Ubomi Nobulungiseleli BukaYesu
UYesu—‘Isonka Sokwenyaniso Esiphuma Ezulwini’
NGOKWENENE loo mhla wawungenakulibaleka ezimbalini. Ngokungummangaliso uYesu wayondle amawakawaka waza waphuncula ebantwini ababezama ukumenza ukumkani. Ngobo busuku wahamba ngeenyawo kulwandle lwaseGalili olwalungazolanga; wahlangula uPetros, owathi wazika xa wahamba emanzini awayelatyuza; waza wazolisa amaza ukuze asindise abafundi bakhe ekuqhekekeni kwenqanawa.
Ngosuku olulandelayo abantu ababondliwe ngokungummangaliso nguYesu kumntla-mpuma wolwandle lwaseGalili bamfumana kufuphi naseKapernahum. Ebakhalimela, uYesu uthi bebemfuna kuba belindele esinye isidlo sesisa. Uyababongoza esithi mabasebenze, bangasebenzeli ukudla okutshabalalayo, kodwa basebenzele ukudla okuhlala kukho ngonaphakade. Ke abantu bayambuza besithi: “Masenze ntoni na, ukuze sisebenze imisebenzi kaThixo?”
UYesu uchaza umsebenzi omnye oxabiseke gqitha. Ucacisa ngokuthi: “Umsebenzi kaThixo nguwo lo, ukuba nikholwe kuye othunyiweyo nguye.”
Noko ke, abantu ababonakalisi lukholo kuYesu, phezu kwayo nje yonke imimangaliso ayenzileyo. Kusuku olungaphambi kolo, ngokungummangaliso wondla amadoda angama-5 000, kwanabafazi nabantwana, ukanti ngoku, bengakholwa, babuza oku: “Wenza mqondiso mni na wena, ukuze sibone, sikholwe nguwe? Usebenza ntoni na? Oobawo bethu bona badla imana entlango, njengokuba kubhaliwe kwathiwa, Wabanika isonka siphuma ezulwini, ukuba badle sona.”
Ephendula isicelo sabo sokubona umqondiso, uYesu ucacisa uMthombo wamalungiselelo angummangaliso, esithi: “AsinguMoses oninike isonka esiphuma ezulwini; nguBawo oninika isonka esiphuma ezulwini, esiyinyaniso. Kuba isonka sikaThixo sesi sehlayo ezulwini, silinike ubomi ihlabathi.”
Abantu bathi, “Nkosi, sinike eso sonka ngamaxa onke.”
UYesu ucacisa ngokuthi: “Isonka sobomi esi ndim; lowo uzayo kum, akasayi kulamba; lowo ukholwayo kum, akasayi kunxanwa naphakade. Senditshilo kuni ukuthi, Nindibonile nokundibona, anikholwa noko. Konke andinikayo uBawo, kuya kuza kum; nozayo kum, andisayi kukha ndimlahlele phandle; ngokuba ndihle emazulwini, ndingaze kwenza ukuthanda kwam; ndize kwenza ukuthanda kwalowo wandithumayo. Kuko ke oku ukuthanda kowandithumayo, kukaBawo: ukuba konke awandinikayo, ndingalahli nento kuko, ndikuvuse ngomhla wokugqibela. Kuko ke oku ukuthanda kowandithumayo, ukuthi babe nobomi obungunaphakade bonke abambonayo uNyana, bakholwe kuye.”
Xa kulapha amaYuda aqalisa ukukrokrela uYesu kuba uthe, “Ndim isonka, esi sehlayo emazulwini.” Akukho nto bayibonayo engakumbi kuye kunokuba ngunyana wabazali abangabantu ibe ngenxa yoko bamchasa ngendlela awachaswa ngayo ngabantu baseNazarete abathi: “Lo asinguye na kanene uYesu, unyana kaYosefu, esimaziyo thina uyise nonina? Angathini na ke ngoko yena ukuthi, Ndihle emazulwini?”
UYesu uphendula ngelithi: “Musani ukukrokra ngaphakathi kwenu. Akukho namnye unako ukuza kum, engathanga uBawo owandithumayo amtsale; ndaye mna ndiya kumvusa ngomhla wokugqibela. Kubhaliwe ebaprofetini kwathiwa, Baye bonke beya kuba ngabafundiswa bakaThixo; bonke ngoko abathe beva kuBawo, bafunda kuye, bayeza kum. Kungekuba kukho bani ombonileyo uBawo,ingenguye ovela kuThixo;nguye yedwa ombonileyo uBawo. Inene, inene, ndithi kuni, Lowo ukhoIwayo kum unobomi obungunaphakade.”
Eqhubeka, uYesu uyaphinda athi: “Ndim isonka sobomi. Oyihlo bayidla imana leyo entlango, bafile noko. Isonka sona esihla emazulwini sesi, athi ubani akusidla, angafi. Ndim isonka esiphilileyo, esi sehlayo emazulwini. Ukuba ubani uthe wasidla esi sonka, wodla ubomi ngonaphakade.” Ewe, ngokuba nokholo kuYesu, lowo wathunywa nguThixo, abantu banokufumana ubomi obungunaphakade. Akukho mana, okanye nasiphi na esinye isonka esinjalo, esinokukubangela oko!
Ingxoxo engesonka esivela ezulwini kubonakala ukuba yaqalisa emva nje kokuba abantu befumene uYesu kufuphi naseKarpenahum. Kodwa yaqhubeka, ifikelela incopho kamva ngoxa uYesu wayefundisa kwindlu yesikhungu eKarpenahum. Yohane 6:26-51, 59; INdumiso 78:24; Isaya 54:13; Mateyu 13:55-57.
◆ Ziziphi iziganeko ezandulela ingxoxo kaYesu engesonka esivela ezulwini?
◆ Ngenxa yoko uYesu asandul’ ukukwenza, kutheni le nto ukucela kwabantu umqondiso kuyinto engafanelekanga kangaka?
◆ Kutheni le nto amaYuda ekukrokrela nje ukuthi kukaYesu usisonka sokwenyaniso esivela ezulwini?
◆ Ingxoxo engesonka esivela ezulwini iqhubeka phi?