Iimbalasane ZeBhayibhile INtshumayeli 1:1–12:14

“Yoyika UThixo, Ugcine Imithetho Yakhe”

Kule mihla nakwesi sizukulwana, ukoyika nokuthobela uThixo, naphantsi kwezona meko zilungileyo, kugqalwa njengento engeloncedo. Kodwa incwadi yeNtshumayeli (ngesiHebhere, Qo·heʹleth, intshumayeli), eyabhalwa kwiminyaka enokuba ngama-3 000 nguKumkani uSolomon (1:1), ichaza ukuba lilize kwemizabalazo yomntu etyeshela injongo kaThixo.

Okwenza le ncwadi ibe nomtsalane kukugubungela kwayo ngokubanzi imibandela ethi ixutyushwe ngumbhali—ubulumko nolawulo lomntu, ubutyebi bezinto eziphathekayo, neziyolo, unqulo olusekelwe kwizithethe nezinye izinto. Zonke ezi zinto zingamampunge, kuba zezokwexeshana. Kwelinye icala, ukucamngca ngazo kubangela ingqondo yomntu ifikelele kwisigqibo esinye esisesi: “Yoyika uThixo, ugcine imithetho yakhe; ngokuba indawo leyo yimfanelo yoluntu lonke.”—INtshumayeli 12:13.

“Yonke Into Ingamampunge!”

Khawufunde isahluko. Yonke imigudu yomntu xa ithelekiswa nemijikelo yendalo engenasiphelo, iyedlula yaye yeyokwexeshana (1:4-7). Kwanezinto ezinkulu ezenziwa yintshumayeli kumele ukuba zadluliselwa komnye umntu mhlawumbi ziphelelwe lixabiso (2:18, 19). Igama lesiHebhere eliguqulelwe ngokuthi “amampunge,” lithetha “umphunga” okanye “umoya.”

◆ 1:9​—Kungayiphi indlela ekuthi kungabikho “nto intsha phantsi kwelanga”?

Kwimijikelo yendalo yentlalo yamihla le elithi ilanga likhanyise kuyo akukho nto intsha konke konke. Kwaneemveliso ‘ezintsha’ ubukhulu becala zikho ngenxa yokusetyenziswa kwemigaqo uYehova awayesele eyisebenzile ekwenzeni indalo. Kodwa “phantsi kwelanga” uYehova uye wavelisa izinto ezintsha zokomoya ezichaphazela uluntu.—Bona IMboniselo, kaMatshi 1, 1987, iphepha 27-9.

◆ 2:2​—Ngaba kuphosakele ukuzonwabisa?

Hayi, akuphosakele. Ukuhleka, okanye ukuzonwabisa, kusenokunceda okwexeshana ekuphazamiseni ingqondo kabani ingacingi ngeengxaki, kodwa ezo ngxaki azipheli. Ngoko ukuzama ukufumana ulonwabo lokwenene ngokwenza umbhiyozo ‘kukugeza’; akunangqiqo. Ngokufanayo, ‘ukuba ngonovuyo’ akuzicombululi iingxaki zobomi. Ulonwabo nje neziyolo ngaloo ndlela zahlukile kulonwabo olubangelwa yintsikelelo kaYehova kumsebenzi kabani.​—2:24

Esikufundayo Koku: Sifanele sithobele isiluleko sikaSolomon size singasukeli ubutyebi nokuzonwabisa njengezona zinto ziphambili ebomini. Kunoko, sifanele sibe ‘ngabalungileyo phambi koYehova’ ngokumthobela. Siya kwandula ke sinandiphe intsikelelo yakhe ‘yobulumko, nokwazi novuyo.’​—2:26 .

Ixesha Lako Konke

Funda isahluko. USolomon wayengabalaselisi imbono yokuba izihlo ezibi zifanele zibekho ebomini (3:1-9). Kunoko, wayebonisa ukuba umntu akanakusuka nje aguqule oko uThixo akucebileyo ukuba kwenzeke (3:14). Kule nkalo, abantu abahlukanga kwizilwanyana (3:19-21). Ngoko isimo sengqondo (4:9-12)sokuncedisana sinomvuzo ngakumbi kunomoya wokhuphiswano(4:4).

◆ 3:11​—UThixo uye wazenza ‘zantle ngexesha lazo’ njani izinto?

Igama elithi “zantle” likwanentsingiselo “yokulungileyo, okufanelekileyo, okuhle.” Ngexesha elililo, kuthi kutyhilwe indawo efanelekileyo othi kuyo umsebenzi ngamnye kaThixo uyifanele kakuhle injongo yakhe. UThixo uye walwenzela izinto ezininzi ‘ezintle’ uluntu. Ngokomzekelo, uluntu walunika isiqalo esihle e-Eden. Waxela ngenxa engaphambili ngokuza kweMbewu yosindlso xa umntu wawela esonweni. Ngexesha elifanelekileyo, uThixo wayithumela loo Mbewu. Ibe, ‘okuhle’ kuzo zonke ezo zinto kukuba, loo Mbewu uYehova wayenza yanguKumkani woBukumkanl Bakhe.

◆ 4:6​—Ngaba uSolomon wayekhuthaza ubuvila?

Hayi. Kodwa uSolomon waphawula ukuba umsebenzi onzima nohambelo phambili ngenxa yokuba kufunwa inzuzo kudla ngokukhokelela kukhuphiswano nakusukuzwano(4:4). Nako oku, kunokubangela iingxaki kwanokufa ngaphambi kwexesha. (1 Timoti 6:9, 10) Ngoko, unokuba nayiphi imbono elungeleleneyo? Mayikwanelise inzuzo encinane oyifumanayo ehamba noxolo, kunokuba ufumane inzuzo ephindwe kabini ehamba nokubulaleka nokucinezeleka.

Esikufundayo Koku: Ngoku kulixesha lokuba sifune tanci uBukumkani bukaThixo kunezinto zethu zamabhongo (3:1). Sifanele sisebenzisane namaKristu angoowethu singazahluli (4:9-12). Ngaloo ndlela, sinokufumana uncedo nokhuthazo olufunekayo phezu kwawo nje amanzithinzithi nenkcaso.

Unqulo Oluyinyaniso Luyanelisa

Funda isahluko. Ekubeni uYehova engonamandla onke, ulwalamano lwethu naye simele silujonge nzulu, singenzi ngobudenge simlindela ukuba amkele “imibingelelo” esiyenzayo (5:1, 2). Umntu owoyika uThixo ufumana ulwaneliseko ngokusebenzisa ubutyebi anabo, kodwa lowo ubufunela ukubugcina akonwabi.—Thelekisa esesi-5:18-20 with 6:2, nesesi 3.

◆ 5:2​—Eli cebiso lisebenza njani?

Sifanele sikuphalazele kuThixo konke oko kusezintliziyweni zethu, kodwa sifanele sizilinde ekusebenziseni amazwi okungxama, angenantsingiselo ngenxa yobukhulu nobungangamsha anabo. (INdumiso 62:8) Kunokuba senze umlembelele wento engavakaliyo, sifanele sisebenzise amazwi alula aphuma entliziyweni. (Mateyu 6:7) Esebenzisa kuphela nje amazwi amahlanu esiHebhere, uMoses wabongoza ngenxa kaMiriyam ibe wafumana impendulo entle.—Numeri 12:13.

◆ 6:9​—Kuyintoni ‘ukuhambahamba komphefumlo’?

Apha igama elithi “umphefumlo” linentsingiselo ‘yomnqweno womphefumlo.’ Ngoko eli gama libhekisela kuphando olungenasiphelo ukuze kwaneliswe iminqweno engenakuze yaneliswe. Oku kwahlukile ‘ekuboneni ngamehlo,’ oko kukuthi, ukubona oko kusenzeka. Ngaloo ndlela, ekubeni sisazi ukuba buBukumkani bukaThixo kuphela obunokuzisa inguqulelo yokwenene, sifanele saneliseke size singavumeli iminqweno engenakwenzeka okanye esingenakuyifumana ukuba isibandeze uxolo.

Esikufundayo Koku: Kwindawo yethu yonqulo, simele siziphathe ngendlela enesidima esifanelekileyo yaye sifanele sibe ngabaphulaphula ngenyameko (5:1). Sikwamele sibe ngabakhawulezayo ukuphumeza iimfanelo zethu phambi koYehova. Ukuba sitshatile, ezi mfanelo ziquka ukuzalisekisa isifungo sethu somtshato.​—5:4.

Amazwi Obulumko

Funda isahluko. Intshumayeli iqwalasela umphumo obuhlungu oziswa kukufa (7:1-4) nokubaluleka kobulumko,(7:11, 12, 16-19); ikwalumkisa nangomfazi ongcolileyo (7:26). Kunikelwa icebiso ngokuphathelele nezinto ezinjengokwenza ngobulumko kwizinto eziyalelwe ngabalawuli ndawonye (8:2-4) nokungacaphuki xa siphathwa ngokungekho sikweni.​—8:11-14.

◆ 7:28​—Ngaba la mazwi abasingela phantsi abasetyhini?

Kubonakala ukuba umlinganiselo wokuziphatha owawesamele wawuphantsi kakhulu. Ngaloo ndlela, uSolomon wayethetha ngokunqaba kwamadoda okanye kwabafazi abangamalungisa ngelo xesha. Phakathi kwabantu abaliwaka, kwakungenkankulu ukuba ufumane indoda enye elilungisa, kungasathethwa ke ngokufumana owasetyhini onjalo. Phofu ke, iBhayibhile ithetha ‘ngenkazana enesidima’ ‘nangomfazi onesidima.’ (Rute 3:11; IMizekeliso 31:10) Le ndinyana isekwanokuba yeyesiprofeto, kuba akuzange nakanye kubekho umfazi owamthobela ngokugqibeleleyo uYehova, ngoxa kwakhe kwakho indoda enjalo—enguYesu Kristu.

◆8:8​—Yayithetha ngantoni apha intshumayeli?

Yayithetha ngokufa. Akukho mntu unokuthintela amandla obomi ukuba angemki kwiiseli zakhe ukuze ukufa akumisele olunye usuku. Kwimfazwe eliwa notshaba Iwethu oluqhelekileyo ukufa, akukho mntu unokuzikhulula okanye amisele enye into endaweni yakhe. (INdumiso 49:7-9) Kwanabantu abangendawo abanamacebo obuqhinga abanakusinda ekufeni.

Esikufundayo Koku: Nangona ukufumana ubutyebi kuye kwalusukelo ebomini kubantu abaninzi, bubulumko bokuhlonela uThixo kuphela obunokukhokelela kubomi obungunaphakade. (7:12; Luka 12:15) Ukulangazelela ‘iimini ezimnandi zamandulo’ akusayi kusilungiselela izinto (7:10). Kunoko, izinto ‘ziya kusilungela’ kuphela ukuba siyazingisa ekoyikeni uThixo​—8:5, 12.

Izinto Ezimele Zenzeke Ebomini

Funda isahluko. Ubomi buxabisekile, ibe uThixo ufuna sibunandiphe (9:4, 7). Ekubeni singenakukulawula oko kunokusehlela ebomini (9:11, 12) kulunge ngakumbi ukuthobela amazwi kaThixo obulumko nakubeni inkoliso yabantu ingakuqondi oko (9:17). Ngenxa yeemeko ezithandabuzekayo ebomini, sifanele siyilinde intliziyo yethu (10:2), sibonakalise ubulumko kuko konke esikwenzayo, size senze ngobulumko obusebenzisekayo.​—10:8-10.

◆ 9:1​—Imisebenzi yamalungisa isesandleni sikaThixo njani?

Nangona intlekele isehla kwizilumko nakumalungisa, oku kwenzeka kuphela ngokuvunyelwa nguThixo, ibe akasayi kuwashiya. ‘Ngesandla’ sikaThixo okanye ngamandla awasebenzisayo, amalungisa anokuhlangulwa kuvavanyo okanye omelezwe ukuba alunyamezele. (1 Korinte 10:13) Ukukhumbula le nkalo kunokuba yintuthuzelo kumkhonzi kaYehova xa kuvela iinzima.

◆ 10:2—Intliziyo ikwicala langasekunene njani?

‘Icala langasekunene’ ngokufuthi liphawula indawo yobabalo. (Mateyu 25:33) Ngoko isibakala sokuba intliziyo yesilumko ‘ikwicala langasekunene’ sibonisa ukuba imshukumisela ukuba sihambe ngekhondo elilungileyo nelokubabalwa. Kodwa umntu osisidenge akananto imshukumisela kokulungileyo ibe wenza ngobudenge nangokungafanelekanga. Ukuba ‘ngasekhohlo’ kwentliziyo yakhe kubonisa ukuba ushukunyiseIwa ukulandela ikhondo eliphosakeleyo.

Esikufundayo Koku: Ekubeni ukufa ngequbuliso kunokwehlela nabani na kuthi (9:12), ubomi bethu simele sibusebenzisele inkonzo kaYehova hleze ukufa kunqumamise nantoni na esiyenzayo (9:10), Kukwafuneka sibe nobuchule kumsebenzi esiwenzayo kuba ukuba liathalala, nakwizinto ezingenamsebenzi ezinjengokumba umngxuma okanye ukucanda iinkuni, kunokubangela ingozi kuthi nakwabanye​—10:8, 9..

Ulutsha Nenjongo Yobomi

Funda isahluko. Sonke sifanele siziqhelise ukuba nobubele size sithabathe inyathelo lokuzimisela (11:1-6). Ulutsha olulisebenzisa kakuhle ixesha namandla alo ekukhonzeni uMdali aluyi kuzisola kwiminyaka yamva yobomi (11:9, 10). Kunoko, luya kuba nolwaneliseko lokukholisa uThixo ngaphambi kokuba luphulukane nempilo namandla alo.—​—12:1-7; bona IMboniselo, [yesiNgesi] kaDisemba 15, 1977, iphepha 746.

◆ 11:1​—Kusingisele enini ‘ukuphosa isonka’?

Isonka sisixhaso sobomi. Ukusiphosa ‘emanzini’ kukuncama into exabisekileyo. Kanti, “wosifumana [kwakhona, NW],” kuba ngokungalindelekanga onobubele uya kubuyiselwa kwakhona.—Luka 6:38.

◆ 12:12​—Kutheni kuthethwa ngokungakhathali ngolo hlobo ngeencwadi?

Xa ithelekiswa neLizwi likaYehova, imiqulu yehlabathi ‘engenasiphelo’ iqulethe nje iingcamango zomntu. Okuninzi kule ngcamango kubonakalisa oko kucingwa nguSathana. (2 Korinte 4:4) Ngokuvisisana noku, “ukuphikela” kwiincwadi zehlabathi ezinjalo akuvelisi nto ixabisekileyo nehlala ihleli.

Esikufundayo Koku: NjengoSolomon, sifanele sicamngce ngoko kuthethwa liLizwi likaThixo ngobomi. Siya kwandula ke somelezeke isigqibo sethu sokoyika nesokuthobela uThixo. Ukwazi ukuba uYehova usixhalabele ngakumbi (12:13, 14) kusenza sisondele ngakumbi kuye.

Ngoko ke, ngamana ‘singamoyika uThixo oyinyaniso size sigcine imithetho yakhe.’ Oku kuyimfanelo yethu ibe kuya kusizisela ulonwabo oluhlala luhleli.