Ubomi Nobulungiseleli BukaYesu
Ukunduluka Kwikhaya LikaYayiro Nokutyelela Kwakhona ENazarete
UYESU ebexakekile ngolu suku—ube ekuhambo lwaselwandle evela eDekapoli, waphilisa ibhinqa ebelinethombo legazi waza wavusa nentombi kaYayiro. Kodwa usuku alukapheli. Kuyabonakala ukuba njengoko uYesu elishiya ikhaya likaYayiro, iimfama ezimbini ziyamlandela, zize zidanduluke zisithi: “Senzele inceba, nyana kaDavide.”
Ngokumbiza uYesu ngokuthi “nyana kaDavide,” la madoda abonakalisa ukukholeIwa kwawo ekuthini uYesu uyindlalifa etroneni kaDavide, ngoko ke abonisa ukuba unguMesiya othenjisiweyo. Phofu ke, kubonakala ngathi uYesu akakusi so ukucela kwawo uncedo, mhlawumbi ufuna ukuwavavanya ukuba aya kuzingisa kangakanani na. Kodwa la madoda akancami. Ayamlandela uYesu ukuya apho ahlala khona, yaye xa engena endlwini, ayamlandela aze nawo angene.
Apho uYesu uyawabuza athi: “Niyakholwa na ukuba ndinako ukukwenza oko?”
Aphendula ngokuqiniseka esithi: “Ewe, Nkosi.”
Ngoko, echukumisa amehlo awo, uYesu uthi: “Ngokokholo lwenu makwenzeke kuni.” Ngequbuliso ayabona! Emva koko uYesu uwayala ngokungqongqo esithi: “Lumkani ingaziwa mntu le nto.” Kodwa enemincili, la madoda ayawutyeshela umyalelo kaYesu aze athethe ngaye emaphandleni jikelele.
Njengoko enduluka la madoda, abantu bazisa umntu ophethwe yidemon eyayimenze wasisimumu. UYesu uyayikhupha le demon, yaye Io mntu uthetha ngoko nangoko. Izihlwele ziyakhwankqiswa yile mimangaliso, zisithi: “Akuzanga kubonwe okunje kwaSirayeli.”
Apha kukwakho nabaFarasi. Abanakuyikhanyela le mimangaliso, kodwa ngenxa yokungakholwa kwabo kwenkohlakalo bayasiphinda kwakhona isityholo sabo ngokubhekisele kumthombo wemisebenzi kaYesu yamandla, besithi: “lidemon ezi uzikhupha ngaye umphathi weedemon.”
Kamsinya nje emva kwezi ziganeko, uYesu ubuyela kwidolophu yakowabo iNazarete, ngesi sihlandlo uphelekwa ngabafundi bakhe. Ngaphambilana kwisithuba esingangonyaka, wayendwendwele endlwini yesikhungu waza wafundisa khona. Nangona ekuqaleni abantu baye bamangaliswa ngamazwi akhe anomtsalane, kamva baye bakhutyekiswa yimfundiso yakhe baza balinga ukumbulala. Ngoku, ngenceba, uYesu wenza elinye ilinge lokunceda abamelwane bakhe bangaphambili.
Ngoxa kwezinye iindawo abantu babesiza beyinkungu nelanga kuYesu, apha babonakala bengenjalo. Ngoko, ngeSabatha, uya endlwini yesikhungu ukuya kufundisa. Inkoliso yabo bamphulaphuleyo ithe ng’a imilomo. Bayabuza: “Lo ubuzuze phi na obu bulumko, nale misebenzi yamandla? Lo asinguye na unyana wengcibi yokwakha? Unina akuthiwa na nguMariya? Nabazalwana bakhe asingooYakobi, noYose, noSimon, noYuda, yini na? Noodade bakhe abakuthi apha bonke na? Uzizuze phi na phofu lo zonke ezi zinto?”
Baqiqa ngale ndlela, ‘uYesu ungumntu nje oqhelekileyo njengathi. Ukhula phambi kwethu nentsapho yakowabo siyayazi. Ingenzeka njani into yokuba abe nguMesiya?’ Ngoko phezu kwabo nje bonke ubungqina obubonakalayo—ubulumko nemimangaliso yakhe emikhulu—bayamchasa. Kwanezalamane zakhe, ngenxa yokuba zimazi ukusuka nokuhlala, uyazikhubekisa, ngaloo ndlela zimbangela uYesu ukuba aqukumbele ngelithi: “Umprofeti akaswele mbeko, kungekhona kowabo, nakokwabo.”
Ngokwenene, uYesu umangalisiwe kukungakholwa kwabo. Ngoko akenzi nayiphi na imimangaliso apho ngaphandle kokubeka izandla phezu kwabantu abambaIwa abagulayo aze abaphilise. Mateyu 9:27-34; 13:54-58; Marko 6:1-6; Isaya 9:7.
◆ Ngokubiza uYesu ngokuthi “nyana kaDavide,” yintoni iimfama ezibonakalisa ukuba zikholelwa kuyo?
◆ AbaFarisi bagqiba kwelokuba bayicacise njani imimangaliso kaYesu?
◆ Kutheni kusisenzo senceba esokuba uYesu abuyele aye kunceda abo baseNazarete?
◆ UYesu wamkelwa njani eNazarete, yaye kutheni?
[Umfanekiso omkhulu okwiphepha 9]