1-24.) Noko ke, ngokucacileyo wayenganyanzelekanga ukuba anikele ngaloo mnikelo ucingelwayo. Ngaloo ndlela wayenokuzigcina (yaye ngokungathandabuzekiyo azisebenzise) ngokungenasiphelo ezi zinto zakhe. Kodwa ukuba abazali bakhe babefuna ukuncedwa ngokwemali, wayenokusuka nje azikhulule kwimbopheleleko yakhe ngokuthi ngentlonelo athi konke awayenako ‘kwakungumsondezo.’ UYesu wabugxeka obu buqhinga.
6. Yintoni namhlanje esenokuqhubela abathile ukuba baphephe iimfanelo zokunyamekela abazali, yaye ngaba oku kuyamkholisa uThixo?
6 UmKristu osebenzisa izingxengxezo ezingavakaliyo zokubaleka imbopheleleko yakhe ngaloo ndlela akakhohlisi uThixo. (Yeremiya 17:9, 10) Kuyinyaniso ukuba, iingxaki ezingokwemali, impilo ebuthathaka, okanye iimeko ezifana nezo zinokuyithintela kakhulu indlela ubani anokunyamekela ngayo abazali bakhe. Kodwa bambi basenokuthi nje baxabise ubuncinane abanabo, ixesha nokuba bodwa ngaphezu kwempilo-ntle yabazali babo. Noko ke, hayi indlela ebekuya kuba kukuhanahanisa ngayo ukushumayela iLizwi likaThixo kodwa ‘siliphange igunya’ ngenxa yokungaxhasi abazali!
Ukusebenzisana Kwentsapho
7. lintsapho zinokusebenzisana njani ekulungiseleleni ukunyamekela umzali owalupheleyo?
7 Zimbi iingcali zincomela ukuba xa kuvela amanqam abandakanya umzali owalupheleyo, kubekho intlanganiso yentsapho. Elinye ilungu lentsapho kusenokufuneka lisingathe imbopheleleko enkulu. Kodwa ngokuthi ‘zithethathethane zizodwa’ ngendlela ezolileyo nenenjongo, iintsapho ngokufuthi zinokucwangcisa iindlela zokwabelana ngomsebenzi. (IMizekeliso 15:22) Bambi abahlala kude banokunikela ngemali baze batyelele ngamathub’ athile. Bambi banokwenza imisetyenzana okanye balungiselele izinto zokuhamba. Ukukuvuma nje ukutyelela abazali ngokuthe rhoqo kunokuba ligalelo elixabisekileyo. Omnye udade okwiminyaka yakhe yama-80 mayela nokutyelelwa kwakhe ngabantwana bakhe uthi: “Kunjengeyeza!”
8. (a) Ngaba amalungu entsapho akwinkonzo yexesha elizeleyo awabalwa ekubeni nesabelo ekunyamekeleni abazali bawo? (b) Abathile abakwinkonzo yexesha elizeleyo bafikelele kweyiphi imikhamo ukuze bahlangabezane neemfanelo zabo ngakubazali?
8 Noko ke, iintsapho zinokujamelana nengxaki enzima xa elinye ilungu libandakanyeke kwinkonzo yexesha elizeleyo. Abalungiseleli bexesha elizeleyo abazithetheleli kwiimfanelo ezinjalo, yaye abaninzi baye benza imigudu emangalisa gqitha ukuze banyamekele abazali babo. Umveleli wesiphaluka uthi: “Asizange siyithelekelele indlela ekwakuya kuba nzima ngayo ukunyamekela abazali bethu ngokwenyama nangokweemvakalelo, ingakumbi xa sizama ukuba kwangaxeshanye sihlangabezane nokufunwa yinkonzo yexesha elizeleyo. Eneneni, siye safikelela apho singasenakunyamezela khona, ibe saziva sifuna ‘amandla ayincamisa.’” (2 Korinte 4:7) Ngamana uYehova angaqhubeka ebazimasa abanjalo.
9. Luluphi ukhuthazo olunokunikelwa kwabo bebengenandlela yimbi ngaphandle kokuba bashiye inkonzo yexesha elizeleyo ukuze banyamekele abazali?
9 Noko ke, maxa wambi emva kokuzihlola zonke ezinye iimeko ezinokwenzeka, ilungu lentsapho kuyanyanzeleka ukuba liyishiye inkonzo yexesha elizeleyo. Kuyaqondakala ukuba, umntu onjalo unokuba neemvakalelo zokudideka mayela nokushiya amalungelo akhe enkonzo. Owayesakuba ngumvangeli wasemazweni uthi: ‘Siyazi ukuba kuyimbopheleleko yethu njengamaKristu ukunyamekela umama wam owalupheleyo nogulayo. Kodwa oku maxa wambi kuvakala kuyinto engaqhelekanga.’ Noko ke, khumbula ukuba ‘ukuhlonela uThixo ekhaya kwamkelekile emehlweni kaThixo.’ (1 Timoti 5:4) Kwakhona khumbula ukuba, “akanantswela-bulungisa uThixo, ukude awulibale umsebenzi wenu, nomzamo wothando enalubonakalalisa kulo igama lakhe, nabalungiselelayo nje abangcwele, nisamana nibalungiselela.” (Hebhere 6:10) Esinye isibini esashiya inkonzo yexesha elizeleyo esasineminyaka emininzi sikuyo sithi: “Ngokwendlela esibona ngayo, kuthi ukunyamekela abazali bethu ngoku kubaluleke kanye njengokuba kwakunjalo ukuba kwinkonzo yexesha elizeleyo kwethu.”
10. (a) Kutheni le nto abathile besenokuyishiya ngaphambi kwexesha nje inkonzo yexesha elizeleyo? (b) Iintsapho zifanele ziyijonge njani inkonzo yexesha elizeleyo?
10 Noko ke, mhlawumbi bambi inkonzo yexesha elizeleyo baye bayishiya ngaphambi kwexesha ngenxa yokuba izalamane zaqiqa ngale ndlela: ‘Akunazimbopheleleko zampangelo nezentsapho. Kutheni le nto wena ungenakunyamekela uTata noMama?’ Noko ke, ngaba umsebenzi wokushumayela asingowona msebenzi ungxamisekileyo wenziwayo namhlanje? (Mateyu 24:14; 28:19, 20) Ngaloo ndlela abo bakwinkonzo yexesha elizeleyo benza umsebenzi obalulekileyo. (1 Timoti 4:16) Kwakhona, uYesu wabonisa ukuba, kwezinye iimeko, ukunikela inkonzo kuThixo kunokuba yinto ephambili kunemicimbi yentsapho.
11, 12. (a) Kwakutheni aze uYesu acebise enye indoda ukuba ‘iyeke abafileyo bangcwabe abafileyo babo’? (b) Ngawaphi amalungiselelo zimbi iintsapho eziye zawenza xa elinye ilungu likwinkonzo yexesha elizeleyo?
11 Ngokomzekelo, xa indoda ethile yathi yasala isimemo sikaYesu sokuba ibe ngumlandeli wakhe, isithi: “Ndivumele khe ndimke, ndiye kungcwaba ubawo kuqala,” uYesu waphendula wathi: “Bayeke abafileyo [ngokomoya], bangcwabe abafileyo babo; ke wena hamba uye kushumayela ubukumkani bukaThixo.” (Luka 9:59, 60) Ekubeni amaYuda ayengcwaba abantu abafileyo babo kwangosuku abafe ngalo, akunakufane kwenzeke ukuba kanti uyise wale ndoda wayefe ngokwenene. Ngokucacileyo le ndoda yayifuna nje ukuhlala noyise owalupheleyo de afe. Noko ke, ekubeni ezinye izalamane ngokucacileyo zazikho ukuze zimnyamekele, uYesu wakhuthaza le ndoda ukuba ‘ishumayele ubukumkani bukaThixo.’
12 Zimbi iintsapho ngendlela efanayo ziye zafumanisa ukuba xa onke amalungu esebenzisana, kunokuthi ngokufuthi kulungiseleIwe ukuba lowo ukwinkonzo yexesha elizeleyo abe nesabelo sokunyamekela abazali bakhe ngaphandle kokuba ayishiye inkonzo yexesha elizeleyo. Ngokomzekelo, bambi abalungiseleli bexesha elizeleyo banceda abazali babo ngeempelaveki okanye ebudeni bamathuba ekhefu. Okubangel’ umdla kukuba, iqela labazali abakhulileyo liye lazingisa ngelokuba abantwana babo bahlale kwinkonzo yexesha elizeleyo, kwanaxa ikukuzincama okuphawulekayo kubazali. UYehova ubasikelela ngokutyebileyo abo babeka izilangazelelo zoBukumkani kuqala.—Mateyu 6:33.
“Ubulumko” ‘Nokuqiqa’ Xa Abazali Besiza Kuhlala Nani
13. Ziziphi iingxaki ezinokuvela xa umzali emenywa ukuba azokuhlala nabantwana bakhe?
13 UYesu walungiselela ukuba unina ongumhlolokazi ahlale nezalamane zakhe ezikholwayo. (Yohane 19:25-27) AmaNgqina amaninzi ngendlel’ efanayo aye amema abazali bawo ukuba baye kuhlala nawo—yaye aye anandipha amaxesha ovuyo neentsikelelo ngenxa yoko. Noko ke, iindlela zokuphila ezingangqinelaniyo, ukungabi naxesha laneleyo lokuba umntu abe yedwa, noxanduva lokunyamekela umzali mihla le kwenza ukuthabathela kukabani umzali endlwini yakhe kube yinto ekruqulayo kwabo benjenjalo. UAnn, ononinazala onesifo seAlzheimer uthi: “Ukunyamekela uMama kuye kwandidinisa ingqondo ngakumbi. Maxa wambi ndiphelelwa ngumonde ndize ndithethe kakubi noMama—ibe oko kundenza ndizive ndinetyala gqitha.”
14, 15. “Ubulumko” ‘nokuqiqa’ zinokunceda njani ‘ekwakheni’ intsapho phantsi kwezi meko?
14 USolomon wathi “indlu yona yakhiwa ngobulumko; izinziswe ngengqondo.” (IMizekeliso 24:3) Ngokomzekelo, uAnn uye wazama ukuba ngoyiqonda ngakumbi ingxaki kaninazala. Uthi, “Ndihlala ndikhumbula ukuba uyagula yaye akenzi ngabom.” Sekunjalo, “siyakhubeka kaninzi sonke. Ukuba umntu akakhubeki zwini, lowo uyindoda egqibeleleyo.” (Yakobi 3:2) Kodwa xa kuvela iingxabano, bonisa ubulumko ngokwala ukuvumela ukuba kwakheke ingqumbo okanye ugqajukelwe ngumsindo. (Efese 4:31, 32) Wuxubusheni umbandela njengentsapho, nize nikhangele iindlela eninokukulibala ngazo oku okanye eninokukulungisa ngazo.
15 Ingqiqo ikwanceda umntu ukuba ancokole ngokuphumelelayo. (IMizekeliso 20:5) Mhlawumbi umzali unobunzima bokuziqhelanisa nenkqubo yekhaya elitsha. Okanye mhlawumbi ngenxa yokwenza izigqibo eziphosakeleyo, unotyekelo lokungabi nantsebenziswano. Phantsi kweemeko ezithile, kusenokungabikho ndlela yimbi ngaphandle kokuba kuthethwe ngokungqongqo. (Thelekisa iGenesis 43:6-11.) Omnye udade uthi: “Ukuba ndandingathanga hayi kumama, wayeya kuyisebenzisa yonke imali anayo.” Noko ke, omnye umdala maxa wambi ufumanisa ukuba unokwenza ukuba unina amthande. “Amaxesha amaninzi xa singavani, ndisuka nje ndithi, ‘Mama, ngaba ungandinceda undenzele yona?’ yaye uyaphulaphula.”
16. Kutheni le nto indoda enothando imele ibonise ‘ukuqonda’ emfazini wayo? Inokukwenza njani oko?
16 Ekubeni umfazi edla ngokuba nomthwalo omkhulu wokuwunyamekela, indoda eqondayo iya kukulumkela ukuba angatyhafi—ngokweemvakalelo, ngokwenyama, okanye ngokomoya. IMizekeliso 24:10 ithi: “Uthe waphelelwa ngemini yembandezelo, oba ebandezelwe amandla akho.” Yintoni enokuyenza indoda ukuhlaziya inkuthalo yomfazi wayo? Omnye udade uthi: “Umyeni wam ubesithi akufika ekhaya, andigone endixelela indlela andixabise ngayo. Ndandingenakuphumelela ngaphandle kwakhe!” (Efese 5:25, 28, 29) Inokufundisisa iBhayibhile neqabane layo ize ithandaze rhoqo nalo. Ewe, kwanaphantsi kwezi meko zinzima, intsapho ‘inokwakhiwa.’
Ikhaya Lokunyamekela Abantu Abakhulileyo
17, 18. (a) Ezinye iintsapho kuye kwanyanzeleka ukuba zenze ntoni? (b) Kwiimeko ezinjalo, abantwana asele bekhulile banokubanceda njani abazali babo ukuba baqhelane nazo?
17 Ugqirha wabantu abalupheleyo uthi: “Kuye kufike ithuba apho intsapho ithi ingabi nandlela ichuliweyo okanye imali yokumgcina esekhaya [umzali].” Kunjengokuba enye indoda ichaza isithi: “Imeko yaba mbi gqitha kangangokuba impilo yomfazi wam yaba buthathaka ngenxa yokuzama ukunyamekela uMama iiyure ezingama-24 ngemini. Sasingenandlela yimbi ngaphandle kokusa umama kwikhaya labantu abakhulileyo. Kodwa iintliziyo zethu zakhathazeka yinto yokuba sasifanele sikwenze oku.”
18 Ukunyanyekelwa likhaya labantu abakhulileyo kunokuba yeyona ndlela ilungileyo ikhoyo yokubanyamekela phantsi kweemeko ezithile. Kanti, abantu abakhulileyo abasiwe kwiindawo ezinjalo badla ngokwenziwa badideke baze bacaphuke, benemvakalelo yokuba batyeshelwe. Udade esiya kumbiza ngokuba nguGreta uthi: “Samcacisela ngenyameko uMama isizathu sokuba sasinyanzelekile ukuba sikwenze oku, uye wafunda ukuhlengahlengisa izinto yaye ngoku le ndawo uyijonga njengekhaya.” Ukubatyelela rhoqo kwenza kube lula kubazali ukuvumelana neemeko ibe kungqina ukunyaniseka kothando lwenu kubo. (Thelekisa eyesi-2 kwabaseKorinte 8:8.) Apho ukuba mgama kubo kuyingxaki, nxibelelana nabo ngokubatsalel’ umnxeba, ngeeleta, nangokubatyelela ngamathub’ athile. (Thelekisa eyesi-2 kaYohane 12.) Sekunjalo, ukuphila phakathi kwabantu behlabathi kuneengxaki. ‘Zixhalabele iintswelo zabo zokomoya.’ (Mateyu 5:3, NW) UGreta uthi, “UMama simnika iincwadi ukuze afunde, size sizame ukuxubusha ngezinto zokomoya kangangoko kunokwenzeka.”
19. (a) Yiyiphi inyameko ekufuneka ibonisiwe ekukhetheni nasekuphononongeni ikhaya lokunyamekela abantu abakhululileyo? (b) Kuyingenelo njani kumKristu ukuba enze konke okusemandleni akhe ekunyamekeleni umzali?
19 IThe Wall Street Journal yanikela ingxelo ngohlolisiso olwenziwa kumakhaya abantu abakhulileyo angama-406 aseUnited States ekwaye kwathi kuwo “amalunga nesinye kwisihlanu abalwa njengalawo anobungozi kubemi yaye phantse isiqingatha sawo sasingaphucukanga kangako.” Ibuhlungu into yokuba sithi, iingxelo ezinjalo zixhaphake ngendlela ekruqulayo. Ngoko ukuba kufuneka benyanyekelwe likhaya labantu abakhulileyo, yiba nenyameko ekukhetheni. Tyelela ngokobuqu ukuze ubone ukuba licocekile na, ligcinwe kakuhle na, linabasebenzi abafanelekayo na, linemekobume enjengeyasekhaya na, ibe linako na ukudla okwaneleyo. Yiphonononge kangangoko kunokwenzeka inyameko enikelwa kubazali bakho. Yiba ngummeli wabo, ubanceda ukuba baphephe iimeko ezingafanelekanga ezinokuvela, mhlawumbi ezinxulumene neeholide zehlabathi okanye ukuzihlaziya kwalo. Ngokwenza konke okusemandleni akho ekulungiseleleni abazali bakho eyona ndlela ilungileyo yokunyanyekelwa phantsi kwezo meko, ungazikhulula ekubeni uzive unetyala nto leyo enokuthi ikuphazamise.—Thelekisa eyesi-2 yabaseKorinte 1:12.
Abaphi Abachwayitileyo, Ababuyekezwa Ngokuchwayita
20. Kutheni kubalulekile nje ukuba abantwana babe ngabaphi abachwayitileyo?
20 Omnye umfazi ongumKristu ethetha ngokunyamekela abazali bakhe uthi: “Bekunzima, bekufuneka ndibaphekele, ndibacocele, ndihlangabezane neemeko zongxamiseko, nditshintshe namashiti xa bewangcolisile.” Indoda yakhe ikhumbula oku: “Kodwa nayiphi na into esiye sabenzela yona, siye sayenza ngovuyo—ngokuchwayita. Siye sazama ngamandla ukuba singaze senze abazali bethu bavakalelwe kukuba kuyasicaphukisa ukubanyamekela kwethu.” (2 Korinte 9:7) Abantu abakhulileyo ngokufuthi baba madol’ anzima ukwamkela uncedo ibe abathandi ukuba luxanduva kwabanye. Ngaloo ndlela, isimo sengqondo osibonakalisayo sibalulekile.
21. (a) Abazali banokuba ngabamkeli abachwayitileyo njani? (b) Kutheni kububulumko nje ukuba umzali alicebele kwangaphambili ixesha lokwaluphala kwakhe?
21 Kwangaxeshanye, isimo sengqondo esiboniswa ngabazali sikwabalulekile. Omnye udade ukhumbula oku: “Nayiphi na into endandiyenzela uMama, ayizange ibe yeyaneleyo.” Ngoko, nina bazali, kuphepheni ukungabacingeli abantwana okanye ukuzifuna ngetshova izinto kubo. Ngapha koko, iBhayibhile ithi “asingabantwana abafanele ukuqwebela abazali, ngabazali abafanele ukuqwebela abantwana.” (2 Korinte 12:14) Bambi abazali bayabusafaza ubuncwane babo baze babe ngumthwalo ongeyomfuneko kubantwana babo. Noko ke, IMizekeliso 13:22 ithi: “Olungileyo ushiya ilifa kubazukulwana bakhe.” Ngaloo ndlela, ngomkhamo onokwenzeka abazali banokulicebela kwangaphambili ixesha labo lokwaluphala, bebekela bucala imali yaye besenza amalungiselelo athile okuzinyamekela.—IMizekeliso 21:5.
22. Ubani ufanele ayijonge njani imigudu ayenzayo yokunyamekela abazali bakhe abalupheleyo?
22 UPawulos wakuchaza kakuhle xa wathi ukunyamekela kukabani abazali bakhe kufana ‘nombuyekezo.’ (1 Timoti 5:4) Kunjengokuba omnye umzalwana esithi: “UMama wandinyamekela kangangeminyaka engama-20. Yintoni endiyenzileyo efana naleyo?” Ngamana onke amaKristu anabazali abakhulileyo angathi ngendlela efanayo ashukunyiselwe ukuba ‘ahlonele uThixo kwelawo ikhaya,’ esazi ukuba aya kubuyekezwa ngokutyebileyo nguThixo ovakalisa eli dinga kwabo babeka abazali babo: “[Babe] nexesha elide emhlabeni.”—Efese 6:3.
Iingongoma Emazikhunjulwe
◻ Bambi ababephila ngomhla kaYesu bakufuna njani ukuphepha imbopheleleko yabazali?
◻ Ngubani ofanele anyamekele abazali abasele bekhulile, yaye ngoba?
◻ Ziziphi iingxaki ezinokudibana nazo iintsapho xa umzali esiza kuhlala nazo, ibe zinokoyiswa njani?
◻ Kutheni le nto ukunyanyekelwa likhaya labantu abakhulileyo kusenokufuneka nje, ibe abazali banokuncedwa njani ukuze bakwazi ukuhlala apho?
[Umfanekiso okwiphepha 15]
Kunokubakho intlanganiso yokuxubusha indlela ekunokucwangciswa ngayo ukunyamekela umzali
[Umfanekiso okwiphepha 17]
Xa kuyimfuneko ukuba abazali banyanyekelwe likhaya labantu abakhulu, ukutyelela rhoqo kubalulekile ukuze babe neemvakalelo ezintle ngokomoya baze baphile kakuhle abantu abakhulileyo