Imithandazo Kufuneka Ibe Nemisebenzi
“UYehova ukude nabangendawo; ke wona umthandazo wamalungisa uyawuva.”—IMIZEKELISO 15:29.
1. Yiyiphi imeko ekumele kuhlangatyezwane nayo ukuba uThixo uza kuphendula imithandazo yethu?
YONKE imiyalelo kaYehova yeyobulumko, isesikweni yaye yeyothando. Ayiloxanduva nangayiphi na indlela. (1 Yohane 5:3) Oko kuquka imiyalelo yakhe mayela nomthandazo, omnye wayo ukukuba simele siphile ubomi obuvisisana nemithandazo yethu. Ikhondo lethu lesenzo limele limkholise uYehova uThixo. Ngapha koko, sinokumlindela njani ukuba aziqwalasele ngenkoliseko izicelo nezikhungo zethu?
2, 3. Kutheni uYehova engazange ayiphendule nje imithandazo yamaSirayeli, njengokuba kubonwa kumazwi kalsaya, kaYeremiya nakaMika?
2 Le yinkalo yomthandazo esingelwa phantsi yinkoliso yabo bakwiNgqobhoko, kwanjengokuba yasingelwa phantsi ngamaSirayeli angabawexuki ngomhla kaIsaya. Kwakungenxa yoko le nto uYehova wabangela umprofeti wakhe ukuba ammele njengothi: “Nokuba nandise ukuthandaza, andiyi kuva; . . . zihlambeni, ziqaqambiseni; susani ububi beentlondi zenu phambi kwamehlo am; yekani ukwenza ububi; fundani ukwenza okulungileyo.” (Isaya 1:15-17) Ewe, ukuba loo maSirayeli ayefuna inkoliseko kaThixo, kwakufuneka enze izinto ngendlela eyayimkholisa. Kunjengokuba kuye kwatshiwo ngokufanelekileyo ukuthi: “Ukuba ungathanda ukuba uThixo akuve xa uthandaza, umele umve xa ethetha.”
3 Enyanisweni, uYehova uThixo ngokuphindaphindiweyo wakufumanisa kuyimfuneko ukukhumbuza abantu bakhe amaSirayeli ngezi nyaniso. Ngaloo ndlela sifunda oku: “Osusa indlebe yakhe ekusiphulaphuleni isiyalo, kwanomthandazo wakhe ulisikizi” kuThixo. “UYehova ukude nabangendawo; ke wona umthandazo wamalungisa uyawuva.” (IMizekeliso 28:9; 15:29) Ngenxa yale meko, uYeremiya wadanduluka wathi: “Uzigqubuthele ngelifu [uYehova], ukuze ungaphumeli umthandazo wethu.” (IZililo 3:44) Kuyinyaniso ukuba, isilumkiso uMika awaphefumlelwa ukuba asinikele sazaliseka: “Baya kwandula bakhale kuYehova, angaphenduli; wosuka abusithelise ubuso kubo ngelo xesha, njengoko bezenze zambi iintlondi zabo.”—Mika 3:4; IMizekeliso 1:28-32.
4. Yintoni ebonisa ukuba kwanaphakathi kwabantu bakaYehova abanye abayiqondi imfuneko yokuba imisebenzi imele ivisisane nemithandazo yabo?
4 Ngoko kufuneka siphile ngokuvisisana nemithandazo yethu. Ngaba kuyimfuneko ukusibethelela esi sibakala namhlanje? Ngokwenene kuyimfuneko, kungengenxa yemeko ekwiNgqobhoko kuphela kodwa kwanangenxa yemeko yabantu abathile abazahluleleyo bakaYehova. Kubavakalisi beendaba ezilungileyo abangaphezu kwezi-3 000 000 kunyaka odlulileyo, abangaphezulu kuhle kwama-37 000 basuswa kubudlelane ngenxa yehambo engamfanelanga umKristu. Oko kungumlinganiselo omalunga nomntu omnye kwabangama-80. Kunokwenzeka ngokupheleleyo ukuba inkoliso yaba bantu yayithandaza manqaphanqapha. Kodwa ngaba izinto babezenza ngokuvisisana nemithandazo yabo? Akunjalo konke konke! Kwanabadala abathile abebekwinkonzo yexesha elizeleyo kangangamashumi eminyaka baba phakathi kwabo baqeqeshwayo ngandlel’ ithile. Enjani yona ukuba buhlungu into! Enyanisweni, “Lowo uba umi, makalumke angawi,” alumkele ukuba izinto angazenzi ngendlela eyenza ukuba imithandazo yakhe ibe yengamkelekanga kuMenzi wakhe.—1 Korinte 10:12.
Isizathu Sokuba Imithandazo Kufuneka Ibe Nemisebenzi
5. Ukuze uYehova ayiphendule imithandazo yethu, simele sikungqine njani ukunyaniseka kwethu?
5 Ukuze imithandazo yethu iviwe nguYehova uThixo, asimele sicoceke ngokokuziphatha nangokomoya nje kuphela kodwa sikwamele singqine ukunyaniseka kwemithandazo yethu ngokusebenzela koko sikuthandazelayo. Umthandazo uwodwa awuthabathel’ indawo ukunyaniseka nomgudu wokusebenzisa ingqondo. UYehova akayi kusenzela oko sinokuzenzela ngokwethu ngokuthi ngokunyanisekileyo sisebenzise isiluleko seLizwi lakhe size silandele ukhokelo lomoya wakhe oyingcwele. Sifanele sikulungele ukwenza konke esinokukwenza kule nkalo ukuze abe nesizinzi sokuphendula imithandazo yethu. Ngaloo ndlela, ‘asifanele sicele okungaphezu koko sikulungeleyo ukukusebenzela,’ njengokuba umntu othile eye wakuchaza njalo oko.
6. Kungenxa yaziphi izizathu ezibini le nto simele sithandaze?
6 Noko ke, kunokubuzwa lo mbuzo: ‘Sisathandazelani ke ukuba kusafuneka sisebenzele koko sikuthandazelayo?’ Sifanele sithandaze ubuncinane ngenxa yezizathu ezibini ezilungileyo. Esokuqala, ngemithandazo yethu siyavuma ukuba zonke izinto ezilungileyo zivela kuThixo. UnguMphi waso sonke isipho esilungileyo nesigqibeleleyo—ukukhanya kwelanga, imvula, amaxesha anendyebo nokunye okuninzi ngakumbi! (Mateyu 5:45; IZenzo 14:16, 17; Yakobi 1:17) Esesibini, enoba imigudu yethu iyaphumelela okanye ayiphumeleli oko kuxhomekeke kwintsikelelo kaYehova. Kunjengokuba kwiNdumiso 127:1 sifunda oku: “Ukuba akayakhi uYehova indlu, bafumana besaphuka yiyo abakhi bayo. Ukuba umzi akawugcini uYehova, ufumana ephaphama owugcinayo.” Okubethelela ingongoma efanayo ngala mazwi ompostile uPawulos akweyoku-1 yabaseKorinte 3:6, 7 athi: “Mna ndatyala, uApolo wankcenkcesha, ke nguThixo owahlumisayo. Ngoko ke lowo utyalayo akalutho, nalowo unkcenkceshayo akalutho; oyinto nguThixo lo uhlumisayo.”
Imizekelo Ethile Yamandulo
7, 8. (a) Sisiphi isiganeko kubomi bukaYakobi esibonisa ukuba wayeqonda ukuba imisebenzi imele ipheleke imithandazo? (b) Nguwuphi umzekelo uKumkani uDavide awawunikelayo kule nkalo?
7 IZibhalo zinikela ingxelo engeziganeko ezininzi ezibonisa ukuba abakhonzi abathembekileyo bakaYehova basebenzela koko babekuthandazela. Makhe siqwalasele imizekelo embalwa emela oku. Ngenxa yokuba umzukuIwana ka-Abraham uYakobi wafumana intsikelelo yobuzibulo, umkhuluwa wakhe uEsawu wamthiya kangangokuba wafuna ukumbulala. (Genesis 27:41) Kwiminyaka enokuba ngama-20 kamva, xa uYakobi wayebuya ePadan-aram esiya kwilizwe lakhe lokuzalwa enentsapho enkulu nempahla emfutshane eninzi, weva ukuba uEsawu wayemhlangabeza. Ekhumbula intiyo kaEsawu, uYakobi wathandaza ngenzondelelo kuYehova ukuba amkhusele kwingqumbo yomntakwabo. Kodwa ngaba waphelela koko? Akazange enjenjalo. Wathumela izipho zobubele phambi kwakhe, eqiqa ngale ndlela: “Mandibucamagushe ubuso bakhe ngomnikelo ohamba phambi kwam.” Ibe kwaba njalo, kuba xa bathi bobabini bahlangana, uEsawu wamwola uYakobi waza wamanga.—Genesis, isahluko 32, 33.
8 UDavide wanikela omnye umzekelo wokuba sikusebenzele oko sikuthandazelayo. Xa unyana wakhe uAbhisalom wathabathela kuye itrone, umcebisi kaDavide uAhitofele wazimanyanisa noAbhisalom. Ngoko uDavide wenza isikhungo esinyanisekileyo sokuba icebo likaAhitofele libe nokutshitshiswa. Ngaba uDavide wathandazela nje ukuba oko kuphumelele? Akunjalo, wayalela umcebisi wakhe onyanisekileyo uHushayi ukuba athelele uAbhisalom ukuze abe nokutshitshisa icebo lika-Ahitofele. Ibe izinto zenzeka ngaloo ndlela. UAbhisalom wazenza izinto esebenzisa icebo elibi awalinikwa nguHushayi, elikhaba ngawo omane icebo lika-Ahitofele.—2 Samuweli 15:31-37; 17:1-14; 18:6-8.
9. UNehemiya wabonisa njani ukuba wayewuqonda umgaqo wokuba imithandazo kufuneka ibe nemisebenzi?
9 Kanti omnye umzekelo onokucatshulwa ukuze silumke ngulowo kaNehemiya. Wayenomsebenzi omkhulu awayemele awuphumeze—ukuphinda kwakhiwe iindonga zaseYerusalem. Phofu ke, iintshaba ezininzi zazimenzela iyelenqe. UNehemiya wathandaza waza wakusebenzela oko, kwananjengokuba sifunda oku: “Sathandaza kuThixo wethu, samisa abokulinda imini nobusuku ngenxa yabo.” Ukususela ngoko kuse phambili, isiqingatha samadoda aselula kaNehemiya sema silungele ukukhusela esinye isiqingatha, abo babesakha udonga.—Nehemiya 4:9, 16.
Umzekelo KaYesu
10, 11. Yiyiphi imizekelo eyamiselwa nguYesu ebonisa ukuba izinto wayezenza ngokuvisisana nemithandazo yakhe?
10 UYesu Kristu wasimisela umzekelo omhle wokukusebenzela oko sikuthandazelayo. Wasifundisa ukuba sithandaze sithi: “Malingcwaliswe igama lakho.” (Mateyu 6:9) Kodwa naye uYesu wenza konke awayenokukwenza ukuze abaphulaphuli bakhe babe nokungcwalisa igama likaYise. Ngokukwanjalo, uYesu akazange aphelele nje ekuthandazeni athi: “Bawo, lizukise igama lakho.” (Yohane 12:28) Wenza konke awayenokukwenza ukuze azukise igama likaYise nokuze enze abanye ukuba benjenjalo.—Luka 5:23-26; 17:12-15; Yohane 17:4.
11 Ebona ukuba abantu babenentswelo enkulu yokomoya, uYesu wathi kubafundi bakhe: “Ukuvuna okunene kuninzi, kodwa bona abasebenzi bambalwa. Khungani ngoko eNkosini yokuvuna [uYehova uThixo], ikhuphe abasebenzi, baye ekuvuneni kwayo.” (Mateyu 9:37, 38) Ngaba uYesu waziyeka izinto zaba lolo hlobo? Nakanye! Kanye emva koko, wathuma abapostile bakhe abali-12 bengababini ukuba babe kuhambo lokushumayela, okanye ‘lokuvuna.’ Kamva, uYesu wathuma abashumayeli abangama-70 ukuba benze kwaloo msebenzi mnye.—Mateyu 10:1-10; Luka 10:1-9.
Ukusebenzisa Umgaqo
12. Umsebenzi unokuthanani nemithandazo yethu yokuba uThixo asiphe isonka sethu semihla ngemihla?
12 Ngokucacileyo, uYehova uThixo ulindele ukuba sibe ngabazingisayo, senze izinto ngokuvisisana nemithandazo yethu, ngaloo ndlela singqina ukunyaniseka kwethu. UYesu wasixelela ukuba sithandaze sithi: “Siphe namhla isonka sethu semihla ngemihla.” (Mateyu 6:11) Ngoko ke, ngokufanelekileyo bonke abalandeli bakhe bacela oko kuThixo. Kodwa ngaba silindele ukuba uBawo wethu wasezulwini awuphendule loo mthandazo kungekho nto thina siyenzayo ngawo? Akunjalo. Kungenxa yoko le nto sifunda oku: “Umphefumlo wevila uyanqwena,”—mhlawumbi kwanangokuthandaza—“ungazuzi.” (IMizekeliso 13:4) Umpostile uPawulos wabethelela ingongoma efanayo kweyesi-2 yabaseTesalonika 3:10, esithi: “Ukuba umntu akathandi kusebenza, makangadli nokudla.” Ukuthandazela isonka sethu semihla ngemihla kumele kuphelekwe kukulungela ukusebenza. Okubangel’ umdla kukuba, ngobulumko uPawulos wathi abo ‘babengathandi kusebenza’ babengafanele badle. Bambi abathanda ukusebenza basenokungaqeshwa, banokugula, okanye banokuba badala gqitha ukuba bangasebenza. Bayafuna ukusebenza, kodwa oku kungaphezu kweemeko zabo. Ngenxa yoko, banokusithandazela ngokufanelekileyo isonka sabo semihla ngemihla yaye bathembe ukuba baya kusifumana.
13. Ukuze uYehova ayiphendule imithandazo yethu yokucela umoya wakhe oyingcwele, simele senze ntoni?
13 UYesu wakwasiluleka ukuba sicele kuBawo wakhe wasemazulwini umoya Wakhe oyingcwele. Njengokuba uYesu esiqinisekisa, uThixo ukulungele ngakumbi ukusinika umoya oyingcwele kunokuba abazali basemhlabeni bebanika izinto ezilungileyo abantwana babo. (Luka 11:13) Kodwa ngaba sinokulindela ukuba uYehova uThixo asinike umoya wakhe oyingcwele ngokungummangaliso, kungekho mgudu siwenzayo? Nakanye! Simele senze konke esinako ukuze siwufumane umoya oyingcwele. Ukongezelela ekuwuthandazeleni, kufuneka sizondle ngenkuthalo ngeLizwi likaThixo. Ngoba? Ngenxa yokuba uYehova uThixo akanikeli umoya wakhe oyingcwele ungahambisani neLizwi lakhe, yaye asinakuba nethemba lokufumana umoya oyingcwele ukuba asilinanzi ijelo lasemhlabeni uYehova alisebenzisayo namhlanje, “umkhonzi othembekileyo noqondayo,” omelwe liQumrhu Elilawulayo lamaNgqina kaYehova. Ngaphandle koncedo oluvela kulo “mkhonzi,” besingayi kuyiqonda intsingiselo epheleleyo yoko sikufundayo singenakuyazi nendlela yokukusebenzisa oko sikufundayo.—Mateyu 24:45-47.
14, 15. (a) Ukuze uYehova ayiphendule imithandazo yethu yokucela ubulumko, simele sibe nentsebenziswano njani? (b) Oku kuboniswa njani ngumzekelo kaKumkani uSolomon?
14 Umgaqo wokuba imithandazo kufuneka ibe nemisebenzi ukwasebenza nakula mazwi omfundi uYakobi, ongumntakwabo Yesu ngonina athi: “Ukuba ke ubani kuni uswele ubulumko, makacele kuThixo, onika bonke engenakumbi, engangcikivi; wobunikwa.” (Yakobi 1:5; Mateyu 13:55) Kodwa ngaba uThixo usinika obu bulumko ngommangaliso othile? Akunjalo. Okokuqala, simele sibe nesimo sengqondo esifanelekileyo, njengokuba sifunda oku: “Abafundise abalulamileyo indlela yakhe.” (INdumiso 25:9) Ibe uThixo ubafundisa njani “abalulamileyo”? Ubafundisa ngeLizwi lakhe. Kwakhona, simele senze umgudu wokuliqonda nokulisebenzisa, njengokuba kuboniswe kwiMizekeliso 2:1-6 ethi: “Nyana wam, ukuba uthe wazamkela iintetho zam, wayiqwebela kuwe imithetho yam, ukuze uyibazele ubulumko indlebe yakho, uyithobele ukuqonda intliziyo yakho; ewe, ukuba uthe wayibiza ingqondo, walisa ekuqondeni ilizwi lakho, ukuba uthe wabufuna njengesilivere, . . . uya kwandula ukukuqonda ukoyika uYehova, ukufumane ukumazi uThixo, ngokuba uYehova upha ubulumko.”
15 Xa uKumkani uSolomon wathandazela ubulumko waza uThixo ngokungummangaliso wawuphendula umthandazo wakhe, ngaba umgaqo wokuba imithandazo kufuneka ibe nemisebenzi wakwasebenza nalapho? Ewe, wasebenza, kuba njengokumkani wakwaSirayeli, uSolomon kwafuneka ebhale umbhalo wakhe woMthetho, afunde kuwo imihla ngemihla, aze awusebenzise kubomi bakhe. Kodwa xa uSolomon engazange ahambisane nemiyalelo yawo, njengokuzandisela abafazi namahashe, imisebenzi yakhe yayingasavisisani nemithandazo yakhe. Ngenxa yoko, uSolomon waba ngumwexuki waza wafa ‘esisidenge.’—INdumiso 14:1; Duteronomi 17:16-20; 1 Kumkani 10:26; 11:3, 4, 11.
16. Nguwuphi umzekeliso obonisa ukuba imithandazo yethu yokoyisa ubuthathaka benyama imele iphelekwe yimisebenzi?
16 Umgaqo wokuba imisebenzi imele ipheleke imithandazo ukwasebenza naxa sicela uncedo lukaThixo ukuze soyise umkhwa othile wokuzingca owendele nzulu. Ngaloo ndlela udade onguvulindlela wavuma ukuba wayekhotyokiswe kukubukela amabali achukumis’ iimvakalelo akumabonwakude aqhutywa ngokweziqendu, ewabukela ukususela kweye-11:00 a.m kuse kweye-3:30 p.m. yonke imihla. Efunde kwintetho eyanikelwa kwindibano yesithili indlela eziyingozi ngayo ezi nkqubo zokuziphatha okubi, lo mcimbi wawusa kuYehova ngomthandazo. Kodwa kwathabath’ ixesha ukuba awoyise lo mkhwa. Kwakutheni? Kungenxa yokuba, njengoko watshoyo: ‘Ndandithandazela ukuba ndiwoyise lo mkhwa ndize ke ndiphinde ndiwabukele la mabali. Ngoko ndagqiba kwelokuba ndibe kwinkonzo yasentsimini imini yonke ukuze ndingalingeki. Ekugqibeleni ndafikelela kwinqanaba lokuba ndimcime umabonwakude ekuseni ndize ndingawuvuleli imini yonke.’ Ewe, ukongezelela ekuthandazeleni ukoyisa ubuthathaka bakhe, kwafuneka ukuba akusebenzele ukuboyisa.
Umthandazo Nokunikela Kwethu Ubungqina
17-19. (a) Ziziphi izibakala ezibonisa ukuba amaNgqina kaYehova ebesenza izinto ngokuvisisana nemithandazo yawo? (b) Nguwuphi umzekelo womnye umntu obethelela ingongoma efanayo?
17 Umgaqo wokuba imithandazo kufuneka ibe nemisebenzi uyinyaniso ngakumbi kumsebenzi wokushumayela uBukumkani. Ngaloo ndlela, onke amaNgqina kaYehova akathandazeli nje kuphela ukuba kwande abasebenzi abangabavuni kodwa akwazibhokoxela kulo msebenzi. Ngenxa yoko, aye abona ulwando olumangalisayo emazweni amaninzi. Ukukhankanya nje umzekelo omnye: Ngowe-1930 kwakukho iNgqina likaYehova elinye kuphela elalishumayela eChile. Namhlanje, elo Ngqina alibanga liwaka nje kuphela kodwa libe malunga nama-30 000. (Isaya 60:22) Ngaba oku kwabangelwa nje yimithandazo? Akunjalo, kwakukwabandakanyeke nemisebenzi. Ewe, ngowe-1986 kuphela, amaNgqina kaYehova eChile achitha iiyure ezingaphezu kwe-6 492 000 kumsebenzi wokushumayela!
18 Oku kukwanjalo naxa umsebenzi wokushumayela ubhangisiwe. AmaNgqina akathandazeli nje kuphela ulwando kodwa akwenza izinto ngokufihlakeleyo yaye ayaqhubeka eshumayela. Ngoko ke, phezu kwayo nje inkcaso yabasemagunyeni, ulwando luyaqhubeka kula mazwe. Ngaloo ndlela, kumazwe angama-33 apho amaNgqina kaYehova adibana nenkcaso enjalo yabasemagunyeni, ebudeni bonyaka wenkonzo we-1986 achitha iiyure ezingaphezu kwama-32 600 000 kumsebenzi wawo wokushumayela aza avuyela ulwando lwe-4,6 ekhulwini!
19 Kambe ke, umgaqo wokuba imithandazo kufuneka ibe nemisebenzi ukwasebenza nakubantu ngabanye. Sinokuthandaza kuYehova ukuze sifumane isifundo seBhayibhile sekhaya kodwa sisenokuba asenzi konke esinokukwenza ukuze sisifumane. Oku kwakungamava omnye uvulindlela. Enesifundo seBhayibhile esinye kuphela, wathandazela ukuba abenezingakumbi. Ngaba wayeka nje ngolo hlobo? Hayi, kodwa wabuqwalasela ngenyameko ubulungiseleli bakhe waza wafumanisa ukuba kumabuyelo akhe wayengawukhankanyi umbandela wokuba nesifundo seBhayibhile sekhaya. Esebenzela kule nkalo, kungekudala waba nezifundo zeBhayibhile ezibini ezingakumbi.
20. Unokushwankathelwa njani umgaqo wokuba imithandazo kufuneka ibe nemisebenzi?
20 Kunokunikelwa imizekelo emininzi ngakumbi yokungqina ukuba imithandazo kufuneka ibe nemisebenzi. Ngokomzekelo, kukho leyo yokuba nolwalamano lobuqu entsatsheni okanye ebandleni. Kodwa imizekelo eyandulelayo ifanele ibe yanele ukuyenza icace ngokupheleleyo into yokuba imithandazo kufuneka ibe nemisebenzi. Oku kusengqiqweni ngokonakona, kuba asinakulindela ukuba uYehova uThixo aziqwalasele ngenkoliseko izicelo zethu ukuba siyamona ngehambo yethu. Kwakhona simele senze konke esinokukwenza ngokuvisisana nemithandazo yethu ukuba silindele uYehova ukuba asenzele oko singenakuzenzela thina. Ngokwenyaniso, imigaqo kaYehova yeyobulumko yaye isesikweni. Isengqiqweni, yaye ukwenza izinto ngokuvisisana nayo kokokuba kungenelwe thina.
Uyakhumbula Na?
◻ Yiyiphi imfuneko emayela nomthandazo eyathi yasingelwa phantsi ngabantu abaninzi kuSirayeli wamandulo?
◻ Kutheni kungenakuba uThixo akakho ngqiqweni ekufuneni ukuba sisebenze size sithandazele oko sikunqwenelayo?
◻ Yiyiphi imizekelo yamandulo ebonisa ukuba abakhonzi bakaYehova basebenzela koko babekuthandazela?
◻ Ukuze uThixo ayiphendule imithandazo yethu yokucela umoya wakhe oyingcwele nobulumko, simele senze ntoni?
◻ Umgaqo wokuba imithandazo kufuneka ibe nemisebenzi usebenza njani kubulungiseleli bethu basentsimini?
[Umfanekiso okwiphepha 17]
UYesu wabongoza abafundi bakhe ukuba bathandazele abasebenzi abangabavuni abangakumbi. Kodwa wakwabathumela kumsebenzi wokushumayeu okanye ‘wokuvuna’
[Umfanekiso okwiphepha 18]
Ngaba uyaluthandazela uncedo lokuba ukwazi ukulawula ukubukela kwakho umabonwakude? Ngoko wusebenzise umgaqo wokuba imithandazo kufuneka ibe nemisebenzi ngokumcima umabonwakude wakho