Imibuzo Evela Kubafundi
◼ Xa wayesemthini, uYesu wadanduluka wathi: “Thixo wam! Thixo wam! undishiye ngani na?” Ngaba wayeswele ukholo, ekholelwa kukuba uThixo wayemlahlile?
Ekufundeni la mazwi akuMateyu 27:46 okanye akuMarko 15:34, bambi baye bagqiba kwelokuba xa uYesu wayejongene nokufa okuneentlungu, akazange athembele ngokomeleleyo kuThixo. Abanye baye bathi oku yayikukusabela nje kukaYesu okwabonisa ukuba wayengumntu, isikhalo esivakalayo sokuphelelwa lithemba komntu wenyama negazi ongcungcuthekayo. Noko ke, kukho isizathu esivakalayo sokukhangela ngaphaya koqikelelo lwabantu olusekelwe nje kwimbonakalo yangaphandle. Ngoxa kungekho namnye kuthi namhlanje onokwazi ngokuqinisekileyo konke okwakubandakanyekile ekudandulukeni kukaYesu, sinokuphawula izinto ezimbini ezisenokuba zamshukumisela koko.
UYesu wayekuqonda kakuhle ukuba kwakuya kufuneka “aye eYerusalem eve ubunzima obukhulu . . . abulawe, athi ngomhla wesithathu avuke.” (Mateyu 16:21) Xa wayesezulwini uNyana kaThixo wayebabonile abantu abangafezekanga bebulawa ngendlela engcungcuthekisayo ngoxa babelondoloze ingqibelelo yabo. (Hebhere 11:36-38) Ngoko asikho nakancinane isizathu sokukholelwa ukuba uYesu—umntu ofezekileyo—wayeya kuphathwa luloyiko ngenxa yoko wayejongene nako; ibe nokufela kwakhe emthini kwakungayi kuthetha ukuba uYise wayemshiyile. UYesu wayeyazi kwangaphambili ‘indlela awayeza kufa ngayo,’ oko kukuthi, ukufa ngokubethelelwa emthini. (Yohane 12:32, 33) Kwakhona, wayeqinisekile ukuba kusuku lwesithathu wayeza kuvuswa. Ngoko, wayenokutsho njani uYesu ukuba uThixo wayemshiyile?
Okokuqala, ngendlela ethile wayethetha ukuba uYehova wayengamkhuselanga uNyana wakhe ukuze ingqibelelo kaYesu ivavanywe ukusa kumlinganiselo othile, ukufa okuneentlungu nokulihlazo. Kodwa ukuvumela kukaThixo uYesu ajongane neentshaba ezinengqumbo ezazisalathiswa nguSathana kwakungabonisi ukuba wayemshiye ngokupheleleyo. UYehova waqhubeka ebonisa uthando kuYesu, njengoko oko kwangqinwa kusuku lwesithathu xa Wamvusayo uNyana wakhe, nto leyo uYesu wayeyazi ukuba yayiza kwenzeka.—IZenzo 2:31-36; 10:40; 17:31.
Into enxibelelene nombandela owandulelayo mhlawumbi sisizathu sesibini sokuthetha kukaYesu loo mazwi ngoxa wayesemthini into yokuba ngokusebenzisa kwakhe la mazwi wayenokuthi azalisekise umqondiso wesiprofeto esingoMesiya. Kwiiyure ezingaphambi koko uYesu waxelela abapostile ukuba izinto zaziya kwenzeka “njengoko kubhaliweyo ngaye.” (Mateyu 26:24; Marko 14:21) Ewe, wayefuna ukuzalisekisa izinto ezazibhaliwe, kuquka ezo zikwiNdumiso 22. Usenokukufumanisa kufundisa ukuthelekisa INdumiso 22:7, 8—Mateyu 27:39, 43; INdumiso 22:15—Yohane 19:28, 29; INdumiso 22:16—Marko 15:25 noYohane 20:27; INdumiso 22:18—Mateyu 27:35. INdumiso 22, eyanikela iziprofeto ezininzi gqitha ngezinto ezaziza kwenzeka kuMesiya, itshayelela ngala mazwi: “Thixo wam, Thixo wam, undilahleleni na?” Ngenxa yoko, xa uYesu wadandulukayo, wayesongezelela kwingxelo yeziprofeto awazizalisekisayo.—Luka 24:44.
Umdumisi wayengakholelwa kukuba uThixo wakhe wayemshiye nje okanye emlahlile, kuba uDavide wahlabela mgama esithi wayeya ‘kulazisa igama likaThixo kubazalwana bakhe,’ ibe wabongoza abanye ukuba bamdumise uYehova. (INdumiso 22:22, 23) Ngokufanayo, uYesu, owayeyazi kakuhle INdumiso 22, wayekwanesizathu sokuba nentembelo yokuba uYise wayesakholiswa nguye yaye emthanda, phezu kwako nje oko uThixo wayekuvumele ukuba akufumane emthini.