Imibuzo Evela Kubafundi
◼ Kwakutheni aze uYesu athi iguquka labaFarisi ‘lalingumntwana wesihogo ngokuphindiweyo’ kunabaFarisi?
Ngokucacileyo, abeentlanga ababeguqukele kwihlelo labaFarisi lobuYuda babenokukhalinyelwa gqitha. Abanye babo kusenokuba ngaphambili babengamkelekanga kuThixo, kodwa bakuba ngabaFarisi, baba ngabangamkelekanga ngokuphindiweyo kuye, ngokuqinisekileyo belindelwe yintshabalalo eGehena.
Umfula wakwaHinom wawukumazantsi omzantsi-ntshona weendonga zaseYerusalem. Maxa wambi wawusetyenziselwa ukunqula izithixo nokwenza amadini ngabantu. (2 Kronike 28:1-3; 33:1-6; Yeremiya 32:35) Ngoko wathi waba yindawo ekulahlelwa kuyo inkunkuma, kuquka imizimba yezaphulimthetho ezazijongwa zizezingafanele kungcwatywa zinethemba lovuko.—Thelekisa uMateyu 5:22.
IThe New Bible Dictionary (eyahlelwa nguJ. D. Douglas, ngowe-1962) ithi ‘umfula wakwaHinom wawungaphandle kweYerusalem, apho abantwana babesenziwa amadini ngomlilo kuMoleki. Wathi waba ngumfuziselo wesiprofeto womgwebo yaye kamva wafuzisela umgwebo wokugqibela.’ UmJesuit uJohn L. Mckenzie, kwiDictionary of the Bible yakhe (yowe-1965), wongezelela oku: “Ngenxa yesi [sithethe sasisenziwa engcweleni sokwenza amadini ngabantu] uYeremiya wayiqalekisa le ndawo waza wakuxela kwangaphambili ukuba yayiya kuba yindawo yokubulala nokungcola (7:32; 19:6). Nakuba ungakhankanywa ngegama kuIsaya 66:24, lo mfula kubhekiselwa kuwo njengendawo apho izidumbu zabantu abafileyo abavukela uYehova ziya kulala khona . . . Phofu ke, kuncwadi loorabhi umlilo kanaphakade ngokuqinisekileyo asingomgwebo kanaphakade . . . [IGehena] yindawo apho kutshatyalaliswa khona umzimba nomphefumlo wabangendawo, nto leyo mhlawumbi enikela ingcamango yembubhiso (Mt 10:28).”
Xa sifunda iingxelo ezinjengeku; kuYohane 8:12-19, 31-41; 9:13-34; 11:45-53, sinokusiqonda isizathu sokuba uYesu athi abaFarisi, babefanelwe yimbubhiso, eyayifuziselwa yiGehena. Kuyinyaniso ukuba, bambi babesenokuguquka baze bamkeleke kuThixo, kodwa bona njengodidi lwabaFarisi babefanelwe ngumgwebo kanaphakade. UKristu wathi: “Yeha, nina babhali, baFarisi, bahanahanisindini! Ngokuba nijikajika ulwandle nomhlaba ukuze nenze nokuba mnye ongena ebuYudeni; nithi, xa athe wazuzeka, nimenze abe ngumntwana wesihogo ngokuphindiweyo kunani.”—Mateyu 23:15.
Kukangako ke ngabaFarisi ababengamaYuda, kodwa abo bathi baba ngamaguquka abaFarisi babenokuba ngabo njani ‘abantwana besihogo ngokuphindiweyo’ kunabaFarisi? La maguquka abaFarisi ayengengabo abeeNtlanga ababenovelwano kumaYuda okanye ayengengabo nabo babeguqukile baza baluswa. (Luka 7:2-10; Marko 7:24-30; IZenzo 8:26-34; 10:1, 2) UYesu wayengathethi ngabangeni ebuYudeni kodwa wayethetha ngabaguqukela ekuhanahaniseni kwabaFarisi. Yaba njani imeko yabo?
Abanye baba kusenokwenzeka ukuba ngaphambili babengaboni ababonakele gqitha okanye babengabanquli beedemon abanenzondelelo yempambano, ngaloo ndlela bengamkelekanga gqitha kuThixo. Mhlawumbi abanye babede bafanelwa yiGehena ngenxa yokuba ngandlel’ ithile babemonile umoya kaThixo. (Mateyu 12:32) Ukuba imeko yabo phambi koYehova yayingekafikeleli kwelo nqanaba, bathabatha inyathelo lokwenza okubi ngokugqithiseleyo. Baguquka ukuze balandele ikhondo eligabadeleyo labaFarisi. La maguquka azenza ngokwawo ukuba athi zwabha kwiimbono zesithethe zokuhanahanisa ezigabadeleyo ezathi zakutshitshisa nakuphi na ukuziphatha okuhle nenyaniso ekusenokuba abanye ababeguqukele ebuYudeni babeyizuzile. Ngokucacileyo, aba baguqukela kubuFarisi bathi baba ngabatsibe ilitye likaPhungela kunabefundisi babo ababegwetyiwe. Ngoko ukuba abaFarisi abangamaYuda ‘babengabantwana besihogo,’ la maguquka aba njalo ngakumbi okanye, njengoko uYesu wachazayo, aba njalo ngokuphindiweyo.
[Imaphu/Umfanekiso okwiphepha 31]
(Ukuze ufumane inkcazelo epheleleyo,jonga encwadini)
IMAPHU EBONISA IYERUSALEM YENKULUNGWANE YOKUQALA
UMMANDLA WETEMPILE
UMFULA WAKWAHINOM
(IGEHENA)
[Umfanekiso]
Inxalenye yoMfula iHinom namhlanje
[Inkcazelo]
Pictorial Archive (Near Eastern History) Est.