Ubomi Nobulungiseleli BukaYesu
Olunye Uhambo Lokuya Kushumayela EGalili
MALUNGA nasemva kweminyaka emibini yokushumayela kakhulu, ngaba uYesu ngoku uza kuyekelela umxakatho aze abethe kuhle kulo msebenzi? Ngokwahlukileyo koko, uyawandisa umsebenzi wakhe wokushumayela ngokuthabatha olunye uhambo, olwesithathu ukuya eGalili. Utyelela zonke izixeko needolophana kuloo mmandla, efundisa ezindlwini zesikhungu yaye eshumayela iindaba ezilungileyo zoBukumkani. Oko akubonayo kolu hambo lwakhe kumenza eyiseke ngaphezu kunanini na ngaphambili ukuba kukho imfuneko yokuwandisa umsebenzi wokushumayela.
Naphi na apho uYesu aya khona, uzibona izihlwele zifuna ukuphiliswa nokuthuthuzelwa ngokomoya. Zifana nezimvu ezingenamalusi, ezityhafileyo nezichithakeleyo, yaye usikwa yimfesane akuzibona. Ubaxelela oku abafundi bakhe: “Ukuvuna okunene kuninzi, kodwa bona abasebenzi bambalwa. Khungani ngoko eNkosini yokuvuna, ikhuphe abasebenzi, baye ekuvuneni kwayo.”
UYesu uyicwangcisile indlela aza kusebenza ngayo. Ubiza abapostile bakhe abali-12, awabanyula phantse ithuba elingangonyaka ngaphambili. Ubahlula ngababini, ebenza babe ngamaqela amathandathu abashumayeli, aze abanike imiyalelo, esithi: “Ze ningasingi endleleni yeentlanga, ningangeni nasemzini wamaSamariya; yiyani ke kanye kwizimvu ezilahlekileyo zendlu kaSirayeli. Ekuhambeni kwenu ke vakalisani, nisithi, Ubukumkani bamazulu busondele.”
Obu Bukumkani baza kushumayela ngabo bobo uYesu wabafundisa ukuba babuthandazele kumthandazo awabanika wona njengomzekelo. UBukumkani babusondele ngengqiqo yokuba uKumkani omiselwe nguThixo, uYesu Kristu, wayekho. Ukuze enze isiqinisekiso sokuba abafundi bakhe bamela loo rhulumente ungaphezu kowabantu, uYesu ubanika amandla okuphilisa abagulayo kwanokuvusa abafileyo. Ubayalela ukuba bayenze ngesisa le misebenzi.
Emva koko uxelela abafundi bakhe ukuba bangenzi malungiselelo azinto ziphathekayo ngenxa yohambo lwabo lokuya kushumayela. “Ningaziqwebeli golide nasilivere nalubhedu emibhinqweni yenu; nangxowa yandlela, nangubo zangaphantsi ngambini, nambadada, namsimelelo; kuba umsébenzi ufanelwe kukudla kwakhe.” Abo basixabisayo isigidimi baya kusabela baze banikele ngokutya nangendawo yokuhlala. Kunjengokuba uYesu esithi: “Emzini ke enithe nangena kuwo, nokuba kusemzaneni, ize nibuzise ukuba ngubani na kuwo ofanelekileyo; nihlale ke khona apho nide nimke.”
Ngoko uYesu ubayalela indlela yokuqalisa incoko nabaninikhaya ngesigidimi soBukumkani. Uyalela esithi, “Ekungeneni kwenu ke endlwini, ize niyibulise. Ukuba ke ifanelekile indlu leyo, malube phezu kwayo uxolo lwenu; ukuba ayifanelekile, uxolo lwenu malubuyele kwakuni. Nothe akawamkela, akaweva amazwi enu, nakuphuma kuloo ndlu nakuloo mzi, vuthululani uthuli lweenyawo zenu.”
Ethetha ngesixeko esigatya isigidimi sabo, uYesu uthi: “Koba nokunyamezeleka okomhlaba waseSodom nowaseGomora ngomhla womgwebo, kunokwaloo mzi.” Oku kubonisa ukuba ubuncinane bambi babantu abangengomalungisa ababeya kuthi abafundi bakhe babashumayeze baya kuba bekho ebudeni beMini yoMgwebo. Phofu ke, xa aba bemi baloo mzi bevuswa ebudeni beMini yoMgwebo, kuya kuba nzima ngokude kwangakumbi ngabo ukuzithoba baze bamkele uKristu njengoKumkani kunokuba kuya kuba njalo kubantu abavusiweyo bezixeko zamandulo zaseSodom naseGomora ezazinabantu abaziphethe kakubi. Mateyu 9:35-10:15; Marko 6:6-12; Luka 9:1-5.
◆ UYesu uluqalisa nini uhambo lwesithathu lokuya kushumayela eGalili, yaye lumeyisela enini?
◆ Xa ethuma abapostile bakhe abali-12 ukuya kushumayela ubanika yiphi imiyalelo?
◆ Kutheni kwakufanelekile nje ngabafundi ukufundisa ukuba uBukumkani babusondele?
◆ Kuya kwenzeka njani ukuba kunyamezeleke okweSodom neGomora kunabo baye ababamkela abafundi bakaYesu?