Ukuhlala Ngokusondeleyo Kwintlangano KaYehova
Ngokubaliswa nguJohn Barr
KWAKUNGASEKUPHELENI kwethuba lokutyelela ekhaya malunga nonyaka ngaphambilana kuJuni ophelileyo, xa sahamba ngomoya sisuka eGlasgow sisiya eAberdeen. Njengoko inqwelo-moya esasiyikhwele yantinga isenjenjeya phezu kwamathafa aluhlaza aseSkotlani yaza yandandazela kuhle phezu kwaloo mlambo unamanzi aqukuqelayo iClyde, ndakhumbula emva ngomnyaka we1906 naloo dolophana yaseBishopton, ethe zinzi emazantsi apho kwicala elingasezantsi lalo mlambo.
Uyabona ke, kwakungaloo nyaka nakuloo ndawo awathi umakhulu wam, uEmily Jewell, waqalisa ukufunda incwadi kaCharles T. Russell ethi The Divine Plan of the Ages. Zisuka nje amehlo akhe ayibona inyaniso yokuba iBhayibhile ayifundisi imfundiso yesihogo somlilo. Kungekudala iintombi zakhe ezimbini esele zikhulile uBessie noEmily (owathi waba ngumama) nazo zaqalisa ukukubona ukukhanya kwenyaniso kubengezela phakathi kwinkungu emnyama yemfundiso yobuxoki eyayifundiswa yiCawa eyiUnited Free yaseSkotlani. Ngowe-1908 uMakhulu wabhaptizwa efuzisela uzahlulelo lwakhe lokwenza ukuthanda kukaThixo, yaye kungekudala emva koko iintombi zakhe nazo zabhaptizwa.
Ubawo wayeligosa elingumabhalane kwakule Cawa iUnited Free eBishopton. Wayesoloko ekufumanisa kunzima ukwamkela imfundiso kaBathathu Emnye, ngoko ngolunye usuku lwangeCawa umfundisi wale cawa wazinikela ukuba azokunikela intshumayelo ekhethekileyo ngenjongo yokuba kungenelwe yena. Wamcacisela kakuhle oku! Ephulaphule loo ngcaciso yathi yazanywa, ubawo ngoku weyiseka kukuba imfundiso kaBathathu Emnye yayibubuxoki. Wayeka ecaweni waza wabhaptizwa ngowe-1912 efuzisela ukuzahlulela kwakhe kuYebova. Kungekudala emva koko abazali bam bafudukela kumantla eAberdeen bekunye nabantwana babo ababini, uLouie noJames, ibe ke kulapbo mna ndazalelwa khona ngowe-1913.
Njengoko le nqwelo-moya yayiqalisa ukwehlela kwezo ntaba, naloo milambo nakwiintlambo endandizazi ndisakhula ndacinga ngaloo minyaka yangaphambili nangemigudu yabazali bam yokukhulisela thina bantwana babo bathathu “ekuqeqesheni nasekululekeni kweNkosi.” (Efese 6:4) Ngale ntsasa yayintle inelanga, hayi indlela endaziva ndinombulelo ngayo kuYebova ngolo qeqesbo lwalunikelwa ngabazali! Ndandisazi ukuba lwalufake isandla ekubeni ndibe ngosoloko ehleli engosondeleyo entlanganweni kaYehova.
Ukubaluleka Koqeqesho Lwasebuntwaneni Bam
Intsapbo yakowethu yayisoloko yonwabile yaye imanyene. Ukuba kwakusenzeka ukuba uBawo noMama bangavisisani ngento ethile, babengakwenzi phambi kwethu oko. Oko kwabangela ukuba singabahloneli nje kuphela abazali bethu kodwa kubekho umoya woxolo nowonqabiseko lokwenene kwikhaya lakowethu.
Ezinye zezinto ezimyoli endizikhumbulayo ngamaxesha axa intsapho yakowethu yayidla ngokuhlala kunye ngamarhatya. Sasilixhasa ngokwethu eli xesha lokuzonwabisa, sicula kunye nesixhobo somculo sethu yaye sidlala kunye imidlalo edlalwa ebhodini enjengeMonopoly. Kwakhona, kungakhathaliseki indlela uBawo awayexakeke ngayo, wayengaze asilele ukuchitha ixesha ekunye nathi phantse imihla ngemihla, efunda ngokuvakalayo iBhayibhile neempapasho zeWatch Tower, kuquka nolunye uncwadi oluneemfundiso nje ezilula nolunye oluneemfundiso ezinzulu ngakumbi. Zonke ezi zinto zayigcina intsapho yakowethu imanyene njengoko sasikhula.
Sasikuphela kwentsapho enolwazi ‘lwenyaniso’ kuloo mmandla osemantla weSkotlani kuloo minyaka yangaphambili. Ngenxa yoko, umzi wakowethu waba ngodumileyo kubameli abahambahambayo abaninzi be Watch Tower Society (abahambi ngezonqulo, njengoko babebizwa ngolo hlobo ngoko), izinto zooAlbert Lloyd, uHerbert Senior noFred Scott. Bambi babo babede bafike bevela kwikomkhulu loMbutho eBrooklyn, eNew York, kuquka uW. E. Van Amburgh noA. H. Macmillan. Amatyelelo aba bazalwana ayezezona zinto zikwinqanaba elibalulekileyo kwiminyaka yokukhula kwam.
Kude kube namhlanje ndiziva ndinombulelo ngenxa yomoya wokunyaniseka wokubuk’ iindwendwe owawubonakaliswa ngabazali bam. Oku kwabuphucula ubomi bentsapho yakowethu, yaye nakuba ndandiselula ndaqalisa ukulwenza banzi uxabiso lwam ngalo lonke umanyano lwabazalwana. Hayi indlela okuninzi ngayo okunokwenziwa ngabazali ekuhlakuleleni umanyano olufudumeleyo lothando phakathi kwabantwana babo nomanyano lwazwenibanzi lwabazalwana babo!
Ukuhlangabezana Nengxaki Yobuqu
Njengoko ndandingena kwiminyaka yokukhula yeshumi elivisayo, ndaba yinkwenkwe eneentloni ngakumbi neyebeyebezayo. Okukhona ndandikhula, kwaba kokukhona ndikufumanisa kunzima ukudibana nabantu ndize ndincokole nabo. Oku kuba neentloni kwezisa owona mqobo mkhulu ngeendlela ezininzi kodwa ingakumbi xa kwakufuneka ndingqinele ukholo lwam ngokuthi ndishumayele iindaba ezilungileyo zoBukumkani.
Emva nje kweMfazwe Yehlabathi I, umakhulu nomama baba ngamaNgqina okuqala eAberdeen ukuba nesabelo kubulungiseleli bendlu ngendlu. Thina bantwana sasiba nesabelo ekusasazeni amaphecana, kodwa ngoku kum ukuthetha nabantu kumakhaya abo—ewe, kwaba yinto ebangela umahluko! Yayilucelomngeni lokwenene. Kodwa ekugqibeleni ndahlangabezana nalo. Andisayi kuze ndiyilibale loo mva kwemini yangeCawa ngoNovemba 1927 xa ndaxelela ubawo ukuba ndandiza kumpheleka ukuya kubulungiseleli bendlu ngendlu. Ndandizibula ukubona iinyembezi ezidleleni zikabawo—kodwa zona zazibangeIwa luvuyo!
Intlekele Eyehlela Intsapho Yandichaphazela
Umoya wokuzola no woxolo kubomi bentsapho yakowethu waphela ngorhatya lukaJuni 25, 1929, xa ndandine-16 leminyaka. Ngemva kosuku ababeluchithele kubulungiseleli, umama nodade wethu babesukela ekhaya ukuya kulungiselela uBawo isidlo sangokuhlwa. Ngequbuliso, isithuthuthu esasihamba ngesantya esiphezulu sagila uMama, simtsala esitratweni iimitha ezimalunga nama-37. Iindawo awayenzakele kuzo entloko zazimbi kakhulu kangangokuba kwakungalindelwanga ukuba wayenokuphila. Kodwa ngenxa yenyameko enothando eyaboniswa ngudade wethu uLouie kangangeenyanga ezininzi, wathi wasinda. Ekuhambeni kwexesha, umama wakwazi ukuphila ubomi obuqhelekileyo ngentelekiso de wabe uyafa ngowe-1952.
Loo ngozi yasebenzela okulungileyo kum—yandinceda ukuba ndikwazi ukubuqwalasela nzulu ubomi bam noko ndandikwenza ngabo. Ngelo xesha lasehlotyeni ndaqalisa ukufundisisa iBhayibhile ngokunzulu ngakumbi kunangaphambili—ndaphila ngenyaniso. Eli laba lixesha lenguqulelo enkulu kum, yaye ndahlulela ubomi bam kwinkonzo kaYehova. Noko ke, ukufuzisela oko kuzahlulela kwam ngokubhaptizwa emanzini ndakwenza kamva emva kweminyaka ethile.
Ukungenela Inkonzo Yexesha Elizeleyo
Xa ndayeka isikolo ngowe-1932, ndangenela izifundo ezingoqeqesho lobunjineli kwicandelo loomatshini nelombane. Ngaloo mihla eBritani, lwalungekho ukhuthazo olukhoyo namhlanje lokuba abaselula bangenele umsebenzi wokushumayela wexesha elizeleyo njengoovulindlela. Kanti, njengoko iminyaka yayiqengqeleka, ndayazi indawo endandimele ndichithele kuyo amandla am—ubulungiseleli bexesha elizeleyo.
Ndiyikhumbula ngokucacileyo yonke into esasiyifundisisa ekuqalekeni kowe-1938 eyathi yabalaselisa kum iingenelo zokuhlala ungosondeleyo kwintlangano kaYehova nokuyisebenzisa ngokobuqu imiyalelo yayo. Yayiziinkupho zephephancwadi IMboniselo ezazithetha ngoYona nezacacisa ngezinto awatyhubela kuzo ngokubaleka kwakhe isabelo sakhe senkonzo. Ndasithabathela ngamandla entliziyweni yam esi sifundo, ndisenza isigqibo sokuba ndingaze ndisigatye isabelo esiza kum ngentlangano kaYehova. Kwakukuncinane ngoko endandikwazi ngobungakanani bezabelo zolawulo lobuthixo ezazingaphambili nezaziza kuvavanya uzimiselo lwam.
Ndathandazela ukhokelo, yaye impendulo yeza ngeleta eyothusayo eyayivela kwikomkhulu loMbutho eLondon, indicela ukuba ndiqwalasele umcimbi wokuba lilungu lentsapho yaseBheteli. Ngolangazelelo ndalixhakamfula eli thuba lokungena kulo mnyango mkhulu ukhokelela kumalungelo amakhulu enkonzo. Ngaloo ndlela, ngoAprili 1939 ndazifumanisa ndisebenza kunye noHarold King, owathi kamva wasebenza njengomvangeli wasemazweni eTshayina yaye, ngenxa yomsebenzi wakhe wokushumayela, wachitha iminyaka kwintolongo yamakomanisi. Sasisebenza kunye sihlanganisa oomatshini bokukhuphela kwaneegramafoni ezazisetyenziselwa ukudlala iintshumayelo ezirekhodiweyo kumakhaya abantu.
Mna noHarold sasithelekelela zonke iintlobo zabantu ababeya kuthi ekugqibeleni baphulaphule isigidimi soBukumkani bencedwa sisixhobo esasisenza. Ngale ndlela asizange siphulukane nombono wesiphelo somsebenzi wethu. Ukususela ngoko, kuzo zonke izabelo ezahlukahlukeneyo endizifumene eBheteli, ndiye ndazabalazela ukugcina le mbono. Oku kuye kwawenza umsebenzi wam wangovuyisa ngokwenene nosoloko ungobalulekileyo xa uthelekiswa nomsebenzi wokushumayela uBukumkani.
Amalungelo Enkonzo
Kungekudala emva kokuba ndifikile kwiBheteli yaseLondon, ndamiselwa njengesicaka sebandla (ngoku esibizwa ngokuba ngumveleli owongamelayo) elinabavakalisi abangaphezu kwama-200. Ngaphambilana, ndandingumveleli webandla elalinabavakalisi abalishumi kuphela! Ndandula ke ndamiswa njengowongamelayo kwiSebe Lesandisi-lizwi kwindibano emangalisayo eyaqhutywa zwenibanzi eLeicester ngowe-1941. De kube ngelo xesha, ndandinolwazi olulinganiselweyo ngesandisi-lizwi.
Emva koko ndabelwa kumsebenzi wokuhambahamba njengesicaka esikhonza abazalwana, ngoku esibizwa ngokuba ngumveleli wesiphaluka. Izicaka ezinjalo zazizithandathu kuphela ngoko eBritani xa kwathi kwaqaliswa loo msebenzi ngoJanuwari 1943. Isabelo sam yayisesenyanga kuphela, kodwa sagqibela ngokuba ndityelele amabandla kangangeminyaka engaphezu kwemithathu. Ebudeni baloo minyaka yobunzima yeMfazwe Yehlabathi II, ndaba ngovelelayo kwiindibano ezintathu ezinkulu—nto leyo endandingazange ndayenza ngaphambili.
Umsebenzi wokuhambahamba ngezo mini wawahluke kakhulu koko ukuko namhlanje. Sasisoloko singoonothwal’ impahlana, yaye ukuhambela lonke elaseBritani ebudeni baloo minyaka yemfazwe maxa wambi kwakunzima kakhulu. Izihlandlo eziliqela, kwakufuneka ndisebenzise ibhayisekile kwinxalenye yohambo oluphakathi kwamabandla. Endaweni yokutyelela ibandla elinye ngeveki, njengoko besenjenjalo abaveleli abahambahambayo namhlanje, ukuba amabandla ayemancinane, sasityelela amabandla amathandathu ngeveki nje enye!
Nangu umzekelo wocwangciso lwezinto zosuku: Ndandivuka ngecala emva kwentsimbi yesihlanu ekuseni; emva kwesidlo sakusasa, ndandityelela ibandla elilandelayo khon’ ukuze ndikwazi ukuqalisa ukuhlola iingxelo zebandla ngeyesibhozo. Imva kwemini yayidla ngokusetyenziselwa ubulungiseleli basentsimini, kuze ngengokuhlwa kube yintlanganiso yeyure enye yezicaka zebandla kuze kulandele intetho kwibandla. Kwakuba ngenkankulu ukuba ndibe sendilele ngeye-11, okanye kwanasemva kwelo xesha ukuba kwakufuneka ndibhale ingxelo yosuku yelo bandla ngaloo ngokuhlwa inye. UMvulo ngamnye wawubekelwa bucala ukuze kugqityezelwe iingxelo zeveki, kwenziwe ufundisiso lobuqu, uze usetyenziselwe nantoni na ekwakufuneka ilungiselelwe umsebenzi weveki elandelayo.
Ngaba uthi, ‘yayilucwangciso oluxakekileyo lweveki?’ Ewe, yayilulo, kodwa, hayi indlela ekwakusanelisa ngayo ukuvakalelwa kukuba sasisomeleza abazalwana ebudeni baloo minyaka yemfazwe xa lwalungekho unxulumano olufanayo olusondeleyo nentlangano! Ngokoqobo, saba nolwaneliseko nemvakalelo kukuvakalelwa kukuba sasinceda amabandla ukuba ‘azimaseke ngamandla elukholweni.’—IZenzo 16:5.
Ukubuyela Kwinkonzo YaseBheteli
Ndacelwa ukuba ndibuyele kwinkonzo yaseBetheli ngoAprili 1946. Ndakuvuyela ukwenjenjalo, kodwa ndavakalelwa kukuba ubomi bam babondliwe ngokukhethekileyo ngokomoya ngenxa yaloo minyaka mithathu inesiqingatha kumsebenzi wokuhambahamba. Intlangano yaba yebalulekileyo ngakumbi kum ngoku, yaye ndavakalelwa kukuba ndandisenza oko kuchazwe kwiNdumiso 48:12, 13: “Yijikelezeni iZiyon, niyizungeleze; zibaleni iinqaba zayo ezinde . . . Candani ezingxandeni zayo ezinde.” Ukuhambahamba phakathi kwabantu bakaThixo kwaye kwabangela uthando lwam ukuba lwande “ngalo lonke umanyano lobuzalwana.”—1 Petros 2:17, NW.
Emva kokubuyela kwam eBheteli, ndaba nelungelo lokunyamekela umsebenzi omkhulu wokushicilela owawusenziwa kwindawo yethu yokushicilela eLondon yaye kamva ndabandakanyeka kumsebenzi wokwenziwa kweepleyiti zokushicilela. Kuthe ke, ngoSeptemba 1977 ndanikwa ilungelo elikhulu lokuba ndibe lilungu leQumrhu Elilawulayo lamaNgqina kaYehova, eliseBrooklyn, eNew York, eUnited States.
Ndimele ndivume ukuba maxa wambi ndaye ndaziva ndifuna ‘ukuzibaleka’ ezinye zezabelo ezinzima ngakumbi endandizinikwa. Kodwa ke ndandidla ngokukhumbula uYona nempazamo awayenzayo, yaye ndandiye ndiliphindaphinde ngaphakathi kum eli dinga lingummangaliso lifumaneka kwiNdumiso 55:22: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.” Hayi indlela endiwafumanise eyinyaniso ngayo loo mazwi!
UYehova akaze nakanye acele nabani na kuthi ukuba enze into aziyo ukuba asinakuyenza. Noko ke, kuphela kungamandla akhe esithi sikwazi ukwenza oko afuna sikwenze. Ibe nantsi enye into—ukuba ubathanda ngokwenyaniso abazalwana bakho osebenza nabo, baya kukuxhasa baze bakomeleze, besebenzisana nawe “ngaxhatha linye” ukuze bakuncede uphumeze umthwalo womsebenzi owabelweyo.—Zefaniya 3:9.
Ulwalamano Oluxabisekileyo
Kakade ke, kusoloko kukho abazalwana abathile abangamaKristu abangabona basenyongweni kuwe. Omnye owayenjalo yayinguAlfred Pryce Hughes, owafa ngowe-1978. Imbali yobomi bakhe ivela kwinkupho yeMboniselo (yesiNgesi) ka-Aprili 1, 1963. Kangangeminyaka emininzi wayekhonza njengesicaka sesebe, yaye kamva njengelungu leKomiti Yesebe. Wayethandwa kakhulu ngabazalwana kwintsimi yaseBritani ngenxa yokuyihlonela kwakhe kakhulu intlangano kaYehova nokunyaniseka kwakhe kuyo nangothando awayenalo ngabo bonke abazalwana. Enye into esinokuyibalula kukuthanda kwakhe ubulungiseleli basentsimini. Ezi mpawu azizange ziphele kubo bonke ubomi bakhe, kungakhathaliseki nokuba yayiyeyiphi na imbopheleleko awayemele ayithwale. Ukusebenza kunye nabazalwana abathembekileyo abanjengoPryce kube yinto enkulu kakhulu kum, kusomeleza uzimiselo Iwam lokuhlala ngokusondeleyo kwintlangano kaYehova ndize ndihlale ndikhuthele kubulungiseleli.
Ngo-Oktobha 29, 1960, ndaba nolwalamano olukhethekileyo noluxabisekileyo kunye nowayenguvulindlela onenzondelelo ixesha elide nowayengumvangeli wasemazweni kwiklasi ye-11 yaseGiliyadi, ngelo xesha wayekhonza eIreland. Ngaloo mhla ndatshata noMildred Willett, yaye ukususela ngoko ebengumxhasi wam othembekileyo kwinkonzo yaseBheteli.
Ngaphambi kokufa kukamama kaMildred ngowe-1965, le ntombi yakhe wayicebisa ukuba ingaze “imqumbele uYehova.” UMildred ebesoloko ewakhumbula amazwi kanina, yaye oku kuye kwamnceda ukuba angabi ngumntu onganelisekiyo xa ngokufuthi bekufuneka ndisebenze ixesha elongezelelekileyo. Oku kuye kwandinceda kakhulu ukuba ndizinyamekele ndonwabile naziphi na izabelo ezongezelelekileyo zomsebenzi endizifumanayo. Sobabini siye sakunandipha ngokukhethekileyo ukubaliselana ngamava amaninzi ayingenelo esiwafumana kubulungiseleli.
Ngokomzekelo, esinye isibini esiselula esasifundisisa naso iBhayibhile, senza inkqubela ekhawulezileyo ukusa kwinqanaba lokuba sizahlulele size sibhaptizwe saza saba nesabelo rhoqo kubulungiseleli. Sasonwabe gqitha! Ngoko, ngequbuliso, ngesizathu esingavakaliyo, sayeka ukunxulumana nebandla. Mna noMildred sadana, yaye sasisoloko sicinga ngento ephosakeleyo esasinokuba sasiyenzile ekusiqeqesheni. Sathandaza singayeki kuYehova simcela ukuba azivule iintliziyo zaso ukuze silungqine uthando lwaso ngenyaniso. Ngaba unokuluthelekelela ulonwabo esaba nalo xa sathi safumana incwadi evela kwesi sibini kwiminyaka elishumi kamva isixelela ukuba kwakhona sasizizinxulumani ezikhutheleyo zebandla nokuba ikhaya laso lalisisazulu ekuqhutyelwa kuso iSifundo Sencwadi?
UWill indoda yabhala oku: “Ndinqwenela ukunibulela ngalo lonke uncedo nenyameko enothando enayibonakalisayo kuthi . . . Ukuwa kwam kwakuyimpazamo yam, uxabiso lwentliziyo yam Iwalungachananga . . . Siye safumana uvuyo olukhulu ngenxa yokuba sibuyele kwintlangano kaYehova . . . Ndinibhalela ndikwiinkumbulo zothando ngale ngokuhlwa, ngamana uYehova angaqhubeka enisikelela ngenkonzo eniyinikelayo kuye.”
Kwenye incwadi, omnye unozala wabhala oku ngokuphathelele inkwenkwe yakhe uMike: “Ndivuya kakhulu kuba izithunywa zamazulu zimbeke ecaleni kwenu.” Wayethetha ukuthini? Kaloku, uMike wayeze nonina nomninawa wakhe kwindibano kodwa wayengenamdla ngokwenene kwinyaniso. UMildred wamphawula lo mfana wayehleli yedwa waza wancokola naye. Sandula ke sammema nomninawa wakhe ukuba beze kwiBheteli yaseLondon baze babone umsebenzi esasiwenza.
Kamva, uMike weza, yaye oko wakubonayo kwaphembelela umdla wakhe kangangokuba waqhubeka efundisisa iBhayibhile. Waba yintoni ke umphumo? Ngoku ungumdala ebandleni, yaye umfazi wakhe namakhwenkwe akhe amabini bonke bakhuthele kubulungiseleli. Kwixa elidluleyo umfazi kaMike wabhala oku: “Ngokufuthi [uMike] ukhankanya ixesha awadibana ngalo nani . . . Hayi indlela awachukumiseka ngayo bububele benu nangendlela enawubonakalisa ngayo umdla kuye.”
Xa mna nomfazi wam sifumana amazwi abonakalisa uxabiso kumntu onjengoWill okanye uMike esiye sanelungelo lokumnceda, iintliziyo zethu zisuka nje ziphuphume yimibulelo eya kuYehova! Ezinjani zona ukuba ngumvuzo oxabiseke kakhulu “iincwadi zokuzazisa” eziphilileyo—zonke ziyinxalenye yovuyo olufunyanwa ngenxa yokuhlala ngokusondeleyo kwintlangano kaYehova.—2 Korinte 3:1-3, TE.
Ukukhonza Kwikomkhulu Lehlabathi
“Iluhlanga ngokwalo.” Le yindlela umhleli wephephandaba laseBrooklyn Heights awayichaza ngayo intsapho enkulu yamaNgqina angaphezu kwama-3 500 ahlala kwikomkhulu Lehlabathi lamaNgqina kaYehova eBrooklyn eNew York, nakwiiFama zeWatchtower, ezikumgama omalunga ne-160 leekhilomitha kude kumantla eNew York. Ngokwenyaniso, abathanjiswa bakaYehova baluhlanga lokomoya emehlweni kaYehova! Namhlanje, umMbo nomXesibe ophuma kwiintlanga ezininzi zehlabathi uza ngaphambili uze uthi kwaba bantu bolu hlanga: “Siya kuhamba nani, ngokuba sivile ukuba uThixo unani.”—Zekariya 8:23; 1 Petros 2:9.
Ngoko, unokuyiqonda na indlela ekwachwayitisa ngayo kum nakumfazi wam ukuba sibe ngamalungu ahleli ngokusisigxina nale ntsapho inkulu yaseBheteli? Andithandabuzi ukuthi iminyaka esibhozo yokugqibela yobomi bam ibe yeyona ibalasele ngakumbi kuwo onke amava am omsebenzi wolawulo lobuthixo. Apha uva indlela esebenza ngayo intlangano ebonakalayo kaYehova; apha ukudla kokomoya kuyalungiselelwa kuze kuthunyelwe kwiimbombo ezine zomhlaba; apha ubona umoya kaYehova usebenza ukhokela uze walathise kwizigqibo ezikhulu ezimele zenziwe; yaye apha kunayo nayiphi na enye indawo ubona ubungqina obandayo bentsikelelo kaYehova kumsebenzi wokushumayela uBukumkani nowokwenziwa kwabafundi. Onke la mava akutshanje nezinto ezichukumisayo ziye zandinika ifuthe elingakumbi lokusoloko ndihleli ngokusondeleyo nabantu bakaYehova.
Ndiye ndabetha nje koomofu ndibalisa izinto endiye ndahlangabezana nazo ebomini bam. Noko ke, zinokukunceda uqonde isizathu sokuba, ndaziva ndinombulelo kuYehova kuba ndandiseyinxalenye yomanyano olunothando lwazwenibanzi lwabazalwana njengoko ekugqibeleni inqwelo-moya endandiyikhwele yachopha kwiSikhululo seenqwelo-moya eAberdeen ngaloo ntsasa yayinelanga kaJuni. Kolo hambo lomoya ndandicinga ndibuyela emva kwiminyaka edlulileyo ndisenyanisweni, ibe oku kwakhona kwandikhumbuza indlela ekuyingenelo ngayo kuthi ukuthi maxa wambi sibalise ngeentsikelelo ezininzi esizifumene kuYehova.—INdumiso 40:5.
Udade wethu uLouie wayekho apho eze kundibamba isandla—esathembekile, esenenzondelelo, yaye esanyanisekile emva kweminyaka engaphezu kwama-60 yenkonzo yokuzahlulela kuYehova. Ndiyambulela uYehova ngaloo ntsikelelo yongezelelekileyo, kuba akazange atsho na umpostile uPawulos ukuba kukuthembeka uYehova akufunayo kuwo onke “amagosa” akhe? (1 Korinte 4:2) Olunjani lona ukhuthazo olukhulu olunokunikelwa lilungu elinye lentsapho, ngokuhlala lithembekile!
UMoses wakhe wathandaza wathi: “Sazise kanye ukuyibala imihla yethu, ukuze sizuze intliziyo elumkileyo.” (INdumiso 90:12) Njengoko mna noMildred siya sisaluphala, siyayiqonda imfuneko yokusoloko sayame ngobulumko bukaYehova ukuze sikwazi ukusebenzisa ubomi bethu ngendlela ebonakalisa uthando lwethu kuye nakubazalwana bethu. Ngothando uYehova usibonisa loo ndlela ukuba sihlala ngokusondeleyo kwintlangano yakhe.
[Umfanekiso okwiphepha 28]
UJohn Barr (omi ngaphambili ngasekhohlo) malunga nomnyaka we-1930, ekunye nodade wabo, umntakwabo, nabazali bakhe
[Umfanekiso okwiphepha 31]
UJohn Barr namhlanje, ekunye nomfazi wakhe uMildred