Imibuzo Evela Kubafundi

◼ Yintoni le “mbewu yakwaThixo” kuthethwa ngayo kuMalaki 2:15?

Ngokuyinxenye, le ndinyana intsonkothileyo ifundeka ngolu hlobo: “Akubangakho namnye ukwenzayo oku, obenamasalela okomoya. Ke wenza ntoni na omnye lo? Wafuna imbewu yakwaThixo.” Ngokucacileyo “imbewu” luhlanga loSirayeli wamandulo, lowo ngexesha lokubhalwa kwale ndinyana wayonakele ngenxa yonqulo olungcolileyo.

UMalaki waprofeta ebudeni bexesha lokonakala kolu hlanga ngokuziphatha. Wambi amadoda akwaSirayeli ayethabatha kungekuphela nje ‘iintombi zothixo wolunye uhlanga njengabatshakazi’ kodwa kwakhona ayeqhawula umtshato nabafazi bawo bangaphambili abangamaYuda, ‘abafazi bobutsha bawo,’ ukuze mhlawumbi azeke abafazana abaselula abangabahedeni. Kanti, asingawo onke amadoda akwaSirayeli awathi enza eli “sikizi.” (Malaki 2:11, 13, 14; Duteronomi 7:3, 4) Ngokucacileyo ebhekisela kubantu abakwalayo ukuqhawula iminqophiso yabo yomtshato nabanquli abangoowabo bakaYehova, uMalaki wabhala oku: “Akubangakho namnye ukwenzayo oku, obenamasalela omoya.”

‘Umoya’ ngumoya oyingcwele kaThixo, awayewuthululele olo hlanga. Phofu ke, amaSirayeli angathobeliyo ayewuthintela, yaye ngenxa yoko ewenza buhlungu, loo moya. (Isaya 63:10; IZenzo 7:51-53; thelekisa amaEfese 4:30.) Wambi amaYuda angamanye ayenyanisekile kwimithetho kaThixo, yaye ngentobelo yawo ayekugcinile oko ‘kungamasalela omoya.’ Aba banquli bathembekileyo abazange bafune uyolo lwabo lokuzingca. Ethetha ngomntu onjalo, uMalaki wabhala oku: “Ke wenza ntoni na omnye lowo? Wafuna imbewu yakwaThixo.” Le “mbewu” yayiluhlanga lwakwaSirayeli wamandulo, uMalaki awathi ‘lwadalwa nguThixo.’ Lwabakho xa uYehova wangenisa amaSirayeli kumnqophiso wakhe kwiNtaba yaseSinayi, ewenza “inqobo” kuye “nohlanga olungcwele.” “Imbewu” yokwenyaniso ka-Abraham eyayiya kusikelela abantu bomhlaba wonke yayiza kuza ngolu hlanga.—Malaki 2:10; Eksodus 19:5, 6; Genesis 22:18.

Phofu ke, amaSirayeli kwakufuneka ahale ecocekile ngokonqulo ngokungatshati nabantu beentlanga ezazingamkhonzi uYehova. Ukungahloneli Thixo kwabantu abanjalo kwakuya kuwonakalisa, njengokuba kunokubonwa kwimeko eyayikho ngexesha likaEzra. Ngelo xesha amaSirayeli azizekela ‘wona noonyana bawo abafazi ezintombini [zeentlanga ezazibangqongile] yaza yazixuba imbewu engcwele nezizwe zala mazwe.’ (Ezra 9:2) Obu “bubi bukhulu” bufanayo benzeka ngemihla kaNehemiya, owayekho ngemihla kaMalaki. Amadoda akwaYuda awayenyanisekile kuThixo abubona ubungozi obucacileyo bokomoya kuwo nakubantwana abazelwe ngomanyano olunjalo. Kwakukho ingozi yokutyekiswa kunqulo lukaYehova ngumfazi owayengazinikelanga Kuye. UNehemiya wade wabalisa nokuba phakathi kwaloo maYuda ayetshate abo bafazi, ‘akukho namnye kubantwana bawo owayekwazi ukuthetha isiYuda.’—Nehemiya 13:23-27.

AmaYuda awayenganyanisekanga ayefuna nje ukuziyolisa wona engawusi so umphumo oyingozi ongokonqulo owawungakho kuhlanga lwawo, ‘oluyimbewu yakwaThixo.’ Ayimangalisi into yokuba uMalaki abaluleke ngokuthi: “Wugcineni ngoko umoya wenu, ungamnginizeli umfazi wobutsha bakho.” (Malaki 2:15) AmaYuda athembekileyo awugcina umoya wawo, okanye isimo sawo sengqondo, khon’ ukuze ahlale enyanisekile kubafazi bawo abangamaYuda. La madoda ayebuxabisa kunene ubunyulu bonqulo ‘bohlanga lwawo olungcwele.’ Ayenqwenela ukuba abantwana bawo bafunde iLizwi likaThixo baze bakhule ekuthandeni kwabo uYehova, befak’ isandla ekomeleleni kohlanga ngokonqulo.

AmaKristu azahluleleyo namhlanje kufuneka abonakalise ukuwukhuthalela okufanayo umoya wawo, okanye isimo sawo sengqondo esesameleyo. Ukuba batshatile, kufuneka aba bantu bakuphephe ukuqhawula umtshato ngenkohliso namaqabane abo. Yaye umKristu ongatshatanga ufanele asithobele isiluleko sompostile uPawulos sokuba atshate “ngokwaseNkosini,” ezibophelela kwiqhina lomtshato kuphela nelinye ingqina likaYehova elizahluleleyo nelibhaptiziweyo.—1 Korinte 7:39.